Month: April 2022

Японы хойд эргийн ойролцоо хөвж явсан 26 жуулчин тээвэрлэсэн “Каzu-1” онгоцтой хэдэн цагийн турш холбоо тасарсан талаар “NHK” бямба гариг /2022.04.23/-т мэдээлжээ.

Холбоо тасрахаас өмнө хөлөг онгоц живж байна гэсэн ослын дохио ирүүлсэн байна. Эл дохиог онгоцны багийнхан илгээжээ. Онгоцыг олохоор 5 нисдэг тэрэг, эргүүлийн зургаан онгоцыг дайчлан Японы хойд эрэгт эрлийн ажиллагааг эхлүүлжээ.

Цаг уурчдын мэдээлснээр, хөлөг онгоц сураггүй болсон хэсэгт цаг агаар туйлын таагүй буюу шуурган давлагаатай, хүчтэй салхитай байгаа аж.

Сүүлийн мэдээллээр, Японы эргийн хамгаалалтын алба “Каzu-1” аяллын хөлөг онгоц сураггүй алга болсон газраас дөрвөн хүнийг олсон гэж “NHK” мэдээлэв.

Онгоцонд нийт 26 хүн байсан ба тэдний хоёр нь хүүхэд, хоёр нь онгоцны гишүүн байжээ. Тэд бүгд аврах хантааз өмссөн байсан байна.

Эргийн хамгаалалтын албаны мэдээлснээр, тус аяллын онгоц өнгөрсөн оны зургадугаар сард энэ удаагийнх шиг ижил боомтоос хөдөлсний дараа осолдож байжээ. Харин тухайн үед хүний амь эрсдээгүй аж.

Хамгийн сүүлийн мэдээллээр, есөн хүнийг олсон ба бүгд ухаангүй байжээ. Усан онгоцны гурван зорчигчийг Ширэтоко хойгийн эргийн уснаас, өөр нэгийг нь эрэг дээрх хаднаас олсон байна. Эрэн хайх, аврах ажиллагаа үргэлжилж байгаа бөгөөд эргийн хамгаалалтын алба болон онцгой байдлын алба хаагчид оролцож байна.

Индонезийн эрх баригчид энэ сарын 28-наас эхлэн далдуу модны тос болон эл бүтээгдэхүүний түүхий эдийн экспортыг хориглох шийдвэр гаргажээ.

Тус улсын Ерөнхийлөгч Жоко Видодогийн мэдээлснээр, Индонез улс ийм төрлийн бүтээгдэхүүний хомсдолтой нүүрлээд байна. Хязгаарлалтыг тодорхойгүй хугацаагаар хүнсний зориулалттай ургамлын тосны нийлүүлэлтийг тогтворжуулж, хангалттай хэмжээнд хүргэх зорилгоор тавьжээ.

Индонез улсад ургамлын тосны хямрал үүсээд байгаа билээ. Индонез нь далдуу модны тосны томоохон үйлдвэрлэгч, экспортлогч юм. Өмнөх хоригийг энэ оны гуравдугаар сард цуцалж байв. Хоригтой холбогдуулан дэлхийн зах зээл дээр далдуу модны үнэ дээд хэмжээнд хүрч байсан юм.

Хоёр Солонгосын тэргүүн нар захидал солилцож, харилцаагаа сайжруулах найдлага тавьж буйгаа илэрхийлжээ. Пёньянаас цөмийн зэвсгийн хөгжүүлэлтээ эрчимжүүлснээс үүдэн хоёр Солонгосын харилцаа сүүлийн гурван жилийн хугацаанд муудаж, яриа хэлэлцээ царцсан.

Тэгвэл Хойд Солонгосын удирдагч Ким Жон Ун өнгөрсөн Лхагва гаригт Хөх ордны тэргүүн Мун Жэ Инээс захидал хүлээн авсан тухай Пёньяны төв телевиз мэдээлж, хариу захидлыг маргааш нь явуулсан байна. Тэрбээр захидалдаа хоёр талын харилцааг сайжруулахыг эрмэлзэж буй Мун Жэ Иний хичээл зүтгэлийг сайшааж, “гүн итгэлцэл”-ийн илэрхийлэл болсныг онцолжээ.

Ким Жон Уны захидлын цаана Өмнөд Солонгосын ард иргэдийг талцуулах, ирэх тавдугаар сард тангараг өргөх Хөх ордны шинэ тэргүүнд дарамт үзүүлэх зорилго агуулагдаж байгаа гэж ажиглагчид дүгнэжээ.

Хойд Солонгосын төрийн мэдээллийн “KCNA” агентлагт мэдээлэхдээ Мун Жэн Ин ирэх сард суудлаасаа буусан ч Солонгосын хойгийн нэгдлийн төлөө ажиллана гэжээ. Мун Жэ Ин болон Ким Жон Ун нар өмнө нь 2018 онд нүүр тулан уулзаж, энх тайвны төлөө хамтарсан тунхаглал гаргаж байсныг ч мөн онцолжээ.

Хөх ордны мэдээллээр, Мун Жэ Ин нь захидалдаа хоёр Солонгосын харилцаа муудсан ч 2018 онд зарласан энхийн төлөөх амлалтаа биелүүлэхийг уриалсан байна.

Үүний зэрэгцээ АНУ-ын ерөнхийлөгч Жо Байдены Хойд Солонгосын асуудлыг хариуцсан тусгай төлөөлөгч энэ долоо хоногт Сөүлд айлчилж, Пёньяныг тогтворгүй араншины эсрэг хатуу арга хэмжээ авахаар тохиролцсон байв.