Month: March 2022

Говь-Алтай аймгийн МСҮТ-ийн 10 багш нэгдэн бийрэн бичлэгийн сургалтад хамрагдан, гуравдугаар сарын 7-нд “Алтан бийр” үзэсгэлэнгээ дэлгэлээ.

Эдгээр 10 багш, өөрсдийн хүүхдүүдийн хамтаар Говь-Алтай аймгийн уугуул, Завхан аймгийн Б.Элдэв-Очирын нэрэмжит лаборатори сургуулийн мэдээлэл технологийн багш, боловсрол судлалын магистр Б.Энхцолмонгоор үндэсний бичгийн бийрэн бичлэгийг заалгаж, ийнхүү сурсан мэдсэнээ хамт олонд, шавь нартаа тайланган үзэсгэлэнгээ дэлгэсэн байна. Уг үзэсгэлэнг тус төвийн хамт олон, оюутан суралцагчид үзэж сонирхсоноос гадна аймгийн БШУГ-ын дарга Ж.Амгаланбаатар, Монгол хэл, бичгийн арга зүйч, мэргэжилтэн Ж.Дэлгэрмаа нар хүрэлцэн ирж, цаашпын ажилд нь амжилт хүслээ.

Сургалтад хамрагдсан багш нар нэгдэж МСҮТ-ийнхээ дэргэд “Уран бийр” нэртэй бүлгэмийг байгуулж мэдлэг чадвараа дээшлүүлэн, үндэсний бичиг, өв соёлоо түгээн дэлгэрүүлэхийг зорьж буй ажээ.

Олон Улсын эмэгтэйчүүдийн эрхийг хамгаалах өдрийг тохиолдуулан аймгийн Засаг даргын ивээл дор “Өглөөний цай”-ны уулзалтыг зохион байгууллаа.

Уулзалтаар салбар бүрийн, нас насны төлөөлөл болсон эмэгтэйчүүд үг хэлж, эрүүл мэнд, ёс суртахуун, хүүхдийн хүмүүжил, ажлын байр, жендерийн талаар сэтгэл чилээж явдгаа илэрхийлсэн юм.

Энэ үеэр аймгийн Засаг дарга А.Ишдорж “Эмэгтэй хүн бол нийгмийн уран барилгачид” гэсэн сайхан үг бий. Эрүүл амьдралын хэвшилтэй гэр бүл, зөв хүмүүжил, төлөвшилтэй иргэн хүн, тогтвортой хөгжил бүхий улс орныг бүтээхэд та бүгдийн маань хүч оролцоо хамгийн чухал нь гэдгийг онцлон хэлье” гэлээ. 100

Аймгийн НАМЭХ-оос “Зууны түүчээ эмэгтэйчүүд” чуулга уулзалтыг 19 сумын 200 эмэгтэйг оролцуулан зохион байгууллаа.

Өвөрхангай аймгийн 118 мянган хүн ардын тал хувийг эмэгтэйчүүд эзлэдэг бөгөөд салбар бүрийн төлөөлөл болсон эмэгтэйчүүд хуран чуулж, өөрийн амьдралд болон эзэмшсэн мэргэжил, эрхэлсэн ажлаараа нийгэмд түүчээлэн ажиллахад нь тулгамдаж байдаг асуудал, бэрхшээлийн талаар хэлэлцсэн юм.

Мөн “Зууны эмэгтэйчүүд” гэрэл зургийн үзэсгэлэн, “Ахмадаа сонсьё” хэлэлцүүлгийг хийж, аймгийн БОЭТ-ийн төрөх нярайн тасагт хандив өргөхөөр “Өөжин” аяны арга хэмжээг явууллаа.

НАМЭХ-ны Өвөрхангай аймаг дах салбарын тэргүүн Т.Нарангарав хэлэхдээ “Хүмүүсийн дийлэнх нь сайхан амьдрах, хөгжих ёстой гэдгээ ойлгодог ч зүгээр л бусдыг шүүмжлээд суугаад байдаг. Цаашид ч бусдыг шүүмжлээд л өөрсдөө зүгээр суугаад байх уу. Ядаж эмэгтэйчүүд бид энэ байдлыг өөрчлөе, өөрсдөө оролцъё, саналаа хэлье гэсэн уриалгыг дэвшүүлж, энэ чулуга уулзалтыг зохион байгуулж байна” гэлээ.

Эмэгтэйчүүдийн зүгээс хүүхдийн хүмүүжил, нийгмийн эрүүл мэнд, ёс суртахуунтай холбоотой олон асуудлыг хөндөж байв.

Ерөнхий сайд Л.Оюун-Эрдэнэ, Эрүүл мэндийн сайд С.Энхболд нар “Эх нярай, эмэгтэйчүүдийн үндэсний төв-2” буюу Яармагийн 300 ортой төрөх эмнэлэг, Эх хүүхдийн эрүүл мэндийн үндэсний төвд ажиллаж эхчүүд, эмэгтэйчүүд, эмч ажилтнуудад Олон улсын эмэгтэйчүүдийн эрхийг хамгаалах өдрийн мэндийг хүргэлээ.

