Монгол Улсаас Бүгд Найрамдах Казахстан Улсад суугаа Онц бөгөөд Бүрэн эрхт Элчин сайд Д.Баярхүү Бүгд Найрамдах Казахстан Улсын Ерөнхийлөгч Касым-Жомарт Токаевт 2022 оны хоёрдугаар 21-ний өдөр Итгэмжлэх жуух бичгээ барив.

Элчин сайд Д.Баярхүү Итгэмжлэх жуух бичгээ барих үеэр Монгол Улсын Ерөнхийлөгч У.Хүрэлсүхийн мэндчилгээг уламжилж, Монгол, Казахстаны дипломат харилцаа тогтоосны 30 жилийн ой энэ онд тохиож байгааг тэмдэглэлээ.

Мөн энэхүү найрсаг харилцааг өргөжүүлэн хөгжүүлж, хоёр талын хамтын ажиллагааг бодит агуулгаар баяжуулахын төлөө хүч чармайлт гарган ажиллахаа нотлов.

Бүгд Найрамдах Казахстан Улсын Ерөнхийлөгч К-Ж.Токаев Монгол Улс нь Казахстаны Зүүн Ази дахь гол түншүүдийн нэг болохыг цохон тэмдэглэж, хоёр орны харилцаа, хамтын ажиллагааг гүнзгийрүүлэн хөгжүүлэхийн төлөө байгаагаа илэрхийллээ гэж ГХЯ-наас мэдээлэв.

Засгийн газрын ээлжит хуралдаанаас гарсан шийдвэрийг танилцуулж байна.

Өнөөдрийн хуралдаанаар

• 2022 оныг Хоршооны хөгжлийг дэмжих жилээр зарлаж, хэрэгжүүлэх арга хэмжээний төлөвлөгөөг баталж, хэрэгжилтэд нь хяналт тавьж, тайланг Засгийн газрын хуралдаанд танилцуулахыг Хүнс, хөдөө аж ахуй, хөнгөн үйлдвэрийн сайд З.Мэндсайханд үүрэг болголоо.
• “Эрдэнэт үйлдвэр”-ийн эд хөрөнгийг “Медипас” ХХК-д шилжүүлсэн асуудлыг судалж, холбогдох хууль тогтоомжийн хүрээнд шийдвэрлэхийг Монгол Улсын Шадар сайд, Төрийн өмчийн бодлого зохицуулалтын газрын дарга нарт даалгав.
• Монгол Улсын Засгийн газар Нэгдсэн Үндэстний Байгууллагын Хүнс, хөдөө аж ахуйн байгууллагатай хамтран байгуулсан Ази тивийн сүүний түншлэлийн Нарийн бичгийн дарга нарын газрын үйл ажиллагааг өргөжүүлэх нь зүйтэй гэж үзлээ. Тус түншлэлд одоогоор 13 орон гишүүнээр нэгдэж ороод байна.
• Олимп, паралимпын наадам, дэлхийн аварга шалгаруулах тэмцээнээс олимпын жин, зайд медаль хүртсэн тамирчдад 2022 онд олгох сар бүрийн мөнгөн урамшуулалд шаардагдах нэг тэрбум 848 сая төгрөгийг Биеийн тамир, спортын хорооны батлагдсан төсвөөс зохих журмын дагуу гаргахыг тус хорооны даргад даалгав.
• Уул уурхай, хүнд үйлдвэрийн сайд Г.Ёндонг 2022 оны гуравдугаар сарын 7-11-нд ОХУ, Беларусь улсад ажиллахыг зөвшөөрч, ажиллах удирдамжийг баталлаа.
• Энэ сарын 25-нд цахимаар зохион байгуулах Худалдаа, эдийн засаг, шинжлэх ухаан, техникийн хамтын ажиллагааны Монгол, Беларусийн Засгийн газар хоорондын комиссын зургадугаар хуралдаанд оролцох Монголын талын төлөөлөгчдийн баримтлах удирдамжийг зөвшөөрлөө гэж Засгