ОХУ-ын Эрхүү мужаас зүүн хойд зүгт 10.4 километрийн зайд газар хөдлөлтийн чичирхийлэл мэдрэгдсэн тухай VolcanoDiscovery мэдээллээ.
Тодруулбал, Улаанбаатарын цагаар 15:20 цаг орчимд газрын гадаргаас 20 километрийн гүнд чичирхийлэл мэдрэгдсэн байна. Одоогоор магнитудын нарийвчлан тогтоохоор ажиллаж байгаа аж.
Газар хөдөлсөн солбицол: 52.12278°N / 104.67693°E
Европын холбоо ирэх онд Украинд 18 тэрбум еврогийн санхүүгийн дэмжлэг үзүүлэх төлөвлөгөө танилцууллаа. Уг тусламжийг дайнд нэрвэгдсэн Украин улс эрчим хүч, эрүүл мэндийн байгууллагуудаа хэвийн ажиллуулах, цалин тэтгэврээ тавихад нь дэмжлэг болгох зорилгоор нэн хөнгөлөлттэй зээл хэлбэрээр өгөх аж. 2023 онд Украинд сар бүр 3-4 тэрбум америк долларын санхүүжилт хэрэгтэй гэж Олон улсын валютын сан тооцоолж байна.
Европын холбооны гүйцэтгэх байгууллага Европын комиссын мэдээлснээр санхүүгийн тусламж ирэх оны 1 дүгээр сараас эхлэн сар бүр 1,5 тэрбум еврогийн дүнтэй, маш таатай нөхцөлтэй зээл хэлбэрээр олгогдох юм байна.
Ингэхдээ Украин улс ойрын 10 жилдээ уг санхүүжилтийг эргэн төлөх шаардлагагүй, Европын холбооны гишүүн орнууд зээлийн хугацаанд хүүг төлөх юм. Украинд ирэх оноос эхлэн сар бүр шаардлагатай 3-4 тэрбум америк долларын 1,5 тэрбумыг нь Европын холбоо нэн таатай нөхцөлтэй зээл хэлбэрээр өгөх бол зөрүүг нь АНУ болон санхүүгийн байгууллагууд, бусад хандивлагчид нөхөн төлөх юм байна.
Европын комисс Украинд илүү таатай нөхцөлөөр санхүүгийн тусламж үзүүлэхийн тулд гишүүн 27 орны жин нөлөөг ашиглан хөрөнгийн зах зээлээс мөнгө босгохоор төлөвлөж байгаа юм байна. Тус комисс ирэх оны 1 дүгээр сараас эхлэн эхний зээлийг гаргахын тулд он дуусахаас өмнө энэхүү тусламжийн төлөвлөгөөг батлахыг Европын холбооны гишүүн орнууд болон Европарламентад уриалжээ.
Европын холбоо өнгөрсөн 2 дугаар сард Орос Украинд дайн эхлүүлснээс хойш Киевт өгөхөөр 19 тэрбум евро төсөвлөсөн ч санхүүжилт өгөхдөө хэтэрхий удаан байна гэх шүүмжлэлд өртөөд байгаа юм.
Өнөө шөнө төв болон зүүн аймгуудын нутгийн хойд хэсгээр цас орж, цасан шуурга шуурч, өнөө маргаашдаа ихэнх нутгаар хүйтрэхийг анхааруулж байна.
2022 оны 11-р сарын 10-ны 20 цагаас 11-р сарын 11-ний 20 цаг хүртэлх цаг агаарын урьдчилсан мэдээ:
Хур тунадас: Ихэнх нутгаар солигдмол үүлтэй. Шөнөдөө төвийн аймгуудын нутгийн зарим газар, зүүн аймгуудын нутгийн хойд хэсгээр, өдөртөө төв болон говийн аймгуудын нутгийн зарим газраар цас орж, цасан шуурга шуурна.
Салхи: Нутгийн зүүн хэсгээр баруун өмнөөс баруун хойш эргэж, бусад нутгаар баруун хойноос секундэд 6-11 метр, говь, талын нутгаар зарим үед секундэд 14-16 метр хүрч ширүүснэ
Агаарын температур: Шөнөдөө Монгол-Алтай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр голын хөндийгөөр -20…-25 градус, Хангай, Хэнтийн уулархаг нутаг, Туул, Тэрэлж голын хөндийгөөр -15…-20 градус хүйтэн, говийн бүс нутгийн өмнөд хэсгээр -1…-6 градус хүйтэн, бусад нутгаар -8…-13 градус хүйтэн, өдөртөө Монгол-Алтай, Хөвсгөлийн уулархаг нутаг, Завхан голын эх, Хүрэнбэлчир орчмоор -14…-19 градус, Хангай, Хэнтийн уулархаг нутаг, Идэр, Тэс голын хөндийгөөр -8…-13 градус хүйтэн, говийн бүс нутгийн өмнөд хэсгээр -1 градус хүйтнээс +4 градус дулаан, бусад нутгаар -3 …-8 градус хүйтэн байна.
УЛААНБААТАР ХОТ ОРЧМООР: Үүлшинэ. Цас орохгүй. Салхи баруун хойноос секундэд 5-10 метр. Шөнөдөө -10…-12 градус хүйтэн, өдөртөө -5…-7 градус хүйтэн байна.
БАГАНУУР ОРЧМООР: Үүлшинэ. Шөнөдөө ялимгүй цас орно. Өдөртөө цас орохгүй. Салхи баруун баруун хойноос секундэд 5-10 метр. Шөнөдөө -19…-21 градус, өдөртөө -11…-13 градус хүйтэн байна.
ТЭРЭЛЖ ОРЧМООР: Үүлшинэ. Цас орохгүй. Салхи баруун хойноос секундэд 5-10 метр. Шөнөдөө -16…-18 градус, өдөртөө -8…-10 градус хүйтэн байна.
2022 оны 11 дүгээр сарын 12-ноос 11 дүгээр сарын 16-ныг
хүртэлх цаг агаарын урьдчилсан төлөв:
12-нд баруун болон төвийн аймгуудын нутгийн хойд хэсгээр, 13, 14-нд төв болон зүүн аймгуудын нутгийн хойд хэсгээр цас орно. Салхи нутгийн зарим газраар секундэд 12-14 метр хүрч ширүүснэ. Дархадын хотгор, Хэнтийн уулархаг нутаг, Хүрэнбэлчир орчим, Завхан голын эхээр шөнөдөө -25…-30 градус, өдөртөө -14…-19 градус, Монгол-Алтай, Хангайн уулархаг нутаг, Эг, Үүр, Идэр, Тэс, Туул, Тэрэлж голын хөндийгөөр шөнөдөө -19…-24 градус, өдөртөө -9…-14 градус, говийн бүс нутгийн өмнөд хэсгээр шөнөдөө -6…-11 градус хүйтэн, өдөртөө -2 градус хүйтнээс +3 градус дулаан, бусад нутгаар шөнөдөө -12…-17 градус, өдөртөө -3…-8 градус хүйтэн байна. Хугацааны сүүлээр бага зэрэг дулаарна.
Зүүн Азийн есөн үндэсний олимпын хорооны залуучуудын дунд зохион байгуулдаг 12 төрөлт спортын наадмыг Монгол Улсын нийслэл Улаанбаатар хотноо 2023 оны наймдугаар сард зохион байгуулахаар бэлтгэл ажлыг хангаж буй. Тус наадмын бэлтгэл ажлын хүрээнд хамтран ажиллах спортын холбоодтой өнөөдөр хамтын ажиллагааны гэрээ байгууллаа. Тодруулбал, Нийслэлийн Засаг дарга бөгөөд Улаанбаатар хотын Захирагч, “Улаанбаатар-2023” Зүүн Азийн залуучуудын наадмыг Зохион байгуулах хорооны дарга Д.Сумъяабазар тус наадмын хөтөлбөрт орж байгаа спортын 12 холбооны ерөнхийлөгч нартай хамтын ажиллагааны гэрээ байгуулж, гарын үсэг зурлаа.
2023 оны наймдугаар сарын 16-23-нд Улаанбаатар хотноо зохион байгуулах тус наадамд 2400 орчим тамирчин, дасгалжуулагч, 350 гаруй шүүгч, техникийн ажилтан болоод холбогдох албаны нийт 4500 орчим хүн ирэх тооцоо гарчээ.
Хамтын ажиллагааны гэрээ байгуулах ёслолын үеэр Нийслэлийн Засаг дарга бөгөөд Улаанбаатар хотын Захирагч, “Улаанбаатар-2023” Зүүн Азийн залуучуудын наадмыг Зохион байгуулах хорооны дарга Д.Сумъяабазар “Тус наадмыг зохион байгуулахад Монгол Улс, тэр дундаа Улаанбаатар хот өндөр амбицтай, бодлоготой оролцох шаардлагатай. Энэ бол улсын нэр хүнд, нийслэл Улаанбаатар хотын цаашдын хөгжилд томоохон түлхэц болох асуудал. Дэлхийн иргэд спортоор дамжуулан энх тайванч үзэл санааг түгээн дэлгэрүүлдэг. Олимпизмд шударга ёс, эв нэгдлийн утга төгөлдөр агуулга оршдог. Иймээс улс орнууд үүнд ихээхэн ач холбогдол өгдөг. Мөн спортын арга хэмжээнд суурилан дотоодын болон гадаадын аялал жуулчлал хөгжих, улс орноо сурталчлах давуу талыг бий болгож байна. Хотын зүгээс манлайлал үзүүлж ажиллана. Оролцож буй талуудад ажлын өндөр амжилт хүсье. Бид зохион байгуулалт, эв нэгдэл, хамтын хүчээр Зүүн Азийн залуучуудын наадмыг итгэл төгс, бүрэн дүүрэн зохион байгуулна” хэмээлээ.
Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ “2023 он спортын салбарынхны хувьд чухал үйл явдлаар дүүрэн жил. Энэ томоохон наадмыг зохион байгуулах санаачилгыг Улаанбаатар хотынхон үүрч байна. Спорт гэдэг тухайн улс орны хөгжлийн шалгуур, түүчээ болдог онцлогтой. Иймд дэлхийн бүх орон олимпын наадам, олон улсын тэмцээн, уралдааныг зохион байгуулах эрхийг авахын тулд өрсөлддөг. Спорт гэдэг пирамидын тогтолцоотой. Орой дээр нь тэмцээн уралдааны амжилт гялалздаг. Харин пирамидын суурийг бүрдүүлж буй биеийн тамир, спортыг сонирхогч хэн бүхэнд итгэл, урам, эрчмийг өгч байдгаараа спортын наадам онцлогтой” гэлээ.
Зүүн Азийн наадмын холбоо болон МҮОХ-ны төлөөлөгчид 2017 онд гурвалсан гэрээнд гарын үсэг зурж, 2023 онд Монгол Улсын нийслэлд Зүүн Азийн залуучуудын II наадмыг зохион байгуулахаар албан ёсоор шийдвэрлэсэн. Зүүн Азийн залуучуудын наадам нь Олон улсын олимпын хороо, Азийн олимпын зөвлөлийн албан ёсны наадамд тооцогддог, бүс нутгийн хэмжээний томоохон наадам юм. Ийм хэмжээний наадмыг Монгол Улсын нийслэл Улаанбаатар хотноо анх удаа зохион байгуулах гэж байгаагаараа онцлог. Түүнчлэн Улаанбаатар хотын бэлгэ тэмдэг бөгөөд эр чадал, эрэмгий зориг, их ухаан цогцлоосон домгийн хангарди шувуу, үлгэр домгийн үзэсгэлэнт жигүүртэн, үг хэл цэцэн, бурхны дууч, бүхнийг чадагч хэмээн эрхэмлэн дээдэлдэг галбингаа гэх домгийн галт шувууг тус наадмын бэлгэдэл дүрээр сонгосон юм.
Улаанбаатар хотод өнөөдөр 2022.11.11-нд суурин 101 цэгээр 101 багийн 420 эмч, ажилтан ажиллана. Та өөрт ойр вакцины аль ч цэгт очиж коронавирусийн эсрэг дархлаажуулалтад хамрагдах боломжтой. Дархлаажуулалтын цэгүүд 09:00-16:00 цаг хүртэл ажиллана.
Үндэсний үзэлтэн Ч.Мөнхбаярын өмгөөлөгч Г.Баасангийн өмгөөлөх эрхийг Монголын өмгөөлөгчдийн холбоо(МӨХ)-ноос хасчээ. Энэ талаар өмгөөлөгч Г.Баасантай ярилцлаа.
-Монголын өмгөөлөгчдийн холбоо таны өмгөөлөх эрхийг хассан тухай мэдээлэл гараад байна. Ямар үндэслэлээр хасах болов оо?
-Хоёр өмгөөлөгчийн өмгөөлөл үзүүлэх эрхийг хассан. Нэг нь А.Батдорж, нөгөөх нь би. Биднийг нууцын зэрэгтэй материал задалсан гэж үзсэн юм билээ. Мөн ёс зүйгүй байсанд буруутгасан байсан. Нэг ёсондоо, шүүхийн нэр хүндэд халдаж, шүүхэд итгэх иргэдийн итгэлд нөлөөлж байна гэж үзсэн байна лээ.
Монгол Улсын хуульчдын үйл ажиллагаанд баримтлах дүрэм бий. Тэр дүрмийн 2.5-д мэдээллийн нууцлал гэж юу вэ, ямар тохиолдолд задруулах вэ гэдэг талаар тусгасан. Нэг ёсондоо бидэнд задруулж болох нөхцөл бий болсон учраас өөрсдийн хэмжээнд олон нийтэд мэдээлсэн.
Шүүх, хуулийн байгууллага нууцын асуудал гэдэг нэрээр гэмт хэрэг үйлдэж болохгүй. Мөрдөгч, прокурор, шүүхийнхэн Эрүүгийн хуулийн 21 дүгээр зүйлд заасан гэмт хэргийг үйлдсэн.
-Тодруулахгүй юу?
-Тэд хуурамч бичиг баримт бүрдүүлсэн. Миний гарын үсгийг дуурайлган зурж, урьдчилсан хэлэлцүүлэг хийсэн мэтээр шүүх дээр ярьсан. Ч.Мөнхбаярын хэрэгт урьдчилсан хэлэлцүүлэг хийх тухай асуудал огт хөндөгдөж байгаагүй, хийгээгүй. Харин 2022 оны гуравдугаар сарын 18-ны өдөр Сүхбаатар дүүргийн Эрүүгийн хэргийн шүүхэд ерөнхий шүүгч Ж.Болдбаатараар даргалуулсан Ч.Мөнхбаярын таслан сэргийлэх арга хэмжээг өөрчлөх хүсэлтийн дагуу шүүгчид хуралдсан. Гэтэл тэр хурлыг урьдчилсан хэлэлцүүлэг болсон мэтээр оруулаад ирнэ лээ. Энэ хууль бус үйлдлийг нь хэлэхээр шүүхийн нэр хүндэд халдлаа, нэр хүндийг унагалаа гэж үзэж болохгүй. Ийм зүйлийг бид хэлэх ёстой шүү дээ.
-Таныг хэргийн нууц задруулсан гэж буруутгаад байгаа шүү дээ. Яг аль хэсэг нь нууцтай холбоотой мэдээлэл байсан гэсэн үг вэ?
-Манай хуулийнхан өөрөө хуурамч нотлох баримтыг хэргийн материалд аваад байгаа шүү дээ. Эрүүгийн хэрэг хянан шийдвэрлэх тухай хуулийн 16 дугаар зүйлд нотлох баримтын талаар тодорхой зааж өгсөн. Өөрөөр хэлбэл, Энэтхэгийн тагнуулын байгууллага гэж яриад байгаа. Тийм зүйл байхгүй. Бүх баримт, Энэтхэгээс ирсэн захидал, баримт гээд байгаа зүйл дээр Монгол Улсын тагнуулын байгууллагын тамга байгаа. Уг нь Энэтхэгийн тагнуулын байгууллагын тамга тэмдэгтэй баримт байх ёстой. Ингэж нотлох баримт, хэрэг зохиогоод л 10 жилийн ял өгчихөж байна. Тэгээд ийм зүйл дээр дуугүй байсангүй, амаа хамхисангүй гээд өмгөөлөгчийн эрхийг хасч байна.
-Өмгөөлөгч бол хүний эрхийн хамгаалагчдын тэргүүн эгнээнд байдаг хүмүүс. Хэрэв таны ярьсан үнэн бол өмгөөлөгчийн эрхэнд ингээд халдаад байвал эрх нь зөрчигдсөн иргэдийг хэн өмгөөлөх болж байна вэ?
-Хуулийн засаглалын гурван багана гэж бий. Өмгөөлөгч, прокурор, шүүгч гурав. Өнөөдөр бол прокурор өндөр эрх мэдэлтэй, шүүгч нь хамгийн өндөр цалин хангамжтай. Гэтэл өмгөөлөгчдийг хар л даа. Нийгмийн хамгаалал, эрх мэдэл гэж байхгүй. Тэгсэн хэрнээ хүний эрхийг хамгаална, хууль ёсыг дээдэлнэ гэж яриад байдаг. Биднийг ганц хамгаалах байгууллага нь Монголын өмгөөлөгчдийн холбоо гэж харан татвараа цаг тухайд нь өгч ирсэн. Гэтэл хамгаалах биш өмгөөлөх эрхийг нь хасч, талхыг нь булааж байгаад харамсаж байна. Энэ бол гэмт хэрэг. Ер нь Өмгөөлөгчдийн холбоо хэзээнээсээ эрх баригчдын далбаан дор, дохиураар нь хөдөлж ирсэн байгууллага. Өнөөдөр ч хэвээрээ, ийм шийдвэр гаргаад сууж байна.
-Өмгөөлөх эрх хасахаар бусад үйлчлүүлэгч яах вэ?
-Их сонирхолтой. А.Батдорж бид хоёр бодохдоо өмгөөлөгчдийн эрхийг хасна гэж төсөөлөөгүй. Одоо бусад үйлчлүүлэгчид маань яах вэ гэдэг тодорхойгүй байна. Эрүү, иргэн, захиргааны хэргүүд болон Үндсэн хуулийн цэц дээр үйлчлүүлэгчийн хүсэлтээр маргаан өрнүүлээд явж байсан. Тэднийг хэн хамгаалахыг, цаашид яах ёстойг хэн ч тайлбарлаж өгсөнгүй. Өмгөөлөгчдийн холбоон дээр хурал болсон, суусан, “Та хоёрын эрхийг хаслаа” гэсэн. Шүүх танхимд ямар ч хүнд гэмт хэрэг хийсэн хүнд сүүлийн үгийг нь сонсох эрх олгодог доо. Биднийг хоригдлоос дор үзлээ.
-Шүүхэд гомдол гаргах уу?
-Монголын өмгөөлөгчдийн холбоо 14 хоногийн дотор эрх хассан шийдвэрээ өгөх ёстой. Түүний дараа Захиргааны хэргийн шүүхэд хандана.
Уг нь Эрүүгийн хэрэг хянан шийдвэрлэх тухай хуулийн 5.4, Өмгөөллийн тухай хуулийн 26.12, 49.1-д маш тодорхой заасан байгаа. Эдгээр хуулиудыг давсан шийдвэрийг нэг төрийн бус байгууллага гаргачихдаг юм байна.
Монголын өмгөөлөгчдийн холбоо бол төрийн бус байгууллага. Харин өмгөөлөгчид бид бол хууль журмаараа шалгалтаа өгөөд Дээд шүүхээс өмгөөлөх эрхээ авсан. Ийм олон даваа давж байж олж авсан эрхээ төрийн бус байгууллагын шийдвэрээр хасуулна гэж байхгүй. Яагаад тэд бидний ажлын байрыг хөсөрдүүлж байгаа юм бэ. Энэ бол гэмт хэрэг.
ХӨСҮТ-өөс Ковидын шинэ хувилбарын эмнэлзүйн мэдээлэл, тархалт, манай улсад хэвтэж эмчлүүлж буй хүмүүсийн эмнэлзүйн байдал, гэрээр эмчлэх зөвлөгөө, Томуу болон ковидын вакцинжуулалтын талаар мэдээлэл өглөө.
ХӨСҮТ-ийн дэд захирал Ж.Байгалмаа “Оны 44 дүгээр долоо хоногт КОВИД-19-ийн 700 гаруй тохиолдол бүртгэгдсэн нь өмнөх долоо хоногоосоо хоёр дахин нэмэгдсэн үзүүлэлт. Мөн PCR шинжилгээнд эерэг эзлэх хувь хоёр дахин нэмэгдэж, таван хувьд хүрсэн.
Тархалтын түвшинг улсын хэмжээнд авч үзвэл “Ногоон” байгаа ч цөөн хэдэн аймагт “Шар” болсон” гэв.
Түүнчлэн тэрбээр коронавирусийн хувилбарын тандалтын талаар “48 сорьцод хувилбарын тандалт хийхэд 37 сорьцод Омикроны ВА.5.2 хувилбар илэрсэн. Мөн нэг сорьцод BF.1, таван хүнд BQ.1.2 хувилбар илрээд байна.
BF.1, BF.7, BQ.1.2 нь манай улсад өмнө нь бүртгэгдэж байгаагүй Омикроны шинэ хувилбарууд юм. Дэлхий нийтийн нөхцөл байдлыг авч үзвэл BF.7 нь 80 орчим улсад, BQ.1 нь 50 улсад бүртгэгдсэн.
Омикроны BA5.1, BA5.2 нь бүртгэгдэж буй тохиолдлуудын 50 орчим хувийг эзэлж байна. Одоогоор BF.7, BQ.1.2 нь бага хувьтай илэрч байгаа ч халдварлах чадвар өндөртэй тул олон нийтийн газарт амны хаалтаа тогтмол зүүх хэрэгтэй.
Мөн супермаркетын ажилтнууд, таксины жолооч, банкны теллер зэрэг дотор орчинд олон хүнтэй харилцдаг ажилтай хүмүүс амны хаалтаа тогтмол зүүх шаардлагатай” хэмээлээ.
Энэ оны эхний 10 сарын дүнгээр гадаад худалдааны нийт бараа эргэлт 17 154.3 сая ам.доллар болж 2021 оны мөн үеэс 3985.7 сая ам.доллар буюу 30 хувиар өсээ.
Экспортын дүн импортынхоос 2 863.2 сая ам.доллараар давж, гадаад худалдааны баланс эерэг гарсан байна. Экспортод 10008.8 сая ам.долларын бараа, түүхий эд гаргасан нь өнгөрсөн оны мөн үетэй харьцуулахад 33.0 хувиар өссөн байна.
Импортоор нийт 7145.6 сая ам.долларын бараа, түүхий эд оруулсан нь 2021 оны мөн үеэс 1500.4 сая ам.доллараар буюу 26.6 хувиар өсөв.
Шударга өрсөлдөөн хэрэглэгчийн төлөө газраас өнөөдөр /2022.11.11/ иргэдээс ирсэн орон сууцны барилга зогссон, зарим сүлжээ дэлгүүр үнэ дарамт үзүүлж байгаа талаар гомдлын дагуу хийсэн шалгалттай холбоотой мэдээлэл өглөө.
Хэрэглэгчээс “Номин” сүлжээ дэлгүүртэй холбоотой гомдол ирсэн. “Номин” сүлжээ дэлгүүр хямд үнийг тогтооно гэж маркетингийн сурталчилгаа явуулдаг мөртлөө бараа нь ижил төстэй үйл ажиллагаа явуулдаг бусад үйлчилгээний байгууллагаас үнэтэй байгаа талаар иргэдээс гомдол ирсжээ.
Энэ талаар ШӨХТГ-ын дарга С.Мөнхчулуун “Оргил” худалдааны төвд 3650 зарагдаж байсан ундаа “Номинд” 3900 төгрөгийн үнэтэй байгааг худалдан авагч анзаарч дэлгүүрт нь эхлээд гомдол гаргасан байна.
Энэ дагуу Номин сүлжээ дэлгүүрт гомдол гаргахад “Номин”-гийн зүгээс “Оргил” сүлжээ дэлгүүрийн тухайн ундааг 3900 болгон үнийг нь нэмэгдүүлэхээр болсон гэсэн хариу өгчээ. Үүний дараа хэрэглэгч ШӨХТГ-т гомдол гаргасан.
“Номин”-гоор дамжсан бараа бүтээгдэхүүн 30 хувийн нэмэгдэлтэй байдаг. Нийлүүлэгч талтай хийсэн “Хамтран ажиллах гэрээ”-ний зарим зүйл заалтууд нь өрсөлдөөнийг хязгаарлахад чиглэсэн бараа бүтээгдэхүүний хэлцэн тогтоох гэрээ, хэлцэл байгуулсан гэж үзэн Зөрчлийн тухай хуульд заасны дагуу өмнөх орны борлуулалтын орлогын зургаан хувьтай тэнцэх хэмжээний төгрөгөөр торгох шийтгэл оногдууллаа. Ингэснээр “Номин” сүлжээ дэлгүүрийг 6,9 тэрбум төгрөгөөр торгож байна” гэв.