Ерөнхий сайд Л.Оюун-Эрдэнэ эхлээд “Эх нярай, эмэгтэйчүүдийн үндэсний төв-2”-ийн цахим бүртгэлийн хэсэг, нэгдсэн мэс заслын тасаг, төрөх болон төрсний дараах тасаг, дүрс оношилгооны үйл ажиллагаатай танилцсан юм. Эмнэлгийн барилгын ажил 2009 онд эхэлсэн ч хөрөнгө оруулалт нь шийдэгдэхгүй сунжирсаар 2021 онд ашиглалтад оруулсан юм. Зөвхөн эх, нярайд тусламж, үйлчилгээ үзүүлэхээс гадна өнгөрсөн хугацаанд цар тахлын үеийн ковидын эмчилгээг иргэдэд давхар үзүүлж 1000 ор дэлгэн ажиллажээ. Өнөөдрийн байдлаар 380 гаруй эмч, ажилтан ажиллаж байна. Засгийн газраас цар тахлын үед ажиллуулахаар онцгой анхаарал хандуулсан нь үр дүнгээ өгч, эх, нярай, эмэгтэйчүүдэд тусламж, үйлчилгээ үзүүлэх улсын хэмжээний хоёр дахь том эмнэлэг болоод байна. Тус эмнэлэгт мэс заслын орчин үеийн тоног төхөөрөмж бүхий есөн өрөөтэй болсон байна. Харин хотоос зайдуу учир эмч, ажилтнуудын дотуур байр, хүүхдийн цэцэрлэг шаардлагатай, мөн ажиллах хүчний нөөц дутмаг байгаа зэрэг тулгамдсан асуудлыг нь Ерөнхий сайд шийдэж өгнө гэлээ

Коронавируст халдвар (Covid-19)-ын цар тахлыг хүндрэл багатай даван туулахад эрүүл мэндийн салбарын нийт эмч, эмнэлгийн ажилтнуудын нөр их хөдөлмөр, тэсвэр тэвчээр чухал үүрэгтэй байсныг Ерөнхий сайд Л.Оюун-Эрдэнэ онцлоод тус эмнэлгийн хамт олонд талархал илэрхийлж, амжилт хүслээ.

Дараа нь очсон ЭХЭМҮТ-ийн хувьд Ерөнхий сайд Л.Оюун-Эрдэнэ өмнө нь буюу 2021 оны зургадугаар сарын 1-нд үйл ажиллагаатай танилцахдаа хэд хэдэн тулгамдсан асуудлыг шийдэхээ илэрхийлсэн нь өнөөдөр бүрэн шийдэгджээ.

Амаржих газруудад хийгдсэн хөрөнгө оруулалтаар улсын хэмжээнд төрөх болон төрсний дараах бүх орыг шинэчилжээ. Тухайлбал, ЭХЭМҮТ-ийн 496 ор хуучирч муудаад байсныг 100 хувь шинэчилжээ. Мөн “Нөхөн үржихүйн зөвлөх поликлиник” болон “Хүүхдийн зөвлөх поликлиник”-ийн өргөтгөл, 1987 онд ашиглалтад орсноос хойш иж бүрэн засвар хийгдээгүй тус төвийн бүх барилгын их засварын зэрэг нийт 45 тэрбум төгрөгийн хөрөнгө оруулалтыг шийдвэрлээд байна. Тоног төхөөрөмжийн шинэчлэлийн дүнд Монголд эмчилдэггүй байсан дөрвөн төрлийн мэс засал, эмчилгээг Эх, хүүхдийн эрүүл мэндийн үндэсний төвд хийдэг боллоо. Энэ ондоо багтаж Эх нялхсын эмнэлэг төрөх өрөөнүүдээ хөгжингүй орнуудын жишигт хүргэж бүрэн засаж тохижуулахаар төлөвлөөд байгаа аж.

Ерөнхий сайд Л.Оюун-Эрдэнэ эх, нярайн эрүүл мэндийн салбарт нийт 110 тэрбум төгрөгийн хөрөнгө оруулалт хийхээр болсныг тэмдэглээд улсын хэмжээнд иргэдэд тусламж, үйлчилгээ үзүүлж байгаа төрөх эмнэлгүүдийн өнгө төрхийг бүрэн шинэчилж, бүрэн цахимжуулах, эх, нярай, эмэгтэйчүүдийн эмнэлгүүдийг дэлхийн жишигт хүргэхийн төлөө Засгийн газар онцгой анхаарч ажиллана гэв. Мөн ирэх тавдугаар сарын 1-нээс Монгол Улсын иргэн бүрийг эрт илрүүлгийн иж бүрэн оношилгоонд хамруулах ажлыг улсын хэмжээнд зохион байгуулна, эрүүл мэндийн салбарын удирдлагууд бэлтгэл ажлыг хангаж ажиллахыг үүрэг болголоо.

Казах түмний Наурыз баярын угтал болсон “Нүүдэлчдийн өвөл-Бүргэдийн баяр” арга хэмжээ энэ сарын 12-нд болно. Бүргэдийн баяр Түргэний аман дахь Монгол кувейтийн байгаль хамгаалах төвд зохиогдоно.

Тус арга хэмжээний ерөнхий зохион байгуулагчаар нийслэл дэх Баян-Өлгий аймгийн нутгийн зөвлөл, Монгол бүргэдчдийн нэгдсэн холбоо, Баян-Өлгий аймгийн ЗДТГ, Монгол кувейтийн байгаль хамгаалах төв ажиллах аж.

Цар тахал дэгдэхээс хоёр жилийн өмнө буюу 2019 онд тус арга хэмжээ зохион байгуулагдаж, дотоодын үзэгчдээс гадна Өмнөд Солонгос, Хятад, Япон, ОХУ, Их Британи, Турк, Тайланд зэрэг 10-аад орны жуулчид ирж байжээ.