Month: April 2022

Нийслэлийн удирдах ажилтнуудын шуурхай зөвлөгөөн өнөөдөр боллоо. Энэ үеэр нийслэлийн Орон сууцны бодлогын газраас товч мэдээлэл өгөв.

Нийслэлийн Орон сууцны бодлогын газрын дарга Г.Ганхүү “Гэр хорооллын дахин төлөвлөлтийн хүрээнд 56 хэсэгчилсэн талбайд 43 төсөл хэрэгжүүлэгч аж ахуйн нэгж үйл ажиллагаа явуулж байна.

2021 онд нийслэлд 17,478 айлын орон сууц ашиглалтад орсон. Үүнээс 2022 оны нэгдүгээр улирлын байдлаар 85 хувиас дээш гүйцэтгэлтэй 21,279 айлын орон сууц байна. Дахин төлөвлөлтийн хүрээнд өнгөрсөн онд 1,001 айлын орон сууц ашиглалтад орсон бол 2022 онд 6,033 айлын орон сууцыг ашиглалтад хүлээлгэн өгөхөөр ажиллаж байгаа.

Өнгөрсөн оны мөн үетэй харьцуулахад, цемент, бетон зуурмагийн үнэ 95, арматур 68 хувийн өсөлттэй байна” хэмээлээ.

Тагнуулын байгууллагын тухай хуулийг 1999 онд баталсан. Үүнээс хойш 2011, 2015 онуудад нэмэлт өөрчлөлт оруулжээ.

Энэ удаад 13-р зүйл буюу цэргийн тагнуулын байгууллага гэсэн бүлгийг сэргээнэ. 2015 оны долдугаар сарын 9-ний өдрийн хуулиар энэ бүлгийг хүчингүй болгосон юм.

Хуульд дараах заалтуудыг нэмэхээр ажлын хэсгээс төсөл боловсруулжээ:

• 13.1.Цэргийн тагнуулын байгууллага Монгол Улсын Зэвсэгт хүчний удирдлагыг үндэсний аюулгүй байдал, үндэсний язгуур ашиг сонирхолд нийцсэн цэрэг-улс төрийн болон цэрэг-стратегийн тагнуулын мэдээллээр хангах үндсэн чиг үүрэг бүхий цэргийн байгууллага мөн.
• 13.2.Цэргийн тагнуулын байгууллагыг Зэвсэгт хүчний ерөнхий командлагчтай зөвшилцсөний үндсэн дээр Засгийн газар байгуулж, өөрчилж, татан буулгана.
• 13.3.Цэргийн тагнуулын байгууллагын дүрэм, ажиллах журмыг Зэвсэгт хүчний жанжин штабын дарга болон Тагнуулын ерөнхий газрын даргын хамтарсан тушаалаар батална.
• 13.4.Цэргийн тагнуулын байгууллага үйл ажиллагаагаа явуулахад Зэвсэгт хүчний тухай, Цэргийн албаны тухай, Цэргийн алба хаагчий эрх зүйн байдлын тухай, Цэргийн алба хаагчийн тэтгэвэр тэтгэмжийн тухай хууль болон энэ хуулийн холбогдох заалтыг дагаж мөрдөнө.
• 13.5 Цэргийн тагнуулын байгууллага бэлэг тэмдэгтэй байна. Бэлэг тэмдгийн загвар, хэрэглэх журмыг Зэвсэгт хүчний жанжин штабын дарга батална.

Амралтын өдрүүдэд Тээврийн цагдаагийн албаны жижүүрийн шуурхай удирдлагын хэлтэст нийт 620 дуудлага мэдээлэл хүлээн авчээ. Зам тээврийн ослын шинжтэй 436 дуудлага мэдээллийг хүлээн авч шийдвэрлэсэн байна.

Зам тээврийн ослын улмаас 14 хүн гэмтэж бэртсэний 5 нийслэлд, 9 орон нутагт бүртгэгдсэн. Зам тээврийн ноцтой ослын улмаас орон нутагт хоёр хүн амиа алджээ.

