Month: March 2022

Categories
мэдээ нийгэм

Нийслэлд 22 байршилд авто зам, замын байгууламж барина || DNN.mn

Нийслэлд энэ онд төсвийн хөрөнгөөр 22 байршилд 26.95 км авто зам, замын байгууламж, 1891.2 метр урт гүүр, 80850 м2 явган зам, 14.35 км дугуйн зам барихаар төлөвлөөд байна.

Улаанбаатар хотод улс, нийслэлийн хөрөнгөөр хийх бүтээн байгуулалтыг эрчимжүүлж, эхнээсээ тендер зарлаад байна. Өмнө жилүүдэд 4 дүгээр сараас эхэлдэг байсан бүтээн байгуулалт энэ онд 3 дугаар сарын эхнээс эрчимжлээ. Бүтээн байгуулалт ид өрнөж байх хугацаанд тендер зарлах, бичиг цаасны ажлаа гүйцэлдүүлэх зэргээр хугацаа алддаг байсан. Энэ алдааг давтахгүйн тулд бүтээн байгуулалтын бэлтгэлийг эрт дуусгажээ.

Энэ онд барих авто зам, замын байгууламжийн хөрөнгө оруулалт, төлөвлөгөөг баталж, шинэ бүтээн байгуулалтын 11.47 км нь гол зам, гудамжуудад баригдах бол 15.48 км нь туслах замд хийгдэх аж. Эдгээр 22 байршлаас 19 байршлынх нь тендерийг зарлаад байгааг НЗДТГ-ын Сургалт, судалгаа, олон нийттэй харилцах газар мэдээлэв.

Хаана ямар зам, замын байгууламж барихыг дараах зурагнаас харах боломжтой.

Наадамчдын /Яармагийн гүүрнээс баруун тийш “Чингис хаан олон улсын нисэх онгоцны буудал хүртэлх/ авто замаас Энхтайваны өргөн чөлөө хүртэлх авто зам

Ард Аюушийн өргөн чөлөөний олон түвшний огтлолцол

Толгойтын авто замыг Ард Аюушийн өргөн чөлөөтэй холбох авто зам, Ард Аюушийн өргөн чөлөөний олон түвшний огтлолцол

Гачууртын авто замаас Шар хадны автобусны эцсийн зогсоол хүртэлх авто зам, гүүрний угсралтын ажил

Зайсангийн төмөр бетон гүүрний өргөтгөл, шинэчлэлт

Эрчим хүчний гудамжнаас “Монос фарм трейд” ХХК хүртэлх “Таван толгой түлш” ХХК-ийн зүүн талаар шинээр тавих авто зам

Баянголын авто замын баруун талаас 22-ын товчооны баруун талын гарц хүртэлх авто зам

Сэлбэ голын баруун талын авто замаас хойшоо шинээр тавих авто зам, гүүр

Хайгуулчдын гудамж болон Хүнсчдийн гудамжны дагуу шинээр барих болон шинэчлэх авто зам

Нэгдүгээр хорооллын арын холбоос зам гүүр

Цагаан байрны хойд уулзвараас далан дагаад Хүчит шонхор захын уулзвар хүртэлх авто зам

Ахмадын хорооллын зүүн талаарх далан дагасан авто зам

Улаанхуарангийн гудамжнаас 68 дугаар сургуулийн баруун талаар Цагдаагийн академийн өргөн чөлөөтэй холбох гудамж, зам

Дунд голын арын буюу Алтай хотхоны урд талын авто зам

Ээрмэлийн гудамжийг Туул гол гудамжтай холбох авто зам

“Эрдэнийн төгөл” хотхоны баруун талаас Хүннү хороолол хүртэлх авто зам

Номин Юнайтед их дэлгүүрийн баруун талын авто замаас Б.Шаравын гудамж хүртэлх авто зам

Ерөнхий боловсролын 115 дугаар сургуулийн баруун талаар Туул гол гудамжийг Б.Шаравын гудамжтай холбох авто зам

Нарны гүүрний баруун тал Дэма эмнэлгийн хойд талд хийгдэх авто зам

Алтай хотхоны баруун талаас Мод боловсруулах үйлдвэрийн хойд талын авто зам хүртэлх авто зам

