Month: December 2022

Монгол Улс, АНУ-ын хооронд дипломат харилцаа тогтоосны 35 жилийн ойд зориулсан “Монгол-Америкийн хамтын ажиллагаа 35 жилд” эрдэм шинжилгээний бага хурлыг Монголбанкны санаачилгаар Гадаад харилцааны яам, Эдийн засаг, хөгжлийн яам, АНУ-ын Элчин сайдын яам, МҮХАҮТ, Монгол дахь Америкийн худалдааны танхим хамтран энэ сарын 12-нд зохион байгуулав.

Монголбанкны ерөнхийлөгч Б.Лхагвасүрэн, Монгол Улсын Гадаад харилцааны яамны Төрийн нарийн бичгийн дарга Н.Анхбаяр, АНУ-аас Монгол Улсад суугаа Онц бөгөөд Бүрэн эрхт Элчин сайд Ричард Буанган нар эрдэм шинжилгээний бага хурлыг нээж үг хэлэв. Бага хуралд оролцогчид Монгол Улс, АНУ-ын худалдаа, эдийн засгийн хамтын ажиллагааны өнөөгийн байдал, чиг хандлагын талаар илтгэл тавьж, цаашид өргөжүүлэн хөгжүүлэх боломж, замын зураглалыг хэлэлцэв.

АТГ-аас нүүрсний хэрэгт холбогдсон хүмүүсийн нэрийг зарлаж мэдээлэл хийж байна. Энэ үеэр АТГ-ын мөрдөн шалгах хэлтсийн орлогч дарга, ахлах комиссар М.Даваатогтох мэдээлэл өглөө. Тэрбээр “35 хүнийг яллагдагчаар татсан. Үүнд, хахууль өгөх гэмт хэрэгт 7, хахууль авах 16, албан тушаалын байдлаа урвуулан ашигласан хэрэгт 8, үндэслэлгүйгээр хөрөнгөжих гэмт хэрэгт хоёр хүнийг тус тус яллагдагчаар татаж, мөрдөн шалгах ажиллагааг үргэлжлүүлж байна” гэлээ.

ЗГХЭГ-ын дарга Д.Амарбаясгалан өнөөдөр цаг үеийн асуудлаар Төрийн ордонд хэвлэлийнхэнд хандаж, мэдээлэл хийлээ.

Тэрбээр “Засгийн газрын ээлжит бус хуралдаанаар “Эрдэнэс Тавантолгой” ХК-ийн үйл ажиллагаанд олон улсын аудит оруулахаар тогтсон. Мөн цаашид стратегийн ач холбогдол бүхий ашигт малтмалын ордуудыг олон улсын нийтлэг жишигт нийцүүлэн нээлттэй хувьцаат компани болгох асуудлыг судалж, танилцуулах ажлын хэсгийг байгуулсан. Уг ажлын хэсгийг би ахалж ажиллана. Тус ажлын хэсэг өнөөдөр анхны хуралдаанаа хийнэ.

Мөн Засгийн газрын ээлжит бус хуралдаанаас “Тавантолгой төмөр зам” ХХК-ийн үйл ажиллагааг Засгийн газрын шууд хяналтад авч, 6 сарын хугацаагаар онцгой дэглэм тогтоож, Бүрэн эрхт төлөөлөгчөөр ЗГХЭГ-ын Хууль зүйн газрын дарга Н.Мягмарыг томилоод байна.

“Эрдэнэс Тавантолгой” ХК-д анх өнгөрөгч 10 дугаар сарын 14-нд Засгийн газрын Бүрэн эрхт төлөөлөгч томилогдсоноос бүх ажил эхэлсэн. 1995 оноос энэ оны 12 дугаар сарын 11-ний өдрийг хүртэлх хугацаанд 336.4 сая тонн нүүрс экспортолж, нийт дүнгээр нь авч үзвэл 45.2 их наяд төгрөгийн борлуулалт хийсэн байна. Татвараас 10 их наяд төгрөгийг татан төвлөрүүлсэн ба УИХ-ын гишүүн Т.Доржхандын олон нийтэд цацсан мэдээлэл бодит байдалтай нийцэхгүй байна.

Одоогийн байдлаар нүүрсний хэргийг мөрдөн шалгах ажиллагаанд дэмжлэг үзүүлэх ажлын хэсгээс өдөр бүр тогтмол мэдээлэл өгч буй. УИХ-ын зарим гишүүд зөрүүтэй мэдээлэл өгч байна. Иймд Төрийн ордны их танхимд өнөөдөр 15 цагаас нэгдсэн дүн мэдээг танилцуулна” гэв.

Орон сууцны хөнгөлттэй зээлийн хүү болон урьдчилгаа төлбөрийг бууруулах асуудлыг маргааш буюу 2022 оны 12 дугаар сарын 14-ний өдрийн Засгийн газрын хуралдаанаар оруулах бэлтгэл ажлыг хангуулах ажлын хүрээнд Монгол Улсын Шадар сайд С.Амарсайхан Монгол банкны ерөнхийлөгч Б.Лхагвасүрэн, Барилга, хот байгуулалтын дэд сайд Э.Золбоо, Сангийн яамны Санхүүгийн бодлогын газрын дарга Б.Сүх-Очир болон бусад албаныхан өнөөдөр /2022.12.13/ хуралдлаа.

