Month: April 2022

Жил бүр нийслэлийн тухайн жилийн газар зохион байгуулалтын төлөвлөгөөнд дуудлага худалдааны зарчмаар эзэмшүүлж, ашиглуулах газрын байршлыг тодорхойлон тусгадаг. Ингэхдээ газар зохион байгуулалтын ерөнхий төлөвлөгөө, Улаанбаатар хотын хөгжлийн ерөнхий төлөвлөгөө болон бусад бодлогын баримт бичгүүдтэй уялдуулдаг билээ. Төлөвлөгөөний дагуу газар эзэмшүүлэх, ашиглуулах эрхийн дуудлага худалдааг Нийслэлийн газар зохион байгуулалтын албанаас Газрын биржийн цахим системийг ашиглан явуулдаг.

БНСУ-ын Кёнги /Gyeonggi/ аймгийн Онцгой байдлын газраас гамшгаас хамгаалах чадавхыг бэхжүүлэх зорилгоор хамтран ажилладаг Төв аймгийн Онцгой байдлын газарт түргэн тусламжийн бүрэн тоноглогдсон автомашиныг ирүүлжээ.

Тус автомашиныг Онцгой байдлын газраас Баянчандмань сумын Эрүүл мэндийн төвд хүлээлгэн өгсөн байна.

Баянчандмань сум нь улсын чанартай авто зам дагуу оршдог учир зам тээврийн осол ихээр бүртгэгддэг, яаралтай тусламж үйлчилгээ үзүүлэх шаардлага ихээр гардаг учир энэхүү иж бүрэн тоноглогдсон эмнэлгийн түргэн тусламжийн автомашиныг тус суманд хүлээлгэн өгч байгаа юм гэв.

Өнгөрсөн оны ургацаас зах зээлд борлуулагдаагүй, Үндэсний лавлагаа лаборатори болон Хөдөө аж ахуйг дэмжих сангийн холбогдох журам, стандартын шаардлагыг хангаж буй улаанбуудайг улс худалдан авч, нөөц бүрдүүлэхээр Засгийн газраас шийдвэрлэсэн. Тэгвэл өнөөдрийн байдлаар Хөдөө аж ахуйг дэмжих сан 2238.7 тонн улаанбуудайг худалдан аваад байна. Түүнчлэн үлдэгдэл буудайнаас 4.4 мянган тонныг үрэнд, 2.3 мянган тонныг малын тэжээлд, 2.7 мянган тонныг спиртийн үйлдвэрлэлд борлуулсан бол тариалан бүхий аж ахуйн нэгжүүдийн Хөдөө аж ахуйг дэмжих сангийн саванд хадгалуулж буй (борлуулагдаагүй) 4.8 мянган тонн, цэвэрлэгээ хийгдэж байгаа 9.6 мянган тонн буудай борлуулалтын шатандаа байгаа мэдээлэлтэй байна.

Хүнс, хөдөө аж ахуй, хөнгөн үйлдвэрийн яам болон Хөдөө аж ахуйг дэмжих сангаас томилогдсон ажлын хэсэг Засгийн газрын шийдвэрийн хэрэгжилтийг хангаж борлуулагдаагүй үлдэгдэл буудайг худалдан авах ажлыг эрчимжүүлэх зорилгоор Сэлэнгэ, Төв, Дархан-Уул аймгийн бүс нутагт ажиллаж байна.

УИХ-ын чуулганы нэгдсэн хуралдаанаар Г.Ганболд нарын зургаан гишүүний өргөн мэдүүлсэн Зөрчлийн тухай хуульд нэмэлт, өөрчлөлт оруулах тухай хуулийн төслийг хэлэлцлээ.

Б.БАЯРСАЙХАН: -Согтуугаар жолоо баьж замын хөдөлгөөнд оролцсон хүнийг 400 мянган төгрөгөөр торгож, жолоодох эрхийг нь нэг жилээр хасдаг заалтыг өөрчилж зөвхөн жолоо барих эрхийг нь нэг жил хасаад торгохоо болих заалт оруулсан байна. Яагаад ингэж шийтгэлийг нь бууруулж байгаа юм бэ. 2021 онд улсын хэмжээнд 22482 зам тээврийн осол гарсан байна. Ослын улмаас 383 хүн нас барж, 2475 хүн гэмтсэн байна. Нас барьсан хүмүүсийн 159 нь хүүхэд байна. Ийм байхад согтуугаар жолоо барьсан хүнд ногдуулах шийтгэлийг бууруулж оруулж ирж байгаад сэтгэд дундуур байна. БНСУ-д спиртийн хэмжээ 0.2 хувиас их байсан тохиолдолд 20 мянган ам.доллароор торгож, жолоо барих эрхийг нь тодорхойгүй хугацаагаар хасдаг. БНХАУ-д цусан дахь спиртийн хэмжээ нь 0.08 хувиас бага байх тохиолдолд 1000-2000 юанаар торгоод жолоодох эрхийг нь зургаан сараар хасдаг байна. Харин 0.08 хувиас их байсан тохиолдолд гурван жил хүртэлх хугацаагаар хорих ял өгч, жолоодох эрхийг нь таван жил, хүн нас барсан тохиолдолд бүх насаар нь хасдаг. Гэтэл манай улсад цусан дахь спиртийн хэмжээ нь 0.019 хувиас их байх тохиолдолд согтуугаар жолоо барьсан гэж үздэг. Манай улсад нэг сая 350 мянга орчим жолооч байгаагаас сүүлийн 10 жилд 375 мянга буюу нийт жолоочийн хувь (дөрвөн жолооч тутмын нэг) нь согтуугаар жолоо барьсан зөрчилд холбогдсон статистик байна. Тиймээс согтуугаар жолоо барьсан хүнд ногдуулах шийтгэлийг бууруулах бус харин ч нэмэгдүүлэх шаардлагатай байна.

Г.ГАНБОЛД: -Таны хэлж байгаа асуудлыг ойлгож байна. Согтуурлын хэмжээг тогтоох асуудал улс орнуудын хувьд харилцан адилгүй байдаг. Манай улсад түгээмэл хэрэглэгддэг айраг гэх мэт асуудал дээр согтуурлын зэрэг гардаг, гардаггүй гээд асуудал бий. Тээврийн хэрэгсэл жолоодоод амьдрал ахуйгаа авч явдаг хүний хувьд энэ заалт эдийн засгийн дарамт болдог. Тиймээс нэг зөрчил хоёр шийтгэл байх нь зохимжгүй гэж үзсэн юм. Нэг жилээр эрхээс хасуулаад нэмээд 400 мянган төгрөгөөр торгуулж байгаа. Үүнийг өөрчилж зөвхөн эрхээ хасуулдаг болно

Улсын дээд шүүхийн хяналтын шатны иргэний хэргийн шүүх хуралдаанаар “Монгол Улсын хөгжлийн банк” ХХК-ийн нэхэмжлэлтэй “Зэст өндөр” ХХК-д холбогдох иргэний хэргийг нэхэмжлэгчийн итгэмжлэгдсэн төлөөлөгчдийн гаргасан гомдлын дагуу 2022 оны дөрөвдүгээр сарын 7-ны өдөр хянан хэлэлцлээ.

Нэхэмжлэгч “Монгол Улсын хөгжлийн банк” ХХК нь хариуцагч “Зэст өндөр” ХХК-тай байгуулсан зээлийн гэрээний үүрэгт нийт 12,253,379,260 төгрөг гаргуулах, үүргийн гүйцэтгэлийг барьцаа хөрөнгөөр хангуулах нэхэмжлэлийн шаардлагыг шүүхэд гаргажээ.

Сүхбаатар дүүргийн Иргэний хэргийн анхан шатны шүүх уг хэргийг 2020 оны долдугаар сарын 27-ны өдөр хянан хэлэлцээд “Зэст өндөр” ХХК-аас зээлийн гэрээний үүрэгт 12,253,379,260 төгрөгийг гаргуулан “Монгол Улсын Хөгжлийн банк” ХХК-д олгож, хариуцагч шүүхийн шийдвэрийг сайн дураар эс биелүүлбэл барьцааны зүйл болсон үл хөдлөх эд хөрөнгө, эрхийг албадан дуудлага худалдаагаар борлуулж, үүргийн гүйцэтгэлийг хангуулахыг Нийслэлийн шүүхийн шийдвэр гүйцэтгэх газарт даалгаж шийдвэрлэжээ.

Нийслэлийн Иргэний хэргийн давж заалдах шатны шүүх хэргийг 2020 оны есдүгээр сарын 21-ний өдөр хянан хэлэлцээд анхан шатны шүүхийн шийдвэрийг хүчингүй болгож, хэргийг дахин шийдвэрлүүлэхээр анхан шатны шүүхэд буцааж шийдвэрлэсэн байна.

Улсын Дээд шүүхийн хяналтын шатны иргэний хэргийн шүүх хуралдаанаар хэргийг хянан хэлэлцээд давж заалдах шатны шүүхийн магадлалыг хүчингүй болгож, анхан шатны шүүхийн шийдвэрийг хэвээр үлдээв.

Сүхбаатар дүүргийн гуравдугаар хорооны нутаг дэвсгэр, Нарны зам дагуу явган хүний зам хааж ус зайлуулах хоолой татсан талаарх мэдээлэл цахим орчинд гарсан. Тэрхүү шугам хоолойг “Камдер” ХХК зөвшөөрөлгүйгээр татсан тул Хот байгуулалт, хөгжлийн газраас өнөөдөр шаардлага тавьж, ус зайлуулах хоолойг авч, явган хүний замыг чөлөөллөө.

Тус компани нь холбогдох байгууллагаас зөвшөөрөл аваагүйгээс гадна нийтийн эрх ашигт харшилсан үйлдэл гаргасан тул яаралтай арга хэмжээ авсан нь энэ юм.

Түүнчлэн Хан-Уул дүүргийн 15 дугаар хорооны нутаг дэвсгэр, Төв цэнгэлдэх хүрээлэнгийн талбайд зөвшөөрөлгүй түр хашаа татсан тул Хот байгуулалт, хөгжлийн газраас “Төв цэнгэлдэх хүрээлэн” ХХК-д хашаагаа эргүүлэн татах шаардах хуудсыг хүргүүллээ.

Хот байгуулалт, хөгжлийн газрын Хот байгуулалтын инженерийн бэлтгэл, хяналтын хэлтсийн ахлах мэргэжилтэн Б.Бумням “Түр хашаа барьсан газар нь “Төв цэнгэлдэх хүрээлэн” ХХК-ийн харьяа газар. Гэхдээ архитектур төлөвлөлтийн даалгавар ирүүлээгүй, барилгын ажил эхлүүлэх зөвшөөрөл гараагүй байхад газар шорооны ажил эхлүүлсэн тул шаардах хуудас хүргүүлсэн. Одоогийн байдлаар тухайн газарт барилгын суурийн газар шорооны ажил эхэлсэн байна.

Иргэд энд барилгын ажил эхлэх гэж байгааг таслан зогсоох хүсэлтээ илэрхийлсэн. Төв цэнгэлдэх хүрээлэнгийн зүгээс авто угаалгын газрын түр объектуудыг буулгаж, тухайн талбайд барих тул зөвшөөрөл авахгүй ажлаа эхэлж болно гэж үзсэн гэх мэдээллийг өгсөн. Иймд гурав хоногийн дотор түр хашааг буулгах ёстой тухай шаардлагыг хүргүүллээ” гэдгийг онцлоод, зөрчлийг арилгаагүй тохиолдолд албадан буулгах, мэргэжлийн хяналтын байгууллагаас торгох арга хэмжээ авахыг хэлж байв.

Төв талбайд “Монголдоо сайхан амьдаръя” жагсаал үргэлжилж байна. Тус жагсаалд оролцож буй иргэд шударга ёс, тэгш эрхийг төрөөс шаардаж, үнийн өсөлтийг эсэргүүцэн жагсаж байгаа юм.

Тэгвэл хууль зүй, дотоод хэргийн сайд Х.Нямбаатар жагсагчидтай уулзаж шаардлагыг хүлээн авч удахгүй хариу өгнө гэлээ.

Жагсаалын аюулгүй байдлыг Сүхбаатар дүүргийн Цагдаагийн хэлтсийн алба хаагчид ханган ажиллаж буй аж. Өнөөдөр их үдэд эхэлсэн жагсаалд 18:00 цагийн байдлаар иргэд нэмэгдэн ирсээр байна.