Month: December 2022

Авлигатай тэмцэх газрын Хяналт шалгалт, дүн шинжилгээний хэлтэс нь 2022 оны арваннэгдүгээр сарын 28-наас арванхоёрдугаар сарын 2-ны өдрүүдэд нийтийн албанд томилогдохоор нэр дэвшсэн 365 иргэний хувийн ашиг сонирхлын урьдчилсан мэдүүлгийг шалган, 171 мэдүүлгийг хянан шийдвэрлэлээ. Одоогоор ажиллагаанд 194 нэр дэвшигчийн урьдчилсан мэдүүлэг хянагдаж байна.

Тухайн хугацаанд иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 65 гомдол, мэдээллийг хүлээн авч шалгаснаас 26 гомдол, мэдээллийг хянан шийдвэрлэлээ.

Төлөвлөгөөт хяналт шалгалтын хүрээнд 50 албан тушаалтны хувийн ашиг сонирхлын болон хөрөнгө, орлогын мэдүүлгийг шалгав

УИХ-ын гишүүн асан Ж.Батзандан, түүний туслах Г.Аюулгүй нарын цагдан хорих таслан сэргийлэх арга хэмжээний хугацааг сунгах тухай прокурорын саналыг Чингэлтэй дүүргийн Эрүүгийн хэргийн анхан шатны шүүхээр шийдвэрлэжээ.

Ингэхдээ үргэлжлүүлэн хорих саналаас татгалзсан байна.

Эргэн сануулахад, УИХ-ын гишүүн асан Ж.Батзандан, түүний туслах Г.Аюулгүй нарыг Хөгжлийн Банктай холбоотой зээл тойрсон асуудлаар шалгаж, 2022 оны аравдугаар сарын 10-наас эхлэн 30 хоног цагдан хорьсон. Мөн арваннэгдүгээр сарын 9-нөөс үргэлжлүүлэн 30 хоног цагдан хорьсон билээ.

Ерөнхий сайд Л.Оюун-Эрдэнэ цаг үеийн асуудлаар мэдээлэл хийж байна.

Иргэд нүүрсний хулгайг эсэргүүцэн хоёр өдөр төв талбайд жагссан. Үүнтэй холбоотойгоор Засгийн газраас өчигдөр мэдээлэл хийхдээ шалгагдаж буй хүмүүсийг нэрийг зарласан билээ.

Тэрбээр “Өнөөдөр Чингис бондын өрийг дарах захирамжид гарын үсэг зурлаа. Ингэснээр тус бондын 1.5 тэрбум ам.долларын өрийг төлж, барагдууллаа. Хөгжлийн банк 805 тэрбум, самурай 223 сая төгрөгийн өрийг төлөхөд бэлэн болсноор дампуурах эрсдэлээс аврагдсан.

Өчигдрийн жагсаалд оролцсон иргэдээс 20 орчим шаардлага ирсэн. Багцлаад үзвэл, нэг нь шударга ёсны асуудал. Хөгжлийн банкны өр, Чингис бонд төлөгдөж байна. “Бидний үр хүүхэд төлчихнө, өнөөдөр болж байвал маргааш хамаагүй” гэсэн сэдлээр тавьж, хөгжлийг боомилсон өрүүд байлаа. Хариуцлагагүй үйлдлүүдийг засах, хариуцлага тооцох агуулга дээр манай Засгийн газар амаргүй нөхцөл байдалд тэмцэл хийж ирсэн. Та бүхэн мэдэж буй байх. Оюу толгойн гэрээтэй холбоотой асуудлыг анх Арбитрын шүүхэд өгсөн талаар би анх яг энэ танхимд зарлаж байсан. Асуудлыг эхлүүлснээр Дубайн гэрээ цуцлагдаж, 2.3 тэрбум ам.долларын өр тэглэгдэх түвшинд хүрч чадах болов уу гэж нэлээд эргэлзэж байсан. Олон нийт маань маш сайн дэмжсэн, бид бодитой үр дүнд хүрч чадсан. Одоо гүний уурхай энэ хавар ашиглалтад орох хүлээлттэй байна.

