Month: May 2022

Мягмар гарагт Их Британийн нийслэл Лондон хотын баруун хэсгийг зүүн хэсэгтэй холбосон шинэ метроны шугам ашиглалтад оржээ.

Нийт 100 орчим километр урттай уг шугамыг хатан хааны нэрээр Elizabeth Line хэмээн нэрлэсэн байна.

Шинэ шугамыг бүтээн байгуулахад 13 жилийг зарцуулж, $25 тэрбумыг зарцуулжээ. Ашиглалтад орох хугацааг хэд хэдэн удаа хойшлуулж байсан юм.

Лондон хотод хамгийн сүүлд 1979 онд газар доорх төмөр замын шугам шинээр нээгдэж байв.

Элизабетын шугамаар жил бүр 250 сая зорчигч үйлчлүүлэх тооцоо гаргасан байна. Шинэ шугам 40 өртөөг дайрах ба үүний 10-ыг шинээр байгуулсан бол 30 нь засаж сайжруулсан хуучин өртөөнүүд ажээ.

Лондон хотын баруун хэсгийг зүүн хэсэгтэй холбох төмөр замын санаа анх 1830 онд яригдаж эхэлсэн гэнэ. Ийнхүү бараг 200 жилийн дараа энэ санаа бодит биелэл болжээ.

Элизабетын шугамын бүтээн байгуулалтыг Crossrail Ltd компани гүйцэтгэсэн байна. Уг ажлыг гүйцэтгэхэд тус бүр 1,000 тонны даацтай найман ширхэг хонгил ухагч машин ашиглажээ.

Мөн хонгилоос 100 сая литр ус шавхаж гаргасан нь 40 ширхэг Олимпын стандартын усан санг дүүргэх хэмжээтэй болсон байна.

Энэ нь хүнсний хангамжаа хамгаалахын тулд хийж буй урьдчилан сэргийлэх арга хэмжээ юм.

Тус улсын Засгийн газар энэ оны 9 дүгээр сар хүртэлх элсэн чихрийн экспортын хэмжээг 10 сая тонн хүртэл хязгаарлахаар төлөвлөж байна гэсэн мэдээллийг “Bloomberg” агентлаг нэрээ нууцлахыг хүссэн эх сурвалжаас иш татан мэдээлжээ.

Мөн тус эх сурвалжийн мэдээлснээр, дээрх шийдвэрийг ойрын өдрүүдэд зарлаж магадгүй байна.

Энэтхэг улс нь өнгөрсөн онд Бразил улсын дараа орох дэлхийн хоёр дахь том элсэн чихэр экспортлогч орон байсан бөгөөд хамгийн том худалдан авагч нь Бангладеш, Индонези, Малайз, Дубай зэрэг улс, хотууд байжээ.

Одоогоор тус улсын Хүнс, худалдааны яамны хэвлэлийн төлөөлөгч ямар нэгэн тайлбар хийгээгүй байна.

Энэ сарын эхээр хэт халалтын улмаас ургацын хэмжээ буурсны дараа тус улс улаан буудайн экспортод хориг тавьж буйг зарласан ба энэ нь үнийг өсгөхөд хүргэжээ.

ОХУ Украин руу довтолсноос хойш дэлхийн хүнсний бүтээгдэхүүний үнэ огцом өссөний дараа хүнсний бүтээгдэхүүний экспортод хориг тавьж буй улс орнууд ялангуяа Азийн орнууд нэмэгдсээр байна.

Тодруулбал, Индонези улс далдуу модны тосны, Малайз улс тахианы махны экспортыг тус тус хориглосон.

Элсэн чихрийн томоохон экспортлогч орон ийнхүү экспортын хориг тавьж байгаа нь дэлхийн элсэн чихрийн зах зээлд томоохон нөлөө үзүүлж магадгүй юм.

Шри-Ланка улсын ерөнхий сайдаар томилогдоод хоёр долоо хоног болж байгаа Ранил Викремесингх өчигдөр тус улсын эдийн засгийн нөхцөл байдлыг тогтворжуулах богино хугацааны төлөвлөгөөгөө танилцуулжээ.

22 сая хүн амтай Энэтхэгийн далайн арал улс Шри-Ланка тусгаар тогтносноосоо хойших 70 гаруй жилийн хугацааны хамгийн хүнд хямралтай тулгараад байгаа.

“Хүнд өдрүүд биднийг хүлээж байна. Ард түмэн эсэргүүцлээ илэрхийлэх нь гарцаагүй. Зовлонтой тулгарсан ард иргэд ингэх нь жам ёсны үзэгдэл. Гэхдээ бид улс төрийн тогтвортой байдлаа хадгалахыг хичээх болно. Миний удахгүй танилцуулах завсрын төсөвт онц шаардлагагүй зардлыг хэмнэх, хүн амын эмзэг бүлгийг тэтгэх ажлууд тусгагдана” гэж ерөнхий сайд ярьжээ.

Өнөөдрийн хямралын үндэс нь коронавирусийн цар тахлаас үүдэлтэй аялал жуулчлалын орлого тасарсан, гадаадад ажилладаг иргэдийн ар гэртээ илгээдэг мөнгө багассан, өмнөх засгийн газрын татварыг танах популист шийдвэр эдийн засагт сөргөөр нөлөөлсөнтэй холбоотой.

Үүний улмаас Шри-Ланка улсын гадаад валютын нөөц дундарч, чухал шаардлагатай бараа бүтээгдэхүүнээ импортлох чадваргүй болсон юм.

Ард иргэд уг хямралд ерөнхийлөгч Готабаяа Ражапаскагийн гэр бүлийг буруутгаж байгаа. Ерөнхийлөгчийн ах Махинда Ражапаска саяхныг хүртэл ерөнхий сайдаар ажиллаж байсан юм.

Энэ сарын эхээр нийслэл Коломбо хотод гарсан эсэргүүцлийн жагсаалын үеэр есөн хүн амь үрэгдэж, 300 орчим хүн бэртэж гэмтэж байв. Үүнээс хэдхэн цагийн дараа Махинда огцорч, өмнө нь гурван удаа ерөнхий сайдаар ажиллаж байсан Ранил Викремесингх улс орноо хямралаас гаргах үүрэг хүлээгээд байна.

“Бидэнд одоо рупигийн орлого байхгүй болсон тул нэг их наядын рупиг ($2.7 тэрбум) хэвлэх хэрэгтэй байна” гэж хэлсэн Викремесингх жилийн инфляцын хэмжээ ойрын саруудад 40 хувьд хүрэхийг анхааруулжээ.

Шри-Ланкын инфляц гуравдугаар сард жилийн эхнээс 21.5 хувь хүрч өссөн бол дөрөвдүгээр сард 33.8 хувь хүрсэн юм.

Тус улс саяхан хөрш Энэтхэгээс зээлийн шугам нээж, хэрэгцээт бензин шатахуунаа импортолсон. Одоо Олон Улсын Валютын Сангаас зээл авах яриа хэлэлцээ хийж байгаа.

Ерөнхий сайд Викремесингх ирэх долоо хоногт Хятадын элчин сайдтай уулзахдаа бордоо, эм хэрэгслийн тусламж хүсэхээр төлөвлөж байгаагаа ярьжээ.