Хүн гэмтсэн ослыг хэлбэрээр нь авч үзвэл:

Нийслэлд:

• Явган зорчигч мөргөх хэлбэрээр 3 осол бүртгэгдэж, 3 хүн гэмтсэн.
• Мөргөлдөх хэлбэрээр 2 осол бүртгэгдэж 2 хүн гэмтсэн.

Орон нутагт:

• Мөргөлдөх хэлбэрээр 1 осол бүртгэгдэж 2 хүн гэмтсэн.
• Явган зорчигч мөргөх хэлбэрээр 3 осол бүртгэгдэж, 3 хүн гэмтэж, 1 хүний амь хохирсон.
• Онхолдох хэлбэрээр 5 осол бүртгэгдэж, 4 хүн гэмтэж, 1 хүний амь хохирсон.

Гудамж замд зохион байгуулсан хяналт, шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 244 зөрчил бүртгэгдсэний нийслэлд 194, орон нутагт 50 зөрчил тус тус илрүүлж, учирч болох эрсдэлээс урьдчилан сэргийлэн ажилласан.

Архи согтууруулах ундааны төрлийн зүйл хэрэглэсэн бол тээврийн хэрэгсэл жолоодохгүй байхыг цагдаагийн байгууллагаа анхааруулж байна.

Хичээл сургуулийн үйл ажиллагаа өнөөдрөөс эхэлж байгаатай холбоотойгоор эцэг эхчүүд та бүхэн хүүхдээ тавих хараа хяналтыг сайжруулах 10 хүртэлх насны хүүхдийг бие даан хөдөлгөөнд оролцуулахгүй байхыг анхааруулж байна.

Явган зорчигч нь 10 хүртэлх насны хүүхэдтэй замын хөдөлгөөнд оролцохдоо өөрөөсөө салгахгүй хөтлөх, тэврэх, үүрэх, хүүхдийн тэргэнд түрэх гэх мэт авч явахаар заасан байдаг тул эцэг, эх, асран хамгаалагч та бүхэн хүүхдийнхээ аюулгүй байдлыг хангаж хөдөлгөөнд оролцоно уу.

Хүүхдийг тээврийн хэрэгсэлд авч явахдаа аюулгүй байдлын хангаж, хүүхдийн зориулалтын суудалд тээвэрлэх, зориулалтын суудалгүй тохиолдолд суудлыг бүсийг зүүж хэрэглэхийг хэвшүүлэхийг цагдаагийн байгууллагаас та бүхэнд зөвлөж байна.

Зам тээврийн ослын хор уршиг нь цагдаагийн байгууллагад бус иргэн таны амь нас, эрүүл мэнд, эд хөрөнгөнд учирдаг тул өөрийн болон бусдын аюулгүй байдлын үүднээс замын хөдөлгөөнд оролцсон бол архи согтууруулах ундааны зүйл хэрэглэхгүй байх, орон нутгийн замд хөдөлгөөнд оролцохдоо тээврийн хэрэгслийн бүрэн бүтэн байдлыг хангах, хэт их ядарсан хүнээр тээврийн хэрэгсэл жолоодуулахгүй байх, зам орчны байдалд хурдаа тохируулах, өөрийн болон зорчигчийн суудлын бүсийг зүүж, хүүхдийг зориулалтын суудалд суулгаж хэвшихийг цагдаагийн байгууллагаас анхааруулж байна.

УИХ-ын даргын захирамжаар өнгөрсөн баасан гарагт байгуулагдсан Ажлын хэсэг өнөөдөр (2022.04.10) хуралдлаа. Энэ үеэр УИХ-ын дарга Г.Занданшатар “Өнгөрсөн 7 хоногт сэтгэлийн дуудлагаараа нэгдсэн залуус жагсаалынхаа үеэр тавьсан шаардлагад бодитой хариу өгөх ёстой. Тэдний тавьсан шаардлагын гол агуулга нь тэгш бус байдлыг газар авахуулахгүйн төлөө, шударга ёсны төлөө, төр, засгийг үүргээ биелүүлж, ажлаа хий гэдгийг шаардсан зүй ёсны шаардлага байлаа. Бусдын явцуу эрх ашгаас ангид байж, үнэт зүйлийнхээ төлөө нэгддэг, зөвхөн ярьдаг биш, үйлдлээрээ нөлөөлдөг шинэ үе ирж байгаад бахархахаас өөр аргагүй” гэж онцоллоо.

