Month: December 2022

Монгол Улсын Засгийн газрын өнөөдрийн хуралдаанаар Засгийн газрын тусгай сангийн тухай хуульд заасан “Шинжлэх ухаан, технологийн сангаас тэтгэлэг олгох, сангийн хөрөнгийг зарцуулах, түүнд хяналт тавих журам”-ыг хэлэлцэн, баталлаа.

Цахим Хөгжил, Харилцаа Холбооны сайдын эрхлэх асуудлын хүрээнд Төрийн цахим үйлчилгээний зохицуулалтын газар байгуулах шийдвэрийг Засгийн газраас өнөөдөр гаргажээ.

Бизнесийн салбарын нэр хүнд, үнэ цэнийг тодорхойлж ирсэн Монгол Улсын оны онцлох аж ахуйн нэгжийг шалгаруулдаг “Entreprenuer 2022” Меркури цом гардуулах ёслол хүндэтгэлийн арга хэмжээ 25 дахь жилдээ зохион байгуулагдлаа. Энэ үеэр бизнесийн салбарт өндөр амжилт гаргаж, нийгэм, эдийн засгийн хөгжилд бодитой хувь нэмэр оруулж буй онцлох ААН, байгууллага, бизнес эрхлэгчдээс шилдэг ААН-үүдийг тодруулав.

25 дахь удаагийн уг арга хэмжээнд “Сүү” ХК оны ШИЛДЭГ АЖ АХУЙ НЭГЖ-ээр шалгарч, МӨНГӨН МЕРКУРИ гардан авлаа.

Энэхүү шагнал бол “Сүү” ХК-ийн 500 ажилтан, 2500 бэлтгэн нийлүүлэгч, 3000 гаруй харилцагч дэлгүүрүүд болон хөрөнгө оруулагч нарын хөдөлмөрийн үр шим юм хэмээн тус компанийн Гүйцэтгэх захирал М.Болод онцоллоо

2022 онд “Сүү” ХК нь ажилтан төвтэй үйл ажиллагаа явуулж, ЕСБХБ-наас тус компанийг хүний эрх, жендэрийн тэгш байдлыг хангасан байгууллага гэж тодорхойлон, Тогтвортой хөгжлийн жендэрийн шагналаар шагнасан юм.

Мөн “Сүү” ХК нь 2022 онд онд 19.7 тэрбум төгрөгийн хөрөнгө оруулалт хийж, үйлдвэрийн болон сүү хүлээн авах тоног төхөөрөмжүүдээ шинэчилж, есөн нэр төрлийн зайрмаг, милк шэйк, пробиотик таргийг зах зээлд шинээр худалдаанд гаргасан.

Түүнчлэн 2021 онд дөрвөн хоршоо байгуулсан бол энэ онд шинээр найман хоршоо байгуулж, нийт 12 хоршоотой болжээ. Хоршоожуулах аяны хүрээнд бэлтгэн нийлүүлэгч малчдадаа 800 гаруй сая төгрөгийн өртөг бүхий хивгийг үнэ төлбөргүй тараасан аж.

Дээрээс нь малчдаасаа нийт 21.2 сая литр сүү худалдан авч, 27.8 тэрбум төгрөгийн орлогыг малчдадаа бүрдүүлжээ. Тус дүнг өнгөрсөн оны мөн үетэй харьцуулбал 62 хувь хүртлээ өссөн амжилттай байна.

“Сүү” ХК-ийн тухайд

Монгол Улсын ууган үйлдвэр “Сүү” ХК нь 1958 онд нийслэлийн хүн амыг сүү, сүүн бүтээгдэхүүнээр хангах зорилгоор 30 тонн сүү боловсруулах хүчин чадалтайгаар анх байгуулагдаж байсан түүхтэй. Эдүгээ бид 500 гаруй ажилчинтай, хоногт 130-180 тонн сүү, сүүн бүтээгдэхүүн боловсруулах хүчин чадалтайгаар 70 гаруй нэр төрлийн бүтээгдэхүүн үйлдвэрлэн 4000 цэгт хүрч, зах зээлд нийлүүлж байна.

