Month: June 2022

Улаанбаатарт өдөртөө 24 хэм, бороо орно DNN.mn

Post author By
Post date 2022-06-19
No Comments on Улаанбаатарт өдөртөө 24 хэм, бороо орно DNN.mn

УЛААНБААТАР ХОТ ОРЧМООР: Үүлэрхэг. Бороо орно. Салхи баруун хойноос секундэд 7-12 метр, борооны өмнө түр зуур ширүүснэ. Шөнөдөө 16-18 градус, өдөртөө 22-24 градус дулаан байна.

Хур тунадас: Нутгийн баруун хэсгээр үүл багасна, бусад нутгаар үүлэрхэг. Шөнөдөө баруун аймгуудын нутгийн зүүн, говь болон зүүн аймгуудын нутгийн баруун хэсэг, төвийн аймгуудын ихэнх нутгаар, өдөртөө баруун аймгуудын нутгийн баруун, төвийн аймгуудын ихэнх нутаг, говийн аймгуудын нутгийн зарим газар, зүүн аймгуудын нутгийн баруун хэсгээр бороо, дуу цахилгаантай аадар бороо орно.

Салхи: Нутгийн зүүн хэсгээр баруун өмнөөс, бусад нутгаар баруун хойноос секундэд 7-12 метр, говь, тал, хээрийн нутгаар түр зуур секундэд 18-20 метр, зарим үед секундэд 24 метр хүрч ширүүсэж, шороон шуурга шуурна.

Агаарын температур: Шөнөдөө Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр 2-7 градус, Их нууруудын хотгор, Хангайн нурууны өвөр бэл, Эг, Үүр, Орхон, Тэрэлж голын хөндийгөөр 8-13 градус, говийн бүс нутгийн өмнөд хэсгээр 19-24 градус, бусад нутгаар 13-18 градус, өдөртөө Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Орхон, Сэлэнгэ, Хараа, Ерөө, Туул голын хөндийгөөр 16-21 градус, говийн бүс нутгийн зүүн хэсэг, Дорнод-Дарьгангын тал нутгаар 34-39 градус, Их Нууруудын хотгор болон говийн бүс нутгийн баруун хэсгээр 28-33 градус, бусад нутгаар 22-27 градус дулаан байна.

БАГАНУУР ОРЧМООР: Үүлэрхэг. Шөнөдөө дуу цахилгаантай аадар бороо, өдөртөө бороо орно. Салхи баруун хойноос секундэд 8-13 метр, борооны өмнө түр зуур ширүүснэ. Шөнөдөө 13-15 градус, өдөртөө 23-25 градус дулаан байна.

ТЭРЭЛЖ ОРЧМООР: Үүлэрхэг. Шөнөдөө дуу цахилгаантай аадар бороо, өдөртөө бороо орно. Салхи баруун хойноос секундэд 7-12 метр, борооны өмнө түр зуур ширүүснэ. Шөнөдөө 11-13 градус, өдөртөө 23-25 градус дулаан байна.

мэдээ нийгэм

“ОХУ-ын Спортын сайдын зөвлөх Монгол, Буриадын шигшээ багийн тамирчдын хамтарсан бэлтгэлийг зохион байгуулах боломжтой” гэв DNN.mn

Засгийн газрын тохируулагч агентлаг, Биеийн тамир, спортын улсын хорооны дарга Д.Жаргалсайхан өчигдөр ОХУ-ын Спортын сайд О.Матыциний зөвлөх Калмыков Степан Владимировичийг хүлээн авч уулзав. Уулзалтанд МҮОХ-ны тэргүүн дэд ерөнхийлөгч Ч.Наранбаатар, БТСУХ-ны Гадаад харилцаа, мэдээллийн технологийн хэлтсийн дарга Н.Оюунбат, мэргэжилтэн Э.Энхсоёл нар оролцлоо.

Уулзалтын эхэнд Калмыков Степан Владимирович БТСУХ-ны даргаар томилогдсон Д.Жаргалсайханд ОХУ-ын Спортын сайд О.Матыциний нэрийн өмнөөс болон хувиасаа баяр хүргэж, ажлын амжилт хүслээ. Монгол-Оросын спортын салбарт уламжлагдан ирсэн харилцааг илүү өргөжүүлж, хоёр орны баг тамирчдыг олимпын наадамд амжилттай оролцуулах зорилгоор зарим тодорхой саналыг хөндөн ярилцав.

Түүнчлэн ОХУ-ын Буриад болон Монгол Улсын Үндэсний шигшээ багийн тамирчдын хамтарсан бэлтгэлийг зохион байгуулах, хоёр орны эрдэм шинжилгээ, судалгааны төвүүдтэй харилцаа холбоо тогтоож, орчин үеийн судалгааны тоног төхөөрөмж, дэвшилтэт технологийг Монгол Улсад нэвтрүүлж, спортын эрдэм шинжилгээ, судалгааны ажилд дэмжлэг үзүүлэх боломжтой байгаагаа илэрхийлсэн юм. Мөн зарим спортын төрлүүдээр ОХУ-ын шилдэг тамирчдыг олимп болон тив, дэлхийн тэмцээн уралдаанд Монгол Улсын нэрийн өмнөөс оролцуулах хүсэлт гаргав. Цаашид хоёр орны хамтын ажиллагааг эрчимжүүлэх зорилгоор харилцан ойлголцлын санамж бичгийг шинэчлэн байгуулах тухай ярилцлаа.

