Month: August 2022

Шүүгдэгч И.Мөнхжаргалд/Ардчилсан Намын Ерөнхий нарийн бичгийн дарга/ холбогдох эрүүгийн хэргийг Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүх 2022 оны долдугаар сарын 8-ны өдөр хүлээн авч мөн оны наймдугаар сарын 1-ний өдөр хянан хэлэлцэхээр товлон зарласан байв.

Гэвч хохирогчийн өмгөөлөгч Э.Туулаас “…Ковид-19 өвчний халдвар авч эмчилгээ хийлгэж байгаа тул шүүх хуралдааныг хойшлуулж өгнө үү…” гэх хүсэлтийг мөн улсын яллагчаас “…Шүүх хуралдаанд хохирогч Монгол Ардын Намын итгэмжлэгдсэн төлөөлөгч Ү.Амарбатыг биечлэн оролцуулах…” тухай хүсэлт тус тус гаргасныг шүүх хүлээн авчээ.

Ингээд түүнд холбогдох хэргийг хянан хэлэлцэх шүүх хуралдааныг 2022 оны наймдугаар сарын 17-ны өдрийн 11:00 цаг хүртэл хугацаагаар хойшлуулсан байна.

Харин дараагийн шүүх хуралдаан хүртэл шүүгдэгч И.Мөнхжаргалд авсан хувийн баталгаа гаргах таслан сэргийлэх арга хэмжээг хэвээр үргэлжлүүлэхээр шийдвэрлэжээ.

Монгол Ардын Намын алдар нэрд халдсан гэх асуудлаар түүнд хэрэг үүсгэжээ.

Эх сурвалж: Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхийн Тамгын Газар

ХБНГУ-ын экстрем спортын тамирчин Гийдо Кунзе нь Гиннесийн дээд амжилтыг шинээр тогтоох зорилгоор энэ оны 8 сарын 5-аас Монгол орны баруун хязгаараас зүүн хил хүртэл /Улаангом – Архангай – УБ – Багануур – Баруун-Урт – Бичигтийн боомт/ 2400 км-ийг уулын дугуйгаар хамгийн богино хугацаанд буюу 7 хоногт аялна.

Энэхүү аяллыг хийснээр Монгол Улс төдийгүй Монголын дугуйн спорт аяллыг дэлхийд сурталчлах үнэ цэнтэй бүтээл болох юм. Экстрем спортын аяллын үеэр Германы телевизийн уран бүтээлчид бичлэг хийж, Монголын “Боролдой” студитэй хамтран баримтат кино хийн, олон нийтэд мэдээлж, сурталчлах юм.

Экстрем аялагч Гийдо Кунзегийн Гиннесийн дээд амжилтыг шинэчлэн тогтоох эл аяллыг зохион байгуулах, бэлтгэх бүхий л ажлыг УИХ-ын гишүүн, Монголын дугуйн холбооны Дэд Ерөнхийлөгч Ц.Мөнхцэцэг, Монголын дугуйн холбоо, Зам тээврийн яам, Нийслэлийн ЗДТГ хамтран хариуцан ажиллаж байна.

Гийдо Кунзе нь сүүлийн 10 жилд дэлхийн хэд хэдэн дээд амжилтыг тогтоосон байна. Тодруулбал, Австралийн баруун хязгаараас зүүн тийш 4200 км замыг хамгийн богино хугацаанд, дэлхийн хамгийн өндөр галт уул болох Чилийн Атакама цөл дэх Ожос де Саладо галт уул хүртэл 6233 метрийн өндөрт гарч мөн Альпийн нурууг 14 хоногийн дотор 100,000 босоо метрийг туулсан, Хятадын Цагаан хэрэм дээр дугуйгаар хамгийн хол зайг туулсан зэрэг дэлхийн дээд амжилтуудыг эзэмшдэг Төмөр тамирчин /Iron men/ билээ.

Экстрем дугуйчин Гийдо Кунзегийн аяллын талаарх хэвлэлийн бага хурал 2022 оны 8 сарын 02-ны 11:30 цагт Кемпинский зочид буудалд болно.

