Month: May 2022

Categories
мэдээ нийгэм

СЭРЭМЖЛҮҮЛЭГ: Ой, хээрийн түймрээс урьдчилан сэргийлэхийг анхааруулж байна DNN.mn

Жил бүрийн гуравдугаар сарын 20-ны өдрөөс зургаадугаар сарын 10-ны өдөр, есдүгээр сарын 20-ны өдрөөс арваннэгдүгээр сарын 10-ны өдөр хүртэлх хугацааг ой, хээрийн түймэр гарах байгалийн нөхцөл бүрдсэн хуурайшилт бүхий цаг хугацаа буюу “Түймрийн аюултай үе” гэж үздэг.

Түүнчлэн энэ жилийн хувьд хуурайшилтын зэрэг өндөр байгаа бөгөөд хаврын хуурайшилттай, салхи шуургатай үед иргэдийн санамсар болгоомжгүй үйлдлээс шалтгаалан гал түймрийн гаралт ихсэх хандлагатай байна.

Иймд, иргэн та ногоон бүсэд зорчихдоо асаасан гал, шүдэнз, татсан тамхины гал, цог, нурмыг бүрэн унтрааж галын аюулгүй байдлаа хангах, айл өрхүүд халуун үнс, нурмыг тусгайлан бэлдсэн таглаа бүхий нүх, саванд хийх, хашааны өнжмөл өвсийг шатаахгүй байх, гэр сууц, хашаа хорооны гадуур түймрээс хамгаалах зурвас татах, гал унтраах багаж хэрэгслийг бэлтгэх зэргээр ой, хээрийн түймрээс урьдчилан сэргийлэх арга хэмжээ авахыг Онцгой байдлын ерөнхий газраас анхааруулж байна.

Categories
мэдээ нийгэм

ЗӨВЛӨГӨӨ: Гар утас хүүхдийн хараа, сонсголын чадварыг сааруулдаг DNN.mn

Оросын Шинжлэх ухааны академийн Биохимийн физикийн хүрээлэнгийн эрдэмтэд ухаалаг утасны цахилгаан соронзон цацраг хүүхдүүдийн сэтгэц эрүүл мэндэд хэрхэн нөлөөлдөг талаарх судалгааг 10 жилийн турш явуулж саяхан дуусчээ.

Судалгаанд Москвагийн хоёр сургуулийн сурагчид оролцсон бөгөөд нэг бүлэг нь ухаалаг гар утас бүхий 1161 хүүхэд нөгөө бүлэгт гар утасгүй 370 хүүхэд багтжээ.

Эрдэмтдийн тогтоосноор, гар утастай хүүхдүүдийн сонсгол болон харааны чадварын хөгжил суларч, ухаалаг гар утас ашигладаггүй өөр бүлгийн хүүхдүүдтэй харьцуулахад бичих үедээ илүү их алдаа гаргаж байсан гэнэ. Түүнчлэн гар утас хэрэглэж байсан хүүхдүүдэд ажиллах чадвар алдагдах, анхаарал сулрах болон сэтгэн бодох чадвар буурч байсны дээр гар утас хэрэглэдэг хүүхдүүдийн 39,7 хувь нь амархан ядрах шинж тэмдэгтэй байжээ.

Орост хийсэн энэхүү шинэ судалгааны үр дүнг Оросын сургуулиудад гар утасны хэрэглээг хориглоход ашиглаж магадгүй талаар тус улсын хэвлэлүүд бичиж байна.

Оросын сургуулиудад гар утас ашиглахыг зөвшөөрдөг бөгөөд сүүлийн үед утасны хэрэглээг хорих талаар төрийн байгууллагуудын түвшинд яригдах болжээ.

Наймдугаар сарын 19-нд ОХУ-ын Боловсролын яам сурагчид ухаалаг төхөөрөмж ашиглахтай холбоотой аргазүйн зөвлөмж гаргасан байна. Энэ зөвлөмжинд гар утас ашиглахыг хориглоогүй ч сургуулийн орчинд хүүхдүүд гар утас ашиглахыг хязгаарлажээ.

Categories
мэдээ нийгэм

БНСУ-ын Илвүү сангийн тэтгэлэгт хөтөлбөр зарлагдлаа DNN.mn

БНСУ-ын ILWOO /Илвүү/ сан өөрийн тэтгэлгээр 2022-2023 оны хичээлийн жилд манай улсын дөрвөн оюутныг суралцуулахаар болжээ.