мэдээ нийгэм

ОХУ-ын Спортын сайдын зөвлөх Монгол, Буриадын шигшээ багийн тамирчдын хамтарсан бэлтгэлийг зохион байгуулах боломжтой гэв DNN.mn

мэдээ нийгэм спорт

Ахлах дэслэгч Э.Адъяа олон улсын тэмцээнээс хүрэл медаль хүртлээ DNN.mn

Post author By
Post date 2022-06-18
No Comments on Ахлах дэслэгч Э.Адъяа олон улсын тэмцээнээс хүрэл медаль хүртлээ DNN.mn

Хилийн цэргийн 0243 дугаар ангийн харуул хамгаалалтын тусгай салбарын орлогч, самбо бөхийн олон улсын хэмжээний мастер, ахлах дэслэгч Э.Адъяа ОХУ-ын Буриад улсад зохион байгуулагдсан Н.Н.Петровын нэрэмжит Олон улсын байлдааны самбо бөхийн тэмцээнд 71 кг-ийн жинд амжилттай оролцож, гуравдугаар байранд орж хүрэл медаль хүртлээ.

Тус тэмцээнд ОХУ-ын 32 мужийн 128 тамирчин 8 жинд уран мэх, хурд хүч, бяр чадлаараа өрсөлдсөн байна.

мэдээ нийгэм

Зам тээврийн ноцтой осолд орсон 6 иргэнийг шуурхай тээвэрлэн ГССҮТ-д хүлээлгэн өглөө DNN.mn

Дорнод аймагт авто осолд орсон 3 иргэнийг өнөөдөр /2022.06.18/ ЭМЯ, ОБЕГ хамтран эмч нарын бүрэлдэхүүнтэй яаралтай нисдэг тэргээр ГССҮТ-д хүргэн, эрчимт эмчилгээнд оруулж байна.

Учир нь өчигдөр тус аймагт хоёр автомашин мөргөлдсөн зам тээврийн ноцтой осол гарсан бөгөөд ослын улмаас 6 иргэн хүнд гэмтэл аваад байсан.

Хоёр автомашинд нийт 9 зорчигч байсан бөгөөд 3 хүн газар дээрээ амь эрсдэж, биеийн байдал хүнд байгаа 6 иргэнийг ийнхүү өнөөдөр нисдэг тэргээр яаралтай ГССҮТ-д авчирч байна.

“Зам тээврийн осолд орсон иргэдийн ихэнх нь тархи болон цээжний хавсарсан гэмтэлтэй байна”

Энэ талаар яаралтай тусламж үйлчилгээ үзүүлсэн ГССҮТ-ийн Эрчимт эмчилгээний тасгийн их эмч Гантогтохоос тодруулахад “Эмч нарын баг зам тээврийн ослын улмаас яаралтай тусламж үйлчилгээ авах шаардлагатай иргэдэд газар дээр очиж тусламж үйлчилгээ үзүүлэн, нисдэг тэргээр өнөөдөр Улаанбаатар хотод авч ирж, ГССҮТ-ийн эрчим эмчилгээнд оруулж байна.

Өчигдөр Дорнод аймгийн Бүсийн оношилгооны төвд тухайн осолд орж биеийн байдал хүнд байгаа 6 иргэн хүргэгдсэн бөгөөд тус төвийн эмч нар биеийн байдлыг тогтворжуулах, хэвлийн гэмтэлтэй өвчтөнийг хэвлийн мэс засалд оруулж, арьс залгах мэс засал хийсэн байсан. Өвчтөнүүдийн биеийн байдлыг үнэлж, шөнө ажиглалт явуулсны үндсэн дээр өнөө өглөө эхний ээлжинд хавсарсан өвчтэй болон хүндрэх магадлалтай гэсэн 3 иргэнийг тээвэрлэж ирсэн. Араас 2 өвчтөн тээвэрлэгдэж ирж байна. Хэвлийн мэс засалд орсон иргэний биеийн байдлыг ажиглаж байгаад хот руу тээвэрлэх ажлууд хийгдэнэ.

Тусламж үйлчилгээ үзүүлж байгаа иргэдийн дунд 3 том хүн, 3 хүүхэд байгаа. Биеийн байдлын хувьд тархи болон цээжний хавсарсан гэмтэлтэй байна” гэв.