Тус зээлийн хөтөлбөрийн хүрээнд 2013-2020 онд нийт 65 мянга орчим иргэнд ипотекийн зээлийг жилийн 8 хувьтайгаар олгосон байдаг. Тус иргэдийн зээлийг 6 хувь руу шилжүүлэх асуудлыг Монгол Улсын Шадар сайд С.Амарсайхан хөндөж, ажлын хэсэг байгуулсан. Тус ажлын хэсгийн дүгнэлтээр 8 хувийн зээлтэй иргэдийн зээлийн хүүг 6 хувь болгох, мөн шинээр зээл авах иргэдэд урьчилгаа төлбөрийг 20 хувь болгох боломжтой хэмээн гарсан. Иймд тус асуудлыг Засгийн газарт танилцуулахаар тогтлоо.

Түүнчлэн 2019 онд Дэлхийн банкнаас Ипотекийн зээлийг Монгол банк санхүүжүүлэх боломжгүй гэдгийг сануулж, тус зээлийн санхүүжилтийг шилжүүлэх саналыг гаргаад байсан. Үүний хүрээнд Монгол банкнаас гаргаж байсан ипотекийн зээлийн эх үүсвэрийг цаашид хаанаас гаргаж, хэрхэн үргэлжлүүлэхийг Сангийн яам, Барилга, хот байгуулалтын яамныхан яаралтай шийдвэрлэж, Засгийн газрын хуралдаанд оруулахыг Шадар сайд С.Амарсайхан холбогдох албаныханд даалгалаа.

Авлигатай тэмцэх газрын Мөрдөн шалгах хэлтэс 2022 оны арванхоёрдугаар сарын 5-9-ний өдрүүдэд гэмт хэргийн шинжтэй 30 гомдол, мэдээлэл хүлээн авч, нийт 118 гомдол, мэдээллийг шалгав. Үүнээс найман гомдол, мэдээлэлд хэрэг бүртгэлтийн хэрэг нээж, 19 гомдол, мэдээлэлд хэрэг бүртгэлтийн хэрэг нээхээс татгалзах саналтайгаар прокурорт шилжүүлсэн бөгөөд одоогоор 91 гомдол, мэдээллийг хянан шалгаж байна.

Түүнчлэн эрүүгийн 752 хэрэгт мөрдөн байцаалтын ажиллагаа явуулснаас өнгөрсөн долоо хоногт зургаан хэргийг шүүхэд шилжүүлэх, есөн хэргийг хаах, нэг хэргийг харьяаллын дагуу шилжүүлэх саналтай прокурорт хүргүүлж, хоёр хэргийг нэгтгэн шалгаж байна. Мөрдөн шалгах ажиллагаанд одоогоор 734 хэрэг шалгагдаж байна. Өнгөрсөн долоо хоногт гэмт хэрэг гарахад нөлөөлсөн шалтгаан, нөхцөлийг арилгуулахаар мөрдөгчийн гурван мэдэгдэл бичиж холбогдох байгууллагуудад хүргүүлсэн.

Шүүхэд шилжүүлэх саналтайгаар прокурорын байгууллагад хүргүүлсэн хэргүүдийг дурдвал:

• – Иргэн “Б” нь мөрдөн шалгах ажиллагаа явуулж байгаа хэрэг бүртгэлтийн хэргийг өөртөө ашигтай байдлаар шийдвэрлүүлэхийн тулд Говьсүмбэр аймгийн Цагдаагийн хэлтсийн албан тушаалтанд 100,000,000 төгрөг өгөхөөр амлаж, санал болгосон гэх;
• – Худалдаа хөгжлийн банкны удирдах албан тушаалтан “Б”, “Г” нар нь албан тушаалын эрх мэдлээ урвуулан ашиглаж Худалдаа хөгжлийн банк түүний хувьцаа эзэмшигч нарт давуу байдал бий болгож, “Цемент шохой” ХК-д 2,333,121,865 төгрөгийн буюу их хэмжээний хохирол учруулсан гэх;
• – Архангай аймгийн Өгийнуур сумын албан тушаалтан “У” нь албан үүрэг бүрэн эрхээ урвуулан ашиглаж, өөрийн хамаарал бүхий этгээдэд аялал жуулчлалын чиглэлээр гурван га газрыг Засаг даргын захирамжгүйгээр эзэмшүүлэхээр гэрчилгээ олгосон гэх;
• – “Дулааны дөрөвдүгээр цахилгаан станц” ТӨХК-ийн удирдах албан тушаалтан “Г” нь албаны бүрэн эрх, албан тушаалын байдлаа урвуулан ашигласан гэх;
• – Эрүүл мэндийн яамны албан тушаалтан “Ч”, “Б” нар нь удаа дараагийн үйлдлээр нэр бүхий аж ахуйн нэгжүүдээс тусгай зөвшөөрлийн хүсэлт, төслийг хүлээн авч, шаардлага хангахгүй байна гэх байдлаар хясан боогдуулж, их хэмжээний мөнгийг хахуульд авч, өөрийн хамаарал бүхий шинжээч нарыг аж ахуйн нэгж, байгууллагуудад томилон дүгнэлт гаргуулж, дүгнэлтийг тусгай зөвшөөрлийн хурлаар оруулдаг гэх.