Тодруулбал, байгалийн ухаан, инженерийн чиглэлээр хоёр оюутан, эдийн засаг, олон улсын харилцаа, улс төр судлал, бизнес удирдлага чиглэлээр хоёр оюутан, нийт дөрвөн оюутныг БНСУ-ын их, дээд сургуульд бакалаврын түвшинд суралцуулах аж. БНСУ-ын Засгийн газрын тэтгэлэгт хамрагдсан эсвэл Засгийн газар хоорондын гэрээ хэлэлцээрийн дагуу өөр орны сонгон шалгаруулалтад тэнцэж, баримт бичиг нь хүргэгдсэн иргэнийг энэхүү сонгон шалгаруулалтад оруулахгүй гэнэ.

Шалгуулагчдад тавигдах шаардлага, бүртгэл:

Шалгаруулалтад оролцогч нь Ерөнхий боловсролын сургуулийн 12 дугаар ангид 80 хувь буюу түүнээс дээш сурлагын амжилттай суралцаж буй суралцагч эсхүл Монгол Улсын магадлан итгэмжлэгдсэн их, дээд сургууль, коллежийн 1, 2 дугаар ангид 3.2 ба түүнээс дээш голч дүнтэй суралцаж байгаа, 2022 оны тавдугаар сарын 1-ний өдрийн байдлаар 25-аас доош настай, гэрлээгүй, Монгол Улсын иргэн байна.

Шалгаруулалтад оролцогч нь дараах баримт бичгийг бүрдүүлнэ:

  1. Бүрэн бөглөсөн анкет /маягтаас харах/
  2. Илвүү сангийн тангараг /маягтаас харах/
  3. Дагалдах захидал /маягтаас харах
  4. Ерөнхий боловсролын сургууль эсхүл их сургуулийн дүнгийн хуулбар /80 болон түүнээс дээш суралцдаг болохыг батлах нотолгоо болно
  5. Өөрийг нь мөн гэдгийг батлах бичиг баримт /Иргэний үнэмлэх, паспортын хуулбар/
Categories
мэдээ улс-төр

Ерөнхийлөгч УИХ-ын чуулганы хуралдаанд мэдээлэл хийнэ DNN.mn

Хаврын чуулганы хугацаанд долоо хоног бүрийн пүрэв, баасан гарагт УИХ-ын ээлжит чуулган хуралдаанаа хийдэг уламжлалтай. Энэ долоо хоногийн чуулганы хуралдаанд Ерөнхийлөгчийн мэдээлэл хийх аж.

Хуралдаанаар хэлэлцэх асуудлын тов дараалал:

  • Согтууруулах ундааны эргэлтэд хяналт тавих, архидан согтуурахтай тэмцэх тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2021.03.19-ний өдөр өргөн мэдүүлсэн, анхны хэлэлцүүлэг/
  • “Олон Улсын автотээвэрлэлт гүйцэтгэх тээврийн хэрэгслийн багийн ажлын тухай Европын хэлэлцээр”-ийг соёрхон батлах тухай хуулийн төсөлтэй хамт өргөн мэдүүлсэн Замын хөдөлгөөний аюулгүй байдлын тухай хуульд нэмэлт, өөрчлөлт оруулах тухай хуулийн төсөл /Засгийн газар 2022.04.14-ний өдөр өргөн мэдүүлсэн, анхны хэлэлцүүлэг/
  • Далай ашиглах тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Засгийн газар 2019.10.17-ны өдөр өргөн мэдүүлсэн, анхны хэлэлцүүлэг/
  • “Тогтоолын хавсралтад өөрчлөлт оруулах тухай” Улсын Их Хурлын тогтоолын төсөл /Засгийн газар 2022.04.25-ны өдөр өргөн мэдүүлсэн, хэлэлцэх эсэх/
  • “Монгол Улсын хөгжлийн 2023 оны төлөвлөгөө батлах тухай” Улсын Их Хурлын тогтоолын төсөл /Засгийн газар 2022.04.29-ний өдөр өргөн мэдүүлсэн, хэлэлцэх эсэх/
  • Хот, суурины ус хангамж, ариутгах татуургын ашиглалтын тухай хуульд нэмэлт, өөрчлөлт оруулах тухай хуулийн төсөл /Улсын Их Хурлын гишүүн Х.Баделхан нарын 3 гишүүн 2021.07.05-ны өдөр өргөн мэдүүлсэн, хэлэлцэх эсэх/
  • Банк бус санхүүгийн үйл ажиллагааны тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Улсын Их Хурлын гишүүн М.Оюунчимэг нарын 4 гишүүн 2022.04.20-ны өдөр өргөн мэдүүлсэн, хэлэлцэх эсэх/
  • Төрийн албаны тухай хуульд нэмэлт, өөрчлөлт оруулах тухай хуулийн төсөл /Засгийн газар 2022.04.14-ний өдөр өргөн мэдүүлсэн, хэлэлцэх эсэх/
  • “Хянан шалгах түр хороо байгуулах тухай” Улсын Их Хурлын тогтоолын төсөл /Улсын Их Хурлын гишүүн Н.Учрал нарын 22 гишүүн 2022.05.03-ны өдөр өргөн мэдүүлсэн/
  • “Нийгмийн даатгалын Үндэсний зөвлөлийн зарим гишүүнийг чөлөөлөх, томилох тухай” Улсын Их Хурлын тогтоолын төсөл
  • “Эрүүл мэндийн даатгалын Үндэсний зөвлөлийн зарим гишүүнийг чөлөөлөх, томилох тухай” Улсын Их Хурлын тогтоолын төсөл
  • Монгол Улсын Ерөнхийлөгчийн мэдээлэл
  • Улсын Их Хурлын гишүүн Н.Учралаас Монгол Улсын Ерөнхий сайдад хандаж Нийгмийн даатгалын сангийн хөрөнгийн чөлөөт үлдэгдлийн талаар тавьсан асуулгын хариу сонсох.
Categories
мэдээ энтертаймент-ертөнц

