Month: May 2022

Монгол Улсын Ерөнхийлөгч У.Хүрэлсүх НҮБын Хүүхдийн сангийн Зүүн Ази, Номхон далайн бүсийн захирал, хатагтай Дэбора Коминиг хүлээн авч уулзлаа. Монгол Улсын нийгэм, эдийн засгийн зорилтуудыг хэрэгжүүлэхэд НҮБ, түүний дотор НҮБ-ын Хүүхдийн сан дорвитой хувь нэмэр оруулж ирснийг Ерөнхийлөгч тэмдэглэжээ. Түүнчлэн цар тахлын үед эм, вакцин, хүүхдийн бичил тэжээл, хүчилтөрөгчийн хангамж хэрэгсэл нийлүүлж, нийгмийн эрүүл мэндийн онцгой байдлын үеийн чадавхыг бэхжүүлэхэд тусламж, дэмжлэг үзүүлсэнд талархал илэрхийлсэн байна.

Хүүхдийн төлөө хэрэгжүүлж байгаа Монгол Улсын бодлого, үйл ажиллагаа бүс нутагтаа үлгэр жишээ болж байдгийг НҮБ-ын Хүүхдийн сангийн Зүүн Ази, Номхон далайн бүсийн захирал, хатагтай Дэбора Комини онцолжээ. Мөн тэрээр цар тахлын хүнд үеийг амжилттай даван туулж, иргэдээ богино хугацаанд дархлаажуулалтад хамруулан, нийгмийн хамгааллын уян хатан бодлого хэрэгжүүлж, тэр дундаа хүүхдийн мөнгөн тэтгэмжийг хэмжээг нэмсэн нь жишиг болсныг онцолжээ.

Уулзалтын үеэр НҮБ-ын Хүүхдийн сангаас хэрэгжүүлж ХӨСҮТ-ийн дэргэд Вакцин, био бэлдмэлийн төв агуулах барьж, хүйтэн хэлхээний тоног төхөөрөмж суурилуулсан болон цаашид Сонгинохайрхан, Баянзүрх дүүрэг, Говь-Алтай, Баянхонгор, Өмнөговь аймагт CHIP багцыг үргэлжлүүлэх, “Гига” төслийн хүрээнд малчдын хүүхдүүдийг цахим нэвтрэлтэд хамруулах, цахим сургалтын чанарыг сайжруулах талаар ярилцсан байна. Мөн эрүүл мэндийн өгөгдлийг цахимжуулах, орон нутгийн эрүүл мэндийн байгууллагуудын ариун цэвэр, усан хангамжийн байгууламжийг сайжруулах, хүүхдийн өвчлөлийн эрт илрүүлэг, өсвөр насныхны хоол тэжээлийг сайжруулах зэрэг чиглэлээр хамтран ажиллах нь зүйтэй гэдэгт санал нэгджээ.

Монгол, Британийн Дугуй ширээний 14 дүгээр уулзалт 2022 оны тавдугаар сарын 12-ны өдөр Улаанбаатар хотод болов.

Монголын талын төлөөлөгчдийг Боловсрол, шинжлэх ухааны сайд Л.Энх-Амгалан, Британийн талын төлөөлөгчдийг Гадаад хэрэг, хамтын нөхөрлөл, хөгжлийн яамны Ази, Ойрхи дорнодын асуудал хариуцсан Төрийн сайд Аманда Миллинг нар тэргүүлэв.

Сайд нар Монгол Улс, Их Британи Умард Ирландын Нэгдсэн Хаант Улс 1963 онд дипломат харилцаа тогтоосныг тэмдэглэв. Монгол, Британийн харилцаанд тогтмол ахиц гарч буйг талууд сайшааж, түүнийг цаашид улам бүр өргөжүүлэх сонирхлоо нотлов. Ирэх 2023 онд тохиох хоёр улсын хооронд дипломат харилцаа тогтоосны 60 жилийн ойн хүрээнд Түншлэл, хамтын ажиллагааны хэлэлцээр байгуулах яриа хэлэлцээг эхлүүлэхээр тохиролцов.

