Month: September 2022

Есдүгээр сарын 21-ний 20:00 цагаас есдүгээр сарын 22-ны 20:00 цаг хүртэлх цаг агаарын урьдчилсан мэдээ:

Шөнөдөө төвийн аймгуудын нутгийн зүүн хойд хэсэг, зүүн аймгуудын нутгийн зарим газраар, өдөртөө зүүн аймгуудын нутгийн өмнөд хэсгээр бороо, нойтон цас орно. Бусад нутгаар багавтар үүлтэй, хур тунадас орохгүй.

Салхи нутгийн баруун хагаст баруун өмнөөс, бусад нутгаар баруун хойноос секундэд 5-10 метр, говь, талын нутгаар секундэд 15-17 метр хүрч ширүүснэ.

Шөнөдөө Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Байдраг, Туул, Тэрэлж голын хөндийгөөр 3-8 градус хүйтэн, Их нууруудын хотгор, Алтайн уулархаг нутаг, Орхон-Сэлэнгийн сав газраар 4 градус хүйтнээс 1 градус дулаан, цочир хүйтэрнэ.

Говийн бүс нутгийн өмнөд хэсгээр 5-10 градус дулаан, бусад нутгаар 1 градус хүйтнээс 4 градус дулаан, өдөртөө Хэнтийн уулархаг нутаг, Туул, Тэрэлж, Онон, Улз, Халх голын хөндий, Дарьгангын тал нутгаар 6-11 градус, Их нууруудын хотгор, говийн бүс нутгийн баруун өмнөд хэсгээр 21-26 градус, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр 15-20 градус, бусад нутгаар 11-16 градус дулаан байна.

УЛААНБААТАР ХОТ ОРЧМООР: Шөнөдөө үүлэрхэг, ялимгүй хур тунадас орно. Өдөртөө үүл багасна, бороо орохгүй. Салхи баруун хойноос секундэд 5-10 метр, зарим үед секундэд 12-14 метр хүрч ширүүснэ. Шөнөдөө Яармаг Сонгины орчмоор 5-7 градус, бусад хэсгээр 2-4 градус хүйтэн, өдөртөө 9-11 градус дулаан байна.

БАГАНУУР ОРЧМООР: Шөнөдөө үүлэрхэг, ялимгүй хур тунадас орно. Өдөртөө үүл багасна, бороо орохгүй. Салхи баруун хойноос секундэд 6-11 метр, зарим үед секундэд 13-15 метр хүрч ширүүснэ. Шөнөдөө 3-5 градус хүйтэн, өдөртөө 9-11 градус дулаан байна.

ТЭРЭЛЖ ОРЧМООР: Шөнөдөө үүлэрхэг, ялимгүй хур тунадас орно. Өдөртөө үүл багасна, бороо орохгүй. Салхи баруун хойноос секундэд 5-10 метр. Шөнөдөө 4-6 градус хүйтэн, өдөртөө 7-9 градус дулаан байна.

Эх сурвалж: ЦУОШГ

Төгрөгийн ханш ам.долларын эсрэг суларч байгаа хэдий ч зарим валютын эсрэг чангарсан байна. Тодруулбал, БНСУ-ын воны эсрэг 2022 оны 4 дүгээр сараас хойш өнөөдрийн байдлаар 3.8 хувиар чангараад байна. Ингэснээр воны ханш төгрөгийн эсрэг 2.44 төгрөгөөс 3.35 төгрөг болж буурчээ.

Мөн төгрөгийн ханш Японы иений эсрэг дээрх хугацаанд 6.4 хувиар чангарчээ. Иений ханш 2022 оны 4 дүгээр сарын 1-ний байдлаар 24.23 төгрөг байсан бол өнөөдрийн байдлаар 22.76 төгрөг болж буурсан байна.

Ташрамд дурдахад, АНУ-ын Холбооны нөөцийн сан бодлогын хүүгээ өсгөж байгаатай холбоотойгоор дэлхийн улс орнуудын валютын ханш ам.долларын эсрэг сулрах хандлагатай байгаа.

