Ерөнхий сайд Л.Оюун-Эрдэнэ Монгол Улсын Үндсэн хуулийн 39 дэх зүйлийн 4 дэх хэсэгт заасан бүрэн эрхийнхээ хүрээнд Засгийн газрын зарим гишүүдийг шинээр томилсон.

Хөдөлмөр, нийгмийн хамгааллын сайдаар Даваажанцангийн Сарангэрэл томилогдон өнөөдөр тангаргаа өргөж, үүрэгт ажлаа хүлээн авлаа.

Монгол Улсын шадар сайд С.Амарсайхан Хөдөлмөр, нийгмийн хамгааллын яаманд ирж шинээр томилогдсон сайдад тамга гардуулах ёслолд оролцлоо. Тэрбээр “Улсын их хуралд гурван удаа, сайдаар хоёр удаа болон байнгын хорооны даргаар ажиллаж байсан туршлагатай, манлайлагч сайд томилогдож байна. Засгийн газрын хүн төвтэй бодлого, Сэргэлтийн зургаан бодлогын Халамжаас-хөдөлмөрт, хөдөлмөрөөс-хөгжилд агуулгын хүрээнд ажиллаж шинэчлэлийг үргэлжлүүлэх ажлыг та бүхэнтэй хамтран хэрэгжүүлнэ гэдэгт итгэлтэй байна” гээд амжилт хүслээ.

Хөдөлмөр, нийгмийн хамгааллын сайд Д.Сарангэрэл “Нийгмийн бодлогын байнгын хорооны даргаар ажиллаж энэ салбарын хууль дүрэм, бодлогыг батлахад гар бие оролцож байсны хувьд цоо шинэ салбар биш юм. Тулгамдсан асуудал олон бий. Нийгмийн даатгалын багц хууль, тэтгэврийн шинэчлэл зэрэг хүлээгдэж буй асуудалд мэргэжлийн багтайгаа хамтран ул суурьтай, судалгаа тооцоотой гар нийлэн ажиллах болно. А.Ариунзаяа сайдын эхлүүлсэн олон ажлыг үр дүнтэйгээр үргэлжлүүлэхийн төлөө хичээн ажиллана” гэлээ хэмээн Хөдөлмөр, нийгмийн хамгааллын яамнаас мэдээлэв

Хичээлийн шинэ жил эхлэх гэж буйтай холбоотойгоор замын хөдөлгөөний ачаалал болон нийтийн тээврээр үйлчлүүлэх зорчигчдын урсгал ихсэж, Нийслэлийн Нийтийн тээврийн газраас автобусны тоог нэмэгдүүлэн ажиллаж байгааг Нийслэлийн Сургалт, судалгаа, олон нийттэй харилцах газраас мэдээллээ.

Тодруулбал, наймдугаар сарын 25-ны өдрөөс эхлэн ажлын өдрүүдээр 12 чиглэлд 15 автобус, амралтын өдрүүдээр таван чиглэлд зургаан автобус үйлчилгээнд нэмэлтээр явуулж байгаа юм.

Түүнчлэн хичээлийн шинэ жил эхлэх гэж буйтай холбогдуулан автомашинуудыг улсын дугаарын тэгш, сондгойгоор замын хөдөлгөөнд оролцуулах тухай Нийслэлийн Засаг даргын захирамж гарсан. Энэ хүрээнд Нийслэлийн Нийтийн тээврийн газраас нийтийн тээврээр үйлчлүүлэх зорчигчийн урсгал нэмэгдсэн дараах зургаан чиглэлд ес орчим автобусыг есдүгээр сарын 1-нээс эхлэн нэмж явуулахаар бэлтгэн ажиллаж байна. Үүнд:

• Ч:16А “Баруун салаа – Шинэ зам – 5 шар”
• Ч:72 “Богдхан амралт – Ар зайсангийн гудамж – Сүхбаатарын талбай”
• ХО:9 “Био-Сонсголон – 5 шар”
• ХО:11 “Хонхор – Ургах наран хороолол – Офицеруудын ордон”
• ХО:12 “Мал бордох – 5 шар”
• ХО:13 “Баруун түрүү /эцэс/ – 5 шар” гэсэн чиглэлүүд багтаж байгаа юм.

Бүгд Найрамдах Солонгос Улсын Гадаад хэргийн сайд Пак Жин-ий албан ёсны айлчлал өндөрлөлөө. Гадаад харилцааны яамны Төрийн нарийн бичгийн дарга Н.Анхбаяр, БНСУ-аас Монгол Улсад суугаа Элчин сайд Ли Ё Хун тэргүүтэй албаны хүмүүс “Чингис хаан” олон улсын нисэх онгоцны буудалд үдэж мордуулжээ. Солонгос улсын Гадаад хэргийн сайдын айлчлалын үеэр албан ёсны хэлэлцээ хийсэн. Үүнээс онцолбол визний нөхцөлийг хөнгөвчлөх, хоёр орны хооронд үйлдэгдэж буй нислэгийн тоог нэмэгдүүлэх асуудлыг ярилцсан юм.

Хичээлийн шинэ жилийн нээлтийн үйл ажиллагааг цар тахлын нөхцөл байдалтай холбоотойгоор сүүлийн хоёр жил зохион байгуулаагүй.

Харин энэ жилийн тухайд сургууль, цэцэрлэгүүд 2022-2023 оны хичээлийн шинэ жилийн нээлтээ хийж, Чингис хааны эш хөргийг зална хэмээн албаны эх сурвалж хэллээ.

Үндэсний статистикийн хорооны сангийн мэдээллээс харвал 2021 оны байдлаар манай улсад ерөнхий боловсролын 848 сургууль, 1,453 цэцэрлэг байна