Month: April 2022

Вакцины гэрчилгээг бусдад худалдаж, ашиг олох зорилгоор Герман улсын иргэн коронавирусийн эсрэг вакциныг олон удаа тариулсан болохыг цагдаа нар илрүүлжээ.

Магдебург хотын 60 настай оршин суугч эрэгтэй Германы зүүн бүсийн Саксони мужийн дархлаажуулалтын цэгүүдэд нийтдээ 90 тун вакцин тариулсныг энэ сарын эхээр илрүүлсэн байна.

Түүнийг одоо вакцины гэрчилгээг зөвшөөрөлгүй авсан, хуурамч бичиг баримт үйлдсэн хэрэгт буруутган шалгаж байгаа гэнэ.

Хамгийн сүүлд тэр Эйленбург хотын дархлаажуулалтын төвд хоёр өдөр дараалан вакцин тариулах гэж ирээд баригджээ.

Өөр өөр үйлдвэрлэгчийн вакцины олон тунг нэг хүн тариулахад тухайн хүний биед ямар нөлөөтэйг тогтоогоогүй байгаа гэнэ.

Германы иргэдийн зарим хэсэг нь коронавирусийн эсрэг вакцинжуулалтад хамрагдахыг хүсэхгүй байгаа ч вакцины гэрчилгээтэй болох сонирхол өндөр байгаа нь ийм төрлийн гэмт хэрэг гарахад нөлөөлж байгаа ажээ.

Гэрчилгээтэй хүмүүст олон төрлийн үйлчилгээний газруудад нэвтрэх эрх олгогддог.

Ням гарагаас эхлэн Герман улс цар тахалтай холбоотой олон хорио цээрийн арга хэмжээнүүдээ цуцалж, амны хаалт зүүх зэрэг цөөхөн шаардлагыг үлдээсэн юм. Тухайлбал тус улсын 16 муж даяар нисэх онгоц, төмөр замын холын аялалд амны хаалт заавал зүүхийг шаардаж байгаа.

Харин компани, үйлчилгээний байгууллагууд иргэдээс амны хаалт шаардах эсэхээ өөрсдөө шийддэг болжээ.

Германы иргэдийн дунд явуулсан санал асуулгад оролцогчдын 63 хувь нь олон нийтийн газарт сайн дураараа амны хаалт зүүх бодолтойгоо илэрхийлсэн бол 29 хувь нь зүүхгүй гэж хариулжээ.

Хятадын санхүүгийн төв Шанхай хотод коронавирусийн халдвараас сэргийлэхийн тулд яах ёстойг ухуулж, сэнхрүүлэх ажлыг робот нохой гүйцэтгэж байна.

“Амны хаалт зүү, гараа угаа, биеийн халуунаа шалга” гэх мэт зааврууд хэлдэг чанга яригчийг нуруун дээрээ бэхэлсэн робот нохой тус хотын гудамжаар явж байгааг гэрчүүд мэдээлжээ.

Коронавирусийн Омикрон хувилбарын BA.2 дэд хувилбар хүн амын дунд тархсаны улмаас Шанхай хот гуравдугаар сарын сүүлчээс эхлэн хөл хорионы хатуу дэглэмд шилжсэн юм.

Хөл хорионы дэглэмийн хэрэгжилтийг хянахын тулд хотын эрх баригчид дроныг бас ашиглаж байгаа гэнэ.

Ийм дронууд гадуур яваа иргэдэд “Яаралтай гэртээ харь, үгүй бол хуулийн дагуу хариуцлага хүлээнэ” гэсэн зааврыг чанга яригчаар өгч байжээ.

26 сая оршин суугчтай Шанхай хотод өчигдөр халдварын шинж тэмдэггүй 7,788 тохиолдол, шинж тэмдэгтэй 438 тохиолдол шинээр бүртгэгдсэн байна.

Өчигдөр Хятад даяар шинж тэмдэггүй 11,781 тохиолдол, шинж тэмдэгтэй 1,506 тохиолдол бүртгэгджээ. Үүнээс харвал Шанхай хотод тус улсын нийт халдварын тохиолдлын 62 хүртэл хувь оногдож байна.

Еврейн өөртөө засах мужийн захирагч Ростислав Гольдштейн хүнсний ногоо тариалж буй үйлдвэрлэгчдийн хөдөө аж ахуйн татварыг цуцлахыг санал болгосон байна. Ашиглахгүй байгаа сул газруудад хүнсний ногоо тариалахыг бас санал болгожээ. Бүс нутагт өөрийн үйлдвэрлэлийн эзлэх хувийг нэмэгдүүлснээр жижиглэн худалдаан дахь бараа бүтээгдэхүүний өртөг ч буурна хэмээн онцоллоо.

Голдштейн мөн хотын захиргаанд байгаа эзэнгүй газрыг задгай талбайд хүнсний ногоо тариалахад өгөх боломжтой гэж санал болгов. Өөрсдөө үйлдвэрлэлээ нэмэгдүүлснээр жижиглэнгийн сүлжээнүүдийн үнэ буурна гэсэн юм.
Бүсийн Сайд нарын танхимаас өргөст хэмх, улаан лооль тариалах бүтэн жилийн хүлэмжийн иж бүрэн цогцолбор байгуулна хэмээн зарласан. Эл цогцолборыг Смидович тосгонд барихаар төлөвлөсөн аж. Ерөнхийдөө ХАА-н салбараас газар тариалан, бордоо үйлдвэрлэх чиглэлээр зургаан ч төсөл хэрэгжүүлэхээр хэлэлцэж эхэлсэн байна.

2.8 сая хүн амтай Литва улс Оросын байгалийн хийн хамаарлаас бүрэн салж байгаагаа зарласнаар Европын Холбооны 27 гишүүн улсын дотроос анхдагч болжээ.

“Оросын эрчим хүчний дарамт шахалт, Украинд явуулж буй дайны хариуд Литва улс Оросын байгалийн хийгээс бүрэн татгалзаж байна” гэж тус улсын эрчим хүчний яам Бямба гарагийн орой мэдэгдсэн байна.

Ингэснээр Литва улс дөрөвдүгээр сараас эхлэн ОХУ-аас байгалийн хий авахаа бүрмөсөн зогсоож байгаа ажээ.

“Газпромоос байгалийн хий авдаг Европын Холбооны гишүүн орнууд дотроос Литва улс анх удаа Оросоос хамааралгүй боллоо. Энэ бол олон жилийн зөв бодлого, дэд бүтцийн шийдлийг цаг хугацаанд нь оновчтой нэвтрүүлсний үр дүн юм” гэж Литва улсын эрчим хүчний сайд Дайниус Крейвис ярьсан байна.

Тус улсын ерөнхийлөгч Гитанас Науседа мөн энэ тухай твиттер хуудсандаа мэдэгдээд Европын бусад улсуудад ижил арга хэмжээ авахыг уриалжээ.

“Энэ сараас эхлэн Литва улс Оросын байгалийн хийг хэрэглэхгүй болж байна. Олон жилийн өмнө зөв шийдвэр гаргасан нь өнөөдөр бидэнд түрэмгийлэгчээс эрчим хүчний хамааралгүй болох боломж олголоо. Хэрвээ бид чадаж байгаа бол Европын бусад улсууд ч чадах ёстой” гэж тэр бичсэн байна.

2015 оныг хүртэл Литвийн байгалийн хийн хэрэглээ 100 хувь ОХУ-аас хамааралтай байсан юм. Гэвч 2014 оноос Клайпеда боомт хотод байгуулж эхэлсэн шингэрүүлсэн хий импортлох терминал ашиглалтад орсноор сүүлийн жилүүдэд хамаарал нь аажмаар буурсан байна.

Одоо тус улсын дотоод хэрэгцээний хий бүхэлдээ Клайпеда дахь терминалаар импортлогдох болжээ.

Литвийн хөрш Эстони, Латви улсууд мөн шингэрүүлсэн хийн терминалтай болох талаар судалж эхлээд байна.

Дэлхийн хамгийн үнэтэй бензин одоогоор Европын улсуудад худалдаалагдаж байна. Энэ талаар дөрөвдүгээр сарын 2-ны өдөр гарсан мониторингийн судалгаа харуулж байна. Нэг галлон буюу ойролцоогоор 4 литр бензин тус бүс нутагт хамгийн өндөр үнэтэй буюу 6 доллар байгаа юм.

Үүнийг өнөөдрийн валютын ханшаар тооцвол 1 литр 4500 орчим төгрөгтэй тэнцэж байна. АНУ-д дээрх хэмжээний түлш 4-5 доллар байна. Харин Канадад арай илүү үнэтэй буюу 6 доллар руу дөхсөн үнэтэй байгаа юм. Латин Америк, Хятад зэрэг улсад мөн адил 5-6 доллар орчимд хэлбэлзэж байна. Өмнө нь Герман улсад бензиний үнийн өсөлтөөс хүнд цаг үед бэлтгэхийг уриалж байсан юм.