Японы автомашин үйлдвэрлэгч “Toyota Motor” компани тансаг зэрэглэлийн “Lexus” брэндийнхээ анхны цахилгаан хөдөлгүүртэй автомашинаа энэ оны сүүлээр худалдаанд гаргана гэдгээ лхагва гарагт мэдэгджээ.

Хууль зүй, дотоод хэргийн сайд Х.Нямбаатар Засгийн газрын гишүүд онгоцоор томилолтод явах нь зүйтэй талаар байр сууриа илэрхийллээ.

Тэрбээр “Шивээхүрэн-Сэхээ боомтод ажиллахдаа Улаанбаатар хотоос гараад Шивээхүрэн, Цагаандэл боомт хүртэл тээврийн хэрэгслээр явсан. Жанжин баг дээр орой уулзалт эхлэх гээд Шивээхүрэнгээс тухайн баг хүртэл ойролцоогоор 600 орчим километр шороон замаар зорчдог учир яагаад ч амжихгүй байсан.

Тиймээс иргэд хүлээж, бухимдал их байгаа гэсэн үүднээс Цагаандэл боомтоос Эрдэнэс Тавантолгой ХХК-ийн ослын үед ашигладаг гэрээт онгоцоор зорчсон нь үнэн.

Засгийн газрын гишүүд цаашид орон нутагт томилолтоор ажиллахад жижиг оврын шатахуун бага хэрэглэдэг онгоц хэрэглэх нь зөв. Тухайн баг өдөртөө очиж ажиллаад ирвэл хамгийн бага зардал гаргах боломжтой. Агентлаг, яамдын төлөөлөл томилолтод заавал нэг машин дагуулж явдаг.

Ер нь бол томилолт гээд ар араасаа олон машин дагуулж явахыг буруу зүйл гэж боддог. Ингэснээр цаг хугацаа алдаж, их ч зардал гаргадаг. Хэмнэлтийн тухай хууль дээр энэ асуудлыг тусгаж байгаа” гэлээ.

Мэдээллийг Парламент телевизийн шууд дамжуулалтаас бэлтгэв.

Тоон гарын үсгийг хэрхэн олгох тухай мэдээллийг Улсын Бүртгэлийн Ерөнхий Газраас танилцууллаа.

Цахим гарын үсгийн тухай хуулийг 2021 оны арванхоёрдугаар сарын 17-нд УИХ-аар баталсан. Тус хууль энэ оны тавдугаар сарын 1-нээс хэрэгжинэ.

Тоон гарын үсгийг иргэний үнэмлэхийн санах ой болон ухаалаг гар утасны аппликэйшнд байршуулна. Тухайн иргэн тоон гарын үсэг авах хүсэлтээ засаг захиргааны нэгжийн харьяалал харгалзахгүйгээр улсын бүртгэлийн байгууллагын нэгжид биечлэн гаргах юм байна.

Тус байгууллага нь ажлын гурван өдрийн дотор дараах шийдвэрийн аль нэгийг гаргана.

• Хүсэлтийг хууль журмын дагуу, үнэн зөв гаргасан бол тоон гарын үсгийг олгоно.
• Мэдээлэл зөрүүтэй бол хүсэлтийг буцаана.

Тоон гарын үсэг нь эх баримт бичгийн бүрэн бүтэн байдлыг хангадаг бөгөөд цахимаар зурсан этгээдийг найдвартай таньж баталгаажуулах механизм ажилладаг учраас хуулийн дагуу гараар зурсан гарын үсэгтэй ижил хэмжээнд хүчин төгөлдөр хэмээн авч үздэг байна.

Түүнчлэн тоон гарын үсэг нь өндөр нууцлал бүхий нарийн технологийн суур бүтэцтэй байдаг ч энгийн хэрэглэгчдийн хувьд өдөр тутамдаа шууд ашиглаж болохуйц байдлаар бүтээгдсэнээрээ хэрэглэхэд хялбар, олон төрлийн зардлыг хэмнэдэг давуу талтай.

