Month: March 2022

2022-03-09, Улаанбаатар хот, “Улаанбаатар Үнэт Цаасны Бирж” ХК нь Олон улсын эмэгтэйчүүдийн эрхийг хамгаалах өдрийг тохиолдуулан, дэлхий даяар 3 сарын 7-14-ний өдрүүдэд “SSE” (НҮБ-ын Тогтвортой Хөрөнгийн Биржийн санаачилга)”- ын гишүүн дэлхийн 120 гаруй хөрөнгийн биржүүд нэгдэн хэрэгжүүлдэг Жендэрийн эрх тэгш байдлын төлөө цан цохих “Ring the Bell” арга хэмжээг зохион байгууллаа.

Тус арга хэмжээнд хөрөнгийн зах зээлийн манлайлагч эмэгтэйчүүд болох “Улаанбаатар Үнэт Цаасны Бирж”-н Гүйцэтгэх захирал Ж.Золзаяа, Ард Санхүүгийн Нэгдлийн Төр Засаг, Олон Нийтийн Харилцаа эрхэлсэн захирал Ж.Алтангүний, Эрсдэл Хариуцсан захирал Б.Оюутцэцэн, “Монголын Үнэт Цаасны Клирингийн Төв”-ийн Гүйцэтгэх захирал О.Эрдэнэгэрэл, “ГрэйпСити Монгол” ХХК”-ийн Гүйцэтгэх захирал Б.Мөнхцэцэг, “Ард Секюритиз ҮЦК”-ийн Гүйцэтгэх захирал Г.Долгорсүрэн, “Нэрэн Клиринг ХХК”-ийн Гүйцэтгэх захирал Б.Гандулам, “Ард Менежмент ҮЦК”-ийн Гүйцэтгэх захирал Ч.Хандаа нар оролцож “Жендэрийн мэдрэмжтэй санхүүгийн салбарын төлөө” дуу хоолойгоо өргөж, санал солилцов.

Мөн арга хэмжээний үеэр “Улаанбаатар Үнэт Цаасны Бирж” ХК – ийн зүгээс 3 сарын 8-ны өдөр НҮБ-ын Тогтвортой хөрөнгийн биржийн санаачилгын хүрээнд хийгдсэн “How stock exchanges advance gender equality” буюу “Хөрөнгийн биржүүд хэрхэн жендэрийн эрх тэгш байдлыг хангахад хувь нэмрээ оруулж манлайлдаг вэ?” тайланг танилцуулсан юм.

Тайланд дурдсанаар дэлхий даяар 92 тэрбум триллион долларын зах зээлийн үнэлгээтэй нийт 50 гаруй мянган компаниудыг биржүүд бүртгэсэн бөгөөд улс орнуудын эдийн засагт голлох нөлөөтэй ба шууд болон шууд бус замаар бүртгэлтэй компаниудын үйл ажиллагаанд нөлөө үзүүлж, жендэрийн эрх тэгш байдлын төлөө ажиллаж, илүү үр ашигтай, уялдаа холбоотой үр ашигтай нэгдмэл нийгмийг бий болгоход хувь нэмрээ оруулдаг байна. Мөн тус тайланд олон улсын биржүүдийн тэргүүн туршлага болон биржүүдийн жендэрийн эрх тэгш байдлын төлөө хийх боломжит ажлуудыг танилцуулжээ. Үүнээс дурдвал:

Хөрөнгийн биржүүд хэрхэн жендэрийн эрх тэгш байдлыг дэмжин ажиллах вэ?

