Шүүхийн ерөнхий зөвлөл хуралдаж давж заалдах шатны шүүхийн шүүгчийн сонгон шалгаруулалтад нэр дэвшүүлэх хүсэлтийг хэлэлцсэн байна. Хүсэлт илгээсэн 41 хуульчаас 37 хуульчийг нэр дэвшигчээр бүртгүүлэх шаардлага хангасан гэж үзэн бүртгэжээ.
Эдгээр хуульчийн хууль зүйн мэдлэг, чадварын шалгалтын хуваарийг баталсны дагуу шалгалт тавдугаар сарын 28-наас эхэлнэ.
Дөрвөн настай хүү энгэрийн зүү залгисныг мэс заслын аргаар гаргаж авлаа. Тодруулбал, ЭХЭМҮТ-ийн ерөнхий мэс заслын тасагт зүү залгисан дөрвөн настай хүү мэс засалд оржээ.
Зүү хүүхдийн цагаан мөгөөрсөн хоолойд байсан бөгөөд дурангаар авах боломжгүй нөхцөлтэй байсан учир нээлттэй хагалгаа хийсэн байна.
УИХ-ын Төсвийн байнгын хороогоор 2019-2021 онд хэрэгжүүлсэн Өрийн стратегийн баримт бичгийн тайланг хэлэлцлээ. Энэ үеэр Үндэсний аудитын газрын дарга, Монгол Улсын ерөнхий аудитор Д.Занданбат тус тайланд хийсэн аудитын дүгнэлтийг танилцуулав. Аудитаар дараах дүгнэлтүүд гарчээ.
-Засгийн газрын гадаад өрийн богино хугацаанд төлөх төлбөрийн дахин санхүүжилтийг шийдвэрлэж, төсвийн алдагдлыг багасгаж, гадаад валютын албан нөөц болон улсын төсөвт учруулах дарамтаас сэргийлсэн боловч урт хугацаанд эргэн төлөх өрийн хэмжээ өндөр хэвээр байна.
-Монголбанк Өрийн удирдлагын тухай хуулиар хүлээсэн чиг үүргээ биелүүлээгүй. Тодруулбал, Засгийн газрын нийт зээлийн хэмжээ Монгол Улсын мөнгөний болон валютын зах зээлд нөлөөлөхүйц байх тохиолдолд тухай бүр холбогдох санал, зөвлөмжийг санхүү, төсвийн асуудал эрхэлсэн төрийн захиргааны төв байгууллагад /Сангийн яам/ хүргүүлээгүй.
-Шинээр гадаад зээлийн эх үүсвэрээр санхүүжүүлэх төсөл арга хэмжээний эдийн засаг, нийгмийн ач холбогдлыг үнэлэх, зардал үр нөлөөг эрэмбэлэх аргачлал байхгүй байна.
-Өр үүсгэж бий болгосон хөрөнгийг үр ашигтай захиран зарцуулах зарчим хэрэгжихгүй байна.
-Засгийн газрын гадаад зээлийн 41.7 хувийг 2019-2021 онд улсын төсвийг алдагдлыг нөхөхөд зарцуулсан.
-Засгийн газрын нийт өрийн үлдэгдлийн 60.7 хувийг урт хугацаатай, хөнгөлөлттэй нөхцөлтэй гадаад зээл эзэлж байгаа нь цаашид ханшийн өсөлтийг нэмэгдүүлэх эрсдэлтэй.
-Засгийн газрын дотоод үнэт цаасны арилжаа хийх зайлшгүй шаардлага үүссэн тохиолдолд бэлэн байдлыг хангаагүй байгаа нь стратегийн баримт бичигт дэвшүүлсэн зорилтдоо хүрэхгүй байна.
-Засгийн газрын өрийн удирдлагын үйл ажиллагааг сайжруулах чиглэлээр олон улсын байгууллагаас өгсөн зөвлөмжийг бүрэн хэрэгжүүлээгүйгээс өрийн удирдлагын тогтолцоо сайжраагүй.
-Засгийн газрын өрийн удирдлагын 2019-2021 оны стратегийн баримт бичгийн зорилт, хэрэгжүүлэх арга зам, шалгуур үзүүлэлтийг оновчтой тодорхойлоогүйгээс бүрэн тайлагнаагүй байна гэж дүгнэжээ.
Үүний дараа Үндэсний аудитын газар 2021 оны үйл ажиллагааны тайлангаа УИХ-ын Төсвийн байнгын хороонд танилцууллаа.
Тэд 2021 онд 4134 аудитыг хийж дүгнэлт, тайлан гаргаснаас бүх шатны төсвийн гүйцэтгэл, санхүүгийн тайлангийн 3906 дүгнэлт гаргасан бол сэдэвчилсэн 228 гүйцэтгэл, нийцлийн аудитад 7174 шалгагдагч болон холбоотой хуулийн этгээдийг хамруулан төрийн хяналтыг хэрэгжүүлсэн байна. Тайлант хугацааны аудитын дүнгээр 10 их наяд төгрөгийн алдаа зөрчлийг илрүүлжээ. Үүнээс 4.2 их наяд төгрөгийн алдааг аудитын явцад залруулан цаашид үүсэх эрсдэлээс урьдчилан сэргийлж зөвлөн туслах чиг үүргийг хэрэгжүүлж ажилласан байна.
Түүнчлэн аудитын дүнгээр нийт 59.7 тэрбум төгрөгийн төлбөрийн акт, 2.2 их наяд төгрөгийн албан шаардлагыг шалгагдагч этгээдэд хүргүүлсэн аж. Энэ хүрээнд үйл ажиллагааны зохион байгуулалт, санхүү нягтлан бодох бүртгэл, дотоод хяналт, хууль тогтоомжийн нийцлийг хангуулах, төсвийн сахилга хариуцлагыг сайжруулж, зорилтот үр дүнд хүрч ажиллахыг үүрэгжүүлэн шалгагдагч болон хамрагдагч байгууллагын холбогдох албан тушаалтанд нийт 10 мянга гаруй зөвлөмж өглөө. Үүнээс гадна тайлант хугацаанд улс, орон нутгийн төсөвт 53.1 тэрбум төгрөгийн орлого төвлөрүүлж, шалгагдагч байгууллагаас 757.3 тэрбум төгрөгийн үр өгөөжийг хүлээн зөвшөөрсөн нь Төрийн аудитын байгууллага төсвөөс авсан “Нэг” төгрөгийн санхүүжилт тутамд 31.3 төгрөгийн үр өгөөжийг бий болгожээ.
УИХ-ын Төрийн байгуулалтын байнгын хорооны өчигдрийн хуралдаанаар Үндэсний баяр наадмын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн хэлэлцэх эсэх асуудлыг хэлэлцлээ.
Хуулийн төслийн талаар Соёлын сайд Ч.Номин танилцуулав.
Үндэсний их баяр наадмын тухай хууль нь 2003 оны 06 дугаар сарын 19-ний өдөр батлагдсанаас хойш нийт зургаан удаа нэмэлт, өөрчлөлт оруулж, хуулийн анхны бичвэрээс нэлээд зүйл, хэсэг заалт өөрчлөгдсөн бөгөөд бөх, уяач, сур харваачид олгох цол, чимэг, тэднээс допингийн шинжилгээ авах, хариуцлага тооцох зохицуулалтыг тусгажээ.
