Month: May 2022

Коронавируст цар тахлын эдийн засагт үзүүлэх сөрөг нөлөөллийг бууруулах, аж ахуй нэгжийн үйл ажиллагаанд дэмжлэг үзүүлж, иргэдийн ажил, орлогыг нэмэгдүүлэх зорилгоор “Авто зам, замын байгууламжийн техник-эдийн засгийн үнэлгээ, зураг төсөл боловсруулах, барих, арчлах, засварлах, техник технологийн хяналтын зөвлөх үйлчилгээ үзүүлэх ажлын тусгай зөвшөөрөл олгох журам”-д өөрчлөлт оруулж, ажлын нөхцөл, шаардлагыг тодорхой хугацаанд бууруулж мөрдөх шийдвэрийг Зам, тээврийн хөгжлийн сайдын тушаалаар гаргасан.

Тус журмын шинэчлэлт 2022 оны 12 дугаар 31-ний өдөр хүртэл хүчин төгөлдөр мөрдөгдөх юм.

-Зөвшөөрөл авахад шаардагдах мэргэжлийн инженер, тенхикийн ажилчдын харьцуулсан тоо

Тусгай зөвшөөрөл олгоход шаардагдах нэмэлт мэдээллийг ЭНД дарж үзнэ үү гэж ЗТХЯ-наас мэдээллээ.

Аймгийн Хүнс хөдөө аж ахуйн газар /ХХААГ/ 2022 оны хаврын махны хэрэгцээнд зориулж 25 тонн мах нөөцөлжээ. Мах бэлтгэн нийлүүлдэг дөрвөн компанитай гэрээ байгуулсан бөгөөд одоогоор нэг компани нөөцийн махаа худалдаанд гаргаад байна.

Тодруулбал, “Дарьт шүтээн” ХХК 10 тонн нөөцөлсөн. Тэд өөрийн нэрийн дэлгүүрээр махыг худалдаалж эхэлсэн байна. Хонины мах нэг килограмм нь 9800, ямааны мах 7500, адууны мах 8000 төгрөгөөр худалдаж байна. Үхрийн махыг худалдаанд гараагүй байгаа аж.

Үүнээс гадна Түмэн цагаан ноос хоршоо, Дөрвөн гэгээ эрдэнэ, Өөдлөх боломж компаниуд тус бүр таван тонн махыг нөөцлөх гэрээ байгуулсан. Эдгээр компаниудын хувьд энэ сарын 15-наас эхлэн нөөцийн махаа худалдаж эхлэхээр төлөвлөжээ.

Монгол Улсын Их Хурлын дарга Г.Занданшатар Бүгд Найрамдах Солонгос Улсын Үндэсний Ассамблейн гишүүн Ким Ён Жүг өнөөдөр хүлээн авч уулзлаа.

Уулзалтад УИХ-ын Тамгын газрын Парламентын сургалт, судалгааны хүрээлэнгийн захирал Ц.Цогзолмаа, БНСУ-ын Засгийн Газрын харьяа Гадаад худалдаа, хөрөнгө оруулалтыг дэмжигч агентлагийн (KOTRA) Улаанбаатар дахь төлөөлөгчийн газрын дарга Мин Сон Мү болон БНСУ-ын барилга, дэд бүтэц, нийтийн тээврийн салбарт бизнес эрхлэгчдийн төлөөлөгч байлцлаа.

Үндэсний Ассамблейн гишүүн Ким Ён Жү нь БНСУ-ын Хөдөлмөр эрхлэлт, хөдөлмөрийн сайдаар ажиллаж байсан төдийгүй бүс нутгийн гадаад харилцаа, хамтын ажиллагааг олон талт чиглэлээр өргөжүүлж, нийгэм дэх эмэгтэйчүүдийн оролцоо, манлайллыг онцгойлон дэмжиж ажилладаг байна. Энэ удаагийн айлчлалынхаа хүрээнд НАМЭХ-ны гишүүд, нийт эмэгтэйчүүдийг дэмжиж, хамтран ажиллах олон санаачилгуудыг дэвшүүлж буй бөгөөд зорилтот сэдвийн хүрээнд нэгдсэн сургалт зохион байгуулахаар төлөвлөж байгаагаа илэрхийллээ.