Хархорин захын баруун талаар шинээр баригдах авто зам

Баянмонголын нүхэн гарцнаас Нийслэл хүрээ өргөн чөлөө хүртэлх төмөр зам дагасан авто зам

Categories
гадаад мэдээ

Муу бүхэн сайн талтай || DNN.mn

Аюулгүйн Зөвлөлийн байнгын гишүүн ОХУ өөрийн бүрэн эрхийн дагуу хориг тавьсан учир өнгөрсөн баасан гаригт НҮБ-ын Аюулгүйн Зөвлөл Украины асуудлаар тогтоолын төсөл баталж чадаагүй юм. Иймээс НҮБ-ын Аюулгүйн Зөвлөл Украины хямралын талаар Ерөнхий Ассамблейн онц чуулган хуралдуулах тухай 2623 дугаар тогтоолыг ням гаригт баталсан. НҮБ түүхэндээ ийм онц их хуралдааныг 10 удаа зарлаж байгаа бөгөөд Аюулгүйн Зөвлөл сүүлийн дөчин жилийн хугацаанд анх удаагаа ийм тогтоол баталсан гэдгийг тус зөвлөлийн хэвлэлийн мэдэгдэлд онцолсон юм. Ийнхүү НҮБ-ын Аюулгүйн Зөвлөл Украины хямралын талаар Ерөнхий Ассамблейн онц чуулган хуралдуулж, ОХУ-д Украины эсрэг хийж буй түрэмгийллээ зогсоож, тус улсын нутгаас үг дуугүй цэргээ гарган, “ДНР”, “ЛНР”-ийн тусгаар тогтнол гэх асуудлаа яаралтай эргэн харахыг шаардсан “Украины эсрэг түрэмгийлэл” гэсэн нэртэй тогтоолыг батлав. Уг тогтоолыг 141 улс дэмжиж Орос, Беларусь, Эритрея, Хойд Солонгос, Сири улс эсэргүүцэж ОХУ-тай иж бүрэн стратегийн түншлэл бүхий Монгол, Хятад зэрэг 35 улс түдгэлзсэн санал өгчээ. Эритрея гэдэг нь Африкийн зүүн талд, Улаан тэнгисийн эрэгт орших 117 600 км газар нутагтай 6,08 сая хүн амтай улс билээ. Харин энэ тогтоолыг ОХУ ёстой огт тоохгүй. Учир нь НҮБ-ын Ассамблейн чуулган 2014 онд оросууд Крымыг хүчээр нэгтгэснийг буруутгасан тогтоол батлахад 100 улс дэмжиж 11 улс эсэргүүцэж, 58 улс түдгэлзэж байсан юм. Хэргийн учир нь АНУ тэргүүтэй барууны улсууд Оросын эсрэг явуулж буй арга хэмжээгээ дэлхий нийтээр дэмжүүлж чадсанд байгаа юм. Өнгөрсөн лхагва гаригт АНУ-ын ерөнхийлөгч Конгрессын хоёр танхимын нэгдсэн чуулганд улс орныхоо өнөөгийн нөхцөл байдлын талаар илтгэл тавилаа. “State of the Union” гэж нэрлэгддэг жил тутмын ийм илтгэлийг тус улсын ерөнхийлөгч шинэ оны эхэнд тавьдаг уламжлалтай юм. Ерөнхийлөгч Жо.Байдены нэг цаг орчим үргэлжилсэн энэ удаагийн илтгэлд Украины хямралын асуудал бие даасан нэг сэдэв болж орсон байна. Байдены илтгэлд Украины элчин сайд Оксана Маркарова уригдаж, тэргүүн хатагтай Жилл Байдентай зэрэгцэн хүндэт суудалд суусан байв. Ерөнхийлөгч Жо.Байден “Путины дайн урьдаас төлөвлөгдсөн байсан. Тэр дайнаас сэргийлэх дипломат арга замуудаас татгалзсан. Тэр Өрнөд болон NATO-г хариу арга хэмжээ авахгүй гэж тооцоолсон байна. Тэр биднийг хагаралдуулж чадна гэж боджээ.

