Month: June 2022

УИХ-ын Нийгмийн бодлогын байнгын хорооноос “Чанар стандартын шаардлага хангаагүй барилгын материалаас ялгарч буй химийн нэгдэл нь хүний биед сөрөг нөлөө үзүүлдэг.

Багтраа, амьсгал, зүрх, судасны өвчнөөр өвчлөх, хавдар үүсгэх эрсдэлийг нэмэгдүүлдэг төдийгүй бага насны хүүхдийн эрүүл мэндэд гадаад болон дотоод орчны агаарын чанар шууд нөлөөлж байдаг”-тай холбогдуулан Монгол Улсын иргэд, хүүхэд багачуудын эрүүл, аюулгүй орчинд амьдрах, сурах, ажиллах эрхийг хангах зорилгоор Хүний эрх, эрх чөлөөг хангахтай холбоотой хяналтын сонсголыг зургаадугаар сарын 6-ны өдөр зохион байгуулахаар товлож байсан ч хойшлогдлоо.

Сонсголыг зургаадугаар сарын 13-ны өдрийн 14:00 цагаас “Их эзэн Чингис хаан” танхимд зохион байгуулах болжээ.

Залилан мэхлэх гэмт хэргээс сэрэмжлүүлж байна.

Тодруулбал, улсын хэмжээнд энэ оны эхний тавдугаар сард залилах гэмт хэрэг 5,523 бүртгэгджээ. Энэ нь өнгөрсөн оны мөн үеэс 18 хувиар өссөн үзүүлэлт бөгөөд сүүлийн таван сард нийт бүртгэгдсэн 16,850 гэмт хэргийн 32.8 хувийг дангаар эзэлж буй үзүүлэлт юм.

Иргэдэд их хэмжээний хохирол учруулсан энэ төрлийн гэмт хэргээс дурдвал:

1. 2020-2022 оны хооронд барилгын компанийн захирал Б, гүйцэтгэх захирал С нар бүлэглэн барилгын компаниудад арматур нийлүүлж итгэл төрүүлэн бартерын гэрээ байгуулан баригдах барилгын борлуулж буй ханшнаас нь хямд худалдах тухай үл хөдлөх компаниар зар тавиулж, улмаар 28 иргэнд 1.5 тэрбум төгрөгийн хохирол учруулж залилжээ.
2. Хуурамч зар сурталчилгаа ашиглаж, хил гаалиар бараа орж ирэх нь удаашралттай байгааг далимдуулж, 2021 онд тээвэр зуучлалын компани шинээр байгуулж, 10 орчим байгууллагаас 700 сая төгрөгийн хохирол учруулж залилсан байна.
3. Цахим орчинд “Миний хүүхдэд туслаач” гэж тавьсан хандивын аяны зарыг ашиглаж, тухайн зургийн дансны оронд өөрийнхөө дансыг байршуулан тарааж, өдөрт 200,000 төгрөг, тав хоногт 1.8 сая төгрөг залилсан хэрэг бүртгэгджээ. Тухайн гэмт хэргийг Хан-Уул дүүргийн нэгдүгээр хорооны оршин суугч, 18 настай хүү үйлдсэн нь тогтоогдсон байна. Хандивын аяны дагуу тус этгээдийн данс руу иргэд 5,000-50,000 төгрөг өдөрт шилжүүлдэг байсан нь шалгалтын явцад тодорхой болжээ.

Энэ мэт залилах гэмт хэрэгт иргэд, аж ахуйн нэгжүүд хохирох нь сүүлийн үед ихсэж байгаа тул аливаа эд хөрөнгө, бэлэн мөнгө бусад руу шилжүүлэх үедээ мэргэжлийн байгууллага, хуульч, өмгөөлөгчөөс зөвлөгөө авч сайтар нягталж, тунгаахыг зөвлөж байна.

Дэлхийн зах зээлд үүссэн газрын тосны үнийн өсөлттэй холбоотойгоор 2022 оны дөрөвдүгээр сард ОХУ-аас манай улсад нийлүүлэх АИ-92 авто бензиний үнэ тонн тутамдаа 1,110 ам.доллар, Дизелийн түлш тонн тутамдаа 1,077 ам.доллар болж, өмнөх сарын импортын хилийн үнээс тус бүр 170 ам.доллароор нэмэгдсэн юм. Тухайн сард Брент төрлийн газрын тосны арилжааны үнэ баррель нь 98.48-107.4 ам.долларт хэлбэлзэж байв.