“ГССҮТ-д өдөрт эмнэлгийн тусламж авч байгаа өвчтний 40 хувь нь буюу 200 хүн авто ослын шалтгаантай гэмтэлтэй байна”

ГССҮТ-ийн Эмчилгээ эрхэлсэн дэд захирал Р.Гантуяа “ГССҮТ-д өдөрт 500-600 үйлчлүүлэгч ирж байна. Үүнээс 40-50 нь хэвтэн эмчлүүлж байгаа. Өнгөрсөн долоо хоногт 3000-4000 орчим үйлчлүүлэгч тусламж үйлчилгээ авсан. Үүний 1500 гаруй буюу 40 хувь нь авто ослын шалтгаантай гэмтэл байна. Амралт зугаалгын сар эхэлж байгаа энэ үед зам тээврийн осол маш их байгаа. Ялангуяа гэр бүлээрээ хүүхэдтэйгээ явж байгаад осолд орж байгаа тоо маш их гарсан. Ослын улмаас хүүхдүүд маш их гэмтэж байна.

ГССҮТ-ийн Эрчимт эмчилгээний тасаг 12 ортой үйл ажиллагаа явуулж эмнэлгийн тусламж үйлчилгээ үзүүлж байна. Одоогоор 12 ор дүүрсэн байгаа. Үүнээс зургаа нь 2 сартайгаас 11 насны хүүхдүүд хэвтэн эмчлүүлж байна. Тиймээс ард иргэдэд анхааруулж хэлэхэд, хөдөө орон нутаг руу аялах, зугаалахад автомашины бүрэн бүтэн байдлыг хангах, машины суудалд хүний тоогоор сууж, хүүхдийг тусгай зориулалтыг суудлаар тээвэрлэх, өөрийн болон хайртай гэр бүлийнхээ гишүүдийн эрүүл мэнд, амь насыг хамгаалж, аюулгүй байдлыг хангаж, зорчихыг анхааруулж байна” гэв.

мэдээ нийгэм

“Дугуйн аялал 2022” арга хэмжээ боллоо DNN.mn

Post author By
Post date 2022-06-18
No Comments on “Дугуйн аялал 2022” арга хэмжээ боллоо DNN.mn

Монгол Улсын Засгийн газрын 2022-2024 оны үйл ажиллагааны хөтөлбөрт тусгасан “Эрүүл чийрэг хүн”, “Эрүүл идэвхтэй амьдрал” арга хэмжээний хүрээнд ЭМЯ энэ сарыг “Иргэдэд эрүүл идэвхтэй амьдралыг сурталчлах, эрүүл зан үйлийг хэвшүүлэх, эрүүл мэндийн салбарын эмч эмнэлгийн мэргэжилтэн, ажилтан, албан хаагчдын хамтын ажиллагааг бэхжүүлэх” зорилгоор “Хөдөлгөөний ач холбогдлыг сурталчлах сар болгон” тэмдэглэж байгаа билээ.

Энэ хүрээнд эрүүл мэндийн салбарын эмч, эмнэлгийн ажилтнууд спортын арга хэмжээнүүд зохион байгуулж байгаа бөгөөд үүний нэг нь өнөөдрийн дугуйн аялал юм. Өмнөх 2 долоо хоногт Богд ууланд болон Үндэсний цэцэрлэгт хүрээлэнд “Эрүүл мэндийхээ төлөө алхангаа ярилцья” арга хэмжээг зохиосон ба сүүлийн арга хэмжээнд ДЭМБ-ын НДБ-ийн захирал доктор Такаши Касай оролцсон билээ.

Иргэд олон нийтэд эрүүл, идэвхтэй хөдөлгөөн, унадаг дугуйн спортыг сурталчлан уриалах “Дугуйн аялал 2022” арга хэмжээнд ЭМЯ-ны удирдлагууд болон харьяа 22 байгууллагын төлөөлөл, Монголын дугуйн холбооны хамт олон оролцлоо.

Арга хэмжээг нээж ЭМЯ-ны Төрийн нарийн бичгийн дарга Ц.Эрдэмбилэг үг хэллээ. Тэрбээр “Дугуй унах нь дэлхийн хамгийн түгээмэл спортын төрлүүдийн нэг. Унадаг дугуйг зөвхөн спортоос гадна эрүүл мэнддээ анхаарал тавин, байгаль орчноо бохирдуулахгүйг эрхэмлэдэг хүн болгон унадаг. Цэвэр агаарт удаан дугуй унаснаар уушги бүрэн хүчин чадлаараа ажилладаг, тархины цусан хангамж нэмэгдэж, бусад амин чухал эрхтэнг хүчилтөрөгчөөр баяжуулдаг зэрэг олон ач тустай. Монгол Улсад дугуйн спорт эрчимтэй хөгжиж байгаа ч хүмүүс өдөр болгон ажил төрөлдөө дугуйгаар явдаг болох түвшинд хараахан хүрээгүй, орчин нь ч бүрдээгүй. Хэдий тийм боловч унадаг дугуйгаар хичээллэж, олон нийтэд түгээж, түүний давтагдашгүй таашаалыг мэдрэхийг эрүүл мэндийн салбарын эмч, эмнэлгийн мэргэжилтэн, ажилтан албан хаагчид бид өөрсдөөс эхлэн манлайлах хэрэгтэй. Улсынхаа эрүүл энхийн манаанд өдөр, шөнөгүй хүчин зүтгэж буй баатрууд бид бүхэн өөрсдөө эрүүл байж бусдад үлгэр дуурайлал болж эрүүл мэндийн тусламж үйлчилгээг цаг алдалгүй чанарын өндөр түвшинд үзүүлж чадах билээ” хэмээв.

