Month: March 2022

Аймгийн Гэр бүл эмэгтэйчүүдийг хүчирхийллээс хамгаалах хөтөлбөрийн хүрээнд “Эмэгтэйчүүд асуудал ба шийдэл” уулзалт хэлэлцүүлэгийг зохион байгууллаа гэж Өмнөговь аймгийн ГБХЗХГ-аас мэдээллээ.

Аймгийн ЗДТГазрын ХЭЗХэлтэс, ГБХЗХГ хамтран Олон улсын эмэгтэйчүүдийн эрхийг хамгаалах өдрийг угтаж гэрээр хүүхдээ асарч байгаа ээжүүдийн төлөөллийг урьж уг уулзалтыг хийсэн байна. Эмэгтэйчүүдэд өөрийгөө хайрлаж, бусдыг хайрлах тухай, Эрэгтэйчүүдийн дундаж наслалт бага байгаа, эрэгтэйчүүдийн эрүүл мэндийн тулгамдсан асуудалд эмэгтэйчүүд анхаарах шаардлагатай, гэрээр хүүхдээ асарч байгаа ээжүүдэд тулгамдаж буй асуудлуудыг хөндсөн. Мөн төрөх тасгийн үйлчилгээ, орны асуудал, төрхийн дараахь сувилгаа үйлчилгээ хэрэгцээтэй байгаа, шийдвэрлэх гарцын тухай хэлэлцлээ. Уг уулзалтыг өглөө эрт гэсэн тодотголтойгоор хийсэн бөгөөд уулзалтанд ирсэн эмэгтэйчүүд тус бүр 10 бүсгүйд “Хайраа хайрлая хандлагаа өөрчлөе хамтдаа үлгэрлэе” уриалга хүргэхээр болов. Мөн нийгмийн амьдралд эмэгтэйчүүдийн тэгш оролцоог нэмэгдүүлэхэд хамтран ажиллахаа илэрхийлсэн байна.

Сүүлийн 24 цагт аймгийн хэмжээнд коронавирусний халдвар илрүүлэх 135 шинжилгээ хийснээс хүүхэд 25, насанд хүрэгч 20 нийт 45 тохиолдол шинээр бүртгэгдлээ.

Өнөөдрийн байдлаар коронавирусний халдварын улмаас 77 хүн эмнэлгийн тусламж авч байгаагаас нэн хүнд 2, хүнд 10, хүндэвтэр 22, хөнгөн оноштой 43 өвчтөн хэвтэн эмчлүүлж байгаа бөгөөд өнгөрсөн хоногт 58 хүн эдгэрсэн тухай ЭМГ-аас мэдээллээ.

Одоогоор тус аймгийн хэмжээнд дархлаажуулалтын нэгдүгээр тунд 39562, хоёрдугаар тунд 37473, гуравдугаар тунд 16420, дөрөвдүгээр тунд 1362 иргэн хамрагдаад байгаа юм.

Канадын нийслэл Оттава хотод ОХУ-ын Элчин сайдын яам байрладаг гудамжийг Украины Ерөнхийлөгч Владимир Зеленскийн нэрэмжит болгох санал гарчээ. Канадын парламентын гишүүн Чарли Энгус уг саналаа твиттер хуудсаар дамжуулан хотын захиргаанд тавьжээ.

Улс орных нь байдал хурцатмал байгаа нөхцөлд ийм алхам хийх нь Украины Ерөнхийлөгчид дэмжлэг болно гэж Энгус үзэж байгаа юм.

“Алтан тариа” компани үйлдвэрийнхээ байран дээрээ Украины далбааг өлгөсөн нь асуудал дагуулаад байгаа.

Тодруулбал, цагдаагийн байгууллагын 102 утсанд “Алтан тариа үйлдвэр дотор Украин улсын далбааг өлгөөд хүмүүсийн дургүйцлийг хүргэж байна” гэх дуудлага мэдээлэл 12:27 цагт иржээ. Энэ дуудлага мэдээллийн дагуу Сонгинохайрхан дүүргийн цагдаагийн нэгдүгээр хэлтсийн ажилчид очиж тодруулан ажилласан юм.

Ингэхдээ иргэний баримтжуулсан зургаар долоон цагдаа очиж, ажилласан нь зарим талаар шүүмжлүүлж буй. Хувийн ААН олон улсын асуудалд энх тайванч байр суурь илэрхийлэхэд цагдаа ийн сүржин шалгасан нь буруу гэдэг байр суурийг илэрхийлэх хүмүүс байна.

Тэгвэл энэ талаар ЦЕГ-ын ХМОНХТ-ийн дарга Б.Баатархүү “Цагдаагийн байгууллагад дуудлага мэдээлэл ирсэн үед газар дээр нь очиж шалгах ёстой байдаг. Өнөөдрийн тухайд дуудлагаар очсон ЦАХ-д туг далбааг буулга гэсэн шаардлага тавиагүй, хувийн өмчид халдсан асуудал гаргаагүй бөгөөд дуудлагыг газар дээр нь шалгаад ГХ, зөрчлийн шинжгүй байсан тул явсан байна” гэж тайлбар өгчээ.

