Month: September 2022

БНСУ-ын Засгийн газар иргэдийнхээ амьжиргааны өртгийн дарамтыг хөнгөвчлөхийн тулд ирэх 2023 онд 74 их наяд вон буюу 53.4 тэрбум америк доллар зарцуулахаар төлөвлөж байгаагаа мэдэгдэж байна.

Энэ төсвийг бага орлоготой гэр бүл, өндөр настан болон бусад эмзэг бүлгийн иргэдээ дэмжихэд илүүтэй зарцуулах юм байна.

Өмнөд Солонгосын Засгийн газар ирэх 2023 оны төсвийн төлөвлөгөөгөө нэмэгдүүлэх замаар энэ дэмжлэгийг иргэддээ олгохоор төлөвлөж байна. “Ёнхап” агентлагийн мэдээлж байгаагаар хэрвээ энэ дэмжлэг туслалцааг Засгийн газраас үзүүлсэн тохиолдолд 51 сая хүн амтай Өмнөд Солонгос улсын бараг тал хувь нь буюу 21 сая хүн улсаас тэтгэмж авах төлөвтэй байна.

Тухайлбал, улсын хэмжээнд амьжиргааны түвшин доогуур орлоготой 3.7 сая айл өрхөд 21.2 их наяд вон зарцуулахаар ирэх оны төсөвт оруулж буй юм байна. Энэ онд энэ төсөв нь 18 их наяд вон байна.

Мөн хөгжлийн бэрхшээлтэй иргэдийн асаргаа үйлчилгээнд зориулж 5.8 их наяд воныг зарцуулахаар төлөвлөж байна. Үүний зэрэгцээ Хөх ордон 6 сая залуусыг баталгаатай ажлын байраар хангах, мөн өөрийн эзэмшлийн байр орон сууцтай болоход нь дэмжлэг үзүүлэх үүднээс 24 их наяд вон зарцуулахаар ирэх оны төсвийн төсөлд суулгаад байна.

Мөн хүүхдүүд болон ахмад настнуудад зориулж 23 их наяд воны дэмжлэг үзүүлэхээр төлөвлөж байна. Өнгөрсөн 7 хоногт Өмнөд Солонгосын Сангийн яам төсвийн тогтвортой байдлыг бэхжүүлэхийн тулд хэмнэлтийн горимд шилжиж, бүсээ чангалах бодлогыг хэрэгжүүлэхээр зорьж байгаагаа мэдэгдсэн.

Ирэх 2023 оны Өмнөд Солонгос улсын жилийн нийт төсвийг 639 их наяд вон байхаар төсвийн төслийн саналыг Сангийн яамнаас нь гаргаад байна. Энэ нь тус улсын Засгийн газар сүүлийн 13 жилийн хугацаанд анх удаа төсвийг хэмнэлтийн горимд шилжүүлж, танаж байгаа тохиолдол болж байна.

Харин ирэх оны улсын төсөвт нийгмийн халамж, эрүүл мэнд болон хөдөлмөр эрхлэлтийг дэмжихэд зориулж 227 их наяд төсөвлөсөн нь өмнөх онтой харьцуулахад 4 хувиар нэмэгдсэн үзүүлэлт болж байна.

Монгол Улсын дээд шүүхийн нийт шүүгчийн хуралдаан 2022 оны есдүгээр сарын 12-ны өдөр товлогджээ.

Тус хуралдаанаар Монгол Улсын шүүхийн тухай хуулийн 25 дугаар зүйлийн 25.8.1-д зааснаар Улсын дээд шүүхэд шинээр томилогдсон шүүгчдийг танхимд хуваарилж, бүрэлдэхүүнийг батлах бөгөөд Шүүгчдийн зөвлөгөөнөөр Захиргааны хэргийн танхимын тэргүүнийг сонгох болон бусад асуудлыг хэлэлцэнэ.

Хан-Уул дүүргийн иргэдийн Төлөөлөгчдийн Хурал, Цагаатгах ажлыг удирдан зохион байгуулах салбар комиссоос улс төрийн хилс хэрэгт хэлмэгдсэн иргэдийг санан хүндэтгэхийг Монголын төр, Улсын Их Хурлаас 1996 оны 33 дугаар тогтоолоор жил бүрийн 9 дүгээр сарын 10-ны өдөр тэмдэглэн өнгөрүүлэхээр шийдвэрлэсэн. Түүнээс хойш эдүгээ 27 жил өнгөрсөн байна.

Энэ өдрийг тохиолдуулан Хан-Уул дүүрэгт амьдран суудаг улс төрийн хилс хэрэгт хэлмэгдсэн иргэдийнхээ ар гэр, үр хүүхэд, ач зээ нарыг Дүүргийн иргэдийн Төлөөлөгчдийн Хурлын дарга бөгөөд дүүргийн Цагаатгах ажлыг удирдан зохион байгуулах салбар комиссын дарга Г.Батсайхан хүлээн авч уулзаж, алдар нэр, гэгээн дурсгалыг мартах ёсгүйг ахин нэг сануулан хүндэтгэл үзүүллээ.