“Дугуйн аялал 2022” арга хэмжээ эрүүл мэндийн байгууллагын дунд Үндэсний цэцэрлэгт хүрээлэнгийн дугуйн замаар маршрутын дагуу амжилттай зохион байгуулагдлаа

мэдээ нийгэм

АНУ-аас хандивласан хүүхдийн Файзер вакциныг хүлээн авлаа DNN.mn

Post author By
Post date 2022-06-18
No Comments on АНУ-аас хандивласан хүүхдийн Файзер вакциныг хүлээн авлаа DNN.mn

АНУ-аас Монгол Улсад хандивласан 302,400 тун КОВИД-19 өвчний эсрэг хүүхдийн Файзер вакцин Ковакс хөтөлбөрийн дагуу Монголд ирсэн байна. Эдгээр вакцин Мичиган мужийн Каламазу дахь Файзер компанийн үйлдвэрээс шууд нийлүүлэгдэж буй.

АНУ-аас Монгол Улсад хандивласан коронавируст халдварын эсрэг вакцины нийт тоо уг хандивтай нийлээд 1.4 сая тун боллоо. Монголын ард түмэн энэхүү цар тахлыг даван туулахад АНУ дэмжсэн хэвээр байх бөгөөд КОВАКС хөтөлбөрөөр дамжуулан өгч буй хандив нь уг дэмжлэгийн нэг хэсэг билээ.

Коронавируст халдварын (КОВИД-19) цар тахал эхэлснээс хойш АНУ-аас Олон улсын хөгжлийн агентлаг (ОУХА буюу USAID)-аар дамжуулан Монгол Улсад 8.1 сая гаруй ам.долларын тусламж үзүүлжээ. Тусламжаар иргэдэд нэн хэрэгцээт эм, шинжилгээ авах иж бүрдэл, эмнэлгийн шаардлагатай багаж хэрэгсэл, хүчилтөрөгчийн эмчилгээ болон хувийн хамгаалах хэрэгслээр хангаж байв. Мөн 2020 оны 12 дугаар сард АНУ-ын ОУХА-аас өндөр чанарын 50 ширхэг амьсгалын аппаратыг хандивлаж, хүнд өвчтэй өвчтөнүүдийг эмчлэхэд шаардлагатай нэмэлт сургалтуудыг хийсэн. Түүнчлэн ОУХА нь эрсдэлийн үеийн харилцаа холбоо, эрүүл мэндийн байгууллага, сургуулийн орчинд халдвараас урьдчилан сэргийлэх, хяналт тавих, вакцин түгээх зэрэг ажлуудад тусламж дэмжлэг үзүүлдэг.

Мөн АНУ-ын зүгээс Монголын 570 гаруй эрүүл мэндийн байгууллагыг шаардлагатай эмнэлгийн тоног төхөөрөмжөөр хангаж, 12,700 эрүүл мэндийн ажилтанд тандалт судалгаа хийх, АНУ-ын Засгийн газраас хандивласан эдгээр тоног төхөөрөмжийг ашиглах, удирдах, халдвараар өвчилсөн өвчтөнүүдэд чанартай эрүүл мэндийн тусламж үйлчилгээ үзүүлэх сургалтыг зохион байгуулахад дэмжлэг үзүүлжээ.

АНУ нь олон улсын түншүүдтэй хамтран Ковид-19 өвчний эсрэг вакциныг дэлхий нийтэд хандивлаж, тахал өвчнийг таслан зогсоохоор ажиллаж байна. Ковид-19 өвчний эсрэг дэлхий нийтийн тэмцэлд үзүүлж буй АНУ-ын дэмжлэгийн хүрээнд:

539 сая гаруй тун вакциныг бусад улс оронд хандивласан.
Хөгжиж буй 100 орчим улс оронд хандивлахаар нэг тэрбум тун вакциныг худалдаж авсан.
Ковид-19 өвчний эсрэг вакциныг дэлхий даяар тэгш хуваарилах аюулгүй, үр дүнтэй санаачилга болох Ковакс хөтөлбөрийг дэмжих зорилгоор Вакцины холбоо Гави-д 4 тэрбум ам.долларыг хандивлав.
Эдийн засгаа сэргээн босгох, хүнсний хомсдолыг даван туулах, эрүүл мэндийн аюулгүй байдлаа бэхжүүлэхэд нь улс орнуудад туслах зорилгоор зайлшгүй шаардлагатай эм, хангамж, эмчилгээний хэрэгсэл, бусад тусламжийг хүргэсээр ирлээ.

