Хан-Уул дүүргийн 21-р хороо Спорт цогцолборын хашаанд дотор барилга шатаж байна дуудлага 14:07 цагт нийслэлийн Онцгой байдлын газарт ирсэн.
Дуудлагын дагуу Гал түймэр унтраах, аврах 10, 14, 18, 30 дугаар ангийн 40 гаруй алба хаагч, 7 автомашинтай гал түймрийг унтраахаар ажиллаж байна гэж НОБГ-аас мэдээллээ.
Хэвлэл мэдээллийн зөвлөлөөс “Сэтгүүл зүйн ёс зүйн форум”-ыг дөрөв дэх удаагаа 2022 оны хоёрдугаар сарын 24-ний өдөр сэтгүүлчид, иргэний нийгмийн төлөөлөлтэйгөөр амжилттай зохион байгууллаа.
Энэхүү форумд “Цар тахлын үеийн хэвлэлийн эрх чөлөө, сэтгүүлчийн ёс зүй”, “КОВИД-19: Сэтгүүл зүйн үүрэг, ёс зүй, хамтын ажиллагаа”, “Цар тахлын үед аюулд өртөөд буй мэдэх эрх, үзэл бодлоо илэрхийлэх эрх чөлөө: олон улсын сургамж” сэдэвт гурван илтгэл, мөн оролцогч талуудын хэлэлцүүлгээр дамжуулан нөхцөл байдлыг хэлэлцэж, зөвлөмж гаргалаа.
Цар тахлын онцгой нөхцөл байдалд бид хоёр жилийг үдлээ. Дэлхийн аль ч улс оронд, хаана ч, хэнд ч КОВИД-19 цар тахлыг хохирол багатайгаар богино хугацаанд даван туулах туршлага, арга зам байсангүй. Бусад оролцогч талуудын нэгэн адил хэвлэл мэдээллийнхэн нийгмийн өмнө хүлээсэн үүргээ амаргүй нөхцөлд байдалд биелүүлэхийн төлөө хичээн ажиллаж, олон сорилыг даван туулахын сацуу туршлага, сургамжийг мөн хуримтлууллаа.
Дижитал хувьсал бидэнд ихээхэн боломжийг авчирсан ч цар тахлын талаарх баталгаагүй, төөрөгдүүлсэн, эргэлзээтэй, нягтлан шалгаагүй мэдээлэл түгэх, улмаар иргэдийг эргэлзээ, бухимдал, айдаст автуулах шалтгаан болж байв. Цахим орчинд тархсан худал ташаа мэдээлэл нь сэтгүүл зүйн нэр хүнд, итгэл үнэмшлийг ч бууруулж байна.
Түүнчлэн мэдээллийн цар тахал нь хүний эрүүл мэнд, эдийн засаг, амь насанд сөрөг үр нөлөө үзүүлээд зогсохгүй “иргэн, хэвлэл мэдээлэл, төр” хоорондын үл итгэлцэл, үл ойлголцол нэмэгдэх шалтгаан болов. Цар тахлын үеийн хууль, эрх зүйн орчин нь олон нийтийг төөрөгдүүлэх, худал мэдээлэл түгээвэл гэмт хэрэг, зөрчилд тооцох, мэдээллийн нэг чиглэлт урсгалыг шаардсан. Үүний үр дагавраар Ковид-19 цар тахлын үед хэвлэлийн эрх чөлөө хумигдсан гэж 5 сэтгүүлч тутмын 3 нь үзжээ. Цар тахал зэрэг онцгой нөхцөл байдал нь төрөөс хэвлэлийн эрх чөлөө, мэдээлэлтэй байх эрхийн зарчмыг хүндэтгэх, харин сэтгүүлчдээс мэргэжлийн ёс зүйн өндөр хариуцлагыг шаардаж байна.
Тодруулбал, төрийн мэдээллийг дамжуулах буюу нэг чиглэлт мэдээллийн урсгал хэт давамгайлсан. Хамтын ажиллагаа доголдолтой буюу сэтгүүл зүйн оролцоо, үүргийг хязгаарласан. Сэтгүүл зүй дагаж сурвалжилснаас манлайлж сурвалжилж чадаагүй. Цар тахлын нөхцөлд редакцын түвшинд хүний эрхийг хамгаалах ёс зүйн зохицуулалт, сэтгүүлчид хэрхэн ажиллах удирдамж, туршлага сул, сэтгүүл зүйн байгууллагууд цахим орчинд ажиллахад, хурдан шуурхай дасан зохицох менежмент дутагдалтай бөгөөд редакцууд нэгдэж, хамтран ажиллаж чадаагүй зэргийг хэлэлцүүлгийн үеэр онцлов.
Цар тахлын үеийн эдгээр хязгаарлалт нь нийгмийн эрүүл мэндийн онцгой байдлын талаар иргэний үнэнийг мэдэх эрхийг хангах үүрэгтэй төр болоод хэвлэл мэдээлэл аль нь ч бүрэн хангаж чадаагүй.
Ковид-19 цар тахалтай тэмцэх төрийн бодлого, үйл ажиллагаа нь иргэний үг хэлэх, үзэл бодлоо илэрхийлэх үндсэн эрхэд аргагүй хязгаалалтыг үүсгэсэн ч зарим тохиолдолд энэ нь зохист хэмжээнээс хэтэрсэн тохиолдлууд бий. Энэ нь засгийн газарт таагүй мэдээллийг дарах зорилгоор сөрөг хүчний улс төрчид, шүүмжлэгч хэвлэл мэдээллийн байгууллага эсвэл хүний эрх хамгаалагчдын дуу хоолой, үзэл бодлыг дарах шалтаг болов.
Цар тахалтай амжилттай тэмцэхийн тулд улс орнууд иргэдээ үнэн зөв мэдээллээр хангахдаа талуудын оролцоог хангах, хамтын ажиллагааг хөгжүүлэх, иргэдийн хэвлэл мэдээлэл, мэдээллийн суурь боловсролыг дэмжин чадавхжуулж, үзэл бодлыг нь сонсох шаардлага улам бүр нэмэгдэж байна. Гэвч цар тахлын өнөөгийн үед засгийн газрууд үзэл бодлоо илэрхийлэх эрх чөлөөг дэмжихийн оронд хааж хавчих явдал илүүтэй буйд бид шүүмжлэлтэй хандаж, ийм эрсдэлээс хол байх арга замыг байнга эрэлхийлж байхыг форумын үеэр онцлов.
Хятадын Үндэсний статистикийн газар 2021 оны Хятадын эдийн засаг, нийгмийн хөгжлийн статистик тайланг гаргалаа. 2021 онд Хятадын ДНБ 114 их наяд юанийг давж, өнгөрсөн оны мөн үеийнхээс 8.1 хувиар нэмэгдсэн. Хүн тутамд ногдох ДНБ-ий хэмжээ 81 мянган юань болж дэлхийн дундаж түвшнийг давсан.
Хятадын эдийн засаг 17.7 их наяд ам.долларт хүрч, дэлхийн эдийн засгийн 18 гаруй хувийг бүрдүүлэн, дэлхийн эдийн засгийн өсөлтөд 25 орчим хувийн үүрэг гүйцэтгэжээ.
2021 онд Хятадын бараа бүтээгдэхүүний импорт, экспортын нийт хэмжээ 6 их наяд ам.долларыг давж өмнөх оныхоос 21.4 хувиар нэмэгдсэн. Хятад улс дахь гадаадын хөрөнгө оруулалт 1.1 их наяд юаньд хүрсэн нь өмнөх оныхоос 14.9 хувиар нэмэгдсэн. Хятад улс худалдаа, гадаадын хөрөнгө оруулалт, хэрэглээний зах зээлийн цар хүрээгээр дэлхийн эхэнд жагсаж, дэлхийн эдийн засгийн сэргэлт, аж үйлдвэрийн ханган нийлүүлэлтийн гинжийн хэлхээг хамгаалахад чухал үүрэг гүйцэтгэжээ.