1. Үйл ажиллагаагаараа үлгэр жишээ үзүүлэх
2. Зохицуулалт, зааварчилгаагаар бүртгэлтэй компаниудын үйл ажиллагаанд нөлөөлөх
3. Жендэрийн мэдрэмжтэй бүтээгдэхүүнийг бүртгэж, олон нийтэд таниулах
4. Компанийн гүйцэтгэх удирдлагын түвшинд эмэгтэйчүүдийн оролцоог нэмэгдүүлэхийг дэмжих
5. Жендэрийн тэгш байдлыг дотооддоо дэмжих: Цалингийн зөрүүг арилгах; Дарамтаас урьдчилан сэргийлэх
6. Жендэрийн тэгш байдлын талаарх ахиц дэвшлийг үнэлж, ил тод болгох

Жендэрийн тэгш оролцоог хангах нь хүний эрх, эрх чөлөөний шударга зарчмыг хэрэгжүүлэхийн зэрэгцээ бизнесүүд, байгууллагууд бүх хүчин чадлаа дайчлан ажиллах, ажлын үр дүнг үнэмлэхүй хэмжээнд нэмэгдүүлдэг. Иймд Монголын хөрөнгийн зах зээлийн жендэрийн мэдрэмжтэй тэгш оролцоог хангаж ажиллахыг хөрөнгийн зах зээлийн оролцогч бусад байгууллагууд, бүртгэлтэй хувьцаат компаниуд болон гишүүн компаниуддаа хандан Улаанбаатар Үнэт Цаасны Бирж ХК-ийн зүгээс уриаллаа.

Хустайн байгалийн цогцолборт газрын үйл ажиллагаатай БОАЖ-ын сайд Б.Бат-Эрдэнэ танилцаж, байгаль хамгаалагчдын төлөөлөлтэй уулзлаа. Тэрбээр, Монгол Улс Биологийн олон янз байдлын конвенцод нэгдэн орж, эх орныхоо унаган байгаль, ургамал, амьтны ховор зүйлийг хадгалан хамгаалахын төлөө газар нутгийнхаа 30-аас доошгүй хувийг улсын тусгай хамгаалалтад авах талаар байр сууриа илэрхийлсэн юм.

Улсын тусгай хамгаалалттай газар нутгийн сүлжээг өргөжүүлсээр өдгөө нийт газар нутгийн 21.0 хувьтай тэнцэх 32.7 сая га талбай бүхий 119 тусгай хамгаалалттай газар 34 хамгаалалтын захиргаатай болжээ. Түүний нэг нь Хустайн байгалийн цогцолборт газар аж.

Байгаль хамгаалагчдын төлөөлөл хэлэхдээ “Одоогоор Хустайн байгалийн цогцолбор газар нь дэлхийн хамгийн олон тахитай, монголын хамгийн олон буга, тарваганы нягтшилтай нутаг болоод байна. Мөн тахь сэргээн нутагшуулалт, идэвхтэй хамгааллын үр дүнд өссөн амьтдаасаа тодорхой тооны бодгалийг улсынхаа бусад нутгуудад шилжүүлэн нутагшуулах ажлыг амжилттай гүйцэтгэж байгаа” хэмээн ярив.

Хустайн байгалийн цогцолбор газрын онцлогийг тодруулбал,

• Жилийн дөрвөн улиралд тасралтгүй үйл ажиллагаа явуулан гадаад, дотоодын жуулчдыг хүлээн авч, тахь сэргээн нутагшуулсан үүх түүхээс эхлээд, зэрлэг онгон байгальд тахь, буга, чоно зэрэг амьтдыг үзэх боломжийг бий болгожээ
• Дэлхийн хамгийн ховор зүйл болох зэрлэг адуу – тахийг сэргээн нутагшуулахаар байгуулагдсан
• 2000-аад оноос өнөөг хүртэл халиун бугын 500 гаруй илий, 1,000 гаруй тарвагыг Монгол Улсын бусад нутгуудад шилжүүлэн нутагшуулжээ. Эдгээр амьтдын экологи – эдийн засгийн үнэлгээгээр тооцон үзвэл гурван тэрбум орчим төгрөгийн хөрөнгө оруулалтыг Монгол Улсын байгаль хамгаалалд оруулсан
• Дэлхийн хэмжээгээр үйл ажиллагаа явуулдаг, нэр хүнд бүхий байгаль орчны ууган төрийн бус байгууллага болох Дэлхийн байгаль хамгаалах холбоо (IUCN)-ны гишүүнээр 2007 онд элсжээ.