Дэлхийн зах зээлд ийнхүү газрын тосны үнэ өссөний улмаас манай улсын өргөн хэрэглээний АИ-92 авто бензин болон Дизель түлшний үнэ огцом нэмэгдэх эрсдэл үүссэн. Харин Монгол Улсын Засгийн газар 161 дүгээр тогтоол баталснаар АИ-92 авто бензиний гаалийн албан татварыг ирэх наймдугаар сарын 1-н хүртэл, Дизель түлшний онцгой албан татварыг 2022 он дуустал тэглэсэн.

Үүний үр дүнд АИ-92 авто бензиний үнэ литр тутамдаа 900 төгрөгөөр нэмэгдэх байсан үнийн өсөлтөөс сэргийлж, жижиглэнгийн борлуулалтын үнийг 2,390 төгрөгт барьсан бол Дизель түлшний хувьд 600 төгрөгөөр нэмэгдэх байсан эрсдэлээс хамгаалсан шийдвэр болов.

Түүнчлэн УУХҮ-ийн сайд Г.Ёндон өнгөрөгч гуравдугаар сард ОХУ-ын “Роснефть” НХН-тэй хэлцэл хийсний үр дүнд тонн нь 1,110 ам.доллар байсан АИ-92 авто бензиний үнэ 270 ам.доллароор буурч, 4-6 дугаар сард тонныг нь 840 ам доллароор худалдан авах нөхцөлийг бүрдүүлсэн байна.

“Нэпко” компанийн эрхлэн гаргасан Япон улсын Хёого мужийн Нагао эмнэлгийн эрхлэгч, их эмч Нагао Казүхирогийн “Алхат: Алхах төдийд өвчний 90 хувь эдгэрнэ” номын нээлт зургаадугаар сарын 8-ны өдөр Төв аймгийн Зуунмод хотын Мөнх-Алдарын талбайд өнөөдөр боллоо.

“Алхалт: Алхах төдийд өвчний 90 хувь эдгэрнэ” ном нь Япон улсад Амазон сайтын Эрүүл мэндийн чиглэлийн номын төрөлд тэргүүлсэн бэстселлер ном юм. Нээлтийн үеэр “Нэпко” компанийн ТУЗ-ийн гишүүн Б.Болдбаатар, аймгийн Засаг даргын Тамгын газрын Нийгмийн бодлогын хэлтсийн дарга Д.Мөнхцэцэг нар үг хэлсэн бөгөөд аймгийн Эрүүл мэндийн газар, Биеийн тамир, спортын гаүрын аргазүйч нарын зааварчилгаагаар зөв амьсгалах, зөв алхах дасгалуудыг хийж, тогтоосон маршрутын дагуу өглөөний алхалтыг зохион байгууллаа. Өглөөний алхалтад аймгийн төрийн байгууллагууд болон Төв аймгийн явган алхалтын холбоо зэрэг байгууллага, иргэд идэвхтэй оролцов.

Чингэлтэй дүүргийн нутаг дэвсгэрт Тоёота приус 30 маркийн автомашин хоёр автомашин мөргөсөн зам тээврийн осол гарчээ.

Энэ талаар Тээврийн Цагдаагийн Албаны урьдчилан сэргийлэх ажил хариуцсан ахлах зохицуулагч Г.Отгонтамираас тодрууллаа.

Тэрбээр “Чингэлтэй дүүргийн 4 дүгээр хороо, Залуучуудын гудамж, “Сондор” дэлгүүрийн баруун замд “Приус 30” маркийн автомашин “Марк II”, “Приус 30” маркийн хоёр машиныг мөргөсөн осол цагдаагийн байгууллагад ирсэн.

Тухайн осол дээр Чингэлтэй дүүрэг дэх Цагдаагийн газрын Замын цагдаагийн хэлтсийн алба хаагч очсон бөгөөд хэргийн газрын үзлэг хийгдэж дууссан. Одоо зөрчлийн хэрэг нээгээд, шалгалтын ажил явагдаж байна. Шалгалтын ажиллагаа явагдаж байгаа тул урьдчилсан байдлаар ослын шалтгааныг таамаглаж хэлэх боломжгүй. Ослын улмаас хүн гэмтэж бэртсэн эсэх мэдээллийг эрүүл мэндийн байгууллагаас бидэнд өгөөгүй” гэлээ.