Гэвч Путин алдсан. Бид үүнд бэлэн байлаа” гэж хэлсэн. Мөн тэрээр орос олигархуудын бүх хөрөнгийг хураах болсныг “Тэдний хууль бусаар олсон бүх хөрөнгө, хувийн нисэх онгоц, бусдад гайхуулан зугаацдаг усан онгоцыг нь хураан авна” гэж хэлсэн. Англи зэрэг Европын улсууд төдийгүй Швейцарь, Япон улсууд мөн ийм арга хэмжээ аваад эхэлсэн. Тэрээр Оросын эсрэг хориг арга хэмжээг үргэлжлүүлэн авч хэрэгжүүлэхээ илэрхийлээд “Путин юу ирж байгааг төсөөлөхгүй байна” гэж анхаарууллаа. Тэгвэл стратегийн иж бүрэн түншлэлтэй хойд хөршдөө бид яаж гай болохгүй тус болох вэ? Нэгдүгээрт, өнөөдөр барууны улсын иргэд оюутан, дипломат, жирийн иргэн ч бай орос хүн л бол ад үзээд эхэллээ. Иймээс юуны өмнө орос хүнийг огт ад үзэж болохгүй. Энэ бол хамгийн чухал зүйл.

Хоёрдугаарт, орос даяар хүнсний ургамлын бордооноос эхлээд мерседес бенц машин, боинг онгоцны сэлбэг хүртэл барууны бүх барааны хомсдолд орох болж байна. Үүнд нэг юмыг бид онцгойлон маш сайн ойлгох хэрэгтэй байгаа юм. Энэ бол бид барууны ямар ч барааг ОХУ-ын хил рүү оруулж зарж болохгүй. Ингэх л юм бол бид өөрсдөө олон улсын хориг зөрчсөн хэрэгт орж жинхэнэ баларна. Харин улс дотроо бол ямар ч бараа зарж болно. Жишээ нь, оросууд хоригийн эсрэг 2-3 жил тэсэх алт урьдчилан нөөцөлсөн. Тэгвэл энэхүү хүчтэй хоригоос болоод өнөөдөр Оросын энэ хямд алтыг худалдан авч өөрсдөө хоригт орох улс байхгүй болчихсон гэсэн үг. Харин өөрийн улс дотор бол ямар ч алтыг аль ч улс худалдан авч цааш нь зарж болно. Өөрөөр хэлбэл, манай бүх худалдаачид нийлж “холбоо” байгуулан Гадаад хэргийн яам, элчин сайдын газар, консултайгаа нийлж оросуудаас юуны өмнө хаанахын ямар, ямар бараа хэр зэрэг хэрэгтэй байгаа судалгаа ав. Тэгээд энэ судалгаа өгсөн газартайгаа байнгын холбоо тогтоо. Энэ судалгааныхаа дагуу хэрхэн ажиллаж бараа нийлүүлэх нарийвчилсан төлөвлөгөө гарга. Энэ хугацаандаа Оросын том, хүчтэй, даацтай ачааны оноцуудыг хөлсөлж түр Монгол Улсын мэдэлд ажиллуулах гэрээ хийж улсынхаа далбааг уг онгоцнууд дээрээ зуруулж ав. Ингээд гаргасан төлөвлөгөөнийхөө дагуу баруунаас бараа худалдан авч Алтанбулагийнхаа чөлөөт бүсэд худалд. Олсон орлогоороо Оросыг хангах экспортын жижиг, дунд үйлдвэрүүд байгуулцгаая. Мэдээж барууны хөрөнгө оруулагчтай нийлсэн хамтарсан үйлдвэрүүд байх болно. Монгол Улс шууд л хөл дээрээ босоод ирнэ. Гэхдээ эндээс бид юу хожно гээч. XIII зуунаас хойш монголчууд бид анх удаагаа жинхэнэ ёсоор нэгдэнэ. Энэ л юугаар ч үнэлшгүй маш чухал зүйл.

Оросууд “Нет худа без добра” гэдэг. Энэ нь “Муу бүхэн сайн талтай” гэсэн үг.

Г.АМАРСАНАА

Categories
мэдээ нийгэм

Хөвсгөл нуурын хориглох тэмдэгтэй хэсгээр зорчсон автобус мөсөнд цөмөрчээ || DNN.mn

Хөвсгөл нуурын хориглох тэмдэгтэй хэсгээр зорчсон автобус мөсөнд цөмөрчээ

Хөвсгөл аймгийн Алаг-Эрдэнэ сумын 6 дугаар баг Хатгал тосгоны “Доод модот булан” гэдэг газарт хот хоорондын автобус мөсөнд цөмөрч суусан тухай дуудлага өчигдөр /2022.03.03/ 16:12 цагт Онцгой байдлын албанд иржээ.

Дуудлагын дагуу тус аймгийн Онцгой байдлын газрын Эрэн хайх, аврах салбар, Гал түймэр унтраах, аврах 69 дүгээр ангийн алба хаагчид очиход иргэн Ж-ийн “Хьюндай” загварын 45 хүний суудалтай автобус “Ашихай” амралтын газраас “Хүй толгой” гэдэг газрын чиглэлд зорчихдоо хориглох тэмдэг байрлуулсан газраар нуурын өрхөнд орж хойд 2 дугуй мөсөнд цөмөрч суусан байжээ.

Автобусыг аюулгүй газарт гаргахаар албан хаагчид 5 цаг 36 минут ажиллаж 21:54 цагт татан гаргасан. байна. Тус автобус доторх 15 зорчигчийг эсэн мэнд гаргажээ.

Монгол орны бүх гол мөрөн, нуур тогтвортой мөсөн бүрхүүлтэй байгаа хэдий ч зарим голын дунд болон адгаар мөсний зузаан өмнөх арав хоногоос 5-15 см нимгэрсэн байна.

Цаашид цаг агаар дулаарахын хирээр мөсний үзэгдэл эрчимжиж мөс нимгэрч хэврэгших тул цаг хожих, зам товчлох зэргээр мөсөн дээгүүр явах болон авто тээвэр хийхгүй байхыг Гадаргын усны судалгааны хэлтсээс онцгойлон анхаарууллаа.

Categories
мэдээ энтертаймент-ертөнц

Монголын эмэгтэй уран бүтээлчид “Саарал хайрцаг” үзэсгэлэн нээнэ || DNN.mn

Монголын Урчуудын Эвлэлийн 80 жилийн ой, Олон Улсын эмэгтэйчүүдийн эрхийг хамгаалах өдрийг тохиолдуулан “Саарал хайрцаг” Монголын эмэгтэй бүтээлчдийн үзэсгэлэнг МУЭ-ийн арт галерейд энэ сарын 7-нд олон нийтэд толилуулна.

Дүрслэх урлагийн салбар дахь эмэгтэйчүүдийн оролцоо, тэдний дуу хоолойг түгээх, хүний эрхийн асуудлуудыг тунхаглахад хүн бүрийн оролцоо чухлыг онцлон энэхүү үзэсгэлэнг дэлгэж буй юм.

Уг үзэсгэлэнгийн зорилго нийгэм эдийн засгийн өөрчлөлт, хөгжлийн үйл явц, эмэгтэйчүүдийн тэгш оролцоог дэмжих, сургалт, сурталчилгаа бүхий нөлөөллийн ажлууд, өнөөгийн нийгэмд тулгамдаж буй экологийн тэнцвэргүй байдал, уур амьсгалын өөрчлөлт, байгаль орчны доройтол, агаар орчны бохирдол, төлөвлөлтгүй хот, хүн амын бөөгнөрөл, гэр бүл, хүүхэд хамгаалал, нийгмийн харилцаа хандлага зэрэг асуудлыг хөндсөн, тулгарч буй саад бэрхшээлийг даван гарах гэсэн эмэгтэйчүүдийн оролцоог нэмэгдүүлэхэд гол анхаарлаа хандуулж, сэдвийн хүрээнд манлайлагчид байж, урлагаар дамжуулж нийгэмтэйгээ харьцахад оршиж байна.

Уран бүтээлчид бүтээлдээ сайн сайхныг магтан дуулсаар, нөгөө талд нийгэм дэх хүчирхийлэл буурахгүй байсаар байна. Яагаад эмэгтэйчүүдийн бүтээл үргэлж цэцэг навч, гоо үзэмж, гоё ганган, хөөрхөн сайхны тухай дүрслэх ёстой гэж? Яагаад бодит байдлаа илчилдэггүй, илэрхийлдэггүй, тодруулбал хашгирдаггүй юм бэ? Эмэгтэйчүүдийн эрхийн төлөө хэн дуугарч, тэдний эрхийг хэн хамгаалах ёстой гэж? Эмэгтэйчүүдийн эрхийн өдөр, бүхий л үзвэр яагаад наран, саран, хатан, ижий гэсэн нэртэй байдаг юм бол? энэ мэт олон, олон яагаад ийм, тийм юм бэ? хэмээсэн асуултын хариултыг өөрсдөөсөө, дотроосоо, нухацтай, судалгаатай эрж хайсан бүтээлүүдийг дэлгэх юм.