Экспортлогч орнуудын хувьд ханшийн сулралт нь бүтээгдэхүүний өрсөлдөх чадварыг сайжруулах эерэг нөлөөтэй байдаг. Жишээ нь БНСУ-ын Самсунг, Японы Тоёотагийн ам.доллароор илэрхийлэгдэх үнэ хямдарна гэсэн үг. Энэ нь тухайн улсын экспортлогч компаниудад ихээхэн давуу тал болдог байна.

Нийслэлийн Эрүүгийн хэргийн давж заалдах шатны шүүхээс шүүгдэгч Ч.Мөнхбаярт холбогдох хэргийг өчигдөр болон өнөөдөр хаалттайгаар хянан хэлэлцлээ.

Тодруулбал, түүнд холбогдох хэрэгт Тагнуулын Ерөнхий газраас мөрдөн шалгах ажиллагаа явуулан Нийслэлийн Прокурорын газраас Эрүүгийн хуулийн тусгай ангийн 19.4 дүгээр зүйлийн 1 дэх хэсэгт зааснаар яллах дүгнэлт үйлдэж хэргийг шүүхэд шилжүүлжээ.

Сүхбаатар дүүргийн Эрүүгийн хэргийн анхан шатны шүүхийн шийтгэх тогтоолоор Ч.Мөнхбаярыг “Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан” гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 19.4 дүгээр зүйлийн 1 дэх хэсэгт зааснаар түүнийг 10 жилийн хугацаагаар хорих ялаар шийтгэж, ялыг нээлттэй хорих байгууллагад эдлүүлэхээр шийдвэрлэсэн.

Нийслэлийн Эрүүгийн хэргийн давж заалдах шатны шүүх 2022 оны есдүгээр сарын 20, 21-ний өдрүүдэд хуралдаж Ч.Мөнхбаярт холбогдох хэргийг хянан хэлэлцэж, анхан шатны шүүхийн шийтгэх тогтоолыг хэвээр үлдээж, шүүгдэгч Ч.Мөнхбаяр, түүний өмгөөлөгч Г.Баасан, А.Батдорж нарын гаргасан давж заалдах гомдлуудыг хэрэгсэхгүй болгосон байна.

Шүүх хуралдааныг Эрүүгийн хэрэг хянан шийдвэрлэх тухай хуулийн 34.4 дүгээр зүйлийн 2 дахь хэсгийн 2.1 дэх заалтад заасан “Төрийн болон албаны нууцтай холбоотой” үндэслэлээр хаалттай явуулсан юм.

Байгаль орчин, аялал жуулчлалын яам, Туул голын сав газрын захиргаа, Дэвшилтэт Социал демократ клубээс хамтран “Clean Up 2” бүх нийтийн цэвэрлэгээг энэ сарын 24-ны өдөр зохион байгуулах гэж байна.

Энэхүү цэвэрлэгээнд 3000-5000 залуу нэгдэж, туул гол орчмыг цэвэрлэх юм. Залуус та бүхнийг нэгдэхийг уриалж байна.

Цуглах газар: Үндэсний цэцэрлэгт хүрээлэнгийн Хөл бөмбөгийн талбай

Хэзээ: 2022 оны 09 дүгээр сарын 24-нд 09:00 цаг

ХХААХҮЯ-наас ургац хураалтын явцын талаар мэдээлэл өглөө. Тодруулбал “Өнөөдрийн байдлаар 31.6 мянган га-гаас 37.9 мянган тонн үр тариа, үүнээс 30.3 мянган га-гаас 36.3 мянган тонн улаанбуудай, 7.9 мянган га-гаас 92.9 мянган тонн төмс, 3.8 мянган га-гаас 35 мянган тонн хүнсний ногоо, 2.9 мянган га-гаас 9.4 мянган тонн тэжээлийн ургамал, 3.8 мянган га-гаас 1.2 мянган тонн тосны ургамал хурааж аваад байна.

Улсын хэмжээнд 5 их, дээд сургууль ЗХЖШ-ийн 18 анги нэгтгэлээс нийт 3102 оюутан, цэргийн албан хаагч ургац хураалтад гэрээгээр ажиллаж байна” хэмээлээ.