Ерөнхийлөгч Ж. Байден 2021 оны 6-р сарын 3-ны өдөр хийсэн мэдэгдэлдээ “Энэхүү вирусийн эсрэг бидний хамтын тэмцлийн дэлхий дээрх вакцины гол цөм нь АНУ байх болно” гээд “Бид халдварт өвчний аюулаас хамгаалагдсан, илүү аюулгүй дэлхийг бий болгохын тулд чадах бүхнээ хийх болно” хэмээн нэмж хэлж байв.

Эх сурвалж: АНУ-аас Монгол Улсад суугаа ЭСЯ

мэдээ нийгэм

Завьт эргүүл голын усанд осолдсон иргэнд яаралтай тусламж үзүүлж, амь насыг нь аварчээ DNN.mn

Голын усанд осолдсон иргэнд 10 минутын турш хиймэл амьсгал хийж, эмнэлгийн байгууллагад хүлээлгэн өгсөн талаар Нийслэлийн Онцгой Байдлын Газар (НОБГ)-аас мэдээллээ.

Аврах ангийн бүлгийн дарга, дэслэгч Х.Наранбаатарын удирдсан завьтай эргүүлийн бүрэлдэхүүн өнөөдөр Баянзүрх дүүргийн 11-р хороо Хар үзүүрт үүрэг гүйцэтгэж байхдаа голын усанд осолдсон 50 орчим насны эрэгтэйг уснаас гаргаж амь насыг нь аварчээ. Тодруулбал, 10 минутын турш хиймэл амьсгал хийж амьдруулан, Яаралтай Түргэн Тусламжийн Төв (ЯТТТ)-ийн эмч нарт хүлээлгэн өгсөн байна.

Амралтын өдрүүдэд Туул, Тэрэлж, Хэрлэн гол дагуу иргэдийн зорчих хөдөлгөөн нэмэгдэж, голын усны ослын эрсдэл нэмэгддэг тул иргэдийг голын усны ослоос урьдчилан сэргийлж, бага насны хүүхдийн аюулгүй байдлыг хангахыг анхааруулж байна.

НОБГ

Эх сурвалж: Нийслэлийн Онцгой Байдлын Газар

мэдээ улс-төр

УИХ-ын тухай хуульд нэмэлт оруулах тухай хуулийн төслийг анхны хэлэлцүүлэгт шилжүүлэв DNN.mn

Монгол Улсын Их Хурлын тухай хуульд нэмэлт оруулах тухай хуулийн төслийн хэлэлцэх эсэх асуудлыг хэлэлцлээ.

Хуулийн төслийн талаар Улсын Их Хурлын гишүүн О.Цогтгэрэл, УИХ-ын Төрийн байгуулалтын байнгын хорооны санал, дүгнэлтийг Улсын Их Хурлын гишүүн Ж.Батсуурь тус тус танилцуулсан.

Монгол Улсын Их Хурлаас 2019 оны 11 дүгээр сарын 14-ний өдөр Монгол Улсын Үндсэн хуульд нэмэлт, өөрчлөлт оруулсан билээ. Энэхүү нэмэлт, өөрчлөлтийн хүрээнд холбогдох хууль тогтоомжийг нийцүүлэх, түүнтэй холбогдуулан авах арга хэмжээний тухай Улсын Их Хурлын тогтоолыг баталж, Улсын Их Хурлын үйл ажиллагааг боловсронгуй болгох, хариуцлагыг нэмэгдүүлэх, Улсын Их Хурлын гишүүний бүрэн эрх, түүнийг эгүүлэн татах, Улсын Их Хурал хугацаанаасаа өмнө дуусгавар болох, Улсын Их Хурал дахь олонх, цөөнхийн болон нам, эвслийн бүлгийн зохицуулалтыг Монгол Улсын Үндсэн хуульд нийцүүлэн өөрчлөх зэрэг асуудлыг тусгасан Монгол Улсын Их Хурлын тухай хуулийг шинэчлэн найруулж, 2020 оны 05 дугаар сарын 07-ны өдрийн нэгдсэн хуралдаанаар хэлэлцэн баталсныг төсөл санаачлагч гишүүн О.Цогтгэрэл танилцуулгадаа онцлоод ийнхүү шинэчлэн баталсан Монгол Улсын Их Хурлын тухай хуулийн 31 дүгээр зүйлд Улсын Их Хурал дахь нам /эвсэл/-ын бүлэг, 33 дугаар зүйлд Бүлгийн эрх, үүрэг, 34 дүгээр зүйлд Бүлгийн үйл ажиллагаа дуусгавар болгохтой холбоотой зохицуулалтыг тусгасан байдаг гэв.