Худалдаа, эдийн засаг, хөрөнгө оруулалтын хамтын ажиллагаа

Сайд нар Британийн импортын барааны тарифын хөнгөлөлтийн систем болох “Сайжруулсан нөхцөл”-д Монгол Улсыг 2021 оны 1 дүгээр сарын 1-ний өдрөөс хамруулсныг сайшаан тэмдэглэж, хоёр талын худалдаа, эдийн засгийн хамтын ажиллагааг хөнгөвчлөх чиглэлээр идэвхтэй хамтран ажиллах эрмэлзлээ илэрхийлэв.

Британийн Ерөнхий сайдын Монгол Улстай харилцах Худалдааны Элч, парламентын гишүүн Даниел Кавченскигийн Монгол Улсад хийсэн анхны айлчлал болон Оюу толгойн гүнийн уурхайн үйл ажиллагааг эхлүүлэх талаарх Монгол Улсын Засгийн газар, Рио Тинто компани хоорондын тохиролцоог талууд сайшаан тэмдэглэв.

Монгол Улсад бизнес, хөрөнгө оруулалтын таатай орчин чухал ач холбогдолтойг талууд онцолж, хөрөнгө оруулалтыг хамгаалах, эрх зүйн шинэчлэл, авлигатай тэмцэх чиглэлээр хийгдэж буй ажлыг сайшаав.

Сайд нар Лондонгийн хөрөнгийн бирж болон Монголын хөрөнгийн бирж хоорондын хамтын ажиллагааг сайшааж, цаашид эдгээр байгууллага хоорондын хамтын ажиллагааг эрчимжүүлэхийн төлөө байгаагаа илэрхийлэв.

Монголын Үндэсний геологийн алба, Британийн Геологийн алба хоорондын хамтын ажиллагааг үргэлжлүүлэх, Монголын геологи, уул уурхай, газрын тос, хүнд үйлдвэрийн салбарт тэргүүлэх технологи, тоног төхөөрөмж, сайн туршлагыг нэвтрүүлэх хүчин чармайлтыг талууд сайшаав.

Боловсрол, шинжлэх ухааны хамтын ажиллагаа

Сайд нар Кембрижийн хөтөлбөр, Чевнингийн түншлэлийн хэлэлцээр, Боловсролын төлөөх дэлхийн түншлэл зэргийн хүрээнд Монгол Улсын боловсролын тогтолцоо, үнэлгээний системийг боловсронгуй болгох, багш нарын мэргэшил дээшлүүлэх, англи хэлний мэдлэгийг сайжруулах чиглэлд хамтран ажиллахаар тохиров.

Уур амьсгал, эрчим хүч, байгаль орчны хамтын ажиллагаа

Дэлхийн дулаарлыг 1.5 хэмд хязгаарлах зорилтыг хэвээр хадгалах, дэлхийн эдийн засгийн 90 хувийг хамарсан нүүрс, машин, бэлэн мөнгө, мод болон хүлэмжийн хийн ялгарлыг тэглэх дэлхий нийтийн шинэ зорилтыг Глазгоу хотод болсон Уур амьсгалын өөрчлөлтийн тухай НҮБ-ын Суурь конвенцид оролцогч талуудын 26 дугаар бага хурал (COP26)-аас баталсан түүхэн тохиролцоог талууд сайшаав.

Үүнтэй холбогдуулан Монгол Улсын Ерөнхийлөгч Хүрэлсүх COP26-д оролцож, ой модыг хамгаалах амлалт, 2030 он гэхэд тэрбум мод тарих санаачлага гаргасныг мөн сайшаав.

Үндэсний хэмжээнд тодорхойлсон хувь нэмрээ оруулах үүрэг амлалтаа бүрэн хэрэгжүүлэх, байгаль орчинд ээлтэй эрчим хүчний салбарыг хөгжүүлэх, сэргээгдэх эрчим хүчний эх үүсвэрийн хэрэглээг нэмэгдүүлэхийн чухлыг сайд нар онцлов. Үүнтэй холбогдуулан Монгол Улсад усан цахилгаан станц хөгжүүлэх чиглэлээр хамтран ажиллах боломж байгааг тэмдэглэв.

