Month: October 2022

Манай улсын нийт экспортын 94 хувийг эрдэс баялгийн бүтээгдэхүүн бүрдүүлдэг. Гэхдээ статистик дүнгээр сүүлийн 20 жилд уул уурхайн бус бүтээгдэхүүний экспортод эзлэх хувь хэмжээ буурсан дүнтэй гарчээ. Тиймээс уул уурхайн бус экспортыг баримжаалсан, импортыг орлосон үйлдвэрлэлийг дэмжсэн бодлого шаардлагатай байгааг МҮХАҮТ-д болсон “Экспортлогч үндэстэн-Шинэ сэргэлтийн бодлого” чуулганаар хөндсөн юм.

Экспортыг дэмжихийн тулд юун түрүүнд нэгдсэн бодлого хэрэгтэй гэдгийг чуулганд оролцсон Монгол Улсын Ерөнхий сайд Л.Оюун-Эрдэнэ онцолж, үүнтэй оролцогчид санал нэгдэж байв. Түүнчлэн, экспортын санхүүжилтийн арга хэрэгслийг нэвтрүүлэх, санхүүжилтийн тогтолцоог бий болгох шаардлагатай байгааг бизнес эрхлэгч нар илэрхийллээ. Энэ талаар МҮХАҮТ-ын тэргүүн О.Амартүвшин, “Экспортыг дэмжих институцийг бий болгох, санхүүжилтийг тогтолцоог хөгжүүлэх талаар зайлшгүй шийдвэрлэх шаардлагатай байгаа”-г тодотголоо. Чуулганаар:

• Монгол Улсын экспортын бүтцийг өөрчлөх,
• уул уурхайн бус экспортын бүтээгдэхүүний эзлэх хувийг нэмэгдүүлэх,
• экспортын бүтээгдэхүүнийг төрөлжүүлэх,
• экспортлогч үндэстэн болох зорилгыг хэрэгжүүлэх талаар ярилцлаа.

Чуулганд экспорт хийх үйл явцад оролцож буй төрийн байгууллагууд, арилжааны банк, даатгалын байгууллагууд, экспортлогч ААН-ийн төлөөлөл оролцлоо.

Уул уурхайн бус экспортыг хөгжүүлэхэд төрийн нэгдсэн бодлого, санхүүжилтийн тогтолцоо шаардлагатай байна.

Үргэлжлүүлэн ирэх даваа гарагт МҮХАҮТ-д Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай хуулийн өөрчлөлт болон Төр-хувийн хэвшлийн түншлэлийн тухай хуулийн төслийн талаар нээлттэй хэлэлцүүлэг зохион байгуулах гэж байна.

Чуулганы үеэр уул уурхайн бус экспорт хийхэд шаардлагатай санхүүжилт татахад дэмжлэг үзүүлэх чиглэлээр МҮХАҮТ “Ти Ди Би Секьюритис ҮЦХ” ХХК-ийн хооронд харилцан ойлголцлын санамж бичиг байгууллаа.

Худалдаа, аж үйлдвэрийн Танхимын гишүүн байгууллагуудад санхүү, хөрөнгийн зах зээлийн цаг үеийн мэдээ мэдээлэл болон судалгаа, тайланг хуваалцах замаар санхүүгийн боловсролыг дэмжих аж.

• Тодруулбал, уул уурхайн бус экспорт хийхэд шаардлагатай санхүүжилт татахад дэмжлэг үзүүлэх
• Зах зээл, эдийн засгийн болон хөрөнгө оруулалтын боломжуудын талаарх мэдээллээр хангах, сургалт зохион байгуулах зэрэг ажлыг хийх юм.

Манай улс түүхий эдийн бааз биш харин дотооддоо бүтээж чадах бүхнээ үйлдвэрлэхэд гол хөшүүрэг болохуйц чухал шийдвэрийг Засгийн газрын ээлжит хуралдаанаар гаргасан.

Ирэх оноос угаасан бус харин самнасан ноолуур экспортолж эхэлснээр одоо байгаа 2200 ажлын байрыг хадгалж, 4400 ажлын байр шинээр нэмэгдэх улмаар тус салбарын борлуулалтын орлогыг 600-700 тэрбум төгрөгөөр нэмэгдүүлэх боломж бүрдэж байна.

• Манай улсын экспортолж байгаа ноолуурын 80 хувийг зөвхөн угаасан ноолуур эзэлдэг;
• Ноолуурыг угаах явцад ашигласан маш их хэмжээний бохир усыг байгаль орчинд гаргадаг;
• Дэлхийн худалдааны байгууллагад манай улс элсэхдээ ноолуурын экспортын татварыг тэглэх үүрэг хүлээсэн нь дотооддоо нэмүү өртөг шингээх, өндөр ашиг шим хүртэх стратегийн бүтээгдэхүүнээсээ олох боломжит орлогоо алдсаар байна.

Иймд Хүнс, хөдөө аж ахуй, хөнгөн үйлдвэрийн яамнаас үйлдвэрүүдийн хүчин чадлыг бүрэн ашиглах, дотооддоо нэмүү өртөг шингээх, ажлын байрыг нэмэгдүүлэх зорилгоор “Ямааны ноолуурын боловсруулалт, худалдаанд мөрдөх техникийн зохицуулалт”-ын төслийг холбогдох дүрэм, журамд нийцүүлэн боловсруулж, батлууллаа.

