Month: May 2022

Categories
мэдээ эдийн-засаг

Банк бус санхүүгийн салбарын зээлдэгчдийн тоо 1.4 саяд хүрчээ DNN.mn

УИХ-ын чуулганы нэгдсэн хуралдаанаар /2022.05.20/ Банк бус санхүүгийн үйл ажиллагааны тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцrээ.

Энэ оны нэгдүгээр улирлын байдлаар Санхүүгийн зохицуулах хорооноос тусгай зөвшөөрөл авсан нийт 529 банк бус санхүүгийн байгууллага үйл ажиллагаа явуулж байна. Эдгээр байгууллагын нийт хөрөнгийн хэмжээ 3.0 их наяд төгрөгт хүрлээ. Түүнчлэн банк бус санхүүгийн байгууллагуудын зээлийн үйлчилгээний хүртээмж ч сайжирсан бөгөөд салбарын зээлдэгчдийн тоо өмнөх оны мөн үеэс 2.4 дахин нэмэгдэж 1.4 саяд хүрсэн бол нийт харилцагчдын тоо давхардсан тоогоор 4.6 сая байна.

Энэхүү өсөлт нь зээлийн нийлүүлэлтээс гадна технологид суурилсан санхүүгийн бүтээгдэхүүн, үйлчилгээ зах зээлд нэвтэрч эхэлсэнтэй холбоотой юм. Нөгөөтээгүүр банк бус санхүүгийн салбарт технологид суурилсан санхүүгийн бүтээгдэхүүн үйлчилгээ буюу финтек өргөнөөр нэвтэрч байна. Тухайлбал, 32 банк бус санхүүгийн байгууллага /ББСБ/ финтек зээлийн бүтээгдэхүүн гаргаж харилцагч, үйлчлүүлэгчдэдээ хүргээд байна.

Гэхдээ технологид суурилсан санхүүгийн шинэ үйлчилгээ бий болж харилцагч, үйлчлүүлэгчдийн тоо нэмэгдсэн ч эрх ашгийг нь хамгаалсан, салбарын хөрөнгө оруулалтыг нэмэгдүүлэх замаар иргэдэд хүрэх санхүүгийн хүртээмжийг ахиулах боломжийг бүрдүүлсэн хууль, эрх зүйн орчин учир дутагдалтай байна. Ялангуяа төрөөс үзүүлж буй тусгай зөвшөөрлийн тоог бууруулах, хөгжлийн чиг хандлагыг олон улсын жишигт нийцүүлэх шаардлага тулгарч буй. Иймд Санхүүгийн зохицуулах хорооноос банк бус санхүүгийн салбарт зохистой орчин бүрдүүлэх, санхүүгийн зах зээлд шинэ бүтээгдэхүүн, үйлчилгээ нэвтрүүлэх замаар санхүүгийн зуучлалыг хөгжүүлэх, салбарын хөгжлийг олон улсын жишигт хүргэх цаашилбал хяналтын оновчтой тогтолцоог бүрдүүлж, болзошгүй эрсдэлээс урьдчилан сэргийлэхээр Банк бус санхүүгийн үйл ажиллагааны тухай хуулийн шинэчилсэн найруулгын төслийг боловсруулсан.

Хуулийн шинэчилсэн найруулгын төсөл батлагдсанаар ББСБ-ууд нь олон талт санхүүгийн үйлчилгээг эрхлэх боломж бүрдэхийн сацуу салбарын оролцогчдыг чадавхжуулж, төрөлжсөн институт болгох, финтект суурилсан санхүүгийн үйлчилгээ болон компанийн засаглалын ил тод байдал, мэдээллийн аюулгүй байдлын эрх зүйн зохицуулалт бий болно. Мөн Санхүүгийн зохицуулах хороо буюу зохицуулагч байгууллагын эрх үүргийг тодорхой болгож, нэгдсэн хяналт шалгалт хийх эрх зүйн орчин бүрдэхийн хамт мөнгө угаах болон терроризмыг санхүүжүүлэхээс урьдчилан сэргийлэх тогтолцоо сайжрах юм.

Банк бус санхүүгийн үйл ажиллагааны тухай хууль нь 2002 оны 12 дугаар сарын 12-нд батлагдсан бөгөөд өнгөрсөн хугацаанд нийт 9 удаа холбогдох хууль тогтоомжтой нийцүүлэн нэмэлт өөрчлөлт оруулж байсан. Харин өнөөдөр буюу 20 жилийн дараа ийнхүү шинэчлэх ажлыг УИХ-ын чуулганы нэгдсэн хуралдаанаар хэлэлцэн дэмжээд Банк бус санхүүгийн үйл ажиллагааны тухай хуулийн шинэчилсэн найруулгын төслийг анхны хэлэлцүүлэгт бэлтгүүлэхээр Эдийн засгийн байнгын хороонд шилжүүллээ.

Эх сурвалж: СЗХ

Categories
мэдээ нийгэм

ЖДҮ эрхлэгчдийн 60 хувийг эмэгтэйчүүд эзэлж байна DNN.mn

Монгол Улсын Ерөнхийлөгчийн ивээл дор “Бизнес ба эмэгтэйчүүд” зөвлөлдөх уулзалт боллоо

Монгол Улсын Ерөнхийлөгчийн ивээл дор “Бизнес ба эмэгтэйчүүд” зөвлөлдөх уулзалт өнөөдөр Монголын үндэсний худалдаа, аж үйлдвэрийн танхимын Их танхимд боллоо.

Зөвлөлдөх уулзалтын нээлтэд Монгол Улсын Ерөнхийлөгчийн Тамгын газрын дарга Я.Содбаатар оролцож, үг хэлэв. Ерөнхийлөгчийн Тамгын газрын дарга Я.Содбаатар Монгол Улсын Ерөнхийлөгч “Халамжаас хөдөлмөрт” суурь шинэчлэлийн хүрээнд эмэгтэйчүүдийн ажил эрхлэлт, бизнесийг дэмжих, өрхийн орлогыг нэмэгдүүлэхэд анхаарал хандуулан ажиллаж байгааг тэмдэглэлээ.

Үндэсний статистикийн хорооны 2021 оны аж ахуйн нэгжийн тооллогын урьдчилсан дүнгээр Монгол Улсад үйл ажиллагаа явуулж буй нийт аж ахуйн нэгжийн 38 хувь нь эмэгтэй захиралтай байна. Харин жижиг, дунд үйлдвэрлэлийн салбарт үйл ажиллагаа эрхэлж буй бизнес эрхлэгчдийн 60 гаруй хувийг эмэгтэйчүүд эзэлж байгаа юм. Гэвч эмэгтэйчүүдийн ажиллах хүчний оролцооны түвшин сүүлийн жилүүдэд буурах хандлагатай байгаа бөгөөд энэ оны эхний улирлын байдлаар 50.4 хувьтай байхад эрэгтэйчүүдийнх 66.5 хувьтай байна.

Эмэгтэйчүүдийн ажиллах хүчний оролцоог нэмэх, эмэгтэй бизнес эрхлэгчдийг дэмжихэд тулгамдаж буй асуудлуудыг зөвлөлдөх уулзалтаар хамтдаа тодорхойлж, шаардлагатай бодлогын болон эрх зүйн орчныг бүрдүүлэх чиглэлээр идэвхтэй хэлэлцүүлэг өрнүүлнэ гэдэгт итгэж байгаагаа илэрхийллээ.

Уулзалтаас гарсан санал, зөвлөмжийг нэгтгэн ирэх намар Монгол Улсын Ерөнхийлөгчийн ивээл дор зохион байгуулах үндэсний чуулганаар хэлэлцүүлэх юм. Энэ удаагийн зөвлөлдөх уулзалтаар бизнес эрхлэгч эмэгтэйчүүдийн эрх ашгийг хамгаалах, дэмжих чиглэлээр үйл ажиллагаа явуулж буй төрийн бус байгууллагууд, мэргэжлийн холбоод, олон улсын байгууллагуудын зүгээс хэрэгжүүлж буй ажлуудаа танилцуулж, хамтран ажиллах, харилцан уялдаа холбоогоо сайжруулах боломжуудын талаар санал солилцлоо.

Монгол Улсын Ерөнхийлөгчийн Тамгын газар, Хөдөлмөр, нийгмийн хамгааллын яам, Монголын үндэсний худалдаа, аж үйлдвэрийн танхимаас хамтран зохион байгуулсан зөвлөлдөх уулзалтад эмэгтэй бизнес эрхлэгчид, төрийн болон төрийн бус байгууллагууд, мэргэжлийн холбоод, олон улсын байгууллагуудын төлөөллөөс бүрдсэн 100 гаруй хүн оролцов.

Categories
мэдээ нийгэм

Ирэх сарын 1-нээс эхлэн цахилгааны төлбөрөө хэрэглэгч өөрөө төлнө DNN.mn

Монгол Улсын Засгийн газрын 410 дугаар тогтоолын дагуу 2021 оны нэгдүгээр сарын 1-нээс 2022 оны тавдугаар сарын 31-ний өдрийг хүртэл орон сууцны айл өрхийн сард хэрэглэсэн 250 кВт.ц хүртэл, гэр хорооллын айл өрхийн сард хэрэглэсэн 350 кВт.ц хүртэл төлбөрийг төрөөс хариуцаж байсан билээ.

Энэхүү тогтоолын хэрэгжилтийн хугацаа дуусгавар болж буйтай холбогдуулан ирэх зургаадугаар сарын 1-ний өдрөөс эхлэн цахилгаан эрчим хүчний төлбөрөө хэрэглэгч өөрөө бүрэн хариуцаж болсныг Улаанбаатар цахилгаан түгээх сүлжээ ТӨХК-аас мэдээллээ.

Categories
мэдээ нийгэм

Даланзадгад-Мандалговь-Улаанбаатар чиглэлийн замыг засаж эхэлжээ DNN.mn

Энэ талаар тус аймгийн Засаг Даргын Тамгын Газраас “Утаагүй түлш болон уул уурхайн бүтээгдэхүүний тээвэр хот хооронд хийгдэж, даац хэтрүүлсэн тээврийн хэрэгсэл сүүлийн жилүүдэд зорчсоноос үүдэн авто замын эвдрэл үүсэж, аваар ослын нөхцөл байдал хүндэрсэн.

Өмнөговьчууд 2018 оноос эхлэн Засгийн газрын түвшинд анхаарлаа хандуулахыг шаардан, замын асуудал дээр орон нутгийн удирдлагууд, олон нийтийн байгууллага, иргэд зорчигчид шат шатандаа дуу хоолойгоо хүргэсээр ирсэн билээ.

2022 оны улсын төсөвт Улаанбаатар-Мандалговь чиглэлийн зам засварт 990 сая төгрөг, Мандалговь-Даланзадгад чиглэлийн зам засварт 1 тэрбум 900 сая төгрөг төсөвлөгдөж улсын чанартай тус замуудын засварын ажил эхэлсэн. Утаагүй түлшний тээвэр Зүүнбаянгийн төмөр замаар явж байгаа” хэмээн мэдээллээ.

Categories
арын-нүүр булангууд мэдээ

СОНИНЫ АРЫН НҮҮР: Морины уралдаан дагасан тээврийн хэрэгслийг улсын орлого болгоё DNN.mn

Морины уралдаан болоход л бандгар, бандгар жийпнүүд хэдэн арваараа дагадаг жишиг манайд тогтоод удаж байна. Хэдхэн морины давхил болох төдийд л хар теньтэй жийпнүүд дагаж давхиад эрүүл хөрсийг сүйтгэж байгаль орчны эсрэг гэмт хэрэг үйлддэг болж. Ийм гажиг жил бүрийн өдийд орон нутагт хурцадмал хэлбэрээр илрэх юм. Хамгийн ноцтой нь морь, машин холилдож давхиад улаан тоос татаад ирэхэд унаач хүүхдийн эрүүл мэнд үндсэндээ хутганы ирэн дээр ирж байна л даа. Тэнд ч унаач хүүхэд мориноос унаж бэртлээ, энд ч унаж нас барлаа гэх мэдээ зогсолтгүй хөврөх болж. Дийлэнх нь л хөдөө орон нутагт овоо тахилгын наадмын үеэр тохиосон байх. Мөрөөр нь холбогдоод сурахад морины уралдааныг машин дагаснаас л боллоо гэж нулимс унагаж байх юм. Энэ нь хүүхдийн эрхийг хамгаалах байгууллагуудын анхаарлын төвд орж морины уралдааныг хориглох талаар ч шат шатны байгууллагууд хэлэлцээд эхэлж.