Тус үзэсгэлэнг дэмжин Соёлын яам, Монголын Эмэгтэйчүүдийн сан, Монгол арт галерей хамтран ажиллаж байна.

Үзэсгэлэн энэ сарын 18-ныг хүртэл үргэлжлэх бөгөөд энэ сарын 9-нд Керамик урлагийн мастер класс, 10-нд Уран бичлэг, бэхэн зургийн мастер класс, 10-нд Арьсан урлагийн мастер класс, 14-нд Уран зургийн мастер класс, 15-нд Эсгий урлагийн мастер класс тус тус зохион байгуулах юм.

Categories
гадаад мэдээ

Орос, Украин хоёр улсын ерөнхийлөгч нар тус тусдаа мэдэгдэл хийлээ || DNN.mn

Хоорондоо дайтаж буй Украин, Орос улсуудын ерөнхийлөгч нар өчигдөр тус тусдаа мэдэгдэл хийсэн юм.

Украины ерөнхийлөгч Володимир Зеленский тус улсын нутаг дэвсгэрийг харийн түрэмгийлэгчдээс хамгаалах дайнд оролцохоор ирсэн гадаадын сайн дурынхны тоог анх удаа мэдээлжээ.

“Украин улс гадаадын сайн дурынхныг хүлээж авсаар байна. Тэдний тоо одоогоор 16,000 хүрсэн. Тэд хүмүүсийн эрх чөлөө, амь насыг хамгаалахаар ирсэн юм” гэж Зеленский хэлсэн байна.

Тэрбээр цааш нь ярихдаа “Украин улс холбоотнууд, найз нөхдөөсөө өдөр бүр зэвсэг хүлээн авч байгаа. Манай зэр зэвсэг өдрөөс өдөрт улам бүр хүчирхэгжиж байна” гэжээ.

Өмнө нь Украин улсын эрх баригчид олон улсын легионеруудын анги нэгжийг зохион байгуулахаар болсноо зарлаж байв. Европын хэд хэдэн орон Украинд тулалдахаар явах иргэддээ саад хийхгүй гэдгээ мэдэгдээд байна.

ОХУ-ын ерөнхийлөгч Владимир Путин өчигдөр хийсэн мэдэгдэлдээ Украинд амь үрэгдсэн цэргүүдийн ар гэрт олгох нөхөн олговрын хэмжээг мэдээлжээ.

Сүүлийн өдрүүдэд зарим хэвлэл, сошиал сувгуудаар Оросын эрх баригчид Украинд амь үрэгдсэн цэргүүдийн нөхөн олговрын хэмжээг 11,000 рублиэр ($100) тогтоосон тухай мэдээ цацагдах болсон юм.

Харин Путин үүнийг няцаагаад нөхөн олговорт 7 сая гаруй рубль ($64,000) олгохоо амлажээ. Шархадсан цэргийн алба хаагч бүр 3 сая рублийн ($27,000) тэтгэмж нэг удаа авах бол тахир дутуу болсон алба хаагч бүр насан туршдаа засгийн газраас тэтгэмж авахыг тэр бас мэдээлсэн байна.

Украин дахь байлдааны ажиллагаанд нь тодорхой хэмжээний саад тохиолдсоныг Путин бас хүлээн зөвшөөрчээ.

Гэхдээ ажиллагаа төлөвлөгөөний дагуу хэрэгжиж байгааг тэр нэмж хэлсэн байна.

“Үндсэрхэг үзэлтнүүд, нео Нацист бүлгүүд, Ойрх Дорнодоос ирсэн гадаадын хөлсний цэргүүд энгийн иргэдийг бамбай болгон ашиглаж байна” гэж дайснуудаа шүүмжилсэн Путин “Оросууд, Украинчууд бол нэг үндэстэн. Би энэ үзлээсээ хэзээ ч буцахгүй” гэж хэлжээ.

