Month: September 2022

Төв аймгийн Сэргэлэн сумын I багийн нутаг сумын төвөөс зүүн хойд зүгт 34 км-т орших Дөрөвдүгээр зөрлөг хэмээх газарт чиргүүлтэй ачааны автомашин замын хажуу руу онхолдож, автомашины чиргүүлд нэг хүн дарагдсан байна гэсэн дуудлагыг Төв аймгийн Цагдаагийн газраас 17:37 цагт Онцгой байдлын газарт өгчээ.

Дуудлагын дагуу Налайх дүүргийн Онцгой байдлын хэлтсийн алба хаагчид 15 км зам туулан очиход Өмнөговь аймгийн Цогтцэций сумаас жолооч 32 настай эрэгтэй О “Норд Бенз” загварын том оврын чиргүүлтэй ачааны автомашинаар нийслэлийн Налайх дүүргийн чиглэлд 43 тн нүүрс тээвэрлэж яваад машинтайгаа замын хажуу руу онхолдсон байв.

Ослын улмаас машинд зорчиж явсан Хөвсгөл аймгийн харьяат 27 настай эрэгтэй автомашины чиргүүлд дарагдаж нас барсан байсан бөгөөд цогцсыг гаргаж, Төв аймгийн Цагдаагийн газрын мөрдөгчид шилжүүлж өгсөн хэмээн ОБЕГ-аас мэдээлэв.

Нийтийн хоолны салбарын орлого энэ оны эхний хагас жилд 478.4 тэрбум төгрөг болж, өмнөх оны мөн үеийнхээс 216.2 тэрбум төгрөг буюу 82.4 хувиар нэмэгдлээ.

Үүнд рестораны орлого өмнөх оны мөн үеэс 158.3 (2.1 дахин) тэрбум төгрөгөөр нэмэгдсэн нь нөлөөлсөн гэж Үндэсний статистикийн хороо мэдээлэв.

Нийтийн хоолны салбарын орлого энэ оны 6 дугаар сард 98.1 тэрбум төгрөг болж, өмнөх сарынхаас 5.7 (6.1 хувь) тэрбум төгрөгөөр нэмэгджээ. Ийнхүү орлого нэмэгдэхэд рестораны орлогын эзлэх хувь энэ оны эхний хагас жилд өмнөх оны мөн үеийнхээс 8.9, баарных 1.9 нэгж хувиар нөссөн нь нөлөөллөө. Харин захиалгат хоолны хүргэлтийн үйлчилгээний орлогын эзлэх хувь 9.8, гуанзных 0.6, кафеных 0.4 нэгж хувиар багассан аж.

Чингэлтэй дүүргийн Гэмт хэргээс урьдчилан сэргийлэх ажлыг зохицуулах салбар зөвлөлөөс дүүргийн Онцгой байдлын хэлтэст гамшиг ослын голомтод эрэн хайх, аврах ажиллагаанд дэмжлэг үзүүлэх, гэнэтийн осол, гамшгийн үед ард иргэд, алба хаагчдын амь, нас эрүүл мэндийг болзошгүй эрсдэлээс хамгаалах, урьдчилан сэргийлэх, зорилгоор нисгэгчгүй нисэх иж бүрэн төхөөрөмж /дрон/-ийг хүлээлгэн өглөө.

Тус төхөөрөмж /EVO II Dual 640T загвар/ нь аюулт үзэгдэл, ослын эрсдэлийн зураг боловсруулах, гал түймэртэй тэмцэх, галын цэгүүдийг тодорхойлох, хохирогчдын байршлыг тогтоох, өөрчлөгдөж буй нөхцөл байдлыг хянахын тулд галын дөл дээр хөөрч, газар дээрх эрсдэлийг бууруулж эрэн хайх, аврах, секундын нарийвчлалтайгаар өргөн цар хүрээ бүхий талбайд даалгаврын автомат горимуудыг ашиглан байршлыг хурдан тогтоох боломжтой.

Мөн дулаан мэдэрдэг, 8К видео бичлэг хийдэг хосолсон камер бүхий өндөр хүчин чадалтай гэдгээрээ онцлог юм гэж НОБГ-ын Чингэлтэй дүүргийн Онцгой байдлын хэлтсээс мэдээллээ.

Хяргас нуурын эрэг орчмоос 63.1 тонн хог хаягдлыг цэвэрлэжээ. Тодруулбал, Увс аймгийн Байгаль орчин, аялал жуулчлалын газраас Хяргас нуурын эргийн хог хаягдлын менежментийг сайжруулах төслийг энэ оны зургаадугаар сарын 25-наас наймдугаар сарын 25-ны хооронд хоёр сарын хугацаанд хэрэгжүүлсэн байна.

Тус хугацаанд аж ахуйн нэгж байгууллага, иргэд, төрийн бус байгууллагын хамтын оролцооны үр дүнд нийт 63.1 тонн хогийг цэвэрлэлээ гэж Байгаль орчин, аялал жуулчлалын яамнаас мэдээллээ.

Ховд аймгийн Булган сумын Байтаг багийн 1 дүгээр гудамжны задгай хэмээх хаягт оршин суугч 28 настай эмэгтэй М нь есдүгээр сарын 1-ний 22:00 цагийн орчимд гэрээсээ явганаар гараад сураггүй болжээ.

Энэ тухай дуудлагыг Онцгой байдлын газар есдүгээр сарын 4-ний 14:10 цагт өгсөн байна. Тус аймгийн Онцгой байдлын газрын Булган сум дахь Гал түймэр унтраах, аврах 38 дугаар ангийн алба хаагчид, ар гэрийнхэн нь эрэн хайх ажиллагааг 5-ны 06:00 цагаас эхлүүлжээ.

Эрлийг тус сумын Баянгол, Бүрэнхайрхан багийн нутаг дэвсгэрт 10 км-ын тойрогт зохион байгуулж, 11:40 цагт гэрээс нь хойд зүгт 3 км-ын зайд эзэнгүй айлын хашаанд байсныг эсэн мэнд олж ар гэрийхэнд нь хүлээлгэн өгсөн хэмээн ОБЕГ-аас мэдээлэв.

Монгол Улс, БНХАУ-ын холбогдох байгууллагууд хэлэлцээр хийж, хоёр улсын агаарын хилийг нээж, тогтмол нислэгийг сэргээхээр болсон. Тэгвэл энэ дагуу энэ сарын 8-наас эхлэн 11, 17, 18, 22, 25, 29-ний өдрүүдэд Улаанбаатараас Гуанжоу хот руу шууд нислэг үйлдэхээр болжээ.

Зорчигч Гуанжоу хотын нислэгийн хүлээх хуудсанд www.miat.com цахим хаягаар нэвтэрч бүртгүүлэх ба бүртгүүлсэн дэс дарааллаар тийз худалдан авна.

Нислэгийн өдрүүдийг сонгохдоо бүртгүүлсэн дарааллаар сонгож нислэгийн тийз бичнэ.

• Хувийн мэдээлэл өөрчлөх боломжгүй.

• Мэдээллийн үнэн зөвийг зорчигч хариуцна.

• Хүлээх хуудас нэг удаагийн хандалтаар 9 хүртэл хүн хамт бүртгэх боломжтой хэрэв 10 болон түүнээс дээш тооны хүн бүртгүүлэх бол дахин хандалт хийж тус тусад нь бүртгүүлнэ.

• Суудал эзлэхгүй 24 хүртэл сартай нярай хүүхдийн мэдээлэл оруулах шаардлагагүй, суудал захиалгын үед нэмж бүртгэнэ.

• Визний мэдээлэл байхгүй бол хүлээх хуудсанд бүртгэх боломжгүй.