Ташрамд дурдахад, БОАЖЯ-аас Хустайн байгалийн цогцолборт газрын үйл ажиллагаанд дэмжлэг үзүүлэн олгосон фургон автомашиныг БОАЖ-ын сайд Б.Бат-Эрдэнэ өчигдөр тус газрын үйл ажиллагаатай танилцах үеэрээ гардууллаа.

Хамтын хэлэлцээр нь боловсрол, шинжлэх ухааны салбарын ажилтны хөдөлмөрлөх эрх, сонирхлыг хамтран хамгаалах зорилготой.

Энэ хүрээнд талууд салбарын эрх зүйн орчныг сайжруулах, хэрэгжилтийг чанаржуулах, багш, ажилтан, албан хаагчдын цалин хөлс, хөдөлмөрийн нөхцөл, нийгмийн баталгааг хангах чиглэлээр хамтран ажиллах юм.

Цахим хөгжил, харилцаа холбооны яам болон “И-Монгол” академийн хамтарсан баг энэ 2022 онд бүх аймгуудыг цахимжуулах ажлын хүрээнд ирэх 03 дугаар сарын 15-с эхлэн хөдөө, орон нутагт ажиллаж, “Цахим жишиг аймаг” болоход нь мэргэжил арга зүйн зөвлөгөө өгөх юм. Түүнчлэн орон нутгийн иргэдэд төрийн үйлчилгээг хэрхэн цахимаар авах талаар зааварчилгаа өгч ажиллана.

Тэгвэл өнөөдрийн байдлаар “e-mongolia” системд найман аймгийн нутгийн захиргааны 540 үйлчилгээ цахимжиж, нэгтгэгдээд байна. Үүнээс тодруулбал,

1. Төв аймаг – 47 үйлчилгээ
2. Хөвсгөл аймаг – 71 үйлчилгээ
3. Булган аймаг – 62 үйлчилгээ
4. Дархан уул аймаг – 61 үйлчилгээ
5. Орхон аймаг – 74 үйлчилгээ
6. Сэлэнгэ аймаг – 73 үйлчилгээ
7. Сүхбаатар аймаг – 76 үйлчилгээ
8. Хэнтий аймаг – 71 үйлчилгээг цахимжуулжээ. Өөрөөр хэлбэл, эдгээр аймгууд дээрх тооны нутгийн захиргааны үйлчилгээг гар утас болон суурин компьютероосоо авах боломжийг бүрдүүлсэн гэсэн үг юм.

Үүний зэрэгцээ, “e-mongolia” системээс үзүүлж буй төрийн 600 гаруй үйлчилгээг орон нутгийн иргэд операторын тусламжтайгаар авах боломжтой бөгөөд операторын үйлчилгээг 21 аймгийн 330 суманд нэвтрүүлжээ.

Монгол Улсын Ерөнхий сайд энэ онд аймгуудын ажлыг дүгнэхдээ нэн тэргүүнд цахим шилжилтийг орон нутагтаа хэрхэн нэвтрүүлсэн байдлыг харгалзан үзнэ гэсэн юм. Энэ хүрээнд аймгууд нутгийн захиргааны үйлчилгээгээ цахимжуулахын зэрэгцээ орон нутагтаа цахим шилжилтийг салбар бүрд алхам алхмаар нэвтрүүлэн ажиллаж байна.

Тухайлбал, Дархан-Уул аймагт Үндэсний дата төвийн НӨӨЦ төвийг байгуулан, өнгөрсөн онд нээлтээ хийсэн. Тус аймгийн хувьд өнөөдрийн байдлаар нутгийн захиргааны 61 үйлчилгээг цахимжуулж, “e-Mongolia” системд оруулжээ. Үүний зэрэгцээ Гэрэгэ системтэй хамтран “Смарт-Дархан” системийг хөгжүүлж байна.