Улсын Их Хурлын 2020 оны ээлжит сонгуулийн үр дүнд Ардчилсан намаас 11 гишүүн сонгогдож, Монгол Улсын Их Хурлын чуулганы хуралдааны дэгийн тухай хуулийн 24 дүгээр зүйлд заасны дагуу Улсын Их Хурал дахь Ардчилсан намын бүлэг байгуулсан тухай шийдвэр, бүлгийн гишүүдийн нэрсийн жагсаалтыг Улсын Их Хурлын даргад бичгээр ирүүлснийг 2020 оны 07 дугаар сарын 01-ний өдрийн нэгдсэн хуралдаан дээр Улсын Их Хурлын дарга танилцуулсан. Ийнхүү Улсын Их Хурал дахь Ардчилсан намын бүлэг хуульд заасны дагуу байгуулагдаж, үйл ажиллагаагаа явуулж байна. Улсын Их Хурал дахь Ардчилсан намын бүлэг, бүлгийн гишүүд, Ардчилсан намаас Улсын Их Хурлын даргад удаа дараа албан бичиг хүргүүлж, түүнчлэн хоорондоо санал нэгдэхгүй, бүлгийн даргаа хүлээн зөвшөөрөхгүй, Монгол Улсын Их Хурлын тухай хуульд заасан бүлгийн эрх, үүргээ хэрэгжүүлж чадахгүй байдалд нэлээд хугацаанд ажиллаа. Эдгээр асуудлыг нэг мөр болгох, бүлгийн дарга, гишүүдийн эрх үүргийг тодорхой болгох, хэрэв бүлгийн нийт гишүүдийн олонх бүлгийн даргыг чөлөөлөх, огцруулах, шинээр томилох талаар санал нэгдвэл, шийдвэрээ Улсын Их Хурлын даргад бичгээр ирүүлснийг нэгдсэн хуралдаанд сонсгосноор эрх, үүрэг хэрэгжих зохицуулалтыг тусгасан Монгол Улсын Их Хурлын тухай хуульд нэмэлт оруулах тухай хуулийн төслийг боловсруулсан гэж төсөл санаачлагч гишүүн танилцуулгадаа дурдлаа.

Хуулийн төсөл батлагдсанаар Улсын Их Хурал цөөнхийн бүлгийн эрх, үүрэг тодорхой болж, бүлгийн даргыг чөлөөлөх, огцруулах, шинээр томилох асуудал хуульд заасны дагуу тодорхой болж, бүлгийн тогтвортой ажиллах боломж бүрдэнэ гэж үзэж байна. Хуулийн төсөл нь Үндсэн хууль болон бусад хуультай нийцэж байгаа бөгөөд холбогдох бусад хуульд өөрчлөлт оруулах шаардлагагүй бөгөөд хууль батлагдсаны дараа хэрэгжүүлэхэд холбоотой улсын төсвөөс нэмэлт зардал гарахгүй гэж төсөл санаачлагчид үзжээ.

Улсын Их Хурлын гишүүн О.Цогггэрэл нарын 9 гишүүнээс 2022 оны 05 дугаар сарын 18-ны өдөр Улсын Их Хуралд өргөн мэдүүлсэн Монгол Улсын Их Хурлын тухай хуульд нэмэлт оруулах тухай хуулийн төслийн хэлэлцэх эсэх асуудлыг Төрийн байгуулалтын байнгын хороо 2022 оны 06 дугаар сарын 15,17-ны өдрүүдийн хуралдаанаараа хэлэлцлээ. Хууль санаачлагч Улсын Их Хурал дахь бүлгийн дарга, гишүүдийн эрх үүргийг тодорхой болгох, бүлгийн даргыг чөлөөлөх, огцруулах, шинээр томилох асуудлыг бүлгийн нийт гишүүдийн олонх шийдэж, шийдвэрээ Улсын Их Хурлын даргад бичгээр ирүүлснийг нэгдсэн хуралдаанд уншиж сонсгосноор эрх, үүрэг хэрэгжих зохицуулалтыг тусгасан хуулийн төслийг боловсруулсан гэдгийг Ж.Батсуурь гишүүн танилцуулгадаа дурдлаа.

Мөн тэрбээр, Байнгын хорооны хуралдаанаар хуулийн төслийг хэлэлцэх үед Улсын Их Хурал дахь Ардчилсан намын бүлгийн дарга Д.Ганбат 2022 оны 06 дугаар сарын 15-ны өдрийн Байнгын хорооны хуралдаанаас 2022 оны 06 дугаар сарын 17-ны өдрийг хүртэл, 2022 оны 06 дугаар сарын 17-ны өдрийн Байнгын хорооны хуралдаанаас тус өдрийн 13.00 цаг хүртэл 2 удаа завсарлага авч хугацаа дууссан гэдгийг дурдаад Монгол Улсын Их Хурлын тухай хуульд нэмэлт оруулах тухай хуулийн төслийг асуудлыг Байнгын хорооны хуралдаанд оролцсон гишүүдийн олонх буюу 60.0 хувь нь үзэл баримтлалын хүрээнд хэлэлцэхийг дэмжиж, чуулганы нэгдсэн хуралдаанаар хэлэлцүүлэх нь зүйтэй гэж үзсэн гэв.

