Month: September 2022

Төрийн ордонд “Халамжаас хөдөлмөрт” сэдэвт хэлэлцүүлэг болж байна. Уг хэлэлцүүлгийн үеэр УИХ-ын гишүүн, ХНХ-ийн сайд Д.Сарангэрэл илтгэл хэлэлцүүлэхдээ халамжаас болж хөдөлмөр эрхлэлт буураагүй, судлах шаардлагатай гэлээ. Түүний илтгэлийг тоймлон хүргэе.

-2020 онд ажил хийх боломжтой боловч ажил хийхгүй байгаа 207800 хүн байсан. Үүний 87.8 мянга хүн нь ажилгүй, 70.7 мянга нь боломжит ажиллах хүч, 49.4 мянга нь ажил хийх хүсэлтэй ч ажил хайгаагүй хүн байна. Нөгөө талд ААН-үүдийг 20 орчим хувь нь ажиллах хүчний дутагдалд орсон. Өөрөөр хэлбэл, ААН-үүдэд 40 мянга орчим ажлын байр байхад ажиллах хүн олдохгүй байгаа юм.

-Улс төрийн түвшинд халамжийн бодлого хавтгайрсан учраас хүмүүс ажил хийх сонирхолгүй болсон гэж тайлбарлаж байна. Гэтэл таван хүүхэдтэй нэг өрх, хүүхдийн 500 мянган төгрөгөөр өрхийнхөө нийт зардлаа, эрүүл мэнд, боловсрол, хүүхдийн хэрэгцээг бүгдийг нь хангаж байгаа гэж бодохгүй байна. Үүнд дүгнэлт хийх ёстой.

-Хүмүүс яагаад ажил хийх сонирхолгүй болоод байгааг судлах хэрэгтэй. Судалсны үндсэн дээр дэлхийн улс орнууд тэрхүү асуудлыг хэрхэн шийдсэнийг мөн судлах шаардлагатай.

-Халамж хавтгайрчихлаа, үүнийгээ зогсоочихвол хүмүүс ажил хийж эхэлнэ гэж хөнгөн хуумгай хандаж халамжийг зогсоох ёсгүй.

-Иргэд ажлын талбарт гологдож байна. Тиймээс хүмүүсийг ямар нэг зүйлийг сайн хийдэг болгоход сургах хэрэгтэй.

-Монголчууд гадаадад маш сайн ажилладаг. Монголын ажиллах хүч шиг өндрөөр үнэлэгддэг улс орны иргэд ховор байна. Тэгэхээр Монголчууд иргэдийнхээ хүсэн хүлээсэн цалин, ажлыг нь өгөхгүй байгаа юм. Үүнд л анхаарах ёстой.

-Халамжийг хавтгайруулахаа больж, хэрэгтэй хүнд л өгнө.

-Нэн ядуу 1500 өрхийг эхний ээлжинд ядуурлаас гаргана. Ингэхдээ Баянзүрх, Чингэлтэй, Сонгинохайрхан дүүргээс өрхөө сонгоод тухайн гэр бүлийн хөдөлмөр эрхлэх чадвартай 18-55 насны иргэнийг үсчний мэргэжил эзэмшүүлж, шаардлагатай тоног төхөөрөмжийг нь авч өгч, суудал түрээслүүлээд суулгана. Энэ ажил арваннэгдүгээр сараас эхэлнэ. Энэхүү загвар амжилттай болвол ядуурлаас гарах загварыг гаргах юм.

-Орон нутагт ажлын байр бий болгоход чиглэсэн санхүүжилтийг олгоно.

Цаашид Хөдөлмөр, нийгмийн хамгааллын яам үндсэн дөрвөн чиглэлд анхаарч ажиллана гэж мэдэгдлээ.

-Төрийн албаны цалин хөлсийг шинэчилж, 2023 оны төсөвт суулгана. Энэ талаар Сангийн яамтай хамтран ажиллана.

-Тэтгэврийн шинэчлэлийг хийнэ.

-Халамжаас хөдөлмөрт шилжинэ.

-Хүн амын хөгжлийн бодлогыг хэрэгжүүлнэ.

ЦЕГ-ын Мөрдөн Байцаах Албаны Залилах гэмт хэрэг, мөрдөн шалгах хэлтсийн дарга Б.Нямсүрэн Бэлтэс мөрөн компанитай холбоотой хэрэгт хэчнээн иргэн хохирсон талаар мэдээлэл өгөв.

Тэрбээр “Хөвсгөл аймагт үйл ажиллагаа явуулж байсан Бэлтэс мөрөн компани нь иргэдийн мөнгийг өсгөж өгнө хэмээн 15-100%-ийн хүүтэйгээр иргэдээс мөнгө татан төвлөрүүлсэн хэрэгт тус аймгийн Цагдаагийн газар Эрүүгийн хуулийн тусгай ангийн 17.3.2 дахь хэсэгт зааснаар хэрэг бүртгэлтийн хэрэг нээж шалгасан.