Сүүлийн жилүүдэд улсын баяр наадамд түрүүлсэн, амжилттай сайн барилдаж цол, чимэг авсан бөх допинг хэрэглэсэн нь шинжилгээгээр тогтоогдож, цол, чимгээ хураалгах, хэрэглэсэн, хэрэглээгүй дээр маргалдах, шүүхээр шийдвэрлүүлэх тохиолдолд ихээхэн гарсаар байна. Үндэсний их баяр наадмын тухай хуульд допинг хэрэглэхийг хориглох, хэрэглэсэн тохиолдолд хүлээлгэх хариуцлагын механизмыг суулгаж өгсөн боловч энэ нь олон улсын допингийн стандарттай нэг талаар нийцэхгүй, мөрдөж байгаа дүрэм журмыг батлах субъектийг хуульд тодорхой зааж өгөөгүйгээс Захиргааны ерөнхий хуульд заасан эрх зүйн хэм хэмжээний актын шаардлагыг хангаж чадахгүйд хүрч, Үндэсний баяр наадмыг зохион байгуулах хороо, салбар хорооны шийдвэр нь шүүх дээр хүчингүй болох тохиолдол гарч байна хэмээн сайд Ч.Номин танилцуулав.
Нөгөө талаас допинг хэрэглэхийг хориглох, хэрэглэсэн тохиолдолд хариуцлага хүлээлгэх зохицуулалт нь төдийлөн үр дүнтэй бус зөвхөн хэрэглэсэн бөх, харваачид хариуцлага тооцох, тодорхой хугацаанд баяр наадамд оролцох эрхийг хасах байдлаар явж ирсэн нь допинг хэрэглэхийг зөвлөж, хэрэглүүлж байгаа дасгалжуулагч, эмч, бөхийн дэвжээ зэрэг нь ямар нэг хариуцлага хүлээхгүй, энэ хөшүүрэг үр дүнтэй байж чадахгүй байна гэж хууль санаачлагчид үзжээ.
Үндэсний их баяр наадмын тухай хуульд үндэсний шагайн харвааг зохион байгуулах талаар зохицуулалт байхгүй боловч 1998 оноос эхлэн улс, аймаг, нийслэл, сумын баяр наадамд дөрөв дэх төрөл болон зохион байгуулагдаж, өөрийн дүрмээр зохицуулагдаж ирсэн. Дээрх хууль зүйн болон практик үндэслэл, шаардлагад үндэслэн Үндэсний их баяр наадмын тухай хуулийн шинэчилсэн найруулгын төслийг боловсрууллаа гэлээ.
Хуулийн төсөлтэй холбогдуулан УИХ-ын гишүүд асуулт асууж, байр сууриа илэрхийлсэн. Тухайлбал, допингийн асуудал, хурдан морины уралдаанд морьдыг үүлдэр угсаагаар ялган оролцуулах тухай, унаач хүүхдийн насны хязгаар, шагайн харвааг үндэсний их баяр наадмаар зохион явуулах болсон зэрэг асуудлыг тодруулж байлаа. Соёлын сайд болон ажлын хэсгийн гишүүдийн хариулснаар хуулийн төсөлд үндэсний их баяр наадмын үйл ажиллагаанд оролцогчдын эрх үүргийг тодорхой болгож, хариуцлагын механизмыг боловсронгуй болгохоор тусгасан байна. Тухайлбал, допинг хэрэглэсэн бөх, сурын харваач, допинг хэрэглэхийг зөвлөсөн, шаардсан дасгалжуулагч, эмч, дэвжээнд олон улсын допингийн дүрмийн дагуу хариуцлага оногдуулах механизмыг хуулийн төсөл тусгажээ. Түүнчлэн Допингийн эсрэг үндэсний дүрмийг батлах хүртэлх хугацаанд хуулийн төслийн 21 дүгээр зүйлд заасан шилжилтийн үеийн зохицуулалтаар допингтой холбоотой харилцааг зохицуулах, шийтгэлийг оногдуулахаар тусгасан байна.