“Apple”, “Google”, “Microsoft” руу нууц үг ашиглахгүйгээр нэвтэрдэг болно DNN.mn

“Apple”, “Google” болон “Microsoft” хамтран гар утас, зөөврийн компьютер болон хөтчийн платформдоо нууц үг шаарддаггүй нэвтрэх системийг хөгжүүлэхээр төлөвлөж байна.

АНУ-ын технологийн тэргүүлэгч компаниуд цаашид нууц үгийг халснаар мэдээлэл алдах эрсдэлийг бууруулж, хүмүүсийн хувийн мэдээллийг илүү сайн хамгаална гэж үзэж байна. Хэрэглэгчид голцуу өөр өөр сайт болон програмуудад ижил нууц үгийг ашигладаг нь эрсдэлийг улам нэмэгдүүлж байгаа юм.

Мөн хэрэглэгчид гар утсаа баталгаажуулах гол хэрэгсэл болгож сонгох боломжтой. ПИН код оруулах, хурууны хээ ашиглах зэрэг үндсэн үйлдлүүдийг ашиглан түгжээг нь тайлснаар бусад аппликэйшн, вэб сайт, үйлчилгээ болон төхөөрөмжид нэвтрэх боломжтой гэж мэдэгджээ.

Уг системийг 2023 онд ашиглалтад оруулахаар төлөвлөж байгаа тухай “Эн-Эч-Кэй” мэдээллээ

Categories
булангууд мэдээ шинжлэх-ухаан-технологи

Бодончийн голын буган хөшөө, хиргисүүрийн цогцолбор DNN.mn

Ховд аймгийн Мөст сумын Баянзүрх багийн нутаг Бодончийн голын хөндийд хүрлийн үеийн түүхэнд холбогдох олон тооны булш, хиргисүүр, буган хөшөө бүхий томоохон дурсгалт газар бий.

Уг дурсгалыг 1973 онд Монголын түрэг судлаач М.Шинэхүү анх үзэж Д.Цэвээндоржид мэдээлсэн байдаг. Улмаар 1979 онд А.П.Окладников, Д.Цэвээндорж нарын удирдсан Монгол-Зөвлөлтийн түүх соёлын хамтарсан экспедицийн Чулуун зэвсэг судлах ангийнхан үзэж баримтжуулжээ (Цэвээндорж 1979). Тэрээр энд 24 буган хөшөө байна хэмээн үзэж 16 хөшөөний товч тодорхойлолтыг бичээд, зарим хөшөөний гэрэл зураг ба хуулгыг тайландаа хавсаргасан байдаг.
Энэхүү дурсгал нь Монгол орны баруун бүс нутагт орших хожуу хүрлийн үеийн томоохон оршуулга, тахил тайлгын цогцолбор юм.

May be an image of 1 person and nature

Эх сурвалж: ШУА-ын Археологийн хүрээлэн
Categories
мэдээ нийгэм

Дархан чиглэлийн авто замын асфальтбетон хучилтыг энэ сарын 20-н гэхэд эхлүүлнэ DNN.mn

Зам, тээврийн хөгжлийн сайд Л.Халтар тавдугаар сарын 6-нд Улаанбаатар-Дархан чиглэлийн автозамын нэг, хоёрдугаар багцад хийж буй ажлын гүйцэтгэлийг газар дээр нь үзэж шаардлагатай үүрэг, чиглэлийг өглөө.

Улаанбаатар-Дархан чиглэлийн авто замын нэгдүгээр багцын /баруун аймаг салах тойрог уулзвараас Хар модот давааны ар хүртэлх 37.26 км авто зам/ Азийн хөгжлийн банкны санхүүжилтээр хийгдсэн хэсэг өнгөрсөн онд хучилтын ажил дуусч хөдөлгөөнийг нээсэн бөгөөд одоогоор заслын ажлыг хийж байна.

Харин тус багцын Европын сэргээн босголт хөгжлийн банкны санхүүжилтээр Арж капитал ХХК-ийн гүйцэтгэж буй ажлын гүйцэтгэл 49,93 хувьтай хийгдэж байна. Ажлын талбайд 256 хүн хүч, 59 техник, тоног төхөөрөмж байршин ажиллаж байна.

Гүйцэтгэгч компанийн төлөөлөл, нэгдүгээр багц дээр цементээр бэхжүүлсэн суурийг дуусгаж, асфальтбетон хучилтыг тавдугаар сарын 20-н гэхэд эхлүүлнэ. Замын суурь хучилтыг долдугаар сарын 10-н гэхэд дуусгах төлөвлөгөөтэй байгаагаа сайдад тайлбарлав.

Азийн хөгжлийн банкны санхүүжилтээр хэрэгжиж буй Улаанбаатар-Дархан чиглэлийн багц 2 болон 4 дүгээр хэсгийн гүйцэтгэгч компани тодорхой шалтгааны улмаас зам барилгын ажлыг хийж гүйцэтгэх боломжгүй болж, барилгын ажил гүйцэтгэх гэрээг 2020 онд цуцалсан. Дараагийн гүйцэтгэгчийг сонгох тендер зарлаж багц 2 дугаар хэсгийн /Хар модот давааны араас Урьхан хүртэлх 45.5 км авто зам/ гүйцэтгэгчээр шалгарсан “Арж капитал” ХХК-тай 2021 оны 09 дүгээр сарын 03-ны өдөр гэрээ байгуулж барилгын ажлыг эхлүүлсэн.

Арж капитал ХХК-ийн гүйцэтгэх захирал Ч.Батбаяр хэлэхдээ, хоёрдугаар хэсгийн ажлын гүйцэтгэл 21 орчим хувьтай байна. Нийтдээ 300 гаруй ажилтан, 8 үйлдвэр завод, 90 гаруй техник тоног төхөөрөмжтэйгээр ажиллаж байна. Гэрээ байгуулснаас хойш 3,9 км асфальтбетон, 9,5 км замд суурийн ажлыг хийгээд байгаагаа дуулгалаа.

Харин хоёрдугаар багцын Европын сэргээн босголт хөгжлийн банкны санхүүжилтээр ажиллаж буй Жунмей инженеринг групп ХХК-ийн ажлын гүйцэтгэл 25 орчим хувьтай, 100 гаруй ажилтан 56 техник хэрэгсэлтэйгээр ажиллаж байна.

Сайд Л.Халтар “Нэг, хоёрдугаар багцын далангийн ажил сайн явж байна. Хоёрдугаар багцын дахин гэрээ байгуулсан хэсэгт ажиллаж буй Арж капитал ХХК-д 7 дугаар сарын 10 гэхэд хамгийн их тоосжилттой Баянчандмань сумын төв дайрсан 20 гаруй км авто замын хучилтыг дуусгах чиглэл өглөө. Гүйцэтгэгч компани ч дуусгах боломжтой гэсэн хариутай байгаа нь сайн.

Хоёрдугаар багцын Европын сэргээн босголт хөгжлийн банкны санхүүжилтээр барилгын ажлыг гүйцэтгэж буй Жунмэй ХХК-ийн далангийн ажил хэвийн үргэлжилж байгаа хэдий ч гүүр, хоолойн ажил удаашралтай байна. Тиймээс гүйцэтгэгч болон зөвлөх компаниудад удаашралтай байгаа ажлууддаа анхаарч ирэх 7 хоногийн энэ өдөр гэхэд ажлын хоцрогдлыг барагдуулах үүрэг чиглэл өглөө” гэв.

Categories
мэдээ нийгэм

Хайгуулын тусгай зөвшөөрөл олголтыг 3-4 дахин нэмэгдүүлнэ DNN.mn

Дэлхий нийтэд тархсан цар тахлын улмаас хоёр жил өнжөөд байсан “Монголын геологи, хайгуул 2022” XII дахь удаагийн чуулга уулзалт, үзэсгэлэнг “Корпорэйт конвеншн төвд” хоёр өдөр зохион байгууллаа.

Чуулга уулзалтаар геологийн салбарын бодлого, чиг хандлага, ашигт малтмалын хайгуулын салбарын өнөөгийн байдал, хэрэгжилтэд үүсэж буй асуудлыг хөндлөө. Мөн цацраг идэвхт ашигт малтмалын өнөөгийн байдал, Тавантолгойн ордын геологийн судалгаа, цаашдын хөгжлийн төлөвлөгөө сэдэвт илтгэлүүд тавьж, эрдэс баялгийн салбарт тулгамдаж буй асуудлыг хэлэлцэв.

Манай улсад өнгөрсөн хугацаанд хайгуулын тусгай зөвшөөрлийн тоо жил бүр буурч ирэв. Өнөөгийн байдлаар ашиглалтын тусгай зөвшөөрлийн тооноос 2 дахин бага байна. 2011 онтой харьцуулахад хайгуулын тусгай зөвшөөрөл 2.8 дахин, хайгуулын ажилд зарцуулсан хөрөнгө оруулалт 3.4 дахин буурчээ. Иймд энэ салбарын үйл ажиллагааг эрчимжүүлэх, дотоод, гадаадын хөрөнгө оруулалтыг татах таатай нөхцөлийг бүрдүүлэх зорилгоор УУХҮЯ-наас ашигт малтмалын хайгуулын тусгай зөвшөөрлийг сонгон шалгаруулалтаар олгох ажиллагааг бүрэн цахимжуулж, хайгуулын тусгай зөвшөөрөл олгох ажлыг 3-4 дахин нэмэгдүүлэхээр бэлтгэл ажлыг хангаад буйг мэдээллээ.

Ингэснээр ашигт малтмалын нөөцийг өсгөх, улс орны эдийн засагт нөлөөлөхүйц томоохон орд газрыг нэмж илрүүлэх боломж бүрдэх юм. Мөн холбогдох хууль, эрх зүйн орчныг шинэчлэн сайжруулахаар Ашигт малтмалын тухай хуулийн шинэчилсэн найруулгын төсөл, Газрын хэвлийн тухай хуулийн шинэчилсэн найруулгын төсөл болон бусад холбогдох анхдагч хуулийн төслийг боловсруулан ажиллаж байна.

Categories
мэдээ эдийн-засаг

БИРЖ: 18 компанийн хувьцааны ханш тогтвортой байна DNN.mn

Монголын Хөрөнгийн биржид 34 ХК-ийн 302,151 ширхэг хувьцааг 104,310,715 төгрөгөөр арилжив. 13 ХК-ийн хувьцааны ханш дээшилж, 3 ХК-ийн хувьцааны ханш буурсан бол 18 компанийн хувьцааны ханш тогтвортой байлаа.

Энэ өдөр “Гурил тэжээл Булган” (GTJ+14.44%), “Монголын цахилгаан холбоо” (MCH +11.01%) болон “Хай би ойл” (HBO +5.73%) ХК-ийн хувьцааны ханш хамгийн өндөр өссөн бол “Монгол нэхмэл” (MNH -6.76%), “Тандэм инвэст ББСБ” (VIK -5.00%) болон “Монгол Базальт” (MBW -4.37%) ХК-ийн хувьцаа хамгийн их уналттай байлаа.

Хөрөнгө оруулалтын 2 сангийн 45,397 ширхэг нэгж эрхийг 28,793,954 төгрөгөөр арилжив. ТOП-20 индекс -0.86 хувиар буурч, 36,667.89 нэгжид хүрсэн бол зах зээлийн үнэлгээ 5,084,542,276,615 төгрөг боллоо.

Арилжааны дэлгэрэнгүй мэдээллийг энд дарж үзнэ үү.

