Month: April 2022

Засгийн газрын 2020 оны 130 дугаар тогтоолоор батлагдсан “Сүү боловсруулах үйлдвэр, цехэд техникийн зохицуулалтын шаардлагад нийцсэн малын түүхий сүү бэлтгэн нийлүүлсэн малчин, эрчимжсэн мал аж ахуй эрхлэгчдэд мөнгөн урамшуулал олгох журам”-ын дагуу 2022 оны 1, 2, 3 дугаар сарын сүүний урамшууллыг олголоо.

Сүү боловсруулах үйлдвэр, цехэд 2022 оны 1 дүгээр сард 2.1 сая литр, 2 дугаар сард 2.2 сая литр, 3 дугаар сард 2.8 сая литр нийт 7.1 сая литр үнээний шингэн сүү бэлтгэн нийлүүлсэн 5,527 малчин, эрчимжсэн мал аж ахуй эрхлэгчдэд олгох 3.6 тэрбум төгрөгийн мөнгөн урамшууллыг малчдын дансанд шилжүүлээд байна.

Өнгөрсөн оны долдугаар сард машинтай кино театр нээлтээ хийж байв. Энэ нь цар тахлын хүнд цаг үед кино театраас үзвэр үйлчилгаа авч чадалгүй удаан хугацааг өнгөрүүлсэн иргэдийн магтаалыг хүртээд байв.

Тэгвэл машинтай кино театр буюу “Galaxy Car Cinema” дөрөвдүгээр сарын 30-ны өдөр үйл ажиллагаагаа эхлүүлэхээр болжээ.

Энэ удаагийн нээлтэд Fast&Furios-TokyoDrift киног албан ёсны онцгой эрхтэйгээр үзүүлэх бөгөөд Буянт-Ухаа нисэх буудлын авто зогсоолд болох юм байна. Харин тасалбарын үнэ нь 30 мянган төгрөг байхаас гадна машиндаа хэдэн ч хүн байж болох аж.

ОХУ Украин руу халдсанаас үүдэлтэйгээр Британи улс ОХУ болон энэ улсыг дэмждэг Беларусийн эсрэг олон хориг тавьсны дотор энэ хоёр орноос мод нийлүүлэхийг хориглосон юм. Ийнхүү мод импортлохыг хориглосны улмаас Британид тавилганы үнэ 17 хувиар өссөн, цаашид ч үнэ өснө гэж үйлдвэрлэгчид үзэж байгаа талаар The Guardian мэдээлжээ.

Британийн Тавилга үйлдвэрлэгчдийн холбооны захирал Шон Холтын өгүүлснээр, үйлдвэрлэгчид өмнө нь материалын үнэ ийм ихээр өсөхийг харж байгаагүй гэнэ. “Энэ нь Их Британи дахь үйлдвэрлэлд асар их дарамт болж байна. Эндээс үүдсэн дарамтыг жижиглэн худалдаачид болон хэрэглэгчидтэйгээ хуваалцан үүрэхээс өөр арга алга” хэмээн тэрбээр The Guardian сонинд ярьсан байна.

Цаашлаад цахилгаан эрчим хүчний үнэ, түлш, ажиллах хүчний өртөг ч нөлөөлөх тул тавилгын үнэ 100 хувь хүртэлх хэмжээгээр ч өсөж болзошгүй гэж тэрбээр онцолжээ.

Британийн Whitemeadow тавилга үйлдвэрлэгч компанийн төлөөлөгчийн мэдээлснээр, нэг буйдан үйлдвэрлэх өөрийн өртөг 25 хувиар өссөн гэнэ. Хориг тавьсны дараагаас түүхий эд хомстож, хус модыг гэхэд гуравдугаар сарын үнэтэй харьцуулахад дөрөв дахин өндөр үнээр худалдаж авахаас аргагүй болсон гэнэ.

Энд дуулгахад, Их Британиас гадна Европын холбоо Оросоос мод импортлохыг хориглосон юм. Шинжээчдийн дүгнэснээр, энэ хоригийн улмаас Орос улс Европ руу жилд 4-6 тэрбум долларын ойн бүтээгдэхүүн нийлүүлэх боломжоо алдах гэнэ.

АНУ-ын санхүүжилтээр Монгол Улсад биолаборатори байгуулах гэж буй талаар ОХУ-ын хэвлэлүүд мэдээлж буй. Монгол Улсын Гадаад харилцааны яамнаас уг мэдээллийг үгүйсгэж, АНУ-тай лаборатори байгуулах талаар яригдаагүй, яриа хэлэлцээ огт хийгдээгүйг мэдэгдээд байна. Гадаад харилцааны сайд Б.Батцэцэг энэ асуудлыг Ерөнхийлөгч У.Хүрэлсүх, УИХ-ын дарга Г.Занданшатар, Ерөнхий сайд Л.Оюун-Эрдэнэ, МАН-ын бүлгийн гишүүдэд танилцуулж, бүгд нэг ойлголттой болсныг хэлж байна.

– АНУ онц аюултай эмгэг үүсгэгчдийг судлахаар Монгол Улсын Зоонозын өвчин судлалын үндэсний төвд биолаборатори байгуулахаар зэхэж буй талаар мэдээлэл түгж байна?

-ОХУ-ын Известия сонин энэ тухай дөрвөн удаа нийтлэгдсэн, анхны эх сурвалж нь судлаач, эрдэмтэн хүн байгаа. Үүний дараа Хятадын хэвлэлээр гарсан. Олон улсын хэвлэлээр гарч байгаа энэ мэдээллүүд үнэн бодит байдалд нийцэхгүй. Дэлхийн геополитик, гео эдийн засгийн нөхцөл маш хүнд байна. Хардах эрх хэнд ч байдаг. Бүхий л улс оронд коронавирустай холбоотой халдвар, тархалт, вирустай холбоотой хамтын ажиллагаа идэвхжсэн.

Манай улсын бодлогод эргэлзэх асуудал байхгүй. Монгол Улсын гадаад харилцаа нээлттэй, олон тулгуур, энхийг эрхэмлэсэн зарчмаа маш сайн баримталж ажиллаж байгаа.

-Мэдээллийн мөрөөр манай талаас ямар арга хэмжээ авч байгаа вэ?

Энэ өдрүүдэд Монгол Улсын бүхий л байгууллагууд өөрсдийнхөө хэрэгжүүлсэн төсөл хөтөлбөр, судалгааг нарийвчлан гаргаж, нягтлах ажлуудыг хийлээ. Ерөнхийлөгчийн зүгээс холбогдох байгууллагууд мэдээллээ нэгтгэж, ҮАБЗ-д сонсгол хийх үүргийг өнөөдөр өглөө.

-Яагаад ийм мэдээлэл гарах болов?

-Зэвсэгт мөргөлдөөн эхэлснээс хойш дэлхий даяар хэвлэлийн дайн эрчимтэй явагдаж байна. Маш олон хардалт гарч ирж байна. Улс орон бүр өөрийн эрх ашгийн үүднээс дотоод байдлыг үймүүлэх, зөрүү буруу ойлголт төрүүлэх мэдээллийг дурын хүн илэрхийлж байна.

Монгол Улс Азид ардчиллаараа үлгэр жишээ болсон орон. Манай улсад бүх зүйл ил тод, үзэл бодлоо чөлөөтэй илэрхийлж, хэн ч юу ч ярьсан хэвлэлээр гардаг. Үүнийг ашиглан иргэдийн бухимдлыг төрүүлэх, хөрш улсуудыг хагалган бутаргах санаа явж байхыг үгүйсгэхгүй. Цаашид энхийг эрхэмлэсэн, олон тулгуурт гадаад харилцааны байр сууриа тууштай баримталж байгаагаа илэрхийлэх, хоёр хөрш болон гуравдагч хөршүүдийн харилцааны тэнцвэрийг урьдын адил хангах, аливаа буруу ташаа мэдээлэлд яаралтай тайлбар өгөхөд илүү анхаарах хэрэгтэй юм байна.

НӨАТ-ын буцаан олголтоор хөрөнгийн татвараа шимтгэлгүй төлөх боломжтойг Татварын Ерөнхий Газраас мэдээллээ.

Өнөөдрөөс эхлэн дөрөвдүгээр сарын 22-ны хооронд буцаан олголтоороо татвар төлөх хүсэлтээ гаргахыг зөвлөж байна.

Тодруулбал ebarimt -ын асуулгадаа ТИЙМ товч дарснаар таны татвар төлөгдөх аж.

НӨАТ-ын буцаан олголтоор төлөх боломжтой татварын төрөл:

• Автотээврийн хэрэгслийн албан татвар
• Галт зэвсгийн албан татвар
• Үл хөдлөх эд хөрөнгийн албан татвар
• Газрын төлбөр /газар эзэмшигч/
• Газрын үл хөдлөх эд хөрөнгийн албан татвар /газар өмчлөгч/

2022 оны нэгдүгээр улирлын буцаан олголтын мөнгийг журам ёсоор дөрөвдүгээр сард иргэдийн дансанд шилжүүлэх учиртай. Харин дээрх татваруудыг НӨАТ-ын буцаан олголтоороо төлөх сонголттой юм.

Жил бүр улсын хэмжээнд Эрүүл мэндийн сайдын тушаалын дагуу зургаан сартайгаас тав хүртэлх настай хүүхдийг өндөр тунт А аминдэмд хамруулдаг. Тэгвэл энэ жил дөрөвдүгээр сарын 18-наас буюу өнөөдрөөс харьяа дүүргийн өрх, тосгоны эрүүл мэндийн төвд хүүхдийг А аминдэмд хамруулж эхэллээ.