Хэлэлцэж байгаа асуудалтай холбогдуулан Улсын Их Хурлын гишүүн Д.Ганбат, Б.Энхбаяр нарын асуултад төсөл санаачлагч гишүүн О.Цогтгэрэл хариулсны дараа хуулийн төслийг үзэл баримтлалын хүрээнд хэлэлцэхийг хуралдаанд оролцсон гишүүдийн 70.7 хувь нь дэмжсэн тул төслийг анхны хэлэлцүүлэгт бэлтгүүлэхээр Төрийн байгуулалтын байнгын хороонд шилжүүлэв.

мэдээ улс-төр

УИХ-ын ирэх долоо хоногт хэлэлцэх асуудлууд DNN.mn

Post author By
Post date 2022-06-18
No Comments on УИХ-ын ирэх долоо хоногт хэлэлцэх асуудлууд DNN.mn

УИХ-ын хаврын ээлжит чуулганы ирэх долоо хоногийн хуралдаанаар хэлэлцэх асуудлын тов, дарааллыг эрхэм уншигч танд хүргэж байна.

Улсын Их Хурлын даргын дэргэдэх Зөвлөлийн 2022.06.17-ны өдрийн хурлаар батлав.

УЛСЫН ИХ ХУРЛЫН ХАВРЫН ЭЭЛЖИТ ЧУУЛГАНЫ 2022 ОНЫ 06 ДУГААР САРЫН 20-НООС 24-НИЙ ӨДРИЙН ХУРАЛДААНААР ХЭЛЭЛЦЭХ АСУУДЛЫН ТОВ, ДАРААЛАЛ

ДАВАА ГАРАГ /2022.06.20/

ЦАГ	НЭГ.АЖЛЫН ХЭСГИЙН ХУРАЛДААН	ХААНА
14.00	Монгол Улсын Засгийн газраас 2022 оны 04 дүгээр сарын 14-ний өдөр өргөн мэдүүлсэн Төрийн албаны тухай хуульд нэмэлт, өөрчлөлт оруулах тухай хуулийн төсөл, Улсын Их Хурлын гишүүн Г.Тэмүүлэн нарын 3 гишүүнээс 2021 оны 05 дугаар сарын 21-ний өдөр өргөн мэдүүлсэн Төрийн албаны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд, Улсын Их Хурлын гишүүн Ё.Баатарбилэгээс 2021 оны 07 дугаар сарын 05-ны өдөр өргөн мэдүүлсэн Төрийн албаны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт оруулах тухай хуулийн төслийг нэгтгэн хэлэлцүүлэгт бэлтгэх үүрэг бүхий Төрийн байгуулалтын байнгын хорооны ажлын хэсгийн хуралдаан	“Үндсэн хууль” танхим
14.00	Согтууруулах ундааны эргэлтэд хяналт тавих, архидан согтуурахтай тэмцэх тухай хуулийн төсөл болон хамт өргөн мэдүүлсэн хуулийн төслүүдийг хэлэлцүүлэгт бэлтгэх үүрэг бүхий Хууль зүйн байнгын хорооны ажлын дэд хэсгийн хуралдаан	“Их засаг” танхим

МЯГМАР ГАРАГ /2022.06.21/

ЦАГ	НЭГ.АЖЛЫН ХЭСГИЙН ХУРАЛДААН	ХААНА
10.00	Уул уурхайн бүтээгдэхүүний биржийн тухай хуулийн төсөл болон хамт өргөн мэдүүлсэн хуулийн төслүүдийг хэлэлцүүлэгт бэлтгэх үүрэг бүхий Эдийн засгийн байнгын хорооны ажлын дэд хэсгийн хуралдаан	“Үндсэн хууль” танхим
10.00	Төр, хувийн хэвшлийн түншлэлийн тухай хуулийн төсөл болон хамт өргөн мэдүүлсэн хуулийн төслүүдийг хэлэлцүүлэгт бэлтгэх үүрэг бүхий Эдийн засгийн байнгын хорооны ажлын хэсгийн хуралдаан	“Их засаг” танхим
10.00	Зөрчлийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд, Зөрчил шалган шийдвэрлэх тухай хуульд нэмэлт, өөрчлөлт оруулах тухай хуулийн төслүүдийг хэлэлцүүлэгт бэлтгэх үүрэг бүхий Хууль зүйн байнгын хорооны ажлын дэд хэсгийн хуралдаан	334 тоот өрөө
14.00	Байгалийн ургамлын тухай хуулийн төсөл болон хамт өргөн мэдүүлсэн хуулийн төслүүдийг хэлэлцүүлэгт бэлтгэх үүрэг бүхий Байгаль орчин, хүнс, хөдөө аж ахуйн байнгын хорооны ажлын дэд хэсгийн хуралдаан	“Үндсэн хууль” танхим
14.00	Боловсролын ерөнхий хуулийн төсөл, Сургуулийн өмнөх болон ерөнхий боловсролын тухай хуулийн төсөл, Дээд боловсролын тухай хуулийн төсөл, Хүмүүнлэг боловсролыг дэмжих тухай хуулийн төслийг хэлэлцүүлэгт бэлтгэх үүрэг бүхий Боловсрол, соёл, шинжлэх ухаан, спортын байнгын хорооны ажлын дэд хэсгүүдийн хамтарсан хуралдаан	“Их засаг” танхим