БНСУ-ын Гадаад худалдаа, хөрөнгө оруулалтыг дэмжигч агентлаг (KOTRA) эдийн засгийн олон талт хамтын ажиллагааг идэвхжүүлж, худалдааны эргэлт, хөрөнгө оруулалтыг нэмэгдүүлэх бодит үр дүнтэй төсөл, хөтөлбөрүүдийг хамтран хэрэгжүүлэх талаар санал дэвшүүллээ. Тухайлбал, Монгол Улсад хөрөнгө оруулах сонирхолтой аж ахуйн нэгжүүдийг холбож, эдийн засгийн чөлөөт бүсийг хөгжүүлэхэд дэмжиж ажиллана гэдгээ илэрхийлж байв.

УИХ-ын дарга Г.Занданшатар “Монгол Улстай ах дүүсийн харилцааг хөгжүүлж, манай улсын эмэгтэйчүүдийн хөгжилд хувь нэмрээ оруулан хамтран ажиллаж байгаад талархал илэрхийлье. Цаашид та бүхэн хамтын ажиллагааг улам бэхжүүлэхэд тань бидний зүгээс дэмжин ажиллахад бэлэн байна” хэмээлээ.

Мөн уулзалтын үеэр тус улсын нийтийн тээврийн салбарт хэрэгжүүлсэн бүтээн байгуулалт, сүүлийн үеийн технологи, шийдлүүд, харьцуулсан судалгаа, мэдээллийг талаар “RHP” группийн төлөөлөл танилцууллаа. Улаанбаатар хотын түгжрэлийг бууруулахын тулд боловсруулж буй шийдлүүдийн нэг LRT буюу хөнгөн галт тэрэгний давуу тал, онцлог, бүтээн байгуулалтын шинэлэг технологи болон бусад түгээмэл хандлагын талаар ярилцав. Хоёр орны парламент хоорондын хамтын ажиллагааг дэвшилтэт хэлбэрээр улам бүр өргөжүүлж, гадаад худалдаа, хөрөнгө оруулалтын шинэ урсгалуудыг эхлүүлэхэд харилцан дэмжиж ажиллана гэдгээ талууд онцоллоо.

Үндэсний бичиг үсгийн баярыг тохиолдуулан Монгол Улсын Үндэсний номын сангаас хэлний бодлогын үндэсний зөвлөл, “Бидний монгол бичиг” НҮТББ-тай хамтран “Монгол бичгийн цахим бичвэр-2022” улсын уралдааныг зохион байгууллаа. Уралдаанд оролцохоор 606 оролцогч бүртгүүлснээс 500 гаруй оролцогч цахимаар оролцжээ. Шилдгээр шалгарсан оролцогчдод шагнал гардуулах ёслолыг Монгол Улсын Үндэсний номын сан дээр болон цахим хэлбэрээр зохион байгуулах бөгөөд ёслолын хугацааг жич утсаар мэдэгдэж, цахимд орчинд нийтлэх аж

“Монгол бичгийн цахим бичвэр-2022” улсын уралдааны дүнтэй танилцана уу

Богд хааны ордон музейн урд талын 1.36 га талбайд ногоон байгууламж байгуулахаар болжээ. Зураг төслийг гаргасан ба бэлтгэл ажлын шатандаа явж байгаа аж.

Харин тус музейн зүүн талд 1.4 га талбайд “Богд хааны дурсгалын цэцэрлэгт хүрээлэн”-г 2020 оны есдүгээр сард байгуулсан. Уг цэцэрлэгт хүрээлэнд, Богд хааны хөшөө, “Богд хааны лүндэн”, “Мөнх тэнгэрийн хүчин дор” зэрэг нийт 13 хөшөө дурсгал болон ногоон байгууламж, явган хүний зам талбай, гэрэлтүүлэг, усалгааны систем бүхий соёл, амралтын цогцолбор байгуулаад буй юм.

Сонгинохайрхан дүүргийн 21 дүгээр хорооны нутаг, Хүй 7 худгийн морь барианы ард таван байршилд нийт 8 га газрын 20 мянган ам метр, 9,000 тонн хур хогийн цэг үүссэн байсныг цэвэрлэж, төвлөрсөн хогийн цэг рүү зөөвөрлөжээ.

