Month: June 2022

Карибын тэнгисийн ёроолд гурван зууны өмнө живсэн домогт Сан Хосе хөлгийн дотор их хэмжээний алтан зоос хадгалагдаж байгааг Колумб улсын зэвсэгт хүчний тараасан гэрэл зураг харуулжээ.

Тус улсын эргээс холгүй тэнгисийн 950 метрийн гүн ёроолд уг хөлөг байгаа ба саяхан алсын удирдлагатай шумбагч машин илгээж, гэрэл зургуудыг буулгасан юм байна.

Гэрэл зурагт бас шаварт булагдсан үхэр буунууд, Хятад хийцийн аяга таваг, ваар, шилэн сав суулга дүрслэгджээ.

“Өндөр технологийн багаж хэрэгсэл, Колумбын тэнгисийн хүчний явуулсан ажиллагааны үр дүнд бид урьд өмнө нь хэзээ ч харж байгаагүй нарийвчлалтай гэрэл зургуудыг буулгаж чадлаа” гэж Колумб улсын ерөнхийлөгч Иван Дюк мэдэгдсэн байна.

Живсэн хөлгийн бүрэн бүтэн байдлыг хангаж, ирээдүйд татаж гаргах төлөвлөгөөтэй байгаагаа тэр бас хэлжээ.

Хэрвээ уг хөлгийг Колумб улс уснаас гаргаж чадвал Испани улсаас гадна Боливи улсын уугуул иргэд эзэмшлийн асуудлаар маргаан үүсгэх нь тодорхой болоод байгаа.

Тухайн үед Сан Хосе хөлөг шинэ тивээс их хэмжээний эрдэнэс ачаад Испанийн эзэн хаан Тавдугаар Филипийн ордныг зорьж явжээ.

Хөлөг дээр ачиж явсан зүйлсийн үнэлгээ одоогийн ханшаар олон тэрбум доллар болно гэж үздэг. Мэргэжилтнүүдийн тооцоолсноор уг хөлөг хамгийн багадаа 200 тонн алт, мөнгө, үнэт чулуу ачиж явсан юм.

Хөлөг живэх үедээ 600 хүнтэй байснаас маш цөөн тооны хүн амьд үлдсэн гэдэг.

Үе үеийн эрдэнэсийн эрэлчид Сан Хосе хөлгийг хайгаад олж чадаагүй байсан бөгөөд 2015 онд л хаана байгааг нь тогтоож байжээ.

Колумб улс хөлгийг өөрийнх нь эзэмшлийн уснаас олдсон тул соёлын үнэт олдвороо хэмээн үзэж, эд зүйлсийг нь худалдахгүй гэсэн байр суурьтай байгаа.

Испани улс хөлгийг өөрийнхөө эзэмшил гэж үзээд агуулж буй эрдэнэсийг нь шилжүүлж авах хүсэлтэй байна. Өмнөд Америкийн Боливи улсын Кара Кара омгийн уугуул иргэд колоничлолын үед испаничууд тэднийг уурхайд боолчлон ажиллуулж байсан тул эрдэнэсийг эзэмших эрхтэй гэж бас үздэг юм.

Гэвч тэнгисийн гүн ёроолоос хөлгийг татаж гаргах нь өнөөдрийн техник, технологийн хүчин чадалтай харьцуулахад нэлээд бэрхшээлтэй асуудал болоод байгаа.

Колумбын эрх баригчид Картагена хотын эргээс холгүй энэ газарт живсэн хөлгийн өөр 13 олдворыг илрүүлсэн байна.

АНУ-ын Монтана мужийн ойгоос дөрвөн настай хүү сураггүй алга болсныг орон нутгийн хэвлэлүүд мэдээлж байсан. Хүү хүйтэн цаг агаарт, бөглүү ойд хоёр хоногийг өнгөрөөсөн ба түүнийг эсэн мэнд олсон талаар “Daily Mirror” мэдээлэв.

Хүүг эсэн мэнд байсан ч “өлссөн, цангасан, даарсан” байсан гэж орон нутгийн цагдаа нар мэдээлэв.

Өнгөрсөн долоо хоногийн баасан гараг /2022.06.03/-т алга болсон аж. Хүүг аврагчдаас гадна кино судлаачид зэрэг 53 хүний бүрэлдэхүүнтэй баг эрж хайсан байна. Мөн нисдэг тэргүүд, дроныг дайчилсан байна.

Монтана мужийн шерифийн албаны мэдээлснээр, аянга цахилгаантай аадар бороо, ойн ургамал ногоо шигүү ургасан нь хүүг олох ажиллагаанд хүндрэл учруулсан ажээ. Хүүг ойд байх өдрүүдэд агаарын температур 4.4 хэм хүртэл буурсан байжээ. Хүү алга болох үеэрээ дан унтлагын хувцастай байжээ.

Испани улсын засгийн газар өчигдөр хоол хүнсний хаягдлыг бууруулах зорилготой шинэ хуулийн төслийг парламентдаа өргөн барих шийдвэр гаргажээ.