Дэлхийн биологийн олон төрөл зүйлийг хамгаалах чиглэлээрх зорилтыг хэрэгжүүлэх, хамтын ажиллагааг талууд сайшаав. Мөн Лондонгийн Амьтан судлалын нийгэмлэгийн дэмжлэгтэйгээр Монгол Улсад хэрэгжүүлж буй төслүүд зэрэг зэрлэг амьтан, ургамлын хууль бус худалдаатай тэмцэх, байгаль орчныг хамгаалах чиглэлээр өрнүүлж буй хамтын ажиллагааг сайд нар сайшаав.

Тээврийн салбарын хамтын ажиллагаа

Хоёр улс хоорондын тээврийн харилцааг дэмжих зорилгоор Агаарын харилцааны тухай хэлэлцээр байгуулах сонирхлоо талууд илэрхийлэв.

Нийслэлийн Замын хөгжлийн газар энэ онд авто зам, замын байгууламжийн засвар арчлалтын ажлын хүрээнд 14 байршлын гол болон туслах гудамж замыг шинэчилнэ.

Тодруулбал, Баруун Сэлбийн гудамж буюу Энхтайваны өргөн чөлөө, Их дэлгүүрийн зүүн урд талын уулзвараас хойшоо Тэди төвийн зүүн хойд уулзвар хүртэл 600 метр авто замын шинэчлэлийн ажлыг тавдугаар сарын 13-наас зургаадугаар сарын 1-н хүртэл гүйцэтгэхээр төлөвлөжээ.

Тус ажлын хүрээнд тэгшилгээний хучилт, өнгө хучилт, хашлагуудыг шинэчлэх, инженерийн шугам, сүлжээний худгийг өндөрлөх зэрэг ажлыг хийх юм.

Энэ талаар Нийслэлийн Замын хөгжлийн газрын Засвар арчлалтын хяналтын хэлтсийн ахлах мэргэжилтэн Б.Ганбат “Зорчих хэсгийн хучилтыг хийхэд зам зайлшгүй хаах шаардлагатай. Хучилтаас бусад ажлын үед замын хөдөлгөөнийг хязгаарлахгүйгээр, иргэдийн зорчих хөдөлгөөнд саад учруулахгүйгээр хөдөлгөөн зохион байгуулалтыг хийхээр төлөвлөн ажиллаж байна. Хучилтын ажлын хэмжээнээс шалтгаалан зам хаах хугацааг тогтооно. Богино замуудыг нэг өдөр л хаана. Харин урт хэмжээний замуудыг 1-2 хоног хаах юм. Зам хаах болон хөдөлгөөн зохион байгуулалтын талаарх мэдээллийг засварын ажил эхлэхээс 3-5 хоногийн өмнө хэвлэл мэдээллийн хэрэгслээр дамжуулан иргэдэд мэдэгдэнэ” гэлээ.

Эх сурвалж: Нийслэлийн сургалт, судалгаа, олон нийттэй харилцах газар

Бэлчээрийн ургамлын ургалт тавдугаар сарын 10-ны байдлаар Хэнтий, Дорнод, Булган, Дархан-Уул, Сэлэнгийн ихэнх, Увс, Хөвсгөл, Орхон, Төвийн зарим, Ховд, Говь-Алтай, Баянхонгор, Өмнөговь, Дорноговийн ганц нэг сумдын нутгаар хэвийн байгааг Цаг уур, орчны шинжилгээний газраас мэдээллээ.

Харин Баян-Өлгий, Увс, Ховд, Говь-Алтай, Завхан, Хөвсгөл, Архангай, Баянхонгор, Өвөрхангай, Орхон, Төв, Говьсүмбэр, Өмнөговь, Сүхбаатарын зарим, Сэлэнгийн зарим нутгаар дунд буюу ургамал оройтож цухуйжээ.

Архангай, Баянхонгор, Дундговь, Дорноговь, Өмнөговийн ихэнх, Баян-Өлгий, Увс, Ховд, Говь-Алтай, Завхан, Өвөрхангай, Төв, Сүхбаатарын зарим, Хөвсгөл аймгийн зарим сумын нутгаар муу буюу ургамал цухуйсан боловч мал бэлчээх боломжгүй байна.

Одоогоор Дорноговийн зарим, Баян-Өлгий, Ховд, Завхан, Өмнөговь, Дундговь аймгийн ганц нэг сумдын нутгаар ургамал цухуйгаагүй байгаа талаар дээрх байгууллагаас мэдээлэв.