2021 онд Хятад улс үндэсний эрдэм шинжилгээ, судалгаа туршилтын ажилд 2786 тэрбум юань зарцуулсан нь өмнөх оныхоос 14.2 хувиар нэмэгдэж, үндэсний инновацийн чадавхаараа дэлхийд 12-т бичигдсэн байна.
Шүүхийн ерөнхий зөвлөлөөс зургаан шүүгчийг сэлгэн ажиллуулахаар боллоо. Тус зөвлөлийн хуралдаан гуравдугаар сарын 3-4-нд шүүхүүдийн захиалгын дагуу уг шийдвэрийг гаргасан байна.
Шүүхийн ерөнхий зөвлөлд он гарсаар анхан болон давж заалдах шатны арван шүүхээс 25 шүүгчийг сэлгэн ажиллуулах захиалгыг ирүүлж байв. Шүүгчдийг сэлгэн ажиллуулснаар шүүхийн ажлын ачааллыг тэнцвэржүүлэх зорилготой аж. Мөн өнгөрсөн хугацаанд улсын хэмжээнд 39 мянган оролцогчийг цахимаар шүүх хуралдаанд оролцуулсан байна. Шүүх хуралдаанд зайнаас оролцуулах нь хэргийн оролцогчдоос гарах зардал, төсөв санхүү, цаг хугацааг хэмнэдэг төдийгүй ачааллыг бууруулах давуу талтай юм.
Дэлхийн бөхийн нэгдсэн холбоо (UWW)-ноос өнгөрсөн нэгдүгээр сараас сар бүр бөхийн төрөл тус бүрт шилдгүүдийг тодруулдаг болсон билээ.
Анхных буюу 2022 оны нэгдүгээр сарын шилдэг эмэгтэй бөхөөр Иван Ярыгиний Гранпригийн 53 кг-д түрүүлсэн ОУХМ Б.Болортуяа тодорч байв. Тэгвэл хоёрдугаар сарын шилдэг эмэгтэй бөхөөр өнгөрсөн долоо хоногт Стамбулд болсон дэлхийн чансааны оноо олгох тэмцээний 62 кг-ын жинд алтан медаль хүртсэн, гавьяат тамирчин Сүхээгийн Цэрэнчимэд шалгарчээ.
Тэрбээр Стамбулд дөрөв барилдахдаа олимпын хүрэл медальт, дэлхийн аварга Тайбе Юсейн (Болгар), олимпын хүрэл медальт Сакши Малик (Энэтхэг), Марва Амри (Тунис) нарыг цэвэр ялсан юм.
Чөлөөт бөхийн шилдэг эрэгтэй тамирчнаар Яшар Догугийн ОУТ-ий 70 кг-д аваргалсан Амирмохаммад Яздани (Иран), сонгомол бөхийн шилдгээр 77 кг-д түрүүлсэн Юнус Басар (Турк) нар тодров.
Манай улс нийтдээ 800 мянган га эргэлтийн талбайтай. Энэ талбайдаа тариалалт хийгээд төмс болон улаанбуудайныхаа хэрэгцээг дотоодоосоо 100 хувь, харин хүнсний ногооны 40, жимс жимсгэний ердөө гуравхан хувийг хангадаг.
Уур амьсгалын өөрчлөлттэй зэрэгцээд хөрсний үржил шим ерөнхийдөө доройтож байгаа энэ цаг үед бүс нутгийн онцлогт тохирсон ургацын хэмжээг нэмэгдүүлэх, органик бордоог эрдэм шинжилгээ, туршилтын үр дүнд гаргаж авчээ.