Хувь хүмүүс болон албан байгууллага орон зай, цаг хугацааг үл хамааран албан харилцаагаа явуулах боломж бүрдэж байна. Мөн төр, хувийн хэвшлийн байгууллагын цаасны хэрэглээг эрс бууруулах, үр нөлөөтэй арга юм. Жишээлбэл, интернэт банкаар дамжуулан хадгаламж барьцаалсан зээл, E-Mongolia системд өөрийгөө таниулан нэвтэрч олон төрлийн лавлагаа үйлчилгээ авах, цаашлаад гэрээ хэлэлцээр, өргөдөл хүсэлт гаргах, даатгал, эрүүл мэндийн үйлчилгээнд ч тоон гарын үсгийг нэвтрүүлэх бүрэн боломжтой.

Мал, амьтны гоц халдварт шүлхий өвчний эсрэг яаралтай дархлаажуулалтын сарын аяныг орон даяар энэ сарын 18-наас эхлүүлсэн билээ. Энэхүү дархлаажуулалтын аян орон нутгуудад үргэлжилсээр байна. Тухайлбал,

Завхан аймгийн хэмжээнд дархлаажуулалтын аяны хүрээнд 24 сумын 12,866 өрхийн 245,200 толгой үхэр, 144 гахайг шүлхий өвчнөөс урьдчилан сэргийлэх дархлаажуулалтад хамруулахаар 60 ажлын хэсэг, Онцгой байдлын газар, Мал эмнэлгийн газар, Хүнс, хөдөө аж ахуйн газар, Мэргэжлийн хяналтын бүрэлдэхүүнтэй хяналтын дөрвөн ажлын хэсэг ажиллаж байна.

Архангай аймгийн 19 суманд 70 ажлын хэсэг гарч нийт 326 (их эмч 47, бага эмч 49, туслах 82, багын дарга 78, жолооч) хүнтэй ажиллаж байгаа юм. Аймгийн онцгой комиссоос шүлхийн дархлаажуулалтын ажлыг удирдан чиглүүлэх, хяналт тавих үүрэг бүхий есөн ажлын хэсэг гарчээ.

Дархан-Уул аймагт дархлаажуулалт хийхээр 15 ажлын хэсэгт 82 хүн ажиллаж байна. Үүнд, 15 малын эмч, Хөдөлмөр халамж үйлчилгээний газраас туслах ажилтан 52 хүнийг өдрийн 56 мянган төгрөгөөр цалинжуулан ажиллаж байгаа аж. Нийт 50,900 үхэр, 3,864 гахай урьдчилан сэргийлэх дархлаажуулалтад хамруулахаар төлөвлөжээ.

Сэлэнгэ аймагт тус аймгийн Онцгой комиссын өргөтгөсөн шуурхай хуралдааныг зарлан хуралдуулж шүлхий өвчнөөс урьдчилан сэргийлэх дархлаажуулалтын явц, нөхцөл байдлын мэдээлэлтэй танилцан цаашид салбар хоорондын уялдаа холбоог сайтар ханган дархлаажуулалтыг богино хугацаанд үр дүнтэй хийж гүйцэтгэх үүрэг чиглэл өгч хамтран ажиллаж байгаа гэдгийг мэдээллээ.

Манай улсад 2021 оны эцсээр хөгжлийн бэрхшээлтэй 106,169 иргэн байгааг Хөгжлийн Бэрхшээлтэй Хүний Хөгжлийн Ерөнхий Газраас мэдээлэв.

Үүний 9,865 нь 0-15 насны хүүхдүүд байна. Тэдний

• 4,307 нь ерөнхий боловсролын сургуульд
• 1,208 нь ерөнхий боловсролын тусгай сургуульд суралцаж байгаа бол
• 2,818 нь сургуульд огт хамрагдаагүй байна.

Түүнчлэн хөгжлийн бэрхшээлийг төрлөөр нь авч үзвэл хөдөлгөөний болон сэтгэцийн эмгэг давамгайлж байгаа юм. Мөн эдгээр иргэний 12.8 хувь буюу 13,692 нь хөдөлмөр эрхэлдэг бол 30,946 нь байнгын асаргаанд байдаг аж.