Хүүхдийн эрхийг хамгаалагч гэх хэн бүхэн л монгол наадам, тэр дундаа морины уралдаантай дайсагнах болж. Үндсэндээ хориглоход тун ойрхон байна. Одоо морь дагаж давхилддаг бандгар жийптэй нөхдүүдийн хүний мөсгүй, хар амиа хичээсэн үйлдлийг хуулиар хатуу хориглох цаг ирээд байна. Эс бөгөөс монгол наадмын чимэг морины уралдаан хоригдох нь. Мод хулгайлахдаа ашигласан тээврийн хэрэгслийг улсын орлого болгодог шиг морины уралдаан дагаж хүүхдийн эрүүл мэндэд эрсдэл учруулсан том жийпнүүдийг журамлаж улсын орлого болгох талаар Баяр наадмын тухай хуулийн шинэчилсэн найруулгын төсөлд суулгаж өгье. Хөлс хөдөлмөрөө зарцуулж авсан төмөр хүлгээ морины уралдаан дагах төдийд ашиглаж хураалгах хүн бараг байхгүй болов уу. Үүнийг л хуульчлаад өгчихвөл хүүхдүүд эрүүл саруул наадах гээд байна.

Categories
мэдээ нийгэм цаг-үе

DNN-SPEAK OUT: Иргэд “Монголд мод тарихаас илүү шийдэх олон чухал асуудал байна” гэв DNN.mn

Мод тарих хөдөлгөөн улс даяар өрнөж, иргэд, байгууллагууд хаа сайгүй мод тарьж байна. Нөгөөтэйгүүр мод, суулгац тарьдаг улирал нь ч таарчихлаа. Иргэдээс мод тарьж буй энэ үйл явцын талаар сэтгэгдлийг DNN-SPEAK OUT буландаа сонслоо.

“Монголд мод тарихаас илүү шийдэх олон чухал асуудал байна” ГЭВ

Г.Далайжамц (өндөр настан): Монгол Улс цөлжилтийн тэргүүн байранд явж байна. Тиймээс мод тарьж, зүлэгжүүлэх ажил сайн хийвэл Монгол Улсад ч дэлхий нийтэд ч хэрэгтэй. Нэг гэм нь үрслүүлсэн мод нь их үнэтэй юм. Ахмад настнуудад хямдралтай үнээр зардаг бол бид тарихад бэлэн. Мөн тарьсан модоо эргэж тойроод, тайрах ёстой бол тайраад, услаад явах юм бол үр дүнд хүрнэ шүү гэж хэлье. Миний зүгээс хашаандаа 2,3 үрсэлгээ суулгасан.

Б.Баяндүүрэн (цагдаа): Манай БЗД-ийн Замын цагдаагийн бүх алба хаагчид хамт олноороо мод тарьсан. Мөн хувь хүний зүгээсээ хашаа байшинтай хүмүүс нь хашаандаа, зуслангийн газартай хүмүүс нь зусландаа модоо тарьж ургуулж байгаа. Нэгэнт ургуулна гэж тарьсан юм чинь байнга услах хэрэгтэй.

н.Баатар (өндөр настан): Энэ тэндгүй л мод тарьж байна. Би байранд байдаг болохоор мод тариагүй ээ. Үр хүүхдүүддээ л сайн тарьж ургуулаарай гэж захидаг.

Иргэн: Тэрбум мод тарих үндэсний хөдөлгөөнийг би дэмждэггүй. Монголд мод тарихаас илүү шийдэх олон чухал асуудал байна. Би мод тарихгүй.

Б.Лхагвадорж (хот тохижилтийн ажилтан): Мод тарихад анхаарах зүйл бол усалгаа арчилгаа. Тэгж байж үр дүнд хүрнэ. 

Тэгэхгүй зүгээр мод тарьсан гээд л усалж, арчлахгүй хаячихвал ямар ч үр дүн гарахгүй.

Мөн мод тарихдаа газраа зөв сонгох хэрэгтэй санагддаг. Хүн амьтан сүйтгэж, үймүүлээд байхааргүй газар таривал дээр. Миний хувьд мод тарьж амжаагүй байгаа ч тарихдаа олон зүйл дээр анхаарна гэж боддог.


М.Чимэгбаяр (оюутан): Хойшоо өвөөгийн маань зуслангийн зүгт олон мод тарьж байгаа харагдсан. 

Гэсэн ч мянга тариад арчлахгүй орхичих юм бол нэмэргүй шүү дээ.

Боломжгүй хүмүүс нь хэдэн сардаа, ядаж жилдээ нэг эргэж тойроод, хараад байх хэрэгтэй. Эсхүл ойр хавийн хүмүүстээ захиж үлдээгээд усалгаа хийлгээд байвал бас зүгээр байх. Өмнө нь цэцэрлэгт хүрээлэнд мод тарьж байсан. Очих болгондоо модоо хардаг. Сайн ургаж байгаа шүү.

н.Уранбаяр : Хүмүүс их мод тарьж байгаа л харагдаж байна. Хувь хүн, албан байгууллага аль нь ч байсан мод тарьсан л бол сайн арчилж ургуулах хэрэгтэй. Зарим албан газруудын гадна талбайн мод нь ургалт муу харагддаг.

Тэдгээр газрууд байнга арчилж, хамгаалагчдаа захиж үлдээдэг ч юм уу тиймэрхүү байдлаар хараа хяналттай байвал зүгээр. Миний хувьд нялх хүүхэдтэй учир мод тариж амжаагүй л байна. Уг нь их сайн юм гэсэн.

М.САЙНЗАЯА


Categories
мэдээ нийгэм

Гурван сарын өмнө сураггүй болсон иргэний цогцос олдлоо DNN.mn

Өнгөрөгч гуравдугаар сарын эхээр Хөвсгөл аймгийн Түнэл сумаас хоёр иргэн сураггүй болж онцгой байдлын газраас эрэн хайх ажиллагааг эхлүүлсэн.

Тус аймгийн харьяат, 29 настай эрэгтэй Л, 27 настай эрэгтэй Б нар нь мотоциклтой явж байгаад, сураггүй болсныг аймгийн цагдаагийн газар болон онцгой байдлын газраас эрэн хайх ажиллагаа явуулж, үр дүнд хүрээгүй тул ажиллагааг түр зогсоогоод байжээ.

Гэтэл иргэн Б-ийн цогцос Эгийн гол орчмоос олдсон байна.

Тиймээс талийгаачтай хамт явсан иргэн Л-ийн ар гэрээс эрэн хайх ажиллагааг дахин эхлүүлэх хүсэлт гаргасны дагуу тус аймгийн Онцгой байдлын газрын орлогч даргын шийдвэрээр Эрэн хайх, аврах салбарын бүлгийн алба хаагчид анх осолдсон байж болзошгүй газраас дахин хайгуул хийж, иргэн Л-ийн унаж явсан мотоциклыг олсон байна.

Одоогийн байдлаар иргэн Л-ийн цогцос олдоогүй байгаа ба эрэн хайх ажиллагаа үргэлжилж байна.

Categories
мэдээ улс-төр

“Петрочайна Дачин Тамсаг” компаниас Монгол Улсын хүртэх ашгийг нэмэгдүүлэх чиглэлийг Засгийн газарт өгөв DNN.mn

Аюулгүй байдал, гадаад бодлогын байнгын хорооны хуралдаанаар “Петрочайна Дачин Тамсаг” компаниас Монгол Улсын хүртэх ашгийг нэмэгдүүлэх арга хэмжээний тухай байнгын хорооны тогтоолын төслийг хэлэлцлээ.

Уг тогтоолын төсөлд Тосон-Уул XIX, Тамсаг XXI талбайд байгуулсан бүтээгдэхүүн хуваах гэрээний эрх үүргийг шилжүүлэн авсан Петрочайна Дачин Тамсаг” компанитай хийсэн бүтээгдэхүүн хуваах гэрээг одоогийн мөрдөгдөж буй хууль тогтоомжтой нийцүүлэн шинэчилж, Монгол Улсын хүртэх ашгийг нэмэгдүүлэх асуудлыг судалж шийдвэрлэх, Ашигт малтмалын тухай, Газрын тосны бүтээгдэхүүний тухай хуулиудын нэмэлт өөрчлөлтийн төслийг УИХ-ын 2022 оны намрын ээлжит чуулганд өргөн мэдүүлэх, газрын тосны хайгуулын ажлыг эрчимжүүлж, шинээр нөөц тогтоох ажлыг бүх талаар дэмжих, нийгмийн даатгалтай холбоотой үүссэн маргааныг хууль тогтоомжийн дагуу шийдвэрлэх, татварын актуудын биелэлтийн хангуулах, 590 гаруй тонн химийн бодисын хаягдлыг хууль тогтоомжийн хүрээнд шийдвэрлэх зэрэг асуудлыг тусгасан байна.

“Петрочайна Дачин Тамсаг” компанитай холбоотой асуудлыг холбогдох байнгын хороогоор хэлэлцэх үеэр гишүүд Бүтээгдэхүүн хуваах гэрээ Монголчуудад ямар ч ашиггүй байгааг онцолж байсан.

Тухайлбал, Н.Наранбаатар гишүүн “Энэ гэрээ Монгол Улсын маш олон хуулийг зөрчсөн. Монголд үйл ажиллагаа явуулж байгаа аль ч аж ахуйн нэгж нийгмийн даатгалын шимтгэл төлдөг. Гэтэл энэ гэрээгээр нийгмийн даатгалын шимтгэлээс чөлөөлсөн, татварын актыг биелүүлдэггүй, шүүхээр явж байгаад хүчингүй болгуулдаг, энэ компанийн гаргаж байгаа газрын тосноос экспортын татвар авдаггүй. Оруулж ирж байгаа техник хэрэгсэл, хоол унд, бараа материалыг гаалийн татварыг чөлөөлсөн. Дотоодоос худалдан хийдэггүй, орон нутгаас ажилтан авдаггүй, хууль хяналтын байгууллагын тавьсан шаардлагыг үл тоодог. Санхүүгийн үйл ажиллагааг нь хянах гэхээр гадаадад данс нээж болно гэж гэрээнд заачихсан. Санхүүгийн тайлан нь зөвхөн хятад хэл дээр байдаг, түүнийгээ шалгуулдаггүй гэх зэрэг зөрчлийг тус компани байнга гаргадаг юм байна” хэмээн байсан юм.

Categories
мэдээ энтертаймент-ертөнц

Укагийн “Dance with me” амьд шоу тоглолт ирэх сарын 10, 11-нд болно DNN.mn

СТА, дуучин Д.Уламбаяр /Ука/-ын

Тус тоглолт “Steppe arena” буюу “Мөсөн өргөө”-д зохион байгуулагдах бөгөөд тоглолтын ерөнхий ивээн тэтгэгчээр “Store pay” ажиллаж байгаа бол ерөнхий зохион байгуулагчаар “ВЭП энтертайнмент продакшнс”, хамтрагчаар “Brainstorm branding agency”, “Steppe arena”, “MMP”, “Steppe amusement” зэрэг газар хамтран ажиллаж байна.

May be an image of 1 person and text that says 'epeHxий иB33H T3Tr3r4 storepay LIVE SHOW CONCERT STEPPEARENA STEPPE 10 10&11 JUNE 2022 UKA â DANCE WITH ME'

Тоглолтод урилгаар “Киви”, “Татар” хамтлаг, дуучин Наагий, Оргил, Оки, Б.Алтанжаргал, Э.Дашням, реппэр Цэцэ, AM C, Nene, Don Dior нар оролцож, хамтран дуулна. Түүнчлэн өөрийн “Хайр хөгжим юм уу”, “Маргаашийн нар луу хамт аялах уу” “Don’t stop”, “Цагааруулна” гээд олон хит дуунаасаа дуулахаас гадна цоо шинэхэн уран бүтээлүүдээ ч үзэгч сонсогчиддоо хүргэхээр болжээ.

Тэрбээр “Урт удаан хүлээсэн шоу тоглолтоо хүргэх өдрүүд ойртож байна. Олон жилийн хөдөлмөр, өөрийн сэтгэл зүрхээрээ оролцон бүтээлцсэн дуу, хөгжмөө сонсож шилдэг хөгжимчид, шилдэг бүжигчид, мэргэшсэн баг бүрэлдэхүүнтэй, шинэ орчинд сонсогч, үзэгчидтэйгээ жаргах өдрөө тэсэн ядан хүлээж, догдолж бэлдсээр байна.

2020 онд “Буянт-Ухаа” спорт цогцолборт тоглолтоо хийхээр төлөвлөж байсан ч, цар тахлын улмаас тоглолтоо цуцлалгүй, тохиромжтой цагийг тэсэн ядан хүлээлээ. Энэ удаа “Steppe arena”-д болох тоглолтыг минь тэвчээртэй хүлээж байсан та бүхнийгээ хүндэтгэн, талархаж байна. 6 дугаар сарын 10, 11-ний өдөр жаргаж, дуулж, бүжиглэж, хайр цацарсан үдшийг хамт өнгөрөөхийг тэсэн ядан хүлээж байна” гэв.