Улаанбаатар хотын Захирагчийн ажлын алба /УБЗАА/-наас коронавируст халдвараас урьдчилан сэргийлэх, орчны бохирдлыг бууруулах зорилгоор автобусны буудлуудыг угааж, халдваргүйжүүлэх ажлыг өнөөдрөөс эхлүүллээ.

Энэхүү ажлын хүрээнд төвийн зургаан дүүргийн 220 автобусны буудлыг сард найман удаагийн давтамжтайгаар угааж, халдваргүйжүүлэх бөгөөд аравдугаар сарын 15-ны өдрийг хүртэл үргэлжлэх юм.

Дээрх ажлыг тусгай зөвшөөрөлтэй мэргэжлийн байгууллагууд гүйцэтгэж байна гэж Улаанбаатар хотын Захирагчийн ажлын албанаас мэдээллээ.

Сүүлийн жилүүдэд цусны даралт ихсэх өвчин эрс залуужиж, хүн амын дунд хурдтай тархаж буй нь хөдөлгөөний хомсдол, жингийн илүүдэл, зохисгүй хооллолт, амьдралын буруу хэв маяг, стресс зэргээс үүдэлтэйг эмч мэргэжилтнүүд онцолдог бөгөөд энэ нь монголчуудын нас баралтын тэргүүлэх шалтгаан болсон зүрх судасны өвчлөлд нөлөөлдөг гол хүчин зүйл юм.

Тиймээс иргэдийнхээ эрүүл мэндийн төлөөх үйлсэд хувь нэмрээ оруулахаар ХААН Банк нийгмийн хариуцлагыг хэрэгжүүлэгч ХААН Банк Сангаараа дамжуулан “Цусны даралт ихсэлтийн эсрэг аян”-ыг өдгөө зургаа дахь жилдээ зохион байгуулж байна.

Цусны даралт ихсэх өвчнөөс урьдчилан сэргийлэх, иргэдийг үзлэг оношилгоонд хамруулах, мэдлэг мэдээлэл олгох зорилготой энэхүү аяныг ХААН Банк Сан, П.Н.Шастины нэрэмжит Улсын 3-р төв эмнэлэг (УГТЭ), Нийгмийн эрүүл мэндийн үндэсний төв (НЭМҮТ) хамтран зохион байгуулж, нийт 16 мянган хүнийг үнэ төлбөргүй үзлэг, оношилгоонд хамруулжээ

“Цусны даралт ихсэлтийн эсрэг аян-2022” өнгөрөгч 6-р сард Өмнөговь, Дорноговь аймагт амжилттай хэрэгжсэн бол энэ сард Орхон, Сэлэнгэ аймагт үргэлжилж байна. Аяны хүрээнд Орхон аймагт иргэдийн эрсдэлийг үнэлэн, зөвлөгөө өгч, зорилтот бүлгийн иргэдэд зүрх судас, зүрхний шигдээс, мэдрэл, тархины цус харвалт, бөөр, хоол боловсруулах замын эмгэгийн төрөлжсөн мэргэжлийн эмч нарын үзлэгт хамруулж буй. Мөн аймгийн эмч, мэргэжилтнүүдийг орчин үеийн эмчилгээний аргазүйгээр хангах танхимын сургалтыг зохион байгууллаа. Түүнчлэн 2022 оны 8-р сарын 3-наас 5-ны өдрүүдэд Сэлэнгэ аймгийн иргэдийг эрт илрүүлэг, үзлэг оношилгоонд хамруулан, эрүүл мэндийн боловсрол олгоно.

Ташрамд, аяны цар хүрээ жилээс жилд тэлж буйтай холбогдуулан өнгөрсөн баасан гарагт ХААН Банк, Улсын 3-р төв эмнэлэг, НЭМҮТ, Монголын үндэсний олон нийтийн радио телевиз (МҮОНРТ)-ын удирдлагууд хамтын ажиллагааны санамж бичигт гарын үсэг зурсан юм. Иргэдэд эрүүл мэндийн мэдээ мэдээлэл түгээх, боловсрол олгосноор өвчнөөс урьдчилан сэргийлэх чиглэлд энэ жилээс МҮОНРТ уг аянд нэгдэж, хамтран ажиллахаар боллоо.

Хамтын өсөлт төгөлдөр-ХААН Банк

Нийслэлийн удирдах ажилтны шуурхай зөвлөгөөн 2022 оны 8 дугаар сарын 01-ний өдөр болж, Нийслэлийн Эрүүл мэндийн газрын дарга Б.Бямбадорж мэдээлэл хийсэн. Тэрбээр танилцуулгынхаа эхэнд нийслэлийн эрүүл мэндийн салбарын ажилтнууд эрүүл мэндийн үндсэн тусламж үйлчилгээний зэрэгцээ томуу төст өвчний тусламж үйлчилгээ, Ковид-19-ийн хариу арга хэмжээ зохион байгуулахын дээр нийт иргэдийг урьдчилан сэргийлэх, эрт илрүүлэг үзлэгт хамруулах гэхчлэн үндэсний хэмжээний үйлчилгээ үзүүлж, ачаалал ихтэй байгааг онцолсон юм.

Урьдчилан сэргийлэх, эрт илрүүлэг үзлэгийг дүүргийн эрүүл мэндийн төв, нэгдсэн эмнэлэг, УНТЭ, УХТЭ, УГТЭ, ЭХЭМҮТ, ЭНЭҮТ-2, ХӨСҮТ, Монгол-Японы эмнэлэг, Амгалан амаржих газрууд болон 159 өрхийн эрүүл мэндийн төв, хувийн хэвшлийн нийт 49 эмнэлэгт зохион байгуулан ажиллаж байна. Эрт илрүүлэгт нийслэлийн нийт хүн амын 8.7 хувь нь хамрагдаад байгаа бөгөөд тав хүртэлх насны хүүхдийн 25.2 хувь, 6-17 насны хүүхдүүдийн 44.8 хувь нь хамрагджээ. Илрүүлэг үзлэгт орсон 280 хүнээс хавдрын сэжигтэй тохиолдол илэрсэн байна.

Сүүлийн 24 цагийн дотор улсын хэмжээнд 468 халдварын тохиолдол бүртгэгдсэн байна. Цар тахлын анхны тохиолдол бүртгэгдсэнээс хойш Улаанбаатар хотод 518942 хүнд Ковидын халдвар батлагдсан мэдээ гарчээ. Сүүлийн үед дэлгэрээд буй “Омикрон ВА.4: ВА.5” хувилбарын хувьд халдварлах нууц хугацаа богино /2.5 хоног/, халдвар тараах чадвар өндөртэй, өвчний эмнэлзүйн шинж тэмдэг харьцангуй хөнгөн ч эрсдэлт бүлгийн хүн ам олноороо зэрэг өвдөх эрсдэлтэйг санууллаа.

Нийслэлд тав хүртэлх насны хүүхдүүд, жирэмсэн эхчүүд, өндөр настай хүмүүс хатгаагаар өвдөж буй ажээ. Харин эрчимт эмчилгээ хийлгэх хэмжээнд хүрч хүндрэх нь харьцангуй бага боловч халдвар томуу, томуу төст өвчинтэй зэрэгцэн гарч байгааг НЭМГ-ын дарга тодотгосон. Иргэд ӨЭМТ-ийг зорихоос илүүтэй шууд эмнэлэгт хэвтэх сонирхолтой байгаа аж. Энэ нь ӨЭМТ-өөс эмчилгээний багц өгөхгүй байгаатай холбоотой юм. Түүнчлэн PCR шинжилгээ хамтын төлбөрийн хэлбэрт шилжиж тодорхой хувийг иргэн төлж байгаагаас шинжилгээнд хамрагдахдаа хойрго байгаа ажээ. Шинжилгээ өгсөн иргэдийн 10.6 хувьд халдвар батлагдаж буй юм. Өнөөдрийн байдлаар дархлаажуулалтын суурин 12 цэг, явуулын хоёр цэг нийслэлд ажиллаж байна. Явуулын цэг нь Сүхбаатарын талбай болон Шангри-Ла худалдааны төвд ажиллаж буй юм. Нийслэлийн хэмжээнд 24 цагийн турш ажилладаг 40 эмийн сан байна.