Шинэ үеийн барилгын салбар үүсэж хөгжсөний 96 жилийн ойн хүрээнд “Барилга, орон сууц 2022” үзэсгэлэн, яармагийг “Тогтвортой хөгжилд хамтдаа” уриан дор нээлээ.

Орон сууцны борлуулалт нэмэгддэг цаг үед зохион байгуулагдаж байгаа энэ үзэсгэлэнд шинэ орон сууц, амины орон сууц, хаусны төсөл хөтөлбөр хэрэгжүүлэгч, барилгын материал үйлдвэрлэгч, ханган нийлүүлэгч, дэвшилтэт техник технологи нэвтрүүлэгч зэрэг 120 гаруй ААНБ-ууд оролцон, бараа материал, бүтээгдэхүүн үйлчилгээ, орон сууцны төслүүдээ танилцуулж байна. Энэ үеэр ипотек, компанийн болон хувь лизинд хамрагдах боломжтой Улаанбаатар хотод захиалга авч буй хаус, шинэ орон сууцны төслөөс гадна амины орон сууцны сүүлийн үеийн загвар дизайн, оновчтой шийдлийг үзэж, шилдэг реалторуудаас зөвлөгөө авах боломжтой. Мөн салбарын мэргэжилтнүүд тодорхой сэдвийн хүрээнд илтгэлүүдийг үнэ төлбөргүй, цагийн хуваарийн дагуу хүргэх юм.

Үүнээс гадна үзэсгэлэн яармагт оролцогч байгууллагууд худалдан авагчдад орон сууц, хаусны төсөл, барилгын материал, тавилгын худалдаандаа тодорхой хувийн урамшуулал зарладаг уламжлалтай. Үзэсгэлэн яармагийг мөн barilgaexpo.mn– д цахимаар зохион байгуулж байгаа бөгөөд цахим талбайд зочилсноор шинэ орон сууцны төсөл, барилгын материал, техник технологитой танилцана.

Үзэсгэлэн, яармагийн нээлтэд БХБ-ын сайд Б.Мөнхбаатар, Барилгын хөгжлийн төвийн Хот төлөвлөлт, зураг төслийн институтийн эрхлэгч О.Одбаяр, БХБЯ-ны Орон сууц, санхүүжилтийн хэлтсийн дарга Э.Батболд, Барилгын хөгжлийн төвийн Барилгын материалын хэлтсийн дарга Д.Батням, Монголын барилгын үндэсний ассациоцийн Ерөнхийлөгч Н.Баярсайхан, Барилга МН-ийн үүсгэн байгуулагч Г.Батсүх, Монголын барилгын материал үйлдвэрлэгчдийн холбооны гүйцэтгэх захирал Г.Цэрмаа, “Барилга, орон сууц 2022” үзэсгэлэн, яармагийн ерөнхий ивээн тэтгэгч “Улаанбаатар групп”, ивээн тэтгэгч Монкон констракшн ХХК, Монкон констракшн ХХК, NCD GROUP оролцов.

Үзэсгэлэн яармаг энэ сарын 11 хүртэл үргэлжилнэ.

Есдүгээр сарын 10-н буюу маргааш 11:00 цагт “Хандлагаа өөрчилье” “Хамтдаа бүтээцгээе” уриан дор Соёлын орон зай бий болгох арга хэмжээний нээлтийн ажиллагаа болно.

“Хандлагаа өөрчилье” “Хамтдаа бүтээцгээе” уриан дор Соёлын орон зай бий болгох арга хэмжээний хүрээнд Сүхбаатар дүүргийн 7 дугаар хорооны нутаг дэвсгэр Денверийн гудамж дагуу автомашины замын хөдөлгөөнийг хаах аж.

Тодруулбал, есдүгээр сарын 9-ний 16:00 цагаас есдүгээр сарын 12-ны 06:00 цагийн хооронд автомашины замын хөдөлгөөнийг АНУ-ын Элчин сайдын яамны хойд уулзвараас Сүхбаатар дүүргийн Засаг даргын тамгын газрын зүүн талын уулзвар хүртэл хэсэгчлэн хаана хэмээн Соёлын яамнаас мэдээллээ.

Увс аймгийн Малчин сумын Баян-Эрдэнэ багийн Цагаан бургасын дэнж гэдэг газар тус сумын харьяат малчин Г энэ сарын 04-ний өдөр 18:00 цагийн орчим согтуугаар гэрээсээ гараад сураггүй алга болжээ. Иймд тус сумын мэргэжлийн анги болон орон нутгийн иргэд хамтран мөн өдрөөс 09.07-ны өдрийн хүртэлх хугацаанд эрэн хайх ажиллагааг зохион байгуулсан боловч үр дүнд хүрээгүй байна. Тиймээс хүч нэмэгдүүлэн ажиллах тухай хүсэлтийг энэ сарын 07-ны өдрийн 18:54 цагт аймгийн Онцгой байдлын газарт тавьжээ.

Аймгийн ОБЕГ-ын Гал түймэр унтраах, аврах 41 дүгээр ангийн алба хаагчид 150 км замыг туулан 08-ны өдрийн 00:41 цагт тухайн газарт очиж хоноглосон бөгөөд маргааш нь буюу есдүгээр сарын 8-ны өдөр хүүг эсэн мэнд олжээ.