Үндэсний бөхийн өмсгөл, сур харвааны малгай, нум сум, шагайн харвааны хэрэгсэл, хурдан морины сэрвээний өндөр зэргийг Монгол Улсын стандартаар тогтоох эрх зүйн зохицуулалтыг төсөлд тусгажээ. Өөрөөр хэлбэл дээрх дүрэм, журмыг бөх, сур, шагай, хурдан морины холбогдох мэргэжлийн холбоодын саналыг үндэслэн Засгийн газар тогтоохоор зохицуулжээ.
Үндэсний их баяр наадмын хурдан морины уралдаанд уралдах морийг долоо, түүнээс дээш насны хүүхэд унах бөгөөд уралдаанч хүүхэд нь хурдан морины уралдааны үед болон морины сунгаа, бэлтгэлийн үеийг хамруулсан нэг жилийн ослын даатгалд даатгуулсан байхаар тусгасан байна.
Хурдан морины уралдааны салбар хорооны морины бүртгэлийн дэд хороо нь улсын баяр наадам эхлэхээс гурван өдрийн өмнө мэдээллийн санд орсон, монгол үүлдрийн адууны стандартын шаардлагад нийцсэн морийг Үндэсний их баяр наадмын хурдан морины уралдаанд уралдах мориор бүртгэх бөгөөд стандартын шаардлага хангаагүй морийг бүртгэхийг хориглоно хэмээн төсөлд заажээ. УИХ-ын гишүүд стандартын шаардлага хангасан морь гэж чухам ямар морийг хэлэх, үндэсний их баяр наадмаар эрлийз морьдыг уралдуулах эсэх, унаач хүүхдийн насны хязгаарыг долоо гэж заасан нь зүйд нийцэх эсэх талаар байр сууриа илэрхийлсэн.
Хуулийн төсөлд монгол үндэсний уламжлалт тоглоом болох шагайн харвааг үндэсний их баяр наадмаар зохион явуулах, үүнтэй холбоотой дүрмийг Засгийн газар батлан мөрдүүлэх зохицуулалтыг шинээр тусгасан бөгөөд улсын баяр наадамд түрүүлсэн үзүүрлэсэн үндэсний шагайн харваач нарт бусад үндэсний спортын нэгэн адил Монгол Улсын Ерөнхийлөгчөөс цол олгохоор тусгасан байна.
Хуулийн төслийг хуралдаанд оролцсон гишүүдийн олонх хэлэлцэхийг дэмжсэн бөгөөд Байнгын хорооны санал, дүгнэлтийг чуулганы нэгдсэн хуралдаанд танилцуулахаар тогтлоо.
Мөн хуралдаанаар Байнгын хорооны тогтоолын төслийг хэлэлцэн баталлаа.
Монгол Улсын Их Хурлын Төрийн байгуулалтын байнгын хороо, Монгол Улсын Засгийн газар, Жендэрийн үндэсний хорооны 2022 оны 3 дугаар сарын 29-ний өдрийн хамтран зохион байгуулсан “Хуулийн хэрэгжилт, ач холбогдол, цаашдын үр нөлөө” онол практикийн бага хурлаас гарсан үр дүнг үндэслэн хуулийн хэрэгжилтийг эрчимжүүлэхтэй холбогдуулан дараах арга хэмжээг авч ажиллахыг Монгол Улсын Засгийн газарт чиглэл болгосон юм. Тогтоолоор төсвийн шинэчлэлийн хүрээнд жендэрийн мэдрэмжтэй төсвийн төлөвлөлтийг нэвтрүүлэх, Монгол Улсын урт, дунд, богино хугацааны хөгжлийн бодлогод нарийвчлан тусгах, уялдаа холбоог хангаж, хэрэгжилтийг хангаж ажиллахыг Эдийн засаг, хөгжлийн яам, Сангийн яаманд, Бүх нийтэд жендэрийн боловсрол олгох үндэсний тогтолцоог хөгжүүлж, жендэрийн тэгш байдлын үзэл баримтлалыг нэвтрүүлэх зорилгоор батлагдсан Боловсрол, шинжлэх ухааны салбарт баримтлах жендэрийн тэгш байдлыг хангах бодлогын /2017-2024/ хэрэгжилтийг эрчимжүүлэх, жендэр судлалыг академик түвшинд хөгжүүлэх чиглэлээр ажиллаж буй Жендэрийн үндэсний хорооны дэргэдэх эрдэмтэн судлаачдын бүлгийг Шинжлэх ухаан, технологийн сангаас дэмжих, эрдэм шинжилгээний үйл хэрэгт татан оролцуулах замаар уялдааг хангаж ажиллахыг Боловсрол, шинжлэх ухааны яаманд даалгасан юм.