Бид Улаанбаатар хот орчим болон Төв, Дархан, Сэлэнгэ, Орхон, Хэнтий аймгуудын нийт 30 гаруй чиглэлийн 2500 гаруй малчид, фэрмерүүдээс жилийн дөрвөн улирал тасралтгүй сүүгээ цуглуулан авдаг. 2021 оноос малчдыг хоршоожуулах хөтөлбөр хэрэгжүүлж, өдгөө 12 малчны хоршоо байгууллаа. Ирэх 2023 онд 10-13 орчим хоршоог шинээр байгуулахаар төлөвлөсөн юм. Түүнчлэн 2015 онд “Макс Агро” эрчимжсэн мал аж ахуйн фэрмийг байгуулж, тус чиглэлээр салбартаа тэргүүлж байна.

Засгийн газрын өнөөдрийн хуралдаанаар дараах асуудлыг хэлэлцэн шийдвэрлэлээ.

Төмөр замын тээврийн тухай хуулийн шинэчилсэн найруулгын төслийг УИХ-д өргөн мэдүүлнэ

Төмөр замын тээврийн тухай хуулийн шинэчилсэн найруулгын төслийг хэлэлцэн дэмжээд УИХ-д өргөн мэдүүлэхээр тогтлоо. Төсөл батлагдсанаар төмөр замын тээвэрлэлттэй холбоотой зарим суурь харилцаа хуулийн хүрээнд илүү тодорхой зохицуулагдаж, тээвэрлэлтийн үйл ажиллагаанд оролцогчдын тэгш оролцоог хангаж, суурь бүтэц болон хөдлөх бүрэлдэхүүний ашиглалт, засвар үйлчилгээ сайжирч, хөрөнгө оруулалт, тээврийн үр ашгийг нэмэгдүүлэх боломж бүрдэнэ.

Төмөр замын тээврийн зориулалттай газрыг хуульчилснаар төмөр замын аюултай бүс, төмөр замын зурвас газар, хамгаалалтын бүс тодорхой болж төмөр замын аюулгүй байдлыг хангах нөхцөл бүрдэнэ. Төмөр замын суурь бүтэц, хөдлөх бүрэлдэхүүний өмчлөл, эзэмшил, ашиглалтын харилцаа тодорхой болж, суурь бүтцийн үйлчилгээ үзүүлэгч нь хуулийн хүрээнд тэгш эрхийн зарчимд үндэслэн үйлчилгээ үзүүлэх эрх зүйн орчин бүрдэнэ. Төмөр замын нийтийн зориулалттай зам, тусгай зориулалттай зам, салбар замын өмчлөл, эзэмшлийн асуудлыг зохицуулснаар төмөр замын тээвэрлэлтийн харилцааг зохицуулах боломжтой болно.

Төрийн цахим үйлчилгээний зохицуулалтын газар байгууллаа

Цахим хөгжил, харилцаа холбооны сайдын эрхлэх асуудлын хүрээнд Засгийн газрын хэрэгжүүлэгч агентлаг- Төрийн цахим үйлчилгээний зохицуулалтын газар байгуулна.

Аймаг, нийслэлд үйл ажиллагаа явуулж байгаа үйлчилгээний нэгдсэн төвүүдийн чиг үүрэгтэй төрийн цахим үйлчилгээний зохицуулалтын газрын чиг үүргийг давхардуулахгүй байх үүднээс төрийн үйлчилгээний нэгдсэн төвүүдийг удирдлага, зохион байгуулалт, сургалтаар хангаж, үйлчилгээний стандартын шаардлага мөрдүүлэн, нэгдсэн систем нэвтрүүлж ажиллахыг Цахим хөгжил, харилцаа холбооны сайдад даалгалаа. Аймаг тус бүрт холбогдох төрийн байгууллагын үйлчилгээг хариуцан ажиллаж байгаа таван албан хаагч, нийт 105 албан хаагчийг тус газарт шилжүүлэх юм. Төрийн цахим үйлчилгээний зохицуулалтын газар байгуулагдсанаар нийслэлийн зургаан үйлчилгээний нэгдсэн төв, нийслэл дэх 59 төрийн үйлчилгээний цэг, 21 аймгийн үйлчилгээний нэгдсэн төв, 309 сум суурин газар нийт 395 цэгээр дамжуулан аймаг, сумдад салбар нэгжгүй төрийн захиргааны байгууллагын болон бусад төрийн байгууллагын үйлчилгээг хүн, хуулийн этгээдэд хүртээмжтэй хүргэх үйл ажиллагааг удирдан зохион байгуулах, иргэн төвтэй нэг цонхны үйлчилгээ үзүүлэн төрийн үйлчилгээг түргэн, шуурхай хүргэх нөхцөл бүрдэх юм.

Товч мэдээ

· Шинжлэх ухаан, технологийн сангаас тэтгэлэг олгох, сангийн хөрөнгийг зарцуулах, түүнд хяналт тавих журмыг тус хуралдаанаар хэлэлцэн дэмжлээ.

· Хяналт шалгалтын нийтлэг журмыг баталж, журамд нийцүүлэн эрхэлсэн салбарын онцлогт нийцсэн хяналт шалгалт явуулахтай холбогдсон журам, заавар, маягт, аргачлал, хяналтын хуудсыг боловсруулан баталж, мөрдүүлэхийг хяналт шалгалт хэрэгжүүлэх эрх бүхий төрийн захиргааны төв байгууллага, төрийн захиргааны байгууллагад даалгалаа.

· Кибер аюулгүй байдлын үндэсний стратегийг баталж, тус стратегийг хэрэгжүүлэх арга хэмжээний төлөвлөгөөг боловсруулан, хэрэгжилтийг хангаж ажиллахыг холбогдох хүмүүст үүрэг болголоо.

Монгол улсын Шадар сайдын тушаалаар баталсан “Онцгой байдлын байгууллагын алба хаагчид онцгой гавьяа байгуулсан тохиолдолд мөнгөн урамшуулал олгодог билээ. Энэхүү журмын дагуу тав дахь жилдээ гамшиг, осол, аюулт үзэгдлийн бүс болон хүний гоц халдварт өвчний голомтод аврах, хор уршгийг арилган оролцсон алба хаагчдад тус бүрд 16 сая төгрөгийн мөнгөн урамшуулал олголоо.

Онцгой гавьяа байгуулсан алба хаагчид:

• Ахлагч Г.Жамьян нь Онцгой байдлын байгууллагад 13 дахь жилдээ үүрэг гүйцэтгэж ажиллах хугацаандаа 75 удаагийн дуудлагаар ажиллаж, 133 хүний амь насыг авран хамгаалжээ.
• Ахлагч Р.Энхтүвшин нь Онцгой байдлын байгууллагад 15 дахь жилдээ үүрэг гүйцэтгэж байна. Ажиллах хугацаандаа 1400 удаагийн томилгоот ээлжид 456 удаагийн гал түймэр, 32 удаагийн гамшиг, ослын голомтод ажиллаж, 34 хүний амь насыг авран хамгаалсан байна.
• Ахлах ахлагч Б.Күнтуган нь Онцгой байдлын байгууллагад 8 дахь жилдээ ажиллаж байна. Аврагч-гал сөнөөгчөөр ажиллах хугацаандаа 156 удаагийн томилгоот ээлжинд гарч 10 удаагийн ахуйн гал түймрийн дуудлагаар ажиллаж 1.2 тэрбум төгрөгийн өмч хөрөнгийг авран хамгаалжээ.

Онцгой байдлын байгууллага өнөөдөр 2022 оны ажлаа дүгнэж, үйл ажиллагааны тайлангийн хурлаа зохион байгууллаа. Он гарсаар улсын хэмжээнд бүртгэгдсэн 4129 удаагийн гамшиг, аюулт үзэгдэл, ослын дуудлагаар алба хаагчид үүрэг гүйцэтгэсэн байна. Улмаар 3653 хүний амь нас, төр, байгууллага, аж ахуйн нэгж, иргэдийн 260,9 тэрбум төгрөгийн өмч хөрөнгийг авран хамгаалжээ. Түүнчлэн Агаараас эрэн хайх, аврах анги энэ оноос ард иргэддээ тусламж үйлчилгээ үзүүлж, 42 удаагийн дуудлагаар 59 иргэнийг эрүүл мэндийн байгууллагад хүргэж, амь насыг нь авран хамгаалсан байна гэж Онцгой байдлын ерөнхий газраас мэдээллээ.