ЭМДЕГ-аас даатгалын шимтгэлээ өөрөө хариуцан төлөх даатгуулагчдын жагсаалтыг гаргасан. Тодруулбал,

Улаанбаатар хотын авто замын түгжрэлийг бууруулахаар 420 тэрбум төгрөгийг нийслэлийн төсөвт суулгаж байгаа буюу улсын төсөвт төвлөрүүлэх мөнгийг үлдээж буй. Энэ хүрээнд 36 цогц ажил хэрэгжүүлж байгаагийн нэг чухал ажил нь улсын хэмжээнд тээврийн хэрэгслийн гэрчилгээг цахим болгож байна. Ингэснээр түгжрэлийг бууруулах эдийн засгийн хөшүүрэг ашиглах олон боломж гарч ирж байгааг Нийслэлийн Авто замын түгжрэлийг бууруулах нэгдсэн төслийн захирал Ч.Батзориг танилцууллаа.

Өөрөөр хэлбэл, Улаанбаатар хотын бүртгэлтэй бүх тээврийн хэрэгслийн гэрчилгээг цахимжуулж, тагжуулах ажлыг 2023 оны нэгдүгээр сар гэхэд хэрэгжүүлж дуусгахын зэрэгцээ зам тээврийн ухаалаг системийг хийх ажил ид хийгдэж байгаа аж.

“Улаанбаатар хотын 1,300 орчим км замын 85% ашиглалтын шаардлага хангахгүй болсон бөгөөд жил бүр нөхөөс тавьж, засвар хийдэг. Замын сангийн хөрөнгө зам ашиглалтын төлбөрөөс бүрддэг. Замын төлбөр моторын багтаамжаас хамаараад жижиг машин 20,000, том машин 40,000 төгрөг төлдөг. Энэ суурь үнийг хэвээр хадгална.

Харин ухаалаг системийг ашиглаад уулзвар болгон дээр автомашины нэвтрэлтийг хянах замаар км тутамд 15 төгрөг, орон нутгийн машин гурав дахин өндөр буюу 45 төгрөг төлөх төсөл боловсруулсан. Улаанбаатарын зам дээр зорчиж буй нийт машины 18% нь хөдөө орон нутгийн машин. Үүнээс гадна нийслэл рүү орж ирэхэд авдаг 1,500 төгрөгийн суурь үнэ хэвээр байна” хэмээн Ч.Батзориг хэллээ.

Улаанбаатар хотын иргэд жилд дунджаар 11,000 км орчим явдаг гэсэн тооцоололтой аж. Харин нийслэлд ойр орон нутгийн машинууд амралтын өдрүүдэд хотод таксинд явах тохиолдол нэлээд байгааг хэллээ.

Иймд түгжрэлийг бууруулах ажлын хүрээнд орон нутгийн автомашинуудыг Улаанбаатар хот руу орохдоо машинаа үлдээх нөхцөлийг хангах үүднээс их багтаамжийн зогсоолуудыг барьж байгаа ба 110 га газрыг улсын тусгай хэрэгцээнд авахаар Засгийн газарт оруулж байгаа аж. Ингэснээр хөдөө орон нутгаас таван буюу чиглэлээс ирж байгаа дөрвөн хэсэг газарт орон нутгийн машиныг үнэгүй тавиад хот руу орох боломжийг бүрдүүлсэн том зогсоол хийж, тэр чиглэлд богино эргэлтийн автобус явуулахаар төлөвлөжээ.

Тээврийн хэрэгслийн цахим гэрчилгээтэй болсноор төлбөр тооцоо бүгд цахимаар хийгдэх нь. Ирэх оны нэгдүгээр сарын 1-н гэхэд орон нутгийн автомашинуудыг тагжуулж амжихгүй бол Улаанбаатарт нэвтрүүлэхгүй байх саналыг Үндэсний хороонд өргөн барих гэж байгааг хэллээ.

Улсын Бүртгэлийн Ерөнхий Газраас энэ оны наймдугаар сарын тоон мэдээллийг танилцууллаа. Мэдээлэлд он гарснаас хойш нийт 10.350 хос гэрлэлтээ батлуулсан бөгөөд 2881 өрх гэр бүлээ цуцлуулжээ. Үүний 439 нь наймдугаар сард цуцалсан байна.

Ташрамд дурьдахад он гарснаас хойш 42.828 хүүхэд шинээр мэндэлсэн бол 13.328 иргэн хорвоогийн мөнх бусыг үзүүлжээ.