Дараа нь Байнгын хорооны тогтоолоор Сонгуулийн тогтолцоо болон Үндсэн хуулийн нэмэлт, өөрчлөлтийн талаар улс төрийн намууд, түүнчлэн УИХ-ын гишүүн Т.Доржхандын саналыг дэмжсэн 100,000 иргэдээс ирүүлсэн санал, шаардлагыг судалж, санал, дүгнэлт боловсруулах үүрэг бүхий ажлын хэсгийг УИХ-ын гишүүн Ж.Мөнхбатаар ахлуулан байгууллаа. Ажлын хэсгийн бүрэлдэхүүнд УИХ-ын гишүүн А.Адъяасүрэн, С.Бямбацогт, Ц.Мөнх-Оргил, Ц.Мөнхцэцэг, М.Оюунчимэг, Б.Пүрэвдорж, Д.Тогтохсүрэн, Н.Энхболд нар ажиллах бөгөөд ажлын хэсэг санал, дүгнэлтээ 2022 оны 05 дугаар сарын 31-ний дотор Байнгын хороо, Улсын Их Хуралд танилцуулахыг даалгасан байна.
Түүнчлэн тус байнгын хорооны 05 дугаард сард хэлэлцэх асуудлыг цаглавар батлах тухай Байнгын хорооны тогтоолыг баталлаа хэмээн УИХ-ын Хэвлэл мэдээлэл, олон нийттэй харилцах хэлтсээс мэдээллээ.
Ц.Баасанцогтыг өнгөрөгч дөрөвдүгээр сард тагнуулын байгууллагынхан хойшлуулшгүйгээр цагдан хорьсон билээ.
Түүнийг Экстремист үйл ажиллагаа явуулахыг завдсан хэрэгт шалгуулж буй таван хүнд галт зэвсэг нийлүүлсэн байж болзошгүй хэмээн түүнийг саатуулсан.
Улмаар Б.Баасанцогтын цагдан хорих хугацааг нэг сарын хугацаагаар сунгуулах тухай саналыг Хан-Уул дүүргийн Эрүүгийн хэргийн анхан шатны шүүх 2022 оны 05 дугаар сарын 02 -ны өдөр хүлээн авч хэлэлцээд хорих хугацааг нэг сараар сунгаад байсан.
Түүнийг цагдан хорих хугацаа ирэх зургаадугаар сарын 7-ны өдөр дуусах байсан ч шүүхээс түүнийг суллах шийдвэр гаргажээ.
В.Путины үнэн бодит, бүрэн намтар болох “Вова. Володя. Владимир. Орос Путины нууц” 800 хуудас ном хэвлүүлсэн Польшийн эрэн сурвалжлагч сэтгүүлч, нэрт нийтлэлч Кристина Курчаб-Редлихийн BELSAT TV-д өгсөн youtube-ийн “Путина было ужасное детство. Биограф о главе России” ярилцлагыг товчлон нийтлэж байна.
Хөтлөгч: Та “Орос Путины нууц” гэсэн ном хэвлүүлсэн байна. Энэхүү номоо яагаад Путины нууц гэж нэрлэв. Гол нууц нь яг юу вэ, түүний бага настай холбоотой юу?