Шалгалтын явцад цагдаагийн төв газраас ажлын хэсгийн мөрдөн байцаагч нар Хөвсгөл аймагт ажиллаж, улмаар Бэлтэс мөрөн компанийн үйл ажиллагааг зогсоож, холбогдох шалгалтыг хийн 2022 оны тавдугаар сарын 9-ний өдөр тус компанийн удирдлагад ажиллаж байсан нэр бүхий найман хүнийг яллагдагчаар татаж, цагдан хорих таслан сэргийлэх арга хэмжээ авч мөрдөн шалгах ажиллагааг явуулсан.

Мөрдөн шалгах ажиллагааны явцад нийт 13 мянган иргэнээс мөнгө татаж, 2,549 иргэнд 45.3 тэрбум төгрөгийн хохирол учирсан нь тогтоогдсон. Үүнээс мөнгө өсгөж авсан 1,600 иргэнийг иргэний хариуцагчаар татсан. Бэлтэс мөрөн компанийн захирал болон ажилчдын нэр дээр байсан 13 тээврийн хэрэгсэл, 12 үл хөдлөх хөрөнгийг прокурорын зөвшөөрлөөр хураан авсан.

Урьдчилсан байдлаар 2,549 иргэнд 45.3 тэрбум төгрөгийн хохирол учирсан. Үүнээс мөнгө өсгөж авсан 1,600 хүнийг эрүүгийн хариуцлагаар татаж мэдүүлэг авахад 11.1 тэрбум төгрөгийг буцаан авахаар тогтоогдож байна.

Уг хэргийг аравдугаар сард багтаан шүүхэд шилжүүлэх саналтай ажиллаж байна” гэв.

Тус компани нь Монгол Улсад үйл ажиллагаа явуулж буй ХААН, Төрийн банк, ХХБ зэрэг бүх банкаар дамжуулан иргэдээс мөнгө татан төвлөрүүлсэн нөхцөл байдал тогтоогджээ.

Бэлтэс мөрөн компани нь газар тариалан, сүү, сүүн бүтээгдэхүүний чиглэлээр үйл ажиллагаа явуулж байсан. Дэлхий дахинд понзын систем гэж нэрлэгддэг буюу нэг хүнээс мөнгө өсгөж аваад буцаан өсгөж өгөх маягаар иргэдийг хуурч мэхэлсэн үйлдлийн аргатай байсныг тэрбээр хэллээ

Прокурорын байгууллага өнгөрсөн долоо хоногт мөрдөн байцаалтын 2,486 хэрэгт хяналт тавьж, 267 хэргийг яллах дүгнэлт үйлдэн шүүхэд шилжүүлж шийдвэрлэлээ.

Тодруулбал,

• Эрүүл мэндийн халдашгүй байдлын эсрэг 154
• Өмчлөх эрхийн эсрэг 89
• Авлигын 12
• Амьд явах эрхийн эсрэг 11
• Бэлгийн эрх чөлөө халдашгүй байдлын эсрэг 11 хэргийг шүүхэд шилжүүлсэн байна.

Түүнчлэн хөдөлгөөний аюулгүй байдал, тээврийн хэрэгслийн ашиглалтын журмын эсрэг 36, хүрээлэн байгаа орчны эсрэг тав, мөнгө угаах хоёр, татвар төлөхөөс зайлсхийх, орчиндоо аюул учруулж болох амьтныг зохих хамгаалалтгүй байлгах тус бүр нэг гэмт хэргийг шүүхэд шилжүүлсэн талаар Улсын Ерөнхий Прокурорын Газраас мэдээлэв.

Мэргэжлийн хяналтын байгууллагаас сургуулийн орчинд худалдаалагдаж буй хүнсний бүтээгдэхүүний чанар, аюулгүй байдалд урьдчилан сэргийлэх шалгалт хийлээ. Шалгалтад ерөнхий боловсролын сургуулийн орчинд үйл ажиллагаа эрхэлж буй 904 жижиглэн худалдааны газар хамрагдсан байна. Нийт хамрагдсан газрын 152 буюу 17 хувь нь түргэн үйлчилгээний цэг бөгөөд эдгээрийн 147 буюу 97 хувь нь нийслэлд үйл ажиллагаа явуулж байна.

Шалгалтын явцад 1442 зөрчлийг илрүүлэн 1004 буюу 69.6 хувийг арилгуулж, улсын байцаагчийн 256 заалттай 58 албан шаардлагаар зөрчил арилгуулах хугацаатай үүрэг өгч, 28 акт, 23 дүгнэлт, 29 албан даалгавар, 86 зөвлөмж үйлдэж, 65 газрын үйл ажиллагааг зогсоож, 34 газрын үйл ажиллагааг сэргээсэн байна.

