Month: April 2022

Хүнс, Хөдөө Аж Ахуй, Хөнгөн Үйлдвэрийн сайд З.Мэндсайхан болон бусад албаныхан хүнсний үйлдвэрлэл эрхлэгчид, махны холбоод, худалдаа, үйлчилгээ эрхлэгч томоохон аж ахуйн нэгжүүдийн төлөөллийг хүлээн авч уулзав. Уулзалтаар гол нэрийн хүнс, барааны үнийг тогтвортой байлгах, цаашид нэмэгдүүлэхгүй байх, нэмүү өртгийн зардлыг бууруулах ямар боломжтой талаар ярилцжээ.

Төр, хувийн хэвшлийн хооронд хэрхэн гүүр болох, үйлдвэрлэгч болон худалдааны салбарынхантай хэрхэн ойлголцох, бодлогын ямар дэмжлэг хэрэгтэйг, Засгийн газраас гаргаж байгаа зээлд хамрагдах боломж болон компани, аж ахуйн нэгжийн эргэлтийн хөрөнгийг хэрхэн нэмэгдүүлж болохыг зөвлөлдсөн байна.

Хүнс үйлдвэрлэгчид “Ажиллах хүчний хомстолд орсон, үйлдвэрт тогтвор суурьшилтай ажиллах хүч ихээхэн дутагдалтай байна” гэсэн бол худалдааны салбарынхан иргэдийн худалдан авах чадвар эрс муудсан гэдгийг хэлж байлаа.

“Иргэдийн амьжиргаанд үнийн өсөлтийн дарамтыг мэдрүүлэхгүй, харин ч лангуун дээрх ханш болон үйлдвэрлэгчээс нийлүүлж байгаа анхны үнийг 50-350 төгрөгөөр бууруулах боломж, нөөц, гарц, шийдэл бий. Энэ чиглэлээр үйлдвэрлэгчидтэйгээ хамтран ажиллах саналтай байна” гэдгийг сайд З.Мэндсайхан илэрхийллээ.

Цар тахал болон дайны уршиг цаашид ч үргэлжлэх төлөвтэй байгаа энэ үед үндэсний үйлдвэрлэгчид эх оронч сэтгэлээр асуудалд хандах, төр хувийн хэвшлээ дэмжсэн олон талт бодлогоо илүү хүртээмжтэй болгох шаардлагыг тавив. Тиймээс өнөөдрийн уулзалтаас гарсан саналаа нэгтгэж, хүнсний бүтээгдэхүүний нийлүүлэлтийг нэмэгдүүлэх, үнийг тогтворжуулахад оролцоогоо нэмэгдүүлэхээр болов хэмээн ХХААХҮЯ-наас мэдээллээ.

Ерөнхий боловсролын сургуульд /ЕБС/ 2021-2022 оны хичээлийн жилд 712.4 мянган хүүхэд суралцаж байгаагаас жилд дунджаар 34.8 мянга орчим нь төгсөж байна. Энэ хичээлийн жилд их, дээд сургууль, коллежид нийт 30.5 мянган оюутан залуус шинээр элсэн суралцаж байгаа аж.

Их, дээд сургууль, коллежийн оюутнуудын суралцаж буй мэргэжлийн чиглэлээр авч үзвэл, 2021-2022 оны хичээлийн жилийн эхэнд нийт суралцагчдын 28.8 хувь нь бизнес, удирдахуй, хууль, эрх зүйн мэргэжлээр сурч байна. Түүнчлэн

• 17.5 хувь нь эрүүл мэнд, нийгмийн халамж
• 12.8 хувь нь инженер, үйлдвэрлэл, барилга угсралт
• 12.2 хувь нь боловсролын чиглэлээр тус тус сурч байгаа гэдгийг мэдээллээ.

Хөдөлмөрийн зах зээлд эрэлт ихтэй 100 ажил, мэргэжлийг боловсролын түвшнээр ангилбал, 37 хувийг нь дээд боловсрол шаардагдах ажил мэргэжил эзэлж байна. Харин 35 хувь нь техникийн болон мэргэжлийн боловсрол шаардагдаж байгаа бол 28 хувь нь мэргэжил шаардагдахгүй ажил байгаа юм.

Эх сурвалж: ҮС

УИХ-ын гишүүн Н.Алтанхуяг яллагдагчаар татах санал ирүүлсэн асуудлаар мэдээлэл өгч байна.

Тэрбээр “2014 онд огцруулаад хууль хяналтын байгууллагын хаалга татуулсан. Тэр үед гэрч, сэжигтэн гээд яллагдагч хүртлээ явсан. 2017 оноос эхлээд намайг яллагдагч болж явахад Ц.Элбэгдоржийн тавьсан хүмүүс алга болж дарга нар нь солигдсон.

Өнөөдөр юу болоод байгааг сайн мэдэхгүй байна. Яллагдагчаар татаж байгаа прокурорын тогтоолтой Лхагва гарагт танилцаад, өмгөөлөгчтэйгөө яриад мэдүүлэг өгье гэж сая АТГ-т хэллээ. Улс орны хөгжил дэвшилд санаа зовж байна. Үнэн үг хэлэхээр олон хүний дургүйг хүргэдэг. Алтанхуягийг дуугүй болгох зохиол бичиж байгаа гэсэн ямар зохиол бичиж байгааг мэдэхгүй” гэв.

Манай улс он гарсаар нийт 491.9 мянган тонн газрын тосны бүтээгдэхүүн импортолсон билээ.

Улсын хэмжээнд энэ сарын 21-ний өдрийн байдлаар нийт 138,628 тонн шатахууны нөөцтэй байна. Үүнээс

• А-80 авто бензин 11,367 тонн
• АИ-92 авто бензин 44,548 тонн
• АИ-95 авто бензин 4,565 тонн
• ДТ 77,485 тонн байгаа ба АИ-92 авто бензиний 33, АИ-95 авто бензиний 51 хоногийн, А-80 авто бензиний 68, Дизель түлшний 28 хоногийн нөөцтэй байна.

Улаанбаатар хотын хэмжээнд нийт 69,987 тонн шатахууны үлдэгдэлтэй байгаа аж.

• А-80 авто бензин 3,023 тонн
• АИ-92 авто бензин 25,132 тонн
• АИ-95 авто бензин 2,960 тонн
• ДТ 38,403 тонн байгаа ба АИ-92 авто бензиний 26, АИ-95 авто бензиний 44, Дизель түлшний 35 хоногийн буюу хэвийн нөөцтэй байна.

Шатахууны нөөцийг бүсчилбэл, баруун бүсэд 13,099 тонн, хангайн бүсэд 9,337 тонн, төвийн бүсэд 34,959 тонн, зүүн бүсийн шатахууны үлдэгдэл, нөөц 8,245 тонн байгааг Уул уурхай, хүнд үйлдвэрийн яамнаас мэдээллээ.

Төрийн захиргааны дээд байгууллагууд, түүний дотор хууль сахиулах байгууллагуудын үйл ажиллагааны талаарх иргэдийн өгсөн хариулт нь төр, засагтаа хэр зэрэг итгэл хүлээлгэж буйг илэрхийлэх үзүүлэлт юм. Төрийн захиргааны байгууллагуудын үйл ажиллагааны талаарх иргэдийн үнэлгээг 0-100 оноонд шилжүүлэн харуулжээ.

Зураг. Төрийн захиргааны байгууллагуудын үйл ажиллагаанд иргэдийн өгсөн үнэлгээ, оноогоор, 2018-2021 он

Төрийн эрх барих дээд байгууллагуудад өгсөн иргэдийн үнэлгээг харвал, Ерөнхийлөгчид өгсөн үнэлгээ 2018-2021 онд 44-59, Улсын Их Хуралд өгсөн үнэлгээ 13-42, Засгийн газарт өгсөн үнэлгээ 32-56 болж нэмэгджээ.

Шүүх засаглалын байгууллагуудад өгсөн иргэдийн үнэлгээг 2018-2021 оноор авч үзэхэд, Дээд шүүхэд өгсөн иргэдийн үнэлгээ 43-50, Нийслэл/аймгийн шүүхэд өгсөн үнэлгээ 45-50, Дүүрэг/сум дундын шүүхэд өгсөн үнэлгээ 49-53, Шүүхийн шийдвэр биелүүлэх газарт өгсөн үнэлгээ 49-60 болж өссөн хандлагатай байна.

Төрийн үйлчилгээний бусад байгууллагуудад өгсөн иргэдийн үнэлгээг 2018-2021 оноор харвал

• Хэв журмын цагдаагийн албанд өгсөн үнэлгээ 83-83,
• Аудитын газар өгсөн үнэлгээ 73-73 өөрчлөлтгүй байгаа бол
• Эрүүгийн цагдаагийн албанд өгсөн үнэлгээ 77-80,
• нийгмийн халамжийн байгууллагад өгсөн үнэлгээ 85-87,
• төрийн өмчийн сургууль, цэцэрлэгүүдэд өгсөн үнэлгээ 87-92,
• төрийн өмчит эмнэлэгт өгсөн үнэлгээ 73-84 болж өссөн байна.
• Харин Замын цагдаагийн албанд өгсөн үнэлгээ 84-83,
• Галын байгууллагад өгсөн үнэлгээ 61-51,
• Татварын албанд өгсөн үнэлгээ 78-76,
• нийгмийн даатгалын байгууллагад өгсөн үнэлгээ 87-84 болж буурч

Байгаль орчин, аялал жуулчлалын сайд Б.Бат-Эрдэнэ, БОАЖЯ-ны Төрийн нарийн бичгийн дарга Э.Баттулга, Тусгай хамгаалалттай бүс нутгийн удирдлагын газрын дарга Д.Батмөнх нар Богдхан уулын Жаргалантын ам, Нүхтийн аманд олгогдсон замбараагүй газар олголт, байгаль орчинд халгаатай бүтээн байгуулалтын нөхцөл байдалтай танилцав.

Төлөвлөлтгүй газар олголт эргээд байгаль орчныг сүйтгэж, бохирдуулж байгаа асуудал олон жил ард иргэдийн шүүмжлэлийг дагуулж ирсэн. Гэвч замбараагүй газар олголт тэлж, Богдхан уулын дархан цаазат байдал алдагдахад хүрчээ. Тухайлбал, Нүхтийн аманд уулын модтой хэсэгт газар олгосон зөрчлүүд байв.

БОАЖ-ын сайд Б.Бат-Эрдэнэ Жаргалант, Нүхтийн аманд нэмж газар олгох асуудлыг хориглож, одоо олгогдсон байгаа газруудад дахин хяналт, шалгалт хийх үүргийг Богдхан уулын дархан цаазат газрын захиргаа, БОАЖЯ-ны Тусгай хамгаалалттай бүс нутгийн удирдлагын газрын дарга Д.Батмөнхөд үүрэг болголоо.

Түүнчлэн газар олголт, бүс нутгийн өөрчлөлтийг хиймэл дагуул, сансрын мэдээлэл холбоогоор хяналт тавьж ажиллах үүргийг өгсөн юм.

Ерөнхийлөгч У.Хүрэлсүхийн санаачилга “Тэрбум мод” үндэсний хөдөлгөөнийг хэрэгжүүлэх хүрээнд дээрх Жаргалантын ам, Нүхтийн аманд амьдардаг, үйл ажиллагаа явуулж буй хувь иргэд, аж ахуй нэгжүүдийн газар ашиглалтын гэрээ, гэрчилгээг татан авч, байгаль орчныг хамгаалах чиглэлийн үүрэг, хариуцлагыг нэмэлтээр тусган гэрээг шинэчлэх ажлыг ирэх долоо хоногт эхлүүлэхийг санууллаа.

Эх сурвалж: БОАЖЯ