-Миний номны гол зорилго бол Путин яагаад ийм харгис хэрцгий хүн болов гэсэн асуултад үнэн зөв хариулт олох явдал байсан. Хүмүүс Путиныг КГБ-ын хурандаа юм чинь харгис байлгүй яахав гэдэг. Гэтэл бүх КГБ-ийнхэн харгис байдаггүй. Жишээ нь, ОХУ-ын ерөнхий сайд агсан Геннадий Примаков, Оросын нийгэм, улс төрийн нэрт зүтгэлтэн Сергей Степашин гээд олон хүн КГБ-д байсан хүмүүс шүү дээ. Путины албан ёсны намтарт байгаа Ленинградын уугуул иргэн, тэр байтугай түүний төрсөн он, эх, эцэг гээд бүгд худал зүйл.
Ерөөс түүний намтар авах юмгүй худал хуурмаг. Үнэн хэрэгтээ Путин Уралын нуруун дахь Очёр гэх жижиг гацаанд 1950 онд төрсөн. Өнөөдөр ч энд түүнтэй овог нэг олон хамаатан, садангууд нь амьдарч байна. Түүний эх нь дайны дараа Уралын техникум төгсөж дадлага хийж байхдаа түүний аавтай танилцсан. Эх нь Путиныг төрүүлсний дараа нөхрөө эхнэр хүүхэдтэй гэдгийг мэдээд түүнээс зугтсан. Ээж нь бяцхан Путиныг Уралд эцэг, эх дээрээ орхиод өөрөө Дундад Азид ажиллахаар явсан байна. Тэнд тэр нэгэн гүрж эртэй танилцан дурлаж гэр бүл болон Гүржид очсон. Гэтэл нөгөө баянаа гайхуулаад чамайг жаргаана гээд байсан гүржийн байшин нь бүтэн шал ч үгүй ядуу зүдүү байсан аж. Гүржийн охин буюу Путины дүүг төрүүлсэн эх нь ямар ч байсан Путиныг авчруулахаар нөхрөө ятгаж чадсан байна. Ингээд энд Путины жинхэнэ тамын амьдрал эхэлсэн байгаа юм. Путиныг томроод ирэнгүүт нь гүрж хойд эцэг нь хайр найргүй зоддог байжээ. Гүржид байхдаа Путин өөрийгөө төдийгүй эхээ давхар хамгаалах чадвартай болох ёстой юм байна гэдгийг хатуу ойлгож авсан байна. Аргагүй байдалд орсон эхэд нь Путиныг зүгээр л ачаа бараа шиг Урал руу эцэг, эх рүү гээ ганцааранг нь явуулж энэ тамаас гаргахаас өөр арга үлдээгүй байна. Удалгүй өвөө, эмээ нь Путиныг хоёр хүүгийнхээ нэгийг дайнаас өмнө үлдсэнийг нь Ленинградын бүслэлтийн үед алдсан хамаатандаа өргүүлсэн байна. Өргөж авсан эцэг нь Путиныг бас л хайр найргүй зоддог байжээ.
-Тэрбээр төрсөн эцэггүй, гүрж хойд эцэг, өргөсөн орос эцэгтэй өссөн гэсэн үг үү?
-Харамсалтай нь тэр хоёр нь хоёулаа түүнийг хайр найргүй зоддог байсан.
-Гайхалтай адилхан тохиолдол байна. Беларусьчууд Александр Лукашенког эх нь дурласан цыганаас олж гаргасан гэж ярьдаг. Энэ хоёр хүн ийм ойр дотно болоход эд нарын аз жаргалгүй бага нас нь нөлөөлсөн юм болов уу?
-Би Лукашенкогийн бага нас Путиныхаас хамаагүй аз жаргалтай байсан гэж бодож байна. Түүнийг ялангуяа Путины гүрж хойд эцэг шиг аймшигтай зодож байгаагүй байх.