2023 онд БНСУ-ын Засгийн газрын тэтгэлгээр бакалаврын зэрэгт суралцах гадаадын оюутан сонгон шалгаруулах хөтөлбөр зарлагджээ.

Сонгон шалгаруулалтад оролцох иргэдийг 2022 оны аравдугаар сарын 5-ныг хүртэл бүртгэнэ. Бүрдүүлсэн материалыг Хан-Уул дүүрэгт байрлах БНСУ-аас Монгол Улсад суугаа ЭСЯ-нд ажлын өдрүүдэд 08:30-17:30 цагт хүлээн авна.

TOPIK 5 түвшин ба түүнээс дээш(Хүчинтэй хугацаа хэтрээгүй байх), эсвэл TOEFL 90 оноо, IELTS 6.5-аас дээш оноотой байх шаардлага тавигдах аж. Сонгон шалгаруулах оюутны тоо хоёр байна.

Эх сурвалж: БНСУ-аас Монгол Улсад суугаа ЭСЯ

Нийслэлийн Засаг даргын Тамгын газар, Хүнс, хөдөө аж ахуй, хөнгөн үйлдвэрийн яам, Монголын худалдаа аж үйлдвэрийн танхимтай хамтран зохион байгуулах “Улаанбаатар түншлэл – 2022” олон улсын үзэсгэлэн яармагийн талаарх мэдээлэл өгөхөөр хэвлэлийн бага хурлыг зарлан хуралдуулав.

“Улаанбаатар түншлэл – 2022” олон улсын үзэсгэлэн яармаг нь маргааш буюу есдүгээр сарын 22-ны өдөр нээлтээ хийж, есдүгээр сарын 25-ны өдрийг хүртэл Мишээл экспо үзэсгэлэнгийн танхимд үргэлжилнэ.

Хэвлэлийн хуралд МҮХАҮТ-ын Үзэсгэлэн яармагийн газрын дарга Ч.Баттулга оролцож дараах мэдээллийг өглөө. Тэрбээр “Энэхүү үзэсгэлэн яармагийг жил бүрийн намар уламжлал болгон зохион байгуулдаг. Энэ жилийн үзэсгэлэн яармагт Бүгд Найрамдах Беларусь Улс, Малайз, Оросын Холбооны Улс, Тайвань улсаас 70 гаруй компани, аж ахуй нэгж оролцоно. Эдгээр аж ахуйн нэгжүүд, хүнс, хөдөө аж ахуйн бүтээгдэхүүн, тоног төхөөрөмж, эм, эмийн бүтээгдэхүүн, боловсрол болон тээвэр ложистик, мод бэлтгэл, банк санхүүгийн салбарын бүтээгдэхүүнийг дэлгэж, Монголын хэрэглэгчдэд таниулах юм.

Үзэсгэлэн яармагт дотоодын 30 гаруй компани оролцоно. Түүнчлэн МҮХАҮТ-д есдүгээр сарын 22-нд Монгол-Оросын бизнес форум, есдүгээр сарын 23-нд Монгол-Беларусийн бизнес форум болно. Тус үзэсгэлэн худалдаа нь 47 дахь жилдээ зохион байгуулагдаж байгаа бөгөөд энэ удаагийн үзэсгэлэн худалдааны үеэр тусгайлан зассан уулзалтын цэгт Монгол Улсыг зорин ирж буй гадаадын байгууллагуудтай бизнес уулзалт хийх, хамтын ажиллагаагаа эхлүүлэх боломжийг зохион байгуулагчдын зүгээс олгож байгаа. ОХУ-аас мод, модон материалын чиглэлээр хамтран ажиллах хүсэлтэй аж ахуйн нэгжүүд ирж буй бол Беларусиас хөдөө аж ахуй, хүнсний салбар, эм, эмнэлэг, боловсрол, хүнд машин механизмын чиглэлээр үйл ажиллагаа явуулж буй компаниуд ирсэн” гэлээ.

Гадаад, дотоодын 100 гаруй ААН доорх нэр төрлийн бараа, бүтээгдэхүүн, үйлчилгээгээр оролцож байна.

47 дахь жилдээ зохион байгуулж буй үзэсгэлэнгийн нээлт маргааш 15:00 цагт Мишээл экспо төвд болно.