Categories
гадаад мэдээ

Юн Сук Ёл: Өнөө цагт улс орны аюулгүй байдлыг хангагч гол хүчин зүйл нь эдийн засаг болж байна DNN.mn

Өнгөрсөн гуравдугаар сард болсон БНСУ-ын ерөнхийлөгчийн сонгуульд “Ард түмний хүч” консерватив намаас нэр дэвшигч Юн Сук Ёл эрх баригч Ардчилсан намын Ли Жэ Мёноос урьд өмнө байгаагүй бага, ердөө 250 мянган сонгогч буюу 0.8 хувийн саналын зөрүүгээр ялалт байгуулсан билээ. Юн Сук Ёл энэ сарын 10-нд тангараг өргөснөөр тус улсын 13 дахь ерөнхийлөгч болсон юм.

Эдийн засгийн хэмжээгээрээ дэлхийд аравт эрэмбэлэгддэг БНСУ-ыг ойрын таван жилд удирдах тэрээр “Ерөнхийлөгчдийг яллагч” гэдгээрээ хамгийн ихээр алдаршсан нэгэн. Тэрээр Ерөнхий прокуророор ажиллаж байхдаа тус улсын ерөнхийлөгч асан И Мён-Бак, Пак Гын Хэ нараас гадна Тагнуулын газрын гурван дарга, нэг Ерөнхий шүүгч, 100 гаруй төрийн өндөр албан тушаалтан, “Samsung” болон “Hyundai” корпорацийн удирдлагуудыг авлигын болон эрх мэдлээ урвуулан ашигласан хэрэгт яллаж байжээ. Иймээс ч ерөнхийлөгчөөр сонгогдоод улс орноо бохир улс төрөөс цэвэрлэнэ гэж мэдэгдсэнд гайхах зүйлгүй биз ээ.

БНСУ-ын өмнөх ерөнхийлөгч Мун Жэ Ин АНУ-аас бага зэрэг хөндийрч, БНАСАУ-тай аядуу харьцан хөрш зэргэлдээ БНХАУ, ОХУ-тай илүү ойртохыг эрмэлзэж байсан бол консерватив намаас нэр дэвшсэний хувьд Юн Сук Ёл үүнээс тэс өөр гадаад бодлого баримтлах нь тодорхой. Үүнийг БНСУ-ын ерөнхийлөгч болсноос хойш тус улсад айлчилсан гадаад орны анхны төрийн тэргүүн нь АНУ-ын ерөнхийлөгч Жо Байден байсан илэрхийлэв үү гэлтэй.

Тэрээр БНСУ нь олон улсын тавцанд АНУ-ын итгэлтэй түнш байна гэдгийг баталсан бөгөөд БНАСАУ-тай илүү хатуу байр сууринаас харьцан БНСУ-АНУ-ын хамтарсан хээрийн сургуулийг сэргээж, улс орондоо АНУ-ын пуужингийн довтолгооноос хамгаалах системийг улсдаа байрлуулах төлөвлөгөөтэй байна. Хэдий тийм ч Юн Сук Ёл “Ковид-19”-ийн цар тахалд ихэд нэрвэгдэх болсон хойд хөршдөө вакцин, эмнэлгийн тоног төхөөрөмж зэрэг ихээхэн хэмжээний хүмүүнлэгийн тусламж үзүүлэхэд бэлэн гэж мэдэгдсэн юм.

Юн Сук Ёл түүнчлэн БНСУ ОХУ-ын Украин руу түрэмгийлэн халдсаныг буруушааж, дэлхийн хамтын нийгэмлэгийн ОХУ-ын эсрэг бүхий л хориг арга хэмжээг тууштай дагана гэдгийг мөн илэрхийлсэн билээ. Үүнээс гадна дэвшилтэт технологийг АНУ-тай хамтран хөгжүүлэхдээ БНХАУ-д алдахгүй байх аюулгүй байдлын тогтолцоог бүрдүүлэх юм байна. Үүнээс гадна Өмнөд Хятадын тэнгист хөлөг онгоцуудыг чөлөөтэй зорчуулах, Тайванийн буланг энх тайван, тогтвортой байдлын бүс байлгахыг дэмжин Бээжин эвгүйхэн “чимхээд” авчих шиг болов.