Дархан-Уул аймаг нь 128 хяналтын камерыг ашиглан замын хөдөлгөөн, гудамж талбайд гарч буй гэмт хэргийн хяналтыг хийж, зохицуулж байгаа гэдэг мэдээллийг өгсөн юм. Тус аймгийн 22,000 өрх цахим тоолуурын системийг нэвтрүүлсэн байна. Ингэснээр тоолуурын бичилтийг алба хаагчид өрх бүрд биечлэн очиж, заалтыг тэмдэглэдэг байсан уламжлалт аргыг халаад байгаа ажээ. Үүний зэрэгцээ Дархан-Уул аймаг Callpro компанитай хамтран иргэдтэйгээ харилцаж, санал хүсэлтийг нь хүлээн авах, дамжуулах, эргэн хариу өгөх системийг нэвтрүүлсэн сайн жишиг байгаа юм.

Харин Өмнөговь, Увс, Төв аймгийн хувьд Ерөнхий боловсролын сургуулийн нийт 95 хувь нь ухаалаг самбар ашиглаж байна. Мөн сургууль эцэг эхийн хоорондох харилцааг цахим хэлбэрт шилжүүлжээ.

Тэгвэл Сэлэнгэ, Баянхонгор, Өмнөговь, Говь-Алтай аймагт бэлчээрийн болон газар тариалангийн талбайг төлөвлөх шийдлүүдийг дрон ашиглаж, мэдээлэл цуглуулах аргыг нэвтрүүлж эхэлсэн байна.

Мөн эрүүл мэнд, нийгмийн халамж, малчдад зориулсан нутгийн захиргааны үйлчилгээг цаг хугацаа, орон зайнаас үл хамааран цахимд шилжүүлэх, иргэдээс авч буй өргөдөл, гомдол, санал шүүмжийг цахимаар авах, төрийн байгууллагаас биеэр очиж авдаг үйлчилгээг шат дараатайгаар цахимжуулах, төлбөр тооцоог 100 хувьд цахимд шилжүүлэх,аймаг бүр өөрийн онцлогтоо тохируулан цахим шилжилтийг хийх, ингэхдээ хувийн хэвшилтэй хамтран ажиллах, хяналт удирдлагын нэгдсэн системтэй болж, дата өгөгдөлд суурилсан шийдвэр гаргах, иргэд, олон нийтэд заавар, зөвлөгөө, тусламж үзүүлэх үйлчилгээний төвтэй болох, иргэдийн цахим ур чадварыг сайжруулах чиглэлд сургалт, сурталчилгааны ажлыг зохион байгуулах зэрэг цахим шилжилттэй холбоотой хэрэгжүүлж болох ажлын саналыг Цахим хөгжил, харилцаа холбооны яамны удирдлагууд зүгээс өнгөрсөн өдрүүдэд аймгийн удирдлагуудтай уулзахдаа санал болгосон юм.

Аймгуудыг цахимжуулах ажлын хүрээнд Монгол орны хүн ам, нийт нутаг дэвсгэрийг хамарсан мэдээлэл, харилцаа холбооны сүлжээг өргөтгөх ажилд Цахим хөгжил, харилцаа холбооны яамны зүгээс анхаарч ажиллахаар дунд хугацааны төлөвлөгөөндөө тусгажээ.

Мөн суурь системүүдийн хувьд танилт нэвтрэлтийн нэгдсэн систем “ДАН”, тоон гарын үсгийн “ESIGN” систем, төрийн мэдээлэл солилцооны систем “ХУР”, түүнийг дэмжих системүүд болох орон зай мэдээллийн систем болон баримт бичиг солилцооны системүүдийг хөгжүүлчихсэн байна.