Ерөнхий сайд Л.Оюун-Эрдэнэ өнөөдөр ДЭМБ-ын Монгол дахь Суурин төлөөлөгч Др Сергей Диордицагийн бүрэн эрхийн хугацаа дуусгавар болж, нутаг буцаж байгаатай холбоотойгоор хүлээн авч уулзан талархал илэрхийллээ.

Тэрбээр манай улсад таван жил ажиллахдаа эрүүл мэндийн салбарт томоохон төслүүдийг хэрэгжүүлж, Монгол Улсын Засгийн газрын бодлогыг дэмжин ажилласан юм.

Энэ үеэр Ерөнхий сайд Л.Оюун-Эрдэнэ “Ковид-19” цар тахалтай тэмцэх амаргүй ажилд Монгол Улсад олон улсын байгууллагуудын дэмжлэг туслалцааг зохицуулахад өндөр хувь нэмэр оруулж, 40 мянган хүний амь насыг болзошгүй эрсдэлээс хамгаалсан танд талархал илэрхийлье гээд цар тахлыг хүндрэл багатай даван туулахад та бүхний оролцоо их байсан гэдгийг хэллээ.

Үүний хариуд Суурин төлөөлөгч Др Сергей Диордица “Амаргүй цаг хугацаанд та бид олон амжилтыг хамтдаа бүтээлээ. Цаашдын хамтын ажиллагаа улам өргөжин тэлнэ гэдэгт итгэлтэй байна. Монгол Улс эрүүл мэндийн анхан шатны тусламж үйлчилгээг бэхжүүлэх стратегийн алсын хараатай ажиллаж ирсэнд баяр хүргэмээр байна. Таны тэргүүлсэн Засгийн газрын үед энэ ажлыг далайцтай хийж байгаа нь магтууштай. Цар тахлын үед авч хэрэгжүүлсэн арга хэмжээ тань бусад улс оронд үлгэр жишээ сайн туршлага болсон” гэлээ.

Төр, хувийн хэвшлийн хамтын ажиллагааны хүрээнд хэрэгжүүлж буй “НИК” ХХК, “Петровис ойл” ХХК нь нийгмийн хариуцлагын хүрээнд орон нутагт нүхэн жорлонгийн хэрэглээг бууруулах, байгальд ээлтэй эко бие засах газар байгуулахад хамтран ажиллах санамж бичигт БОАЖ-ын Дэд сайд Г.Түвдэндорж гарын үсэг зурлаа.

Тус төслийг үндэсний хэмжээнд зохион байгуулах ба 21 аймагт үйл ажиллагаа явуулдаг шатахуун түгээх цэгүүдээрээ дамжуулан хэрэгжүүлэх юм.

Орон нутаг, алслагдсан дүүрэг, хорооллын ШТС-ууд нүхэн жорлонтой, энэ нь байнга цоожтой байдаг нь иргэдэд бухимдал төрүүлдэг. Дээрх төсөл хэрэгжиж, жигдрээд ирвэл орон нутаг руу ая тухтай зорчих боломж нэмэгдэх юм.

Энэ оны долдугаар сард гадаадын 40 улсын 2,286 иргэнд цахим виз олгосон талаар Гадаадын иргэн, харьяатын газраас мэдээллээ. Тодруулбал,

• гадаадын 3,289 иргэнд визийн зөвшөөрөл
• гадаадын 1,038 иргэнд Монгол Улсын виз, мөн Evisa.mn системээр нийт 40 улсын 2,286 иргэнд цахим виз олгожээ.

Түүнчлэн эрх бүхий байгууллагын зөвшөөрлийг үндэслэн гадаадын 1,280 иргэнд Монгол Улсад оршин суух зөвшөөрөл олгож, 2,656 иргэний оршин суух зөвшөөрлийн хугацааг сунгасан байна. Мөн энэ сард нийт 865 аж ахуйн нэгж, байгууллагын 3,754 иргэний хүсэлтийг цахимаар хүлээн авч, хянан, шийдвэрлэжээ.

Улсын хэмжээнд наймдугаар сарын 1-ний өдрийн байдлаар нийт 138,946 тонн шатахууны нөөцтэй байгааг Уул Уурхай, Хүнд Үйлдвэрийн Яамнаас мэдээлэв.

Тодруулбал,

• А-80 автобензин 7,014 тонн буюу 42 хоногийн,
• АИ-92 автобензин 44,527 тонн буюу 33 хоногийн,
• АИ-95 автобензин 4,387 тонн буюу 33 хоногийн,
• Дизель түлш 81,191 тонн буюу 30 хоногийн, онгоцны түлшний 24 хоногийн нөөцтэй байна.

Харин Улаанбаатар хотын хэмжээнд нийт 64,509 тонн шатахууны үлдэгдэлтэй байгаагаас

• А-80 автобензин 1,131 тонн,
• АИ-92 автобензин 25,480 тонн буюу 27 хоногийн,
• АИ-95 автобензин 2,792 тонн буюу 38 хоногийн,
• Дизель түлш 33,507 тонн буюу 30 хоногийн хэвийн нөөцтэй байгаа юм.

Хан-Уул дүүрэг, Яармагийн замд явган хүний нүхэн гарц барьж байгуулах ажил эхэлж, авто замын хөдөлгөөнийг хэсэгчлэн хааснаас үүдэн ажил эхлэх, тарах цагт тухайн замын ачаалал ихсэж, түгжрэл ихээр үүсч байгаа.

Үүнтэй холбогдуулан 2022 оны 8 дугаар сарын 03-ний өдрөөс эхлэн Иргэний нисэхийн ерөнхий газар болон түүний харьяа салбар, нэгжийн ажил 07:30-д эхэлж, 16:30-д тардаг байх шийдвэрийг гаргалаа.

Мөн ажлын цагийн өөрчлөлттэй холбоотойгоор маргааш буюу энэ сарын 04-нөөс эхлэн ажилчдын нэгдсэн автобус зорчих хуваарьт ч өөрчлөлт орж байгаа юм байна.

v