А аминдэм нь хүчтэй антиоксидант (үл исэлдүүлэгч) тосонд уусдаг аминдэм бөгөөд хүүхдийн нүдний хараа, мэдрэлийн үйл ажиллагаа, арьс салстыг хамгаалах, дархлааны системийн хэвийн үйл ажиллагаа, өсөлт хөгжлийн хэвийн үйл ажиллагаанд чухал үүрэг гүйцэтгэдэг байна. Түүнчлэн төрөл бүрийн амьсгалын замын халдварт өвчин, улаан бурхан, салхин цэцэг болон суулгалт өвчнөөр өвчлөх, хүндрэх эрсдэлийг бууруулдаг.

Манай орны хувьд тав хүртэлх насны хүүхдүүдийн дунд А аминдэмийн дутагдал өндөр байдаг. А аминдэм дутагдахад хүүхдийн өсөлт, хөгжил, дархлаа, цус төлжилт муудаж, арьс, салст хуурайших шинж тэмдэг илэрдэг.

А аминдэмийн дутагдлаас сэргийлэхийн тулд:

• Хүүхдийг төрсөн даруйд ангир уургаар амлуулах
• Зургаан сар хүртэл нь зөвхөн эхийн сүүгээр хооллох
• Зургаан сар хүрмэгц нэмэгдэл хоолонд оруулж, 2 ба түүнээс дээш нас хүртэл нь үргэлжлүүлэн хөхүүлэх
• Үр тариа, мах, сүү, цагаан идээ, жимс, хүнсний ногоо зэрэг 5 нэр төрлийн хүнсний бүтээгдэхүүнийг өдөр тутмын хоол хүнсэндээ тогтмол хэрэглэх хэрэгтэй.

Түүнчлэн хүүхдийг А аминдэмийн дутагдлаас сэргийлэхийн тулд харьяа өрх, сумын Эрүүл мэндийн төвд хандаж өндөр тунт А аминдэмийг жилд хоёр удаа заавал уулгах шаардлагатай. Үүнд:

• Зургаан сартайгаас 11 сартай хүүхэд 100,000 нэгжтэй А аминдэмийг жил бүрийн тав болон арваннэгдүгээр сард ууна.
• 12 сартайгаас тав хүртэлх насны хүүхэд 200,000 нэгжтэй А аминдэмийг жил бүрийн тав, арваннэгдүгээр сард ууна.
• Харин зургаа хүртэлх сартай хүүхэд эхийн сүүнээсээ шаардлагатай А аминдэмийг авна.

Тээврийн цагдаагийн албаны жижүүрийн шуурхай удирдлагын хэлтэс амралтын өдрүүдэд нийт 524 дуудлага мэдээлэл хүлээн авснаас зам тээврийн ослын шинжтэй 379 дуудлага мэдээлэл бүртгэгджээ. Бүртгэгдсэн зам тээврийн ослын улмаас 15 хүн гэмтэж бэртсэний найм нь нийслэлд, долоо нь орон нутагт бүртгэгдсэн байна. Ноцтой зам тээврийн ослын улмаас нийслэлд нэг, орон нутагт нэг хүний амь нас хохирсон байна.

Түүнчлэн амралтын өдрүүдэд хүүхэд өртсөн 2 осол бүртгэгдсэн байна. Эцэг эхчүүд та бүхэн хүүхдээ тавих хараа хяналтыг сайжруулах 10 хүртэлх насны хүүхдийг бие даан хөдөлгөөнд оролцуулахгүй байхыг ТЦА-аас анхааруулж байна.

Прокурорын байгууллага өнгөрсөн долоо хоногт буюу дөрөвдүгээр сарын 11-15-ны өдрүүдэд хэрэг хянан шийдвэрлэх ажиллагаанд оролцогчдоос гаргасан 27 гомдол, хүсэлтийг шийдвэрлэжээ. Түүнчлэн мөрдөгч болон зөрчлийн хэрэг бүртгэх эрх бүхий албан тушаалтанд тодорхой ажиллагаа гүйцэтгүүлэхээр 551 даалгавар бичгээр өгсөн байна.

Гэмт хэрэг, зөрчил гарахад нөлөөлсөн шалтгаан, нөхцөлийг арилгуулахаар байгууллага, албан тушаалтанд 17 мэдэгдэл, зөрчил шалган шийдвэрлэх, хэрэг бүртгэх, мөрдөн байцаах, ял эдлүүлэх ажиллагааг хэрэгжүүлэх явцад гарсан зөрчил, түүнд нөлөөлсөн шалтгаан, нөхцөлийг арилгуулахаар хяналтын харьяа байгууллагуудад 5 шаардлага тус тус бичиж хүргүүлжээ.