Month: September 2022

Монгол Улсын Их Хурлын дарга Гомбожавын Занданшатарын урилгаар Унгар Улсын Үндэсний Ассамблейн дарга Эрхэмсэг ноён Көвер Ласло 2022 оны есдүгээр сарын 15-наас 18-ны өдрүүдэд Монгол Улсад албан ёсны айлчлал хийнэ.

Испанийн теннисчин Карлос Алькарас АНУ-ын нээлттэй тэмцээний шигшээ тоглолтод Норвегийн тамирчин Каспер Руудыг илүүрхсэнээр Мэргэжлийн теннисчдийн холбооны /ATP/ чансааг тэргүүлсэн хамгийн залуу тамирчин болжээ.

Өдгөө 19 настай К.Алькарас Нью-Йорк хотноо гурван цаг гаруй үргэлжилсэн тоглолтод 23 настай К.Руудыг 6-4 2-6 7-6(1) 6-3 онооны харьцаагаар буулган авсан байна. Ингэснээр тэрбээр 1973 оноос танилцуулж эхэлсэн дэлхийн чансааны нэгдүгээрт бичигдэж, Австралийн теннисчин Ллейтон Хьюиттийн 2001 онд 20 насандаа тогтоосон амжилтыг шинэчилжээ.

“Хүүхэд байхаасаа мөрөөдсөн дэлхийн чансааны нэгдүгээрт бичигдэн, аварга болох мөрөөдөл минь биеллээ оллоо. Их дуулга тэмцээний сүүлийн шатанд ядарч болохгүй, өөрт байгаа бүхнээ зориулах хэрэгтэй гэж би өөртөө хэлж байсан” хэмээн К.Алькарас ярьжээ.

Мэргэжлийн теннисчдийн холбооны чансааг тэргүүлсэн Норвегийн анхны тамирчин болохыг зорьж байсан К.Руудын хувьд нэгдүгээрт бичигдэхийн төлөө хүчин чармайлт гаргасаар байх болно гэдгээ хэлсэн байна. Тэрбээр дэлхийн чансааны долоодугаар байраас хоёрдугаар байр луу ахисан байна.

Улсын Их Хурлын дарга Г.Занданшатар өнөөдөр (2022.09.12) ЕБС-ийн сурагчид болон оюутан залуустай МУИС-ийн Эрдмийн танхимд “Илүү их уншъя” уриан дор “НОМЫН САЙН НӨХӨР” ярилцлага, уулзалт хийлээ.

Уулзалтад МУИС-ийн түүхийн тэнхим, нийтийн удирдлага болон олон улсын харилцааны чиглэлээр суралцдаг 70 гаруй оюутан залуус, ЕБС-ийн сурагчдын 30 гаруй төлөөлөл байлцав. УИХ-ын дарга Г.Занданшатар, өдөр бүр 5 хуудас уншиж хэвших нь хүний амьдралын чанарт хэмжээлшгүй нөлөөллийг бий болгодог тухай оюутан сурагчдад зөвлөж, ном уншиж хэвшсэн туршлагаасаа хуваалцав. Мөн бага залуугаасаа өдөр бүр уншдаг хэвшлийг өөрсдөдөө суулгаж, ном уншихын ач тусын тухай ойлголтыг эргэн тойрон, найз нөхөд, үеийн тэнгийнхэндээ өгч, зөв үлгэрлэх ёстойг хэлж байв.

Уулзалтын үеэр есдүгээр сарын 16-наас 18-ны өдрүүдэд Жанжин Д.Сүхбаатарын талбайд болох 32 дахь удаагийн “Номын баяр”-ын тухай танилцуулан, оюутан залуусыг номд шамдахыг уриаллаа. Жил бүр зохиогддог номын баярын тухайд Нийтээр тэмдэглэх баярын болон тэмдэглэлт өдрүүдийн тухай хуулийн 5.1.17-д “Үндэсний бичиг соёл, номын өдрүүд: тав болон есдүгээр сарын гурав дахь долоо хоногийн Бямба, Ням гараг” гэж тусгасны дагуу энэхүү өдрүүд албан ёсны тэмдэглэлт өдөр болсон билээ.

УИХ-ын дарга Г.Занданшатарын ивээл дор болдог уг арга хэмжээг энэ жил “Илүү их уншъя” уриан дор тэмдэглэх юм.