ЛХАГВА ГАРАГ /2022.06.22/

ЦАГ	НЭГ.АЖЛЫН ХЭСГИЙН ХУРАЛДААН	ХААНА
10.00	Хөрөнгө оруулалтын банкны тухай хуулийн төсөл болон хамт өргөн мэдүүлсэн хуулийн төслүүдийг хэлэлцүүлэгт бэлтгэх үүрэг бүхий Эдийн засгийн байнгын хорооны ажлын хэсгийн хуралдаан	“Үндсэн хууль” танхим
10.00	Үйлдвэрлэл, технологийн паркийн эрх зүйн байдлын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцүүлэгт бэлтгэх үүрэг бүхий Үйлдвэржилтийн бодлогын байнгын хорооны ажлын дэд хэсгийн хуралдаан	334 тоот өрөө
10.00	Зөрчлийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд, Зөрчил шалган шийдвэрлэх тухай хуульд нэмэлт, өөрчлөлт оруулах тухай хуулийн төслүүдийг хэлэлцүүлэгт бэлтгэх үүрэг бүхий Хууль зүйн байнгын хорооны ажлын дэд хэсгийн хуралдаан	“Жанжин Д.Сүхбаатар” танхим
11.00	Ерөнхий боловсролын сургуулийн хоол үйлдвэрлэл, үйлчилгээний тухай хуулийн хэрэгжилтийг шалгах санал, дүгнэлт гаргах, шийдвэрийн төсөл боловсруулах үүрэг бүхий Боловсрол, соёл, шинжлэх ухаан, спортын байнгын хорооны ажлын хэсгийн хуралдаан	“Их засаг” танхим
14.00	Судалгааны их сургуулийн эрх зүйн байдлын тухай хуулийн төслийг хэлэлцүүлэгт бэлтгэх үүрэг бүхий Боловсрол, соёл, шинжлэх ухаан, спортын байнгын хорооны ажлын дэд хэсгийн хуралдаан	“Их засаг” танхим

ПҮРЭВ ГАРАГ /2022.06.23/

ЦАГ	НЭГ.АЖЛЫН ХЭСГИЙН ХУРАЛДААН	ХААНА
10.00	Хуульчийн эрх зүйн байдлын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцүүлэгт бэлтгэх үүрэг бүхий Хууль зүйн байнгын хорооны ажлын дэд хэсгийн хуралдаан	“Үндсэн хууль” танхим
11.00	Боловсролын тухай хуулийн 42 дугаар зүйлийн 42.1 дэх хэсгийн хэрэгжилтийг хангах санал, дүгнэлтийн төсөл боловсруулах үүрэг бүхий Боловсрол, соёл, шинжлэх ухаан, спортын байнгын хорооны ажлын дэд хэсгийн хуралдаан	“Их засаг” танхим
14.00	Төр, хувийн хэвшлийн түншлэлийн тухай хуулийн төсөл болон хамт өргөн мэдүүлсэн хуулийн төслүүдийг хэлэлцүүлэгт бэлтгэх үүрэг бүхий Эдийн засгийн байнгын хорооны ажлын дэд хэсгийн хуралдаан	“Их засаг” танхим

БААСАН ГАРАГ /2022.06.24/

ЦАГ	НЭГ. АЖЛЫН ХЭСГИЙН ХУРАЛДААН		ХААНА
11.00	Монгол Улсын Засгийн газраас 2022 оны 04 дүгээр сарын 14-ний өдөр өргөн мэдүүлсэн Төрийн албаны тухай хуульд нэмэлт, өөрчлөлт оруулах тухай хуулийн төсөл, Улсын Их Хурлын гишүүн Г.Тэмүүлэн нарын 3 гишүүнээс 2021 оны 05 дугаар сарын 21-ний өдөр өргөн мэдүүлсэн Төрийн албаны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд, Улсын Их Хурлын гишүүн Ё.Баатарбилэгээс 2021 оны 07 дугаар сарын 05-ны өдөр өргөн мэдүүлсэн Төрийн албаны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт оруулах тухай хуулийн төслийг нэгтгэн хэлэлцүүлэгт бэлтгэх үүрэг бүхий Төрийн байгуулалтын байнгын хорооны ажлын дэд хэсгийн хуралдаан		“Их засаг” танхим

Нийтэлсэн: УИХ-ын Тамгын газрын Хэвлэл мэдээлэл, олон нийттэй харилцах хэлтэс

“Зам тээврийн осолд орсон иргэдийн ихэнх нь тархи болон цээжний хавсарсан гэмтэлтэй байна”

“ГССҮТ-д өдөрт эмнэлгийн тусламж авч байгаа өвчтний 40 хувь нь буюу 200 хүн авто ослын шалтгаантай гэмтэлтэй байна”

Recent Posts

Recent Comments

Archives

Categories