Month: September 2022

Онцгой байдлын ерөнхий газар, АНУ-ын Элчин сайдын яам, Энэтхэг, Номхон далайн цэргийн командлалтай хамтран жил бүр зохион байгуулдаг “Говийн чоно” олон улсын сургалт, дадлага сургуулийг энэ жил Баянхонгор аймагт зохион байгуулахаар бэлтгэл ажлаа хангаад байна.

“Говийн чоно-2022” олон улсын сургалт, дадлага сургуулийг “Газар хөдлөлтийн гамшгийн хор уршгийг арилгах, хариу арга хэмжээ” сэдвийн хүрээнд есдүгээр сарын 05-11-нд зохион байгуулна.
Мөн Монгол Улсын гамшигтай тэмцэх бэлэн байдлыг дээшлүүлэх, Гамшгаас хамгаалах тухай хууль болон эрх зүйн баримт бичгүүдийг бодит амьдрал дээр турших, онцгой нөхцөл байдал үүссэн үед хариу арга хэмжээ авах, аймгуудын нутаг дэвсгэрийг хамарсан хавсарсан гамшиг, байгалийн аюулт үзэгдлийн үед олон улсын болон улсын, орон нутгийн харилцан үйл ажиллагааг сайжруулах зорилготойгоор бэлтгэл ажлыг ханган ажиллаж байна.

Сургалт, дадлага сургууль, туршлага солилцох үйл ажиллагаа нь гамшгийн удирдлага, команд штабын дадлага , нурангинаас эрэн хайх, аврах ажиллагаа, химийн хорт болон аюултай бодистой ажиллах үеийн аюулгүй ажиллагаа, гамшгийн үеийн II шатлалын хээрийн эмнэлэг дэлгэх үйл ажиллагаа, дууриалган үзүүлэх дадлага сургууль гэсэн хэлбэрээр явагдана.

Тус сургалт, дадлага сургуулилтад АНУ-ын аврагчид болон Монгол Улсын аврах тусгай анги, баруун болон төвийн бүсийн 10 гаруй аймгийн Онцгой байдлын газрын аврагчид оролцохоос гадна 70 гаруй орны зочид төлөөлөгчид хүрэлцэн ирэх юм гэж Шадар сайдын ажлын албанаас мэдээллээ.

Цэцэрлэгийн хүүхдийн хоолны зардлын тодорхой хувийг эцэг, эхчүүдээс авах талаарх судалгааг БШУЯ-наас хийж байгаа аж.

Энэ талаар БШУЯ-ны Сургуулийн өмнөх боловсролын хэлтсийн дарга Ж.Мягмар “Энэ жил холбогдох байгууллагууд цэцэрлэгийн хүүхдийн хоол хүнсний чанар дээр анхаарч ажиллана. Сургуулийн өмнөх боловсролын тухай хуулинд цэцэрлэгийн хүүхдийн хоолны зардлыг эцэг, эхтэй хуваалцах боломжийг хуульчилсан байдаг. Тиймээс үүний хүрээнд манай яам судалгаа хийж байгаа” гэжээ.

Эрүүл мэндийн даатгалын ерөнхий газрын газар, Эрүүгийн цагдаагийн алба хамтарсан шалгалт Баян-Өлгий аймаг дахь Эрүүл мэндийн даатгалтай гэрээтэй эмийн сан, хөнгөлөлттэй эмийн жор бичих эрх бүхий 12 эмч нарыг шалгажээ.

Шалгалтаар эмч нар амбулаторийн тусламж үйлчилгээ авсан иргэний хурууны хээг ашиглан олон удаагийн үйлдлээр хуурамч жор бичсэн, эмийн сангийн ажилчид нь ойр тойрны танил тал, хамаарал бүхий иргэдийн регистрийн дугаарыг ашиглан нэр бүхий эмч нараар хуурамч жор бичүүлсэн, үзүүлээгүй үйлчилгээний зардлыг улсад их хэмжээний хохирол учруулсан нь тогтоогджээ.

Мөн эмчийн бичсэн жорд хамаарах эмийг хөнгөлөлттэй эмийн жагсаалтад байхгүй өөр эмээр орлуулан авах нөхцөлийг бүрдүүлэн даатгуулагчид олгосон зэрэг ноцтой зөрчлүүдийг илрүүллээ.

Мөн ЭМДЕГ-аас Татварын ерөнхий газарт хандан хөнгөлттэй жороор олгох эмээс бусад худалдан борлуулсан эмийг е-баримтад бүртгэдэггүй тухай зөрчлийн талаар, Нийгмийн даатгалын ерөнхий газарт Эмийн сангийн эрхлэгч болон жор баригч нар нийгмийн даатгалын шимтгэлийг хөдөлмөрийн хөлсний доод хэмжээгээр төлдөг, аж ахуй нэгжид ажиллаж буй захирал, менежер нар нь нийгмийн даатгалын шимтгэл төлдөггүй зөрчлийн талаарх албан тоотыг тус тус хүргүүлжээ.

Хяналт шалгалтаар зөрчил гаргасан 17 эмийн сан, хөнгөлөлттэй эмийн жор бичдэг 12 эмчийн мэдээллийг Баян-Өлгий аймгийн Эрүүгийн цагдаагийн хэлтэст хүлээлгэн өгч, эмийн сангуудын гэрээг “Даатгуулагчдад эмийн үнийн хөнгөлөлт үзүүлэх үйлчилгээг худалдан авах гэрээ”-ний 3.3.5-т “эрүүл мэндийн тусламж, үлчилгээ үзүүлэгчийн үйлчилгээтэй холбоотой асуудлаар хууль, хяналтын байгууллагаар шалгагдаж байгаа тохиолдолд тухайн эмийн сангийн асуудал шийдвэрлэгдэх хүртэлх хугацаанд” түдгэлзүүлнэ гэсэн заалтыг үндэслэн түдгэлзүүллээ.

Энэхүү асуудлыг Эрүүгийн цагдаагийн албаны Эдийн засгийн гэмт хэрэгтэй тэмцэх газар хэрэг бүртгэлтийн ажиллагаа явуулж эхлээд байна.

Ховд аймгийн Засаг даргаар томилогдсон Э.Болормаа Ерөнхий сайдын захирамжийг гардан авчээ.

Тэрбээр өнөөдөр Ховд хотыг зорьж байгаа аж.

Э.Болормаа нь АНУ-ын Колумбын их сургуулийг хөгжлийн бодлогын чиглэлээр Төрийн удирдлагын магистр зэрэг хамгаалсан. Дэлхийн банк, Ногоон уур амьсгалын сан, Азийн дэд бүтцийн хөрөнгө оруулалтын банк зэрэг олон улсын байгууллагад ажиллаж байсан туршлагатай нэгэн юм.

Байгаль орчин, аялал жуулчлалын сайд Б.Бат-Эрдэнэ Хөвсгөл аймагт ажиллаж байна. Тэрбээр өнөөдөр тус аймагт баригдаж буй Хатгал-Жанхай-Тойлогт болон Хатгал-Ашихай замын ажлын явцтай танилцлаа. Азийн хөгжлийн банкны санхүүжилтээр хийгдэж байгаа тус замын ажилд одоогийн байдлаар 2,8 сая долларын хөрөнгө оруулалт хийгдээд байна.