Сурагч, оюутнуудтай хийсэн уулзалтын үеэр яригдсан нэг чухал сэдэв нь “Технологийн 4-р хувьсгал”-ын тухай байв. Уг хувьсгал нь хүн төрөлхтний боловсрол олж авах уламжлалт загварчлалыг үндсээр нь өөрчилж буйг сануулж, хүссэн номоо уншиж бас суралцах боломжтой болсон тухай тэрбээр хэлэв. Гагцхүү чанартай, зөв эх сурвалжийг заалгахад хөтөч, багш хэрэгтэй байхын чухлыг онцоллоо. Боловсролын салбарт бий болсон энэ дэвшлийн үрээр ямар ч орон үсрэнгүй хөгжлийн загварыг хэрэгжүүлэх боломж бий болсон тухай тайлбарлав. Өнөөдөр залуучуудын дунд зөвхөн нэг мэргэжил эзэмшээд зогсохгүй хэд хэдэн мэргэжлээр зэрэг суралцдаг соёл нэвтэрч буйг оюутнуудад зөвлөлөө. Тухайлбал компьютерын шинжлэх ухаанаар суралцдаг хэр нь статистикийн чиглэлээр давхар мэргэжил эзэмшсэн Монгол оюутан бол үүний жишээ юм гэлээ. Ингэж чанартай боловсрол олж авах зам нь ном сайн уншихаас эхэлнэ гэв.

УИХ-ын дарга Г.Занданшатар, хууль тогтоох үйл ажиллагаан дахь иргэдийн оролцоог хангах, олон нийт засаглах эрхээ эдлэх боломжийг нээж буй цахим платформ болох d.parliament.mn сайт, “d-parliament” апликэйшний тухай танилцуулав. Энэ цахим талбараар дамжуулан УИХ-аар хэлэлцэж буй хуулийн төсөлд саналаа өгч, идэвхтэй оролцохыг уриаллаа. Сонирхсон хэн бүхэн энэхүү системээр дамжуулан засаглах эрхээ эдлэх боломжийг нээж өгч байгааг онцлов хэмээн Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв

Авлигатай тэмцэх газрын Мөрдөн шалгах хэлтэс 2022 оны 9 дүгээр сарын 5-9-ний өдрүүдэд гэмт хэргийн шинжтэй 33 гомдол, мэдээлэл хүлээн авч, нийт 117 гомдол, мэдээллийг шалгав. Үүнээс 11 гомдол, мэдээлэлд хэрэг бүртгэлтийн хэрэг нээж, 25 гомдол, мэдээлэлд хэрэг бүртгэлтийн хэрэг нээхээс татгалзах саналтайгаар прокурорт шилжүүлсэн бөгөөд одоогоор 81 гомдол, мэдээллийг хянан шалгаж байна.

Түүнчлэн эрүүгийн 734 хэрэгт мөрдөн байцаалтын ажиллагаа явуулснаас өнгөрсөн долоо хоногт 5 хэргийг шүүхэд шилжүүлэх, 5 хэргийг хаах, 1 хэргийг харьяаллын дагуу шилжүүлэх саналтай прокурорт хүргүүлж, 1 хэргийг нэгтгэн шалгаж байна. Мөрдөн шалгах ажиллагаанд одоогоор 722 хэрэг шалгагдаж байна. Өнгөрсөн долоо хоногт нийт 7 объектод нэгжлэгийн ажиллагаа явуулав.

Шүүхэд шилжүүлэх саналтайгаар прокурорын байгууллагад хүргүүлсэн хэргүүд:

• “Э” нь Татварын ерөнхий газарт Татварын орлогын газрын татварын улсын байцаагчаар ажиллаж байх хугацаандаа “Т” ХХК-ийг 2018-2020 он хүртэлх хугацаанд үйл ажиллагаа эрхлээгүй гэж Х тайлан гарган үнэт цаас, санхүүгийн баримтыг хуурамчаар үйлдсэн гэдгийг мэдсээр байж давуу байдал бий болгож, онцгой албан татварын тэмдэг олгосон, 12 сая төгрөгийн хахууль авсан гэх;
• Архангай аймгийн Мэргэжлийн хяналтын газрын дарга “Ц” нь Цэнхэр сумын Орхон багт алт олборлох чиглэлээр үйл ажиллагаа явуулж байсан нэр бүхий уурхайн албан тушаалтнаас 200.0 сая төгрөг хахуульд авсан гэх;
• “Ц” нь Дундговь аймгийн Баянжаргалан сумын Засаг даргаар ажиллаж байхдаа албан тушаалын байдлаа хэрэгжүүлэлгүй 2019 оны 10 дугаар сард орон нутгийн хөрөнгөөр хийгдэх 51,325,200 төгрөгийн төсөвт өртөгтэй, “Ус цэвэршүүлэх төхөөрөмж” нийлүүлэх ажлын гүйцэтгэгчээр бичиг баримт дутуу, шаардлага хангаагүй “Т” ХХК-ийг тендерт шалгаруулж бусдад давуу байдал бий болгосон үнэлгээний хорооны дүгнэлтийг татгалзалгүй гэрээ байгуулсан гэх;
• Чингэлтэй дүүргийн ИТХ-ын даргын 2020 оны 1 дүгээр сарын 29-ний өдрийн захирамжаар дүүргийн ИТХ-ын бүрэн эрхийн хугацаанд дэвшүүлсэн зорилт, баталсан төсөл, хөтөлбөрийн хэрэгжилт, зохион байгуулсан үйл ажиллагааны талаарх мэдээ, мэдээлэл, контент бэлтгэн иргэд, олон нийтэд телевиз, сонин хэвлэл, цахим сүлжээгээр дамжуулан хүргэх зөвлөх үйлчилгээний гүйцэтгэгчийг сонгон шалгаруулах ажлын хэсгийг тус албаны Удирдлага зохион байгуулалтын хэлтсийн даргаар ахлуулан байгуулсан бөгөөд ажлын хэсэг нь дээрх ажлыг зохион байгуулахдаа холбогдох хууль журмыг зөрчсөн гэх;
• Баянзүрх дүүргийн прокурорын газрын Хэрэг бүртгэх, мөрдөн байцаах ажиллагаанд хяналт тавих хяналтын прокурор “Г” нь Эрүүгийн хуулийн тусгай ангийн 10.1 дүгээр зүйлийн 1 дэх хэсэгт зааснаар эрүүгийн хэрэг үүсгэж яллагдагчаар татсан … дугаартай “Б”-д холбогдох эрүүгийн хэрэгт хяналт тавихдаа 2021 оны 4 дүгээр сарын 7-ны өдөр хэрэг шалган шийдвэрлэхэд ач холбогдол бүхий нотлох баримт болох гэрч “А”-ийн мэдүүлгийн тэмдэглэл болон “Яллагдагчаар татах тогтоолд нэмэлт, өөрчлөлт оруулах тухай” прокурорын тогтоолын огноог засварласан гэх.

Галлагааны улирал эхэлж байгаатай холбоотойгоор БОАЖЯ, Орчны бохирдлыг бууруулах Үндэсний хороо, УБЗАА, Нийслэлийн Агаар, орчны бохирдолтой тэмцэх газар, НМХГ, “Таван толгой түлш” ХХК, НҮБ-ын Хөгжлийн хөтөлбөрийн “Бохирдлыг бууруулах замаар эрүүл мэнд, хүрээлэн буй орчны тогтвортой байдлыг сайжруулах нь” төсөл болоод бусад холбогдох байгууллагуудаас хамтран 2022-2023 оны өвөлжилтийн бэлтгэл ажлыг хангаж эхэлсэн.

Уг ажлын хүрээнд Нийслэлийн Засаг даргын А/1025 дугаар захирамж, БОАЖ-ын сайдын баталсан удирдамжийн дагуу “Яндангаа хөөлье-Өнтэй өвөлжье” аяныг есдүгээр сарын 2-ноос аравдугаар сарын 2-ны өдрийн хугацаанд зарлаад байна.

Тус аяны хүрээнд:

• Агаарын бохирдлын хүний эрүүл мэнд, хүрээлэн буй орчинд үзүүлэх хор уршиг, түүнийг бууруулах, угаарын хий, угаарын хийн хордлогоос урьдчилан сэргийлэхийн тулд авч хэрэгжүүлэх арга хэмжээний талаар иргэн, хуулийн этгээдэд сургалт зохион байгуулах
• Угаарын хийн эрсдэлээс урьдчилан сэргийлэх зөвлөмж, мэдээллийг иргэд, олон нийтэд хүргэх, сурталчлах
• Угаарын хийн эрсдэлээс урьдчилан сэргийлэхтэй холбоотойгоор холбогдох байгууллагын төлөөллийг оролцуулсан шуурхай штабыг байгуулах зэрэг арга хэмжээг хийж хэрэгжүүлж байна.

Мөн хавар, намрын улиралд гэр байшингийн гадаад, дотоод орчны температурын зөрүү багасаж, яндангийн таталт муудан угаарын хийн эрсдэл үүсэх нөхцөл бүрддэг. Иймд иргэд та бүхэн яндангаа хөөлж, гэр, байшингаа дулаалан угаарын хийн мэдрэгч төхөөрөмжийн бүрэн бүтэн байдлыг хангаж, зайг сольж дадах шаардлагатай юм. Түүнчлэн яндангийн сойлтыг хаахгүй байх, пийшин, зуухныхаа бүрэн байдлыг хангаж хайртай дотнын хүмүүсээ угаарын хийн эрсдэлээс сэргийлээрэй.