Categories
мэдээ нийгэм цаг-үе

Баруун болон төвийн аймгуудын нутгийн хойд хэсгээр цас орж, цасан шуурга шуурна DNN.mn

Малчид, иргэд, тээвэрчдэд зориулсан мэдээ: 8-нд нутгийн баруун хагаст салхи шуургатай байна.

2022 оны 05 сарын 06-ны 20 цагаас 05 сарын 07-ны 20 цаг хүртэлх цаг агаарын урьдчилсан мэдээ:

Хур тунадас: Ихэнх нутгаар үүлшинэ. Шөнөдөө баруун аймгуудын нутгийн зүүн хэсэг, төвийн аймгуудын нутгийн зарим газраар, өдөртөө төвийн аймгуудын нутгийн зүүн, говийн аймгуудын нутгийн хойд хэсэг, зүүн аймгуудын нутгийн зарим газраар хур тунадас орно. Бусад нутгаар хур тунадас орохгүй.

Салхи: Нутгийн төв хэсгээр баруун өмнөөс хойш эргэж, бусад нутгар баруун өмнөөс секундэд 6-11 метр.

Агаарын температур: Шөнөдөө Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Дархадын хотгор, Завхан, Туул, Тэрэлж, Хэрлэн, Онон, Улз, Халх голын хөндий, Дорнод, Дарьгангын тал нутгаар 1-6 градус хүйтэн, Алтайн өвөр говиор 9-14 градус, бусад нутгаар 1-6 градус дулаан, өдөртөө Хэнтийн уулархаг нутаг, Туул, Тэрэлж, Хэрлэн, Онон, Улз, Халх голын хөндий, Дорнод, Дарьгангын тал нутгаар 10-15 градус, Их нууруудын хотгор болон говийн бүс нутгийн баруун өмнөд хэсгээр 22-27 градус, бусад нутгаар 16-21 градус дулаан байна.

УЛААНБААТАР ХОТ ОРЧМООР: Үүлшинэ. Ялимгүй хур тунадас орно. Салхи баруун өмнөөс хойш эргэж секундэд 6-11 метр. Шөнөдөө 2-4 градус, өдөртөө 12-14 градус дулаан байна.

БАГАНУУР ОРЧМООР: Үүлшинэ. Шөнөдөө хур тунадас орохгүй. Өдөртөө ялимгүй хур тунадас орно. Салхи баруун өмнөөс хойш эргэж секундэд 6-11 метр. Шөнөдөө 1-3 градус хүйтэн, өдөртөө 11-13 градус дулаан байна.

ТЭРЭЛЖ ОРЧМООР: Үүлшинэ. Ялимгүй хур тунадас орно. Салхи баруун өмнөөс хойш эргэж секундэд 6-11 метр. Шөнөдөө 3-5 градус хүйтэн, өдөртөө 11-13 градус дулаан байна.

2022 оны 05 дугаар сарын 08-наас 05 дугаар сарын 12-ныг хүртэлх цаг агаарын урьдчилсан төлөв:

8-нд баруун болон төвийн аймгуудын нутгийн хойд хэсгээр, 9-нд баруун аймгуудын нутгийн зарим газар, төвийн аймгуудын ихэнх нутаг, зүүн аймгуудын нутгийн баруун хэсгээр, 10-нд баруун аймгуудын нутгийн зүүн хэсэг, төв, говь, зүүн аймгуудын нутгийн зарим газраар, 11-нд төв болон зүүн аймгуудын нутгийн зарим газраар бороо, нойтон цас орж, цасан шуурга шуурна. Салхи 8-нд нутгийн зарим газраар, 9-нд ихэнх нутгаар, 10-нд Алтайн уулархаг нутаг болон говь, талын нутгаар секундэд 15-17 метр хүрч ширүүсэж, шороон шуурга шуурна. 9-нөөс ихэнх нутгаар сэрүүсэж, Алтай, Хангай, Хөвсгөл, Хэнтийн уулархаг нутаг, Идэр, Тэс, Завхан, Байдраг, Туул, Тэрэлж голын хөндийгөөр шөнөдөө 9-14 градус хүйтэн, өдөртөө 0-5 градус, говийн бүс нутгийн өмнөд хэсгээр шөнөдөө 0-5 градус, өдөртөө 9-14 градус дулаан, бусад нутгаар шөнөдөө 3-8 градус хүйтэн, өдөртөө 3-8 градус дулаан байна.