Н.Түвшинбаярт холбогдох хэргийн шүүх хурал Хан-Уул дүүргийн Эрүүгийн хэргийн анхан шатны шүүхэд болж байгаа билээ.

Шүүх хуралдаан эхлэх үеэр түүний өмгөөлөгч Л.Данзанноров хохирогчийн зүгээс гаргасан хохирол зардлыг төлсөн баримтыг танилцууллаа.

Тэрбээр “363 сая төгрөгийг өмнөх төлсөн хохирол дээрээ нэмж төлсөн баримт байна. Хохирогчийн сэтгэл санааны хохирлыг нөхөн төлөхөө илэрхийлсэн зарим баримтыг гаргаж өгч байгаа. Цаашдын амьжиргаа гэр бүл, үр хүүхдэд нь хэрэг болох болов уу гэсэн үүднээс өөрийн гэр бүлийн захиран зарцуулах эрхтэй хоёр үл хөдлөх хөрөнгийг шилжүүлэх талаар харилцан ярилцаж зөвшилцсөн. Энэ талаарх баримтуудыг гаргаж өгч байна” гэлээ.

Экологийн цагдаагийн албанаас Дорнод аймагт үйл ажиллагаа явуулж буй Шинь Шинь ХХК-д холбогдох хэргийн талаар болон Сэлэнгэ аймагт үйл ажиллагаа явуулдаг ойн ангиудад холбогдох хэргийн талаар мэдээлэл хийлээ.

Тус албаны дүн шинжилгээ,үнэлгээ шалгалтын хэлтсийн дарга хурандаа Т.Баатар “Холимог металлын орд эзэмшигч Шинь Шинь ХХК-д 2013 онд эрүүгийн хэрэг үүсгэн шалгаж байгаад хаагдсан. 2018 онд шалгагдаж байгаад, дахин шинжээч томилох тогтоолын дагуу 2020 оны арванхоёрдугаар сард газар дээр нь шинжилгээ хийж ажилласан.

Хөрс, ус гээд олон шинжилгээ хийх шаардлагатай учраас хариу удаж гарсан. Шинжилгээний дагуу холимог металлын орд газрыг хамарсан талбайн хөрсөнд хүнд металлын тархалт болон хаягдал усны далангийн шүүрлийн талбайд байгаль орчинд учруулсан хохирлын үнэлгээ нөхөн төлбөрийг тооцож, талбайн хөрсөнд хүнд металлаас учруулсан хохирол 427 сая төгрөг байна. Харин хаягдал усны далангийн шүүрлийн усанд учруулсан нөхөн төлбөр 245 сая төгрөг бөгөөд нийт байгаль орчинд 672 сая 652 мянган төгрөгийн хохирол учруулсан нь тогтоогдсон.

Тус албаны хүрээлэн буй орчны эсрэг гэмт хэргийг мөрдөн шалгах хэлтэст энэ хэрэг мөрдөгдөн, 2021 оны аравдугаар сараас эхлэн байгаль орчныг бохирдуулах гэсэн гэмт хэрэгт буруутай, нотлох баримт нь бүрдсэн гэж үзээд яллагдагчаар татах саналыг өгсөн. Үүний дагуу тус компанийг энэ оны гуравдугаар сард прокуророос яллагдагчаар татсан.

Уг компанийн Монгол талын захирлыг нь байцаан, яллагдагчаар татах тогтоолоо танилцуулсан. Улмаар уг хэргийг шүүхэд шилжүүлэх саналтай шилжүүлээд байна.

Эрүүгийн хэргийн мөрдөн шалгах ажиллагааны нууцад хамаардаг учраас прокуророос зөвшөөрөл авч, зөвшөөрсөн хэмжээнд мэдээлэл өгдөг.

Уг хэрэгт яллах дүгнэлт нь үйлдэгдсэн шүүхэд шилжихэд бэлэн байгаа. Шүүхийн шийдвэр гарахаас нааш хэн нэгнийг гэм буруутайд тооцож болохгүй.

Манай байгууллагын хувьд ямар ч авлига, ашиг сонирхлын зөрчил байхгүй. Харин ч бид нарт дүгнэлт буруу гэсэн шахалт шаардлага ирж байгаа. БНХАУ-ын Гадаад харилцааны яамнаас манай яамаар дамжуулан нот бичиг ирүүлж буй ч тохиолдол бий” гэсэн мэдээллийг өглөө.