ОХУ-ын Ерөнхийлөгч Владимир Путин тус улсын Зэвсэгт хүчний тухай худал мэдээ тарааж, мөн Оросын эсрэг хориг арга хэмжээ авахыг уриалсан тухай мэдээ тараасан тохиолдолд авах арга хэмжээг чангатгахаар хуульд гарын үсэг зурлаа хэмээн Кремлийн хэвлэлийн алба мэдээллээ.
Олон улсын энх тайван, аюулгүй байдал, иргэдийн эрх ашгийг хамгаалах зорилгоор явуулж буй Оросын зэвсэгт хүчний цэргийн ажиллагааны талаар олон нийтэд санаатайгаар худал мэдээлэл тараасан тохиолдолд эрүүгийн хариуцлага хүлээлгэх болно хэмээн албан мэдээнд бичжээ.
Тодруулбал Оросын зэвсэгт хүчний талаар худал мэдээлэл тарааж, олон нийтийг төөрөгдүүлсэн тохиолдолд 700 мянгаас 1.5 сая рубль хүртэл торгууль ногдуулах эсвэл гурван жил хорих ял онооно. Түүнчлэн хуурамч мэдээлэл тарааж, ноцтой үр дагаварт хүргэсэн бол 10-15 жилийн хорих ялаар шийтгэнэ гэж заажээ.
Элсэлтийн Ерөнхий шалгалтын “Монгол хэл бичгийн шалгалт”-ын босго оноог 400 байхаар тогтоожээ. Их, дээд сургуульд элсэн суралцахаар Элсэлтийн ерөнхий шалгалтад бүртгүүлсэн шалгуулагчид Монгол хэл бичгийн шалгалтад заавал хамрагдсан байх ёстой. Иймд шалгалтыг 2022 оны дөрөвдүгээр сарын 02-ны өдөр зохион байгуулахаар болоод буй.
Монгол хэл бичгийн шалгалтын бүртгэл элсэлтийн ерөнхий шалгалтын бүртгэлтэй хамт https://eyesh.eec.mn/ цахим хуудсаар 2022 оны гуравдугаар сарын 14-ний 18:00 цаг хүртэл явагдана.
Энэ оны төгсөгч /2022 онд ерөнхий боловсролын сургууль төгсөх шалгуулагч/-д автоматаар бүртгэгдэнэ. Харин өмнөх оны төгсөгч /2022 оноос өмнө ерөнхий боловсролын сургууль төгссөн/-д элсэлтийн ерөнхий шалгалтад бүртгүүлэхдээ сонгож бүртгүүлнэ. Монгол хэл бичгийн шалгалт нь үнэ төлбөргүй байх юм.
Украины ерөнхийлөгч Владимир Зеленский өчигдөр “Starlink” систем илгээсэн “Тесла” компанийн гүйцэтгэх захирал Элон Маскт талархал илэрхийлэв.
Тэрбээр твиттер хуудастаа “Элон Масктай ярилцлаа. Украиныг үг, үйлдлээрээ дэмжсэнд нь талархаж байна. Ирэх долоо хоногт бид нурж сүйрсэн хотуудад зориулсан “Starlink” системийг дахин хүлээж авах болно. Дайны дараа бусад сансрын боломжит төслүүдийн талаар ярилцахаар боллоо” хэмээн жиргэжээ.
Цахим уулзалтын бичлэгээ Зеленский инстаграмдаа нийтэлсэн бөгөөд Элон Маскийг дайны дараа Украинд айлчлахыг урьсан байв.
Оросын түрэмгийллийн улмаас Украины зарим хэсэгт интернет холболт тасарсан тул дэд ерөнхий сайд Михайло Федоров твиттер хуудсаараа дамжуулан Элон Маскад хүсэлт тавьсан байжээ. Гэвч “Starlink” систем нь зорилтот бүлгийн халдлагад өртөх магадлал өндөр гэдгийг Маск анхааруулсан байна. Тиймээс зөвхөн шаардлагатай үед л системийг асааж, антеныг хүмүүсээс аль болох хол байрлуулахыг зөвлөжээ.
Эх сурвалж: INSIDER