Categories
гадаад мэдээ

Европын хамгийн том цөмийн станцад гал гарлаа || DNN.mn

"Европын хамгийн том цөмийн станцад гал гарлаа"

Украины Энергодар хотод баасан гарагийн шөнө Запорожье АЦС-ын ойролцоох барилгууд руу тасралтгүй галласны улмаас Европын хамгийн том цөмийн цахилгаан станцад гал гарсан гэж хотын дарга Дмитрий Орлов мэдэгдлээ.

Дмитрий Орлов өмнө нь “Энергодар хотын захад ширүүн тулалдаан болж, Оросын танкууд хот руу нэвтрэн, АЦС-ыг бүслэн авахыг оролдсон боловч станцын ажилчид болон нутгийн иргэд цугларч, оросуудын нэвтрэх замуудыг хаагаад байна” гэж мэдээлж байжээ.

Запорожье АЦС-ын ажилчдын нэг Телеграм сүлжээнд оросууд атомын цахилгаан станц руу гал нээсэн тухай мөн мэдээлсэн байна. Тэрээр “Анхаар! ОХУ Запорожье АЦС руу гал нээж байна. Европ дахь хамгийн том атомын цахилгаан станцад цөмийн аюул нүүрлэх бодит эрсдэл үүсээд байна. Галаа зогсоохыг шаардаж байна!” гэжээ.

Украины Гадаад хэргийн сайд “Хэрвээ АЦС дэлбэрвэл Чернобылийн дэлбэрэлтээс 10 дахин хүчтэй дэлбэрэлт болно. Орос яаралтай галаа зогсоож, аюулгүйн бүс бий болгох ёстой” гэжээ.

Categories
мэдээ нийгэм

ЕБС-ийн сурагчид дөрөвдүгээр сарын 1-нд хичээллээд долоо хоног амарна || DNN.mn

2021-2022 оны хичээлийн жил гурван улиралтай байх юм.

Сурагчид эхний улиралд 16 долоо хоног хичээллэж, арванхоёрдугаар сарын 18-наас амарсан. Харин хоёрдугаар улирлын хичээл нь өнгөрсөн сарын 14-нд эхэлсэн билээ.

Энэ улирлын хичээл долоон долоо хоног явагдаж нийслэл болон орон нутгийн ерөнхий боловсролын сургуулийн сурагчид 2022 оны дөрөвдүгээр сарын 2-ноос амрах юм байна. Амралт долоон хоног үргэлжилснээр дөрөвдүгээр сарын 11-нд гуравдугаар улирлын хичээл эхэлнэ.

Categories
арын-нүүр булангууд мэдээ

Нийтийн тээвэртээ зам тавьж өгье || DNN.mn

Автобусны жолооч нар аархал ихтэй. Урдуур дайрна, шүргэнэ, мөргөнө, уурлана, аархана. Ингэсээр байгаад нэг л мэдэхэд автобустай зам булаалдаж, болж л өгвөл өмнө нь орчих гэдэг болчихсон нь нууц биш ээ, манай жолооч нар.

Гэхдээ одоо больё. Замын түгжрэлээ шийдэж чадахгүй байгаа нийслэл хотдоо жолооч нар эвтэй байцгаая. Ядаж л нийтийн тээвэртээ зам тавьж өгч хэвшицгээе. Нэгдүгээр эгнээг нь чөлөөлж өгье. Нэг автобусанд 10 хүн суух, эсвэл тэр 10 хүн тус бүрдээ автомашинаар хөдөлгөөнд оролцох хоёрын зааг ялгааг бид сайн мэднэ. Тийм учраас жолоочийг биш юм аа гэхэд замын хөдөлгөөнд ачаалал нэмэхгүйгээр нийтийн тээврээр үйлчлүүлж байгаа иргэдээ хүндэлье.

Ерөөс зам тавьж өгөх соёл манайд мянга дахь асуудал болчихсон гэдэг шүү. “Та-би-та” гэдэг дүрэм хөгжингүй орнуудын зам дээр үйлчилдэг. Манайд “Би-би-би”-гийн дүрэм үйлчилдэг. Замын хөдөлгөөний соёл гэдэг зүйл түгжрэлд багагүй нөлөөтэй гэдэг судалгаа ч байдаг юм билээ.