Энэ ажлын хүрээнд Сонгинохайрхан дүүргийн Засаг дарга Н.Алтаншагай өчигдөр 21-р хорооны Засаг дарга Б.Энхням болон тус хорооны 12 хэсгийн ахлагчдыг хүлээн авч уулзлаа.

Тус хороо нь мал бүхий суурьшлын бүс бөгөөд газар нутгийн хувьд хэсгийн бүтэц таруу, хүн амын хувьд сүүлийн жилүүдэд Нийслэлийн нутаг дэвсгэрт мал аж ахуй эрхлэхийг хориглосон бүсээс мал, малтай өрхийг зөвшөөрсөн бүс рүү нүүлгэн шилжүүлэх болсонтой холбоотойгоор өсөж буй юм.

Үүнтэй холбоотойгоор мал бүхий иргэдийн малын гаралтай хог хаягдлын асуудлыг тооцож, шийдвэрлээгүйн улмаас эзэнгүй газруудад үхсэн малын сэг зэм, ашиглагдахгүй өтөг бууц асар ихээр хаяж үүсмэл хогийн цэгүүд үүсэх болсон.

Дүүргийн Засаг дарга тус хорооны удирдлага, хэсгийн ахлагч нартай уулзах үеэрээ “Хоггүй хороо” болох уриаг дэвшүүлж өрх бүртэй нэг бүрчлэн уулзалт хийн, ил задгай хог хаяхгүй байх зөвлөмжийг өгч ажиллахыг санууллаа. Хур хог үүссэн газрыг цэвэрлэсний дараа тухайн газрыг арчлах, хамгаалах тал дээр цагдаагийн газар, газар зохион байгуулалтын алба, 21 дүгээр хороо, дүүргийн Засаг даргын Тамгын газар хамтран ажиллана гэдгээ хэлэв.

Мөн уулзалтын үеэр удирдлагаар шуурхай шийдвэрлүүлэх шаардлагатай асуудлын талаар санал солилцож, хэд, хэдэн шийдэлд хүрэв.

Тодруулбал,

• 21-р хорооны айл өрхүүдийн ахуйн хог хаягдлыг “Улаанбаатар шинэчлэл” ХХК сард хоёр удаагийн давтамжтайгаар ачиж тээвэрлэж байх,
• Хур хогийн цэг үүссэн талбайг цэвэрлэж “ТЭРБУМ МОД” үндэсний хөдөлгөөний хүрээнд ойжуулах,
• Оршин суугчдыг малын гаралтай болон ахуйн хог хаягдлыг ил задгай хаяснаар орчны бохирдол үүсгэж буй хор уршгийг таниулах,
• Орчны бохирдол үүсгэхгүй байхад иргэдтэй хамтарч ажиллах нөлөөллийн арга хэмжээ зохион байгуулах,
• Хог хаягдлын менежменттэй холбоотой хууль тогтоомжийг иргэдэд сурталчлан таниулах зэрэг ажлуудыг хэрэгжүүлэхээр болсон гэж Сонгинохайрхан дүүргийн Засаг даргын Тамгын газраас мэдээллээ.

Энэ сарын 04-нд буюу өчигдөр приус маркийн автомашины жолооч эмнэлгийн түргэн тусламжийн машины хаалга таглаж машинаа байрлуулан, эмнэлгийн ажилтны шаардлагыг хүлээж авалгүй ёс бус үйлдэл үзүүлэн машинаа орхиод явж буй бичлэг олон нийтийн сүлжээнд тархсан.

Уг жолоочид ямар арга хэмжээ авсан талаар албаны хүмүүсээс тодруулахад “Тухайн жолоочид Сүхбаатар дүүргийн цагдаагийн газрын Замын цагдаагийн хэлтэст зөрчлийн хэрэг нээн, шалгаж байгаа. Хоёр машины жолоочийг аль алийг нь дуудаж тайлбар авах гэсэн боловч приус маркийн машины жолооч өнөөдөртөө ирж амжихгүй гэсэн. Улмаар тайлбар мэдүүлэг авсны дараа ямар арга хэмжээ авснаа мэдээлэх болно” гэлээ.

УИХ-ын чуулганы нэгдсэн хуралдаанаар Засгийн газраас 2022 оны 04 дүгээр сарын 14-ний өдөр өргөн мэдүүлсэн, Зөрчлийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцлээ.