Month: March 2022

Европын Холбооны Ойрхи дорнод, Номхон далайн бүсийг хариуцсан захирал Жан Луи Виль тэргүүтэй төлөөлөгчид манай улсад айлчилж байна. Төлөөлөгчид МҮХАҮТ, Монгол-Европын ХАҮТ болон манай улсад хэрэгжиж буй төслийн кластеруудын төлөөлөлтэй уулзав. Тодруулбал, уулзалтад Европын Холбооны санхүүжилтээр 2017-2021 онд хэрэгжсэн Монголын Худалдааг дэмжих төсөл (ТRАМ)-ийн дэмжлэгээр байгуулсан экспортын бараа бүтээгдэхүүний 4 кластерийн төлөөлөл, “Монголын Экспортын кластер сүлжээ” ТББ-ынхан оролцож Европын Холбоо, Монгол Улс хооронд худалдааг дэмжих талаар хэрэгжүүлсэн өмнөх хамтын ажиллагаа, цаашид хийх ажлын талаар санал солилцлоо

МҮХАҮТ-аас “Ноосон эдлэлийн гар урлалыг дэмжих” ТББ, Сарлагийн арьсны кластер, Гоо сайхны бүтээгдэхүүний кластер, Чацарганы кластерын төлөөллүүд 100 гаруй гишүүнийг төлөөлж ололт амжилт болон тулгарч буй бэрхшээлийн талаар санал бодлоо солилцож олон улсын кластерын сайн туршлагаас суралцах хүсэлтэй байгаагаа илэрхийллээ.

Европын Холбооны төлөөлөгчид Монголд хэрэгжүүлж буй төслүүдтэй танилцав.

Европын Холбооны төлөөлөгчид Монгол Улс Generalised Scheme of Preferences (GSP+) тогтолцооны шаардлагуудыг хангаж бүрэн ашиг тусыг нь хүртэж буй 7 улсын нэг гэдгийг цохон тэмдэглэв. Монгол Улсын гадаад худалдаа хөгжиж буй энэ үед үйлдвэрлэлийг хөгжүүлж, төрөлжүүлэх, дэд бүтэц бий болгох шаардлага үүсч байгааг онцоллоо. Европын Холбоо GSP буюу Хөнгөлөлтийн ерөнхий системд Монгол Улсыг хамруулж 7200 гаруй нэр төрлийн бараа, бүтээгдэхүүнийг гаалийн татвараас чөлөөлөх хөнгөлөлтийг бий болгосон. Түүнчлэн худалдааг дэмжих хүрээнд ТRAM төсөл кластеруудын экспортыг дэмжиж чанарын стандартыг нэвтрүүлж байна. Тэр дундаа “Увсын чацаргана” газар зүйн заалтыг Европын Холбоонд бүртгэснээр хуурамч бүтээгдэхүүн борлуулахаас хамгаалж, ажлын байр бий болж, өрсөлдөхүйц үнэ тогтоох боломжтой болох зэрэг ач холбогдолтойг онцлон тодотгож байна.

Европын Холбооны төлөөлөгчид ТRАМ төслийн дараагийн үе шатыг хэрэгжүүлэхээр төлөвлөх шатандаа байгааг дуулгалаа. Мөн хамтын ажиллагааны шинэ боломжууд нээгдэхийг илэрхийлж ТRАМ төслийг хэрэгжүүлэхэд хамтран ажиллаж байгаа Монголын Үндэсний Худалдаа, аж үйлдвэрийн Танхимд талархал илэрхийллээ. Уулзалтын төгсгөлд төлөөлөгчид экспортын кластерын компаниудын бүтээгдэхүүнтэй танилцав.

МУИС-ийн Хууль зүйн сургуулийн захиргаа яг одоо тус сургуулийн оюутан Батбаярын Ариунзаяагийн асуудлыг хэлэлцэж, хөөх шийдвэр гаргажээ.

МУИС-ийн зүгээс суралцагчийг өөрийн биеэр ирж тайлбар, мэдээлэл өгөх, шийдвэрийг өөрт нь мэдэгдэх зарчмын үүднээс 14.00 цаг хүртэл хугацаа өгсөн байна. Энэ хугацаанд ирэхгүй бол гарсан шийдвэрийг мэдээлэх болсон талаар эх сурвалж мэдээллээ.

Тус сургуулийн дотоод журмын дагуу оюутнууд 1.5.1 Хууль дээдлэх, 1.5.5 Хариуцлагатай, ёс зүйтэй байх зарчим болон ёс зүйн дүрэмд үндэслэн тус оюутныг хасах өргөдлийг гаргасан.

Ийм ёс зүйгүй үйлдэл гаргаж буй оюутан ирээдүйд хуульч мэргэжлээр төгсгөж болохгүй гэж оюутнууд болон иргэд үзэж байгаа юм.

ДЭМБ-аас жил бүрийн 3 дугаар сарын 3-ны өдрийг “Сонсгол хамгаалах дэлхийн өдөр” болгон тэмдэглэдэг. Энэ жил “To hear for life, listen with care” буюу Насан туршдаа сонсохын тулд анхааран халамжилж сонс” уриатай тэмдэглэж байна.

Дэлхий дээр сонсголын бэрхшээлтэй 466 сая хүн амьдарч байгаагаас 34 сая нь хүүхдүүд байна. Өөрөөр хэлбэл дэлхийн нийт хүн амын 20 хүн тутмын нэг нь сонсголын бэрхшээлтэй бөгөөд энэ тоо цаашид нэмэгдэнэ гэж үздэг. Эмч мэргэжилтнүүдийн үзэж буйгаар, 2050 он гэхэд дэлхийн 900 сая гаруй хүн сонсголын чадвараа алдах болно гэсэн тооцоо бий. Насжилттай холбоотой сонсгол бууралт, сонсголын алдалт үүсэж байдаг бөгөөд 65-аас дээш насны 3 хүн тутмын нэгнийх нь сонсгол хэвийн бус болдог байна.

Энэхүү өдрөөр Хөдөлмөрийн аюулгүй байдал, эрүүл мэндийн төвийн Мэргэжлийн өвчин судлалын эмнэлгийн Чих хамар хоолойн кабинетын эмч нар сонсгол алдалтаас урьдчилан сэргийлэх сурталчилгааг явуулж байна. Мөн эмнэлэгт энгийн үйлчилгээ авч буй иргэдийн сонсголыг шалгах, сонсгол бууралтаас урьдчилан сэргийлэх гарын авлага бэлтгэн тарааж байгаа юм. Хоёр хүн тутмын нэг нь шуугианы улмаас сонсгол алдагдах эрсдэлтэй байдаг аж. Тиймээс шуугиантай ажилд зарцуулах цагийг зохицуулах, сонсох түвшинг хянах, дууны түвшинг бага байлгах, чихээ чанга дуу чимээнээс хамгаалах зэрэг энгийн зан үйлийг байнга хэрэгжүүлэхийг эмч нар зөвлөж байна.

Монгол Улсад 2020 оны статистик мэдээгээр сонсголын бэрхшээлтэй 8585 хүн байдаг. Үүний 3789 нь эмэгтэй , 4194 нь эрэгтэй, үлдсэн нь 17 хүртэлх насны хүүхэд байна. Орчин үеийн техник технологижсон байдал, хүүхэд залуусын чихэвчний зохисгүй, хэтэрсэн хэрэглээ, осол гэмтэл, чих хамар хоолойн үрэвсэлт өвчин, эм тарианы буруу хэрэглээ, гаж нөлөө зэрэг олон шалтгааны улмаас сонсгол бууралт, сонсгол алдалтын тоо нэмэгдэж байна.

Буу ашиглан дээрэм хийхийг завдсан этгээдийг Цагдаагийн байгууллага саатуулан шалгаж байгаа талаар Нийслэлийн цагдаагийн удирдах газар /НЦУГ/-ын Урьдчилан сэргийлэх хэлтсийн мэргэжилтэн Б.Дэлгэрхангай мэдээлэл өглөө.

Тэрээр “Гуравдугаар сарын 1-ны өдөр Баянгол дүүрэгт байрлах нэгэн цэнгээний газрын гадна гар буутай этгээдүүд бусдыг айлган сүрдүүлж байна гэх дуудлага мэдээлэл ирсэн. Дуудлагын дагуу цагдаагийн байгууллагын алба хаагчид очиж шалгаад 32 настай Э, 26 настай Э нар үйлдсэн болохыг тогтоосон. Улмаар Сонгинохайрхан дүүргийн нутаг дэвсгэрээс дайнчлан баривчилсан байна. 32 настай Э нь өмнө нь дээрэмдэх, хүчиндэх, хүн алах гэмт хэрэг үйлдэж, ял шийтгэл эдэлж байсан. Өнгөрсөн есдүгээр сард хорих ангиас суллагдсан. 26 настай Э нь эрхэлсэн тодорхой ажилгүй бөгөөд өмнө нь мансууруулах бодис хууль бусаар хэрэглэсэн хэрэгт холбогдон шалгагдаж байсан” гэсэн мэдээлэл өглөө.

Батлан хамгаалах яамнаас “Оюутан цэрэг” сургалтын бүртгэлийг цахимжуулж, энэ жилээс эхлэн “e-mongolia” системээр бүртгэж буй. Бүртгэлтэй холбоотой түгээмэл асуулт, хариултыг хүргэж байна.

-“Оюутан цэрэг” сургалтын бүртгэл хэдэн хүртэл үргэлжлэх вэ?

-“Оюутан цэрэг” сургалтын бүртгэл 2022 оны 03 дугаар сарын 01-ээс 2022 оны 03 дугаар сарын 10 хүртэл “e-mongolia” системээр явагдаж буй. Иймд оюутнууд 03 дугаар сарын 10-аас өмнө амжиж бүртгүүлэхийг зөвлөж байна.

-Тус сургалтад хамрагдах хүсэлтээ оюутнуудад ямар шалгуур тавьж байгаа вэ?

-Сургалтад хамрагдах хүсэлтээ оюутнуудад тавигдах шалгуур гэж бий. Тодруулбал,

• Тухайн оюутны суралцаж буй сургууль нь магадлан итгэмжлэгдсэн байх,
• 2021-2022 оны хичээлийн жилд шинээр элссэн байх,
• Бакалаврын өдрийн ангийн 1-р курсийн оюутан байх,
• 2022 оны 06 дугаар сарын 15 гэхэд 18 нас хүрсэн байх
• 1 дүгээр улирлын голч оноо 2.8 -аас дээш байх гэсэн шалгуур тавигдаж буй.

-Гол шалгуурыг хангасан хэр нь “e-mongolia” систем дээр хүсэлт илгээх гэхээр боловсролын салбарын мэдээллийн сангаас шалгуур хангасан мэдээлэл олдсонгүй гэсэн мэдээлэл ирж байна. Үүнд тайлбар өгөөч?

-Хэрвээ ийм мэдэгдэл ирж байгаа бол тухайн оюутан сургуулийнхаа сургалтын албанд хандаж, өргөдөл, гомдлоо гаргаарай гэж зөвлөх байна. Учир нь тухайн сургууль нь оюутнуудын мэдээллийг боловсролын салбарын мэдээллийн санд оруулж байгаа. Тус мэдээллийн дагуу “e-mongolia” оюутнуудын хүсэлтийг хүлээж авч байгаа гэсэн үг. Хэрвээ боловсролын мэдээллийн санд тухайн оюутны мэдээлэл ороогүй бол энэ удаагийн “Оюутан цэрэг” сургалтад хамрагдах боломжгүй.

-“e-mongolia” системд бүртгүүлсэн хүсэлт хэзээ баталгаажих вэ?

-“Оюутан цэрэг” сургалтын бүртгэл 2022 оны 03 дугаар сарын 10 хүртэл явагдана. Бүртгэл дууссаны дараа Батлан хамгаалах яамнаас хүсэлтүүдийг шалгаж, баталгаажуулна.

-Хүсэлт нь баталгаажсан оюутнууд “Оюутан цэрэг” сургалтад хамрагдана гэж ойлгож болох уу?

-Тэгж ойлгож болохгүй ээ. Батлан хамгаалах яамнаас “e-mongolia” системд бүртгүүлсэн хүүхдүүдийн хүсэлтийг баталгаажуулна. Үүний дараа оюутнуудыг харьяа дүүргийн цэргийн штаб дээр нь дуудаж, бие бялдрын шалгалт авна. Тус шалгалтад тэнцсэн хүүхдүүд “Оюутан цэрэг” сургалтад хамрагдах боломжтой гэсэн үг.

-“e-mongolia” системд хэрхэн нэвтэрч орох вэ? Оюутнуудын хувьд энэ их түгээмэл асуудал болж байх шиг байна?

-“e-mongolia” системд нэг удаагийн код, банкны эрх, тоон гарын үсэг гэсэн гурван сонголтоор нэвтэрнэ. Нэг удаагийн кодоор нэвтрэхийн тулд тухайн оюутны утасны дугаар нь өөрийнх нь нэр дээр байх шаардлагатай. Хэрвээ гар утасны дугаар нь өөрийнх нь нэр дээр байхгүй бол интернэт банкны эрхээрээ нэвтрэх боломжтой. Нэг удаадаа дээрх аргаар нэвтэрсэн тохиолдолд цаашид пин код эсвэл QR кодоор хялбар нэвтрээд үйлчилгээ авах боломжтой.

Хэрвээ оюутнууд “Оюутан цэрэг” үйлчилгээг авахад хүндрэлтэй тулгарч байвал Төв шуудангийн 1 давхарт байрлаж буй “e-mongolia” төвийн операторуудаас тусламж авах боломжтой. Эсвэл 1111 лавлах утсанд холбогдоод тусламж авах боломжтой.