Ингэснээр тус улсад үйл ажиллагаа явуулдаг ресторан, зоогийн газрууд үйлчлүүлэгчдэдээ илүү гарсан хоолоо хийж авч явах савыг үнэгүй олгох үүрэг хүлээх юм байна.

Хэрвээ ийм боломжоор хангаагүй бол тухайн бизнесийн байгууллагыг торгож шийтгэхээр хуулийн төсөлд тусгажээ.

Үүнээс гадна супермаркет, дэлгүүрүүд хадгалах хугацаа нь дуусах дөхөж буй барааны үнийг бууруулах, ийм хүнсийг буяны үйлсэд хандивлах хууль эрх зүйн орчныг бүрдүүлсэн байна.

Хэрвээ хадгалах хугацаа нь нэгэнт өнгөрсөн бол тухайн хүнсийг мал амьтны тэжээл болгох, бордоо, био түлшний түүхий эд болгох журмыг бас хуульд тусгасан байна.

Испани улсад жил бүр 1,400 тонн хоол хүнс хаягдал болдог ба үүнд олон нийтийн анхаарлыг хандуулж, хэмжээг нь бууруулахад шинэ хууль чиглэж байгааг тус улсын Хүнс, Хөдөө Аж Ахуйн сайд Луйз Планас ярьжээ.

Энэ нь Испанийн хүн амтай харьцуулахад нэг хүн жилд 31 кг хоол хүнс хаяж, 250 еврогийн алдагдал хүлээдэг гэсэн үг юм байна.

Франц, Итали улсууд 2016 онд дараалан үүнтэй ижил төстэй хуулийг баталж байжээ. Хэрвээ шинэ хуулийн төслийг Испанийн парламент баталбал 2023 оны нэгдүгээр сарын 1-нээс хүчин төгөлдөр болох юм байна.

НҮБ-ын хөдөө аж ахуйн байгууллагын гаргасан тооцоогоор дэлхий даяар жил бүр хоол хүнсний гуравны нэг нь хаягддаг ба Европ тивд сүүлийн нэг жилд ийм хаягдлын хэмжээ 40 хувиар өсжээ.

Өчигдөр Европын Холбооны эрх баригчид бага болон дунд оврын зөөврийн төхөөрөмжүүдийн цэнэглэгчийг нэг стандарттай болгох төлөвлөгөөг хэлэлцэж, дэмжжээ.

Тодруулбал тус холбооны гишүүн орнуудын зах зээлд худалдаалагдах бүх гар утас, таблет, зөөврийн компьютерууд 2024 оноос эхлэн зөвхөн USB Type-C стандартын цэнэглэгчтэй болох юм.

Үүний улмаас Apple компани Европын Холбооны зах зээлд гаргах бүтээгдэхүүнийхээ цэнэглэгчийн стандартыг өөрчлөх шаардлагатай болж байна.

Гэхдээ энэ нь 2024 оноос хойш үйлдвэрлэгдэх төхөөрөмжүүдэд үйлчлэх ба өмнө нь үйлдвэрлэгдсэн бүтээгдэхүүнүүдэд нөлөөлөхгүй юм.

Нэгдсэн стандартыг Европын парламентаар эцэслэн батлуулах ажил энэ зун хэрэгжих гэнэ.

Apple компани өмнө нь цэнэглэгчийн нэгдсэн стандарттай болох санааг эсэргүүцэж байжээ. 2021 оны есдүгээр сард анх энэ санаа яригдаж эхлэхэд Apple компаниас “Зөвхөн нэг төрлийн цэнэглэгчийг хүчээр тулгах нь инновацыг дэмжихээсээ илүү боомилсон хэрэг болно. Үр дүнд нь Европын болон дэлхий дахины хэрэглэгчид хохирох эрсдэлтэй” гэж мэдэгдэж байв.

Одоо тус компанийн гар утас, таблет бүтээгдэхүүнүүд өөрийнх нь зохион бүтээсэн Lightning төрлийн цэнэглэгчтэй үйлдвэрлэгддэг.

Европын Холбооны шийдвэрийн дагуу гар утас, таблет, чихэвч, видео тоглоомын консоль, зөөврийн чанга яригч зэрэг бага болон дунд оврын төхөөрөмжүүд хэн үйлдвэрлэснээсээ үл хамааран USB Type-C стандартын цэнэглэгчтэй болох юм.

Цаашдаа зөөврийн компьютерт бас энэ шийдвэр үйлчлэх гэнэ.

Мөн Европын хэрэглэгчид шинэ төхөөрөмж худалдаж авахдаа цэнэглэгч кабелыг хамт авах эсэхээ шийддэг болох юм байна.

Ийм шийдвэр гаргаснаар электроникийн хог хаягдал багасах, үүнийг дагаад байгаль орчны бохирдол буурах, хүмүүсийн хэрэглээг хялбарчлах ач холбогдолтойг Европын Холбоо тайлбарлажээ.

Тус холбооны гишүүн орнуудын хэрэглэгчид жил бүр 250 саяын үнэтэй цэнэглэгчийг шаардлагагүй мөртлөө худалдаж авдаг, үүний улмаас жил бүр 11,000 тонн хаягдал үүсдэг гэнэ.