Ажлын хэсгийн хуралдаанаас:

-2022 оны төсвийг хэмнэлтийг горимд шилжүүлэх, шаардлагатай бол 2022 оны төсөвт тодотгол хийх;

-Төрийн бүх шатны байгууллагуудад хэмнэлтийн горимыг мөрдүүлж, зардлыг 10-аас доошгүй хувиар хэмнэх, бүтэц, чиг үүргийг хянаж, давхардлыг арилгах, удирдлагын орон тоо, зардлыг бууруулах;

-Тансаг хэрэглээний болон бүх төрлийн архи, тамхины онцгой албан татварыг нэмэгдүүлэх асуудлыг судалж, хэрэгжүүлэх;

-Төрийн байгууллагын зарим чиг үүргийг хувийн хэвшил, төрийн бус байгууллага, мэргэжлийн холбоодод шилжүүлэх, төрийн үйлчилгээг цахимжуулах замаар зардлыг бууруулах;

-Төсвийн байгууллагын их засвар, тохижилт, тоног төхөөрөмж худалдан авах болон зөвлөх үйлчилгээний зардлыг тэвчих;

-Төрийн болон орон нутгийн өмчит компани, үйлдвэрийн газруудын зардлыг 30-аас доошгүй хувиар хэмнэх замаар төсөвт төвлөрүүлэх татварын болон ногдол ашгийн орлогыг нэмэгдүүлэх;

-үйл ажиллагаа нь давхардсан, үр ашиг багатай төрийн болон орон нутгийн өмчийн аж ахуйн нэгж, байгууллагуудыг өөрчлөн байгуулах, татан буулгах саналаа Улсын Их Хуралд өргөн мэдүүлэх зэрэг чиглэлээр Төсвийн хэмнэлтийн тогтоолын төсөл боловсруулж, УИХ-аар хэлэлцүүлэх нь зүйтэй гэж үзэв.

Нийт 89 зорчигчтой, цасанд суусан хоёр автобусны нэгийг татан гаргажээ.

Тодруулбал, өчигдөр шөнө буюу дөрөвдүгээр сарын 11-ний 01:20 цаг Архангай аймгийн Хотонт сумын Хөөвөр багийн “Шар булгийн даваа” гэдэг газар хот хоорондын зорчигч тээврийн 2 автобус цасанд суусан тухай дуудлага Онцгой байдлын байгууллагад бүртгэгджээ.

Дуудлагын дагуу тус аймгийн Онцгой байдлын газрын алба хаагчид 02:00 цагт очиход Улаанбаатар хотоос Архангай аймгийн чиглэлд зорчиж явсан нийт 89 зорчигчтой, “Юниверс” загварын хоёр автобус цасанд суусан байсан тул ….АРА улсын дугаартай автобусыг татан гаргасан байна.

Харин ….АРХ улсын дугаартай автобусыг татан гаргах боломжгүй тул үлдээсэн талаар ОБЕГ-аас мэдээллээ.

Өнөөдрийн байдлаар орон нутгийн замын зарим даваа, гүвээ, нар үзэхгүй сүүдэртэй хэсгүүдэд халтиргаа гулгаа үүссэн байна. Үүнтэй холбоотойгоор ТЦА-наас 21 аймгийн Замын цагдаагийн тасгийн дарга удирдлагуудад замынхаа нөхцөл байдлыг үзэж, шалгах, тухайн орон нутгийн холбогдох байгууллагатай хамтран халтиргаа гулгаатай хэсэгт аюулгүй байдлыг ханган ажиллах чиглэлийг өгчээ.

Иймд орон нутгийг зорьж буй иргэд тээврийн хэрэгслийн бүрэн бүтэн байдлыг хангаж, хамгаалалтын бүсээ заавал зүүх, хурдаа зөв тохируулан зорчихыг зөвлөж ТЦА-наас зөвлөлөө.