Бага насны хүүхдийн цогц хөгжилд хувийн хэвшлийн байгууллагуудын оролцоо зөвлөлдөх уулзалт өнөөдөр боллоо.

Байгууллагын дэргэдэх цэцэрлэгийг хэрэгжүүлсэн “Тэсо” групп, Улсын II төв эмнэлэг зэрэг байгууллагын сайн туршлагыг энэ үеэр сонсов. Улсын II төв эмнэлгийн тухайд өнгөрсөн онд 100 хүүхдийн ортой цэцэрлэгийг байгуулсан бөгөөд цаашид бүлгийн тоог нэмэгдүүлэхээр төлөвлөж байгаа аж. “Тэсо” группийн нийт ажилтны 60 хувь нь 2-5 настай хүүхэдтэй. Эдгээр ажилтныхаа хүүхдийг цэцэрлэгт хамруулах үйлчилгээг байгууллагын дэргэдэх цэцэрлэгээр шийдвэрлэжээ. Үүний үр дүнд ажилтнуудын сэтгэл ханамж есөн хувиар нэмэгдсэн байна.

Тэдний туршлагаас судлан Монос эмийн үйлдвэр, Сүү хувьцаат компани зэрэг хувийн хэвшлийнхэн байгууллагынхаа дэргэд цэцэрлэг байгуулахаар ажиллаж байгаа юм. Хувийн хэвшлийнхэн цэцэрлэг байгуулах туршлагаа харилцан ярилцаж, саналаа хэллээ.

Улсын хэмжээнд байгууллагын дэргэдэх 25 цэцэрлэг байгаа юм. Эдгээр байгууллагын 73 салбар бүлэгт 1,893 хүүхэд цэцэрлэгт хамрагдаж байна. Цаашид цэцэрлэгт хамрагдаж чадахгүй байгаа хүүхдийг бүрэн хамруулахдаа төр, хувийн хэвшлийн түншлэлийн хүрээнд шийднэ.

Байгууллагын цэцэрлэгийг байгуулахад төрөөс:

• Мэргэжлийн удирдлага
• Нэг хүүхдэд ногдох хувьсах зардал
• Хүүхдийн хоолны зардал
• Мэргэжлийн багшаар хангах, багшийн мэргэжлийг дээшлүүлэх үйл ажиллагааны дэмжлэг үзүүлнэ.

Бага насны хүүхдийн цогц хөгжилд хувийн хэвшлийн байгууллагуудын оролцоо зөвлөлдөх уулзалтыг Боловсрол, шинжлэх ухааны яам, НҮБ-ын Хүүхдийн сан, МХАҮТ хамтран зохион байгуулж, төр, хувийн хэвшлийн төлөөлөл оролцжээ.

Монгол Улсын Шадар сайд, УОК-ын дарга С.Амарсайхан өнөөдөр УОК-ын Нэгдсэн шуурхай штабын үйл ажиллагаатай танилцаж, үүрэг чиглэл өгөв.

Олон нийтийн сүлжээнд шүүгчийг заналхийлсэн агуулга бүхий мэдээллийг Баянзүрх дүүргийн 16 дугаар хорооны иргэн Г нийтэлсэн болохыг цагдаагийн байгууллага тогтоон, тухайн мэдээллийг устгуулж, Зөрчлийн тухай хуулийн 5.9 дүгээр зүйлийн 1 дэх хэсэгт зааснаар нэг зуун нэгжтэй тэнцэх хэмжээний төгрөгөөр торгох шийтгэл оногдуулсан байна.

Шүүхийн ерөнхий зөвлөлийн дарга, Хууль зүй, дотоод хэргийн сайдын хамтарсан тушаалаар батлагдсан “Шүүгч, түүний гэр бүлийн гишүүний амь нас, эрүүл мэндэд аюул занал учрах нөхцөл үүссэн үед хамгаалалтын арга хэмжээ хэрэгжүүлэх журам”-ын дагуу Шүүхийн ерөнхий зөвлөлөөс цагдаагийн байгууллагад хандсаны дагуу дээрх этгээдэд хариуцлага тооцжээ.

Тус журамд “Шүүгчийг албан үүргээ гүйцэтгэсэнтэй нь холбогдуулан хэвлэл мэдээллийн хэрэгсэл, олон нийтийн сүлжээгээр түүний болон гэр бүлийн гишүүний амь нас, эрүүл мэндэд аюул учруулж болзошгүй мэдээ, мэдээллийг түгээсэн /заналхийлсэн, хүчирхийлэлд уриалсан зэрэг/ тохиолдолд Шүүхийн ерөнхий зөвлөл дээрх нөхцөл байдлыг таслан зогсоох, урьдчилан сэргийлэх чиглэлээр цагдаагийн байгууллагатай хамтран хуульд заасан арга хэмжээг шуурхай авна гэж заасан байдаг.