Харин дотоод бодлогодоо эдийн засгийн өсөлтийг өдөөж, ажлын байрыг нэмэгдүүлэн орон сууцны үнийн өсөлтийг хазаарлах чиглэлд илүүтэй анхаарч ажиллах юм байна. Үүний тулд үл хөдлөх хөрөнгийн татварыг бууруулж, 20-30 насныханд зориулсан хямд төсөр өртөгтэй 2.5 сая шинэ байшин барих зорилт тавьжээ. Мөн хөдөлмөрийн хөлсний доод хэмжээг цуцлан криптовалютын орлогоос авах татварын босгыг намсгаж, цар тахалд нэрвэгдсэн хувиараа хөдөлмөр эрхлэгчдэд туслахын тулд 50 их наяд вон (40 тэрбум доллар)-ын санхүүжилт гаргах ойрын бодолтой.

Тэрээр мөн Хөх ордон гэдэг ерөнхийлөгчийн өргөөнд ажиллаж амьдрахаас татгалзаж, оронд нь Сөүл хотын төвд байрлах Батлан хамгаалах яамны хуучин барилга доторх оффисыг сонгосон тус улсын анхны удирдагч болсон билээ. Өөрийгөө “ардын ерөнхийлөгч” хэмээн өргөмжилсөн Юн Сук Ёл илүү нээлттэй, ардчилсан ерөнхийлөгчийн засаглалыг хэрэгжүүлэх амлалтынхаа дагуу Хөх ордныг олон нийтэд нээлттэй болгохоор төлөвлөжээ.

Ён Сук Ёл тангараг өргөхдөө, “Өнөө цагт улс орны аюулгүй байдлыг хангагч гол хүчин зүйл нь эдийн засаг болж байна” гэж хэлсэн нь эдийн засгийн хөгжилд түлхүү анхаарал хандуулна гэдгийг тодотгосон гэлтэй.

Монголын маш чухал гуравдагч хөрш БНСУ-ын шинэ ерөнхийлөгчийн явуулж эхэлсэн гадаад, дотоод бодлогыг цухас дурдахад ийм байна.

Юн Сук Ёл нь 1960 оны арванхоёрдугаар сарын 18-нд Сөүл хотод төрсөн бөгөөд эцэг эх нь хоёул өндөр боловсролтой хүмүүс байжээ. Ээж нь Ихуа Эмэгтэйчүүдийн их сургуульд багшаар ажилладаг байсан бол аав нь Солонгосын Статистикийн нийгэмлэгийг үүсгэн байгуулсан аж.

Юн Сук Ёл Сөүлийн үндэсний их сургуулийг хуульч мэргэжлээр төгссөн. Гэвч төгсөлтийн шалгалтдаа есөн жил дараалан унаж байжээ. Учир нь үндэсний1980 оны Кванжу хот дахь ардчиллын төлөөх оюутны бослогыг дэмжин их сургуулийнхаа хэсэг оюутны хамт шүүх хурлын театрчилсан тоглолт үзүүлэхдээ тухайн үеийн ерөнхийлөгч Чо Ду Хваныг цаазлахыг шаарддаг прокурорын дүрд тогложээ. Үүний дараа Канвондо муж руу зугтан хэсэг зуур бүгсэн аж.

Юн Сок Ёл нь 1982 онд анизометропи гэх хоёр нүдний хугарлын тэгш бус байдлаас болж үүсдэг өвчнөөс улбаалан цэргийн албанаас чөлөөлөгдсөн бөгөөд өнөөг хүртэл жолооны үнэмлэх аваагүй ажээ. Тэрээр 1994 онд Тэгүгийн Прокурорын газарт ажлын карьераа эхэлсэн байна. Тэр цагаас хойш Юн Сок Ёл улс төрийн дарамт шахалтад автдаггүй цэгц шударга прокурор хэмээн алдаршсаар ирсэн ба 2017 онд шинээр сонгогдсон ерөнхийлөгч Мүн Жэ Ин түүнийг Сөүл хотын прокурорын газрын даргаар, 2019 онд БНСУ-ын Ерөнхий прокуророор томилсон билээ.

Энд тэмдэглэхэд, авлигын хэргээр 22 жилийн ял сонсоод дөрвөн жил, есөн сар хоригдсоны эцэст өнгөрсөн оны арванхоёрдугаар сард тусгай өршөөлөөр суллагдсан Пак Гын Хэ ерөнхийлөгч болсон Юн Сок Ёлын талаар юу гэж хэлэх нь олны анхаарлыг ихэд татаж байгаа юм. Гэвч Пак Гын Хэ энэ талаар өнөөг хүртэл ямар нэгэн мэдэгдэл хийсэнгүй.