Month: March 2022

Өчигдөр нийслэлийн хэмжээнд I тунд 16, II тунд 32, III тунд 185, IV тунд 216, нийт 449 иргэнийг дархлаажууллаа. Вакцинжуулалт эхэлснээс хойш нийслэлийн зорилтот хүн амын I тунгийн хамралт 75.2 хувь, II тунгийн хамралт 72.1 хувь, III тунгийн хамралт 53.4 хувь, нэмэлт IV тунгийн хамрагдалт 6.3 хувь байна.

Зорилтот бүлгийн буюу 3038 (25.5 хувь) жирэмсэн эх, 12-15 насны 68.714 (77.3 хувь), 16-17 насны 27.080 (79.9 хувь) хүүхэд тус тус дархлаажуулалтын бүрэн тунд хамрагдлаа.

Зам тээврийн ослын улмаас нэг хүн харамсалтайгаар амиа алджээ. Тодруулбал, Өмнөговь аймгийн Ханбогд сумын Жавхлан багийн “Цагаан хад” гэдэг газарт ачааны автомашин замын хажуу руу онхолдож, автомашины бүхээгт 1 хүн хавчуулагдаж нас барсан тухай дуудлага иржээ.

Дуудлагын дагуу “Цагаан хад” гэдэг газар үүрэг гүйцэтгэж байсан тус аймгийн Онцгой байдлын газрын Ханбогд сум дахь Гал түймэр унтраах аврах 66 дугаар анги, Цагдаагийн тасгийн алба хаагчид, орон нутгийн иргэдийг очиход “D2066LF01” загварын зүтгүүр автозамын хажуу руу онхолдож, жолооч Д /35 настай, эрэгтэй, Улаанбаатар хотын харьяат/ автомашины бүхээгт хавчуулагдаж нас барсан байсан аж. Цогцсыг гарган тус сум дахь Цагдаагийн тасгийн эрүүгийн мөрдөгчид шилжүүлэн өгсан байна.

Хөвсгөл аймагт өвлийн аялал жуулчлалыг хөгжүүлэх зорилготой зохион байгуулдаг “Хөх сувд-2022” мөсний баяр 20 дахь жилдээ далай ээжийн толин цэнхэр мөсөн дээр өргөн дэлгэр боллоо. Мөсний баярт дотоодын 10 гаруй мянган иргэг, 3000 орчим тээврийн хэрэгсэлтэй ирсэн байна.

Мөсний баярт БОАЖ-ын Дэд сайд Г. Түвдэндорж, БОАЖЯ-ны газрын дарга А.Энхбат болон Хөвсгөл аймгийн удирдлагууд оролцлоо. БОАЖ-ын дэд сайд Г.Түвдэндорж баярын нээлт дээр хэлсэн үгэндээ“Хөх сувд” мөсний баяр нь Монгол Улсын аялал жуулчлалын салбарт улирлын хамаарлыг бууруулахад онцгой хувь нэмэр оруулдагөвлийн эвентюм.Удахгүй орон нутагтаа төдийгүй Монгол Улсынхаа эдийн засагт нөлөөлдөг, дэлхийд танигдсан олон улсын хэмжээний том эвент болж өргөжинө гэдэгт итгэлтэй байна” гэдгийг онцолж байлаа.

Хөвсгөл аймгийн Засаг даргын орлогч, Мөсний баярыг зохион байгуулах комиссын дарга М.Хуягбаатар “Хөвсгөл нуур нь Монгол орны цэвэр усны хамгийн гол нөөц бөгөөд стратегийн бүтээгдэхүүнд ордог. Монгол орны гадаргын усны нөөцийн 93 хувь нь Хөвсгөл нуурын ус юм. Дэлхийн цэнгэг усны бараг нэг хувьтай тэнцдэг гэж ойлгож болно. Иймээс бид энэ жил мөсний баярыг “Цэнгэгээс цэнгэг, цэврээс цэвэр” уриан дор тэмдэглэлээ. Цаашид улам өргөжүүлэн ажиллахаар олон зүйлийг төлөвлөж байна” гэдгийг хэлж байлаа.

Энэ үеэр олон ястны урлагийн тоглолт, тэшүүрийн тэмцээн, мөсөн шагайн тэмцээн, олс таталт, аав ээж би, мөсний волейбол, бөөгийн галын тахилга, тахтай морин чарганы уралдаан, сумо бөх зэрэг олон тэмцээн наадам болж ирсэн зочид хоёр өдрийн турш цэвэр агаарт тоглож наадан өнгөрүүллээ.

Хэнтий аймгийн Засаг даргын Тамгын газраас ААН-үүдэд электрон тамхи худалдаалахгүй байх талаар уриалга гаргажээ.

Шинжлэх ухааны академийн Биологийн хүрээлэнгээс гаргасан мэдээллээр электрон тамхины шингэний найрлагад өсвөр насны хүүхдүүдийн тархины хөгжилд муугаар нөлөөлөх, донтуулах үйлчилгээтэй никотин, хавдар үүсгэгч химийн нэгдэл, уушгины өвчин үүсгэгч химийн нэгдэл, хүнд металлууд бүхий никель, цагаан тугалга, хар тугалга гэх мэт хорт бодисууд агуулагддаг байна.

Тиймээс 21 нас хүрээгүй хүнд сордог электрон тамхи, түүний дагалдах хэрэгслийг худалдаалахыг таслан зогсоох, нэн ялангуяа сургууль, цэцэрлэг орчмын бүсэд үйл ажиллагаа явуулж буй ААН-үүд электрон тамхи худалдаалахгүй байхыг уриалж байна.

Монголын бодибилдинг фитнесийн холбооноос зохион байгуулдаг Бодибилдинг Фитнессийн Улсын аварга шалгаруулах 31 дэх удаагийн тэмцээн өнөөдөр UG Palace-д болж байна. Тэмцээний эхний хэсэг 09.00 цаг эхэлсэн бөгөөд хоёрдугаар хэсэг 14.00 цагт эхэлж 2022 оны аваргууд тодорч дуусна.