Нийт шалгагдсан газруудын:

-330 буюу 36.5 хувь нь шошгын мэдээлэл шаардлага хангаагүй, буруу шошголсон, хэлний зөрчилтэй,

-233 буюу 26 хувь нь хүүхдэд худалдаалахыг хориглосон хүнс худалдаалсан,

-221 буюу 24.4 хувь нь жижиглэн савласан хүнсний бүтээгдэхүүний шошгод ХБАБХТХ-ийн 12.4-д заасан мэдээллээс гадна жижиглэн савласан он, сар, өдрийг бичээгүй,

– 215 буюу 24 хувь нь хадгалах болон хэрэглэж дуусах хугацаа хэтэрсэн хүнсний бүтээгдэхүүн худалдаалсан,

– 121 буюу 13.4 хувь нь хадгалалтын горим, нөхцөл шаардлагыг мөрдөөгүй,

-74 буюу 8.2 хувь нь гарал үүсэл тодорхой бус, гарал үүсэлгүй,

-68 буюу 7.5 хувь нь баталгаажилтгүй, хориглосон сав баглаа боодол, нийлэг хальсан уут хэрэглэсэн зэрэг зөрчлүүд нийтлэг илэрсэн байна.

Шалгалтын явцад чанар, аюулгүй байдлын шаардлага хангаагүй 111 нэр төрлийн 1740.2 мянган төгрөгийн, хэрэглэж дуусах хугацаа хэтэрсэн 201 нэрийн 1597.0 мянган төгрөгийн хүнсийг устгуулахаар захиргааны журмаар хураагдсан эд зүйлийг үнэлэх, улсын орлого болгох, устгах захиргааны зөвлөлд шилжүүллээ.

21 аймаг, нийслэлийн Мэргэжлийн хяналтын газраас 1052 хүнд сургуулийн орчинд ХҮҮХДЭД худалдаалахыг хориглосон хүнсний бүтээгдэхүүний жагсаалтыг түгээж, хориглосон бүтээгдэхүүний хор уршгийн талаар 990 хүнд мэргэжил арга зүйн зөвлөгөө өгч, 758 худалдаа эрхлэгчид зөвлөн туслах үйлчилгээ үзүүлж, “Хүүхдэд худалдаалахыг хориглосон хүнс”-ний талаарх сэрэмжлүүлэг, зөвлөмжийг 779 газарт байршуулан болзошгүй эрсдэлээс урьдчилан сэргийлж ажилласан байна.

ОХУ-ын иргэн монгол иргэнд халдсан гэх гэмт хэргийн талаар Цагдаагийн байгууллагаас мэдээлэл өгч байна.

ЦЕГ-ын ХМТ-ийн дарга, цагдаагийн хурандаа Б.Баатархүү “Гадаад улсын иргэд гэмт хэрэг үйлдээд хүндрээд буй асуудал байхгүй.

ОХУ-ын иргэнтэй холбоотой мэдээллээр ар гэрээс нь цахим орчинд мэдээлэл өгсөн. Зөрүүтэй мэдээлэл гарсан.

Бодит явдлыг хэлбэл есдүгээр сарын 22-23-нд ОХУ-ын иргэн Д Монгол Улсад ирсэн. Тэрбээр хил дээр танилцсан иргэний байрыг түрээслэхээр 24-нд уг газарт ирсэн. Тухайн Монгол Улсын иргэний танил болох Г-ийн гэрт орсон байна. Гэрт Монгол Улсын гурван иргэн, ОХУ-ын нэг иргэн байсан. Мөрдөн шалгалтын ажиллагаа хийгдэж байна.

Эхний байдлаар тухайн хүмүүс согтууруулах ундааны зүйл хэрэглээд анх танилцсан болон найзтайгаа гараад явсан гэж тайлбарлаж буй. Гэрт Монгол Улсын иргэн Г, ОХУ-ын иргэн Д нар үлдсэн. Энэ үед иргэн Г-ийн биед халдсан байж болзошгүй нөхцөл байдал тогтоогдож байгаа. ОХУ-ын иргэнийг 48 цаг саатуулах арга хэмжээг өчигдөр авч хэрэгжүүлсэн. Мөн гэрт байсан Монгол Улсын хоёр иргэнийг саатуулсан. Мөрдөн шалгах ажиллагааны явцад гэмт хэрэг үйлдэх болсон шалтгаан тодорхой болох байх.

Зарим хэвлэл мэдээллийн хэрэгслээр ОХУ-ын Элчин сайдаас асууна гэх ташаа мэдээлэл гарсан байна. Тухайн иргэн ямар нэгэн дипломат эрх ямба байхгүй. Уг иргэнийг саатуулах үйл ажиллагаа оройтсоныг хүмүүс буруугаар ойлгосон байх. Үүнд тайлбар өгөхөд гадаадын иргэн учир тайлбар мэдүүлэг авахад хэлмэрчийг оролцуулах үйл ажиллагаа явагдаад Баянгол дүүргийн цагдаагийн газарт мөрдөн шалгах ажиллагаа үргэлжилж байна” гэв.