Тиймээс өнөөдрөөс нийтийн тээвэртээ зам тавьж өгч эхэлье. Автобусны жолооч аархуугаар урдуур чинь дайраг, хоёр хором тэсчих. Жолооч биш юм аа гэхэд автобусанд зорчиж яваа зорчигчид танд баярлана. Маргаашнаас бусдадаа зам тавьж хэвшье. Ядаж л нэг хэсэг маань ажил, сургуульдаа амжиж байвал нэг төрлийн буян байх шүү.

Categories
мэдээ нийгэм

Д.Кёкүшюзанбатбаяр, Т.Баясгалан нарт холбогдох шүүх хурал тав дахь өдрөө үргэлжилнэ || DNN.mn

Д.Кёкүшюзанбатбаяр нарт холбогдох хэргийн гэм буруугийн шүүх хуралдаан хоёрдугаар сарын 28-ны 10.00 цагт Хан-Уул дүүргийн эрүүгийн хэргийн анхан шатны шүүхэд эхэлсэн. Шүүх хуралдаан өнөөдөр тав дахь өдрөө үргэлжилнэ.

Прокурорын байгууллагаас Д.Кёкүшюзанбатбаяр Н.Болормаа, Б.Цэрэндорж, Т.Баясгалан нарт Эрүүгийн хуулийн 17.3-2.2, 18.6-1-т зааснаар буюу мөнгө угаах, залилах гэмт хэрэг үйлдсэн гэж үзэн яллах дүгнэлт үйлдсэн билээ.

Тодруулбал, УИХ-ын гишүүн асан, Д.Кёкүшюзанбатбаяр түүний эхнэр МУГЖ, дуучин Т.Баясгалан нар өөрсдийн болон хамаарал бүхий хүмүүсийн нэр дээр байгуулсан хэд хэдэн компаниар дамжуулан, дархан цаазат Богд хан ууланд болон Яармагийн дэнжид их хэмжээний газар авсан.Улмаар зориулалтын дагуу ашиглаагүй, орон сууцны хороолол барьсан, байгаль орчинд нөлөөлөх байдлын нарийвчилсан үнэлгээ хийлгээгүй, хууль зөрчсөн гэх үндэслэлээр яллагдагчаар татсан билээ.

Categories
мэдээ нийгэм

Гүрж улс Европын Холбоонд элсэх хүсэлт гаргажээ || DNN.mn

Гүрж улс өчигдөр Европын Холбоонд гишүүнээр элсэх албан ёсны хүсэлтээ гаргажээ.

Орос улс Украины газар нутагт халдан довтолсонтой холбоотой үүссэн улс төрийн уур амьсгал ийм шийдвэрт хүргэснийг тус улсын эрх баригчид тайлбарласан байна.

Гүржийн ерөнхий сайд Иракли Гарибашвили гишүүнээр элсэх албан ёсны хүсэлтэд улс орноо төлөөлөн гарын үсэг зурснаа мэдэгдээд энэ өдрийг “түүхэн өдөр” хэмээн онцолжээ.

“Европын Холбоонд гишүүнээр элсэх хүсэлт гаргасан нь Гүрж улс Европын гэр бүлд интеграцчилагдах чиглэлд хийсэн чухал алхам, түүхийнхээ шинэ хуудсыг нээсэн үйл явдал юм” гэж тэр хэлсэн байна.

Гарибашвили цааш нь ярихдаа “Манай орон олон зууны түүхэндээ үргэлж Европын соёл иргэншлийн нэг хэсэг байсаар ирсэн. Өнөөдөр ч Гүрж улс үүнийг хамгаалах, хөгжүүлэхэд үнэтэй хувь нэмрээ оруулсаар байгаа” гэсэн юм.

Гүржийн нийслэл Тбилиси хотын захирагч Каха Каладзе “Гүрж улс өнгөрсөн 30 жилийн турш Европын Холбоотой харилцах гүүрээ тоосго тоосгоор нь өрж, босгосоор ирсэн юм. Миний бие, миний үеийнхэн, үр хүүхдүүд маань улс орноо Европын Холбоонд аль болох хурдан элсүүлэхийн төлөө бүхнийг хийсэн” гэж мэдэгджээ.