Тус техникийн зохицуулалтад “Экспорт, импортын зориулалтаар улсын хилээр нэвтрүүлэх ямааны ноолуур нь хялгас болон завсрын үсний агууламж 0.3 хувиас ихгүй байна” гэж тусгасан нь зөвхөн самнасан ноолуурыг хилээр нэвтрүүлэх гол зохицуулалт болж байна. Тухайлбал, 3880 тонн самнасан ноолуур экспортолж, 2.5 сая ширхэг бэлэн бүтээгдэхүүн (600-700 тэрбум төгрөгийн нэмүү өртөг шингэсэн) борлуулж, нийтдээ 1.8 их наяд төгрөгийн борлуулалт хийх нөхцөлийг бий болгож байна.

Цаашид ноолуурын үйлдвэрлэлийн шат дамжлагыг ахиулж, ээрсэн утас буюу бэлэн бүтээгдэхүүн үйлдвэрлэхийн төлөө ажиллах шаардлагатайг салбарынхан онцоллоо.

ЭМЯ, Глобаль сангийн дэмжлэгтэй ДОХ, сүрьеэгийн төслийн хүрээнд “Эрүүл сүрьеэгүй ирээдүйн төлөө” ТББ-аас Нийслэлийн Ерөнхий боловсролын сургуулийн сурагчдын дунд сүрьеэгийн халдварын тохиолдлыг илрүүлэн, баталгаажуулах (IGRA) сүрьеэгийн сорил шинжилгээнд хамруулах ажлыг тогтмол хийж байгаа билээ.

Өнгөрсөн хугацаанд ЕБС-ийн сурагчдын дунд сүрьеэгийн эрт илрүүлэг, ковидын дараах шинж тэмдгийг оношлох үзлэг хийснээр уушгины өөрчлөлт, нурууны муруйлт, архаг бронхит, сүрьеэгийн далд халдвар зэргийг илрүүлсээр байгаа юм.

Энэ ажлын хүрээнд өнгөрсөн 9 дүгээр сард Баянзүрх дүүргийн ЕБС-ийн нийт 526 багш, ажилчид, сурагчид сүрьеэгийн эрт илрүүлэг үзлэгт хамрагдсанаас 15-аас дээш насны 465 сурагч үзлэгт оржээ.

Үзлэгээр сурагч тус бүрээр нь асуумж, рентген зураг авч нарийн мэргэжлийн эмч үзлэг хийж, зөвлөгөө, мэдээлэл өгч ажиллаа.

Тус үзлэгийн үеэр уушгины рентген зураг өөрчлөлттэй 25 сурагчдыг илрүүлж, сурагчдын цуснаас баталгаажуулах шинжилгээ авч, эерэг гарсан тохиолдлуудыг эмчилгээнд хамруулахаар болжээ.

Сүрьеэгийн эрт илрүүлэг, урьдчилан сэргийлэх чиглэлээр үр дүнтэй ажил зохион байгуулж байгаад ЭМЯ, Эрүүл Сүрьеэгүй Ирээдүйн төлөө ТББ, БЗД-ийн ЕБС-иудын удирдлагууд, ХӨСҮТ, АШУҮИС-ийн Ангаахын ухааны сургуулийн Халдварт өвчин судлалын тэнхим болон БЗД-ийн сүрьеэгийн диспансерын хамт олонд сурагчдын эцэг, эхчүүдийн зүгээс талархал илэрхийлжээ.

ЭСИТ-ээс 2022 он дуустал нийслэлийн хүн амын сүрьеэгийн өвчлөл өндөр дүүргүүдийн ЕБС-иудаар сүрьеэгийн эрт илрүүлэг үзлэг, оношилгоо үргэлжлэн явуулахаар ажиллаж байна.

“Эрүүл сүрьеэгүй ирээдүйн төлөө” ТББ нь 2021 онд Баянзүрх, Сонгинохайрхан дүүргийн ЕБС-ийн нийт 4860 гаруй, 2022 онд Баянзүрх дүүргийн 4220 гаруй сурагч, багш ажилчдыг сүрьеэгийн эрт илрүүлэг үзлэгт хамруулж, нийт 100 гаруй уушгины рентген зураг өөрчлөлттэй тохиолдлыг илрүүлсэн байна. Үүнээс сүрьеэгийн 16 тохиолдлыг илрүүлэн харьяа эрүүл мэндийн байгууллагад эмчилгээнд хамруулан үр дүнгээ тооцсон байна.

Улаанбаатар-Дархан чиглэлийн авто замын эхний хоёр эгнээ болох 204.11 км замыг өнөөдөр бүрэн нээж байна. Багц-2 хэсгийн 45,5 км авто замын зорчих хэсгийн хөдөлгөөнийг хоёр өдрийн өмнө нээгээд байсан бол багц-4 хэсгийн 20 гаруй км автозамын замын тэмдэг тэмдэглэгээ, бусад заслын ажил хийгдэж дуусч өнөөдөр /2022.10.30/ зорчих хэсгийн хөдөлгөөнийг нээсэн талаар ЗТХ-ийн дэд сайд Л.Халтар мэдээллээ.

Ингэснээр Улаанбаатар-Дархан чиглэлийн 204.11 км хатуу хучилттай замаар зургаан жилийн дараа зорчих боломж бүрдэж байна.

Улаанбаатар-Дархан чиглэлийн авто замын бүтээн байгуулалт зохион байгуулалтын зарим алдаанаас болж удааширч ирсэн. Тус замын ажлыг эрчимжүүлэх үүрэг даалгаварыгЗасгийн газраас өгсөн бөгөөд Ерөнхий сайд ажлын явцтай өнөөдөр очиж танилцах байсан боловч цаг агаарын нөхцөл байдлаас шалтгаалж цуцлагджээ.

Нийт төслийн гүйцэтгэгч байгууллагуудтай хийсэн гэрээний дагуу 2023 онд Улаанбаатар-Дархан чиглэлийн 4 эгнээ автозам бүрэн ашиглалтад орох юм.