-Түүнд хойд эцэг ч байгаагүй л дээ. Харин Путин багадаа өлсөж байсан уу?
-Ленинградын өргөсөн эцэг нь түүнийг хайрладаг байсан гэж хэлэхэд болно. Гэхдээ маш харгисаар зоддог байсан. Түүнтэй нэг байранд хамт амьдарч байсан, одоо насанд хүрсэн хүмүүс өнөөдөр ч энэ тухай дурсан ярьцгааж байна.
-Өргөмөл эцэг нь ДХЯ-нд ажиллаж байсан…
-Тийм ээ, бас Финляндын дайнд оролцсон. Гэхдээ энэ тийм чухал биш. Энэ үеэс л бяцхан Вова гэх Путин нэгдүгээрт, эцэст нь тултал өөрийгөө хамгаалдаг байх, хоёрдугаарт, хуурах, хуурах бас дахин хуурч байх гэсэн зарчимтай болсон.
-Тэр хар багаасаа бусдыг хуурах, мөн чанараасаа өөр төрх гаргаж сурсан гэсэн үг үү?
-Путин өнөөдөр яаж байгааг нь хар л даа…
-Та түүнийг яг юу гэж тодорхойлсон бэ?
-Өнөөдөр тэр бол мэргэжлийн өндөр түвшинд худал ярьдаг дэлхийн хэмжээний ганц хүн.
-Путин Оросыг удирдсан сүүлийн 18 жилд хэн хийсэн нь тодорхойгүй олон том цуст халдлага болон янз бүрийн улс төрийн аллага гарсан?
-Би номынхоо төгсгөлд Путины оршуулгын газар руу илгээсэн талийгаачдын овог нэрсийг жагсааж бичихэд нэлээд хэдэн хуудас болж байна билээ.
-Таны “Вова. Володя. Владимир. Орос Путины нууц” ном орос хэл дээр хэвлэгдэх үү?
-Уг нь би хэвлүүлэхийг маш их хүсч байна. Гэвч ойр дотны хүмүүс маань энэ номыг хэвлүүлэх нь миний амь насанд аюултай гээд байгаа юм. Би өнөөдөр Путиныг тахин шүтэгсэд түүний үнэн бодит намтрыг уншиж, үнэнийг мэдэж, түүний яг хэн болохыг үнэнээр нь мэдэж аваасай гэж маш их хүсч байна.
BBC. CNN. REUTERS. DW. NHK. TASS-аас бэлтгэсэн Г.АМАРСАНАА
Барилгын материалын үнийн өсөлтийн асуудлаар байнгын ажиллагаатай ажлын хэсэг байгуулахаар боллоо.
Холбогдох албаныхан санал солилцож, зах зээлд зохиомлоор дотоодын болон импортын барилгын материалын үнийг өсгөх, монополь байдлаар зах зээлийн үнийг хэт өндөр тогтоох, тонн жин, чанар стандартаа хангахгүй барилгын материалыг зах зээлд хэт ит ашиг олох зорилгоор худалдан борлуулах, хэрэглэгчийн эрх, ашгийг хохироох гэх мэт асуудлуудын хүрээнд байнгын ажиллагаатай хамтарсан ажлын хэсэг байгуулж ажиллахаар тогтов.
Мөн Барилгын материалын нэгдсэн мэдээллийн сангийн хүрээнд хийгдэх барилгын материалын үнийн судалгааг хамтарч олон нийтэд ил тод нээлттэй болгох ажлуудыг зохион байгуулах аж.
Уулзалтад Барилга, хот байгуулалтын яамны Барилга, барилгын материалын бодлогын хэрэгжилтийг зохицуулах газрын дарга Д.Гантулга, Барилгын материалын үйлдвэрлэлийн хэлтсийн дарга Д.Батзориг, ШӨХТГ-ын дарга С.Мөнхчулуун болон холбогдох газар хэлтсийн албан хаагчид оролцсон юм хэмээн Барилга, хот байгуулалтын яамнаас мэдээллээ.
2021-2022 хичээлийн жилд I-III ангийн сурагчид 32, IV-V ангийн суралцагчид 33, VI-XII ангийн сурагчид 34 долоо хоног тус тус хичээллэнэ. Энэ хичээлийн жил сурагчдын өвлийн амралт сунгагдсантай холбогдуулан БШУ-ны сайдын 2022 оны А/38 тоот тушаал гарч 2021-2022 оны хичээлийн жилийн II, III улирлын хичээл эхлэх, үргэлжлэх, дуусах хугацаанд өөрчлөлт оруулсан.
Амралт дараах хуваарийн дагуу эхэлнэ.
-I-III ангийн сурагчид 06-р сарын 3-нд хичээллээд амарна.
-IV-V ангийн сурагчид 06-р сарын 3-нд хичээллээд, 06-р сарын 06-10-нд шалгалтын 7 хоног үргэлжлээд амарна.
-VI-XII ангийн сурагчид 06-р сарын 10-нд хичээллээд, 06-р сарын 13-17-нд шалгалтын 7 хоног үргэлжлээд амарна.
ТЕГ-аас хойшлуулшгүй ажиллагаа явуулж, баривчилсан сэтгүүлч, зохиолч Ч.Мөнхбаярын давж заалдах шатны шүүх хурал өнөөдөр болно.
Тодруулбал, Нийслэлийн эрүүгийн хэргийн давж заалдах шатны шүүх тавдугаар сарын 19-ний өдрөөр товлогдсон уг хурлын цаг тодорхойгүй байна.
Ч.Мөнхбаярын гэр бүлээс хамтран зүтгэгч, найз нөхдийг нь шүүх хурал болох газар цугларахыг уриалсан байна.
ОБЕГ-ын дэргэдэх Агаараас эрэн хайх, аврах 111 дүгээр ангийн “ЕС-145” загварын нисдэг тэрэг өчигдөр анх удаа ойн түймрийн тандалтын нислэгийг үйлдэж, түймрийн голомтод алба хаагчдыг хүргэжээ.
Тодруулбал, Хэнтий аймгийн Батширээт сумын Онон 1 дүгээр багийн “Ононгийн живхээртэй-Эх” гэдэг газар /аймгийн төвөөс хойд зүгт 200 км, сумын төвөөс хойд зүгт 20 км/-т ойн түймэр гарсан тухай дуудлагыг тавдугаар сарын 18-ны өдрийн 15:44 цагт хүлээн авсан.
Дуудлагын дагуу ОБЕГ-ын дарга, хошууч генерал Г.Ариунбуянгийн шийдвэрээр ойн түймэр гарсан газарт агаараас тандалт хийх, шуурхай бүлгийг түймрийн голомтод буулгахаар Агаараас эрэн хайх, аврах 111 дүгээр ангийн “ЕС-145” загварын нисдэг тэрэг 17:16 цагт Хэнтий аймгийн чиглэлд хөөрч, түймрийн голомтын дээгүүр тандалтын нислэг үйлдэж, түймрийн нөхцөл байдлыг үнэлэн, шуурхай бүлгийн аврагчдыг буулгаад 20:33 цагт Хэнтий аймгийн Чингис хотод буцаж газарджээ.
Түймрийн голомтод буусан шуурхай бүлгээс ойн түймрийг өчигдөр орой 21:51 цагт цурамд оруулан, Онцгой байдлын байгууллагын алба хаагчид болон орон нутгийн иргэд бүрэн унтраахаар ажиллаж байна гэсэн мэдээллийг ирүүллээ гэж Онцгой байдлын ерөнхий газраас мэдээллээ.
Уг нисдэг тэргийг Франц улсаас хөнгөлөлттэй зээлээр авсан билээ.