“Эрдэнэт”-ийн 49 хувь гэдэг том асуудал ч бий. 49 хувийн схемийг анх би гаргаж тавьж байсныг та бүхэн санаж байгаа болов уу. “Эрдэнэт үйлдвэр” маш ашигтай ажиллаж байгаа, цар тахлын хүнд үед том нэмэр тус болсон. Холбогдох албан тушаалтнуудын энэ хариуцлагагүй үйлдэл өнөөдөр ил болсон, шүүхийн процессыг нүд цавчихгүй харж байна. Дарханы төмөрлөгийн үйлдвэр, Хөтөлийн цементийн үйлдвэрүүдийн асуудал ч энэ 49 хувийн багц юм.. Энэ үйлдвэрүүдийг төрд эргүүлэн авч чадах эсэхдээ ч анх эргэлзэж байлаа. Шийдэгдсэн, гэхдээ амар байгаагүй.

Хамгийн сүүлд ЭТТ ХК-ийн асуудлыг сөхөж тавилаа. “Эрдэнэс Монгол”, ЭТТ ХК-тай холбоотой асуудал анхаарал татаад удсан. Гашуунсухайтын төмөр зам яагаад 16 жил гацав. Нүүрсний 178 орчим гэрээний сонгон шалгаруулалт шударга болж чадсан уу. Ард нь ямар хүмүүс байдаг, яаж тендерүүд авсан бэ. Мөн офф-тейк гэрээ, түүний нууцлалтай холбоотой асуудлуудыг ул суурьтай хөндөн тавьж байгаа. С зөвшөөрөл байна. Үүний цаана тээврийн машиныг урд, хойно нь оруулдаг асуудал байгаа юм биш биз, зөвшөөрлийг яаж, хэрхэн өгч байна. БНХАУ-ын талын мэдээлэлтэй манай гаргаж буй нүүрсний хэмжээ таарч байгаа эсэхэд ч хяналт тавих шаардлагатай.

Ийм учраас ЭТТ ХК-д зургаан сарын хугацаатай онцгой дэглэм тогтоогоод явж байна. Энэ бол өмнө дурдсан бүх асуудлуудаас хамгийн амаргүй нь. Тийм ч учраас өргөн цар хүрээнд ажиллах шаардлага зайлшгүй үүснэ. ЦЕГ, АТГ, ТЕГ-ын хамтарсан ажлыг хэсэг гараад явж буй. Үүн дээр жагсагчид нэлээд анхаарч, шаардлага тавилаа. Өмнөх асуудлуудыг шийдэж чадсан шиг нүүрсний асуудлыг ч шийдэж чадна. Харин иргэд маань хууль хяналтын байгууллагыг анзаарч байгаарай” гэлээ.

Үргэлжлүүлэн “Нүүрсний хулгайчид өөрсдөө жагсаалыг эргүүлэх гэж оролдсон. ЭТТ ХК-ийн удирдлагууд оролцсон мэдээллийг авсан. Энэ асуудалд олон нийт туйлын сэрэмжтэй хандах нь зүйтэй. Амь нь тасарч, амьсгаа нь давчдаж байгаа хүмүүс хамгийн их нүүрс ярьж буй. Больчхоосой гэж бодож байна. Тэдэнд хэлэхэд, би тэмцлээсээ сөөм ч ухрахгүй. Та нар нүүрсний хэдэн төгрөг цуглуулсан байж болно. Гэхдээ Монгол Улсын Засгийн газар нүдтэй, чихтэй, ажиллах чадамжтай. Үүнийг жагсаал зохион байгуулсан нүүрсний хулгайчдад хандан хатуугаас хатуу хэлье” гэв.

Засгийн газраас 2023-2025 оныг “Монголд зочлох жил” болгон зарлаж байгаа. Энэ хүрээнд ирэх 3 жилд Монголыг зорих иргэний агаарын тээврийн нислэгт хязгаарлалт тавихгүй байхаар Аялал жуулчлалын хуулийн шинэчилсэн төсөлд тусгаад байна.

Тодруулбал, агаарын тээврийн салбарын либералчлалыг эхлүүлж ирэх 3 жилд манай улсыг зорин зорчих нислэгт хязгаарлалт тавихгүйгээр бүх улсаас ирэх агаарын тээврийг хүлээн авах юм. Мөн үүнтэй уялдуулан и-виз олгох улс орнуудын тоог 2 дахин нэмэгдүүлж, цахим системээр 48 цагийн дотор онлайнаар виз олгоно.

Аялал жуулчлалын салбарын эрх зүйг сайжруулах зорилгоор 2000 онд баталсан Аялал жуулчлалын тухай хуулийн шинэчилсэн найруулгын төслийг Засгийн газар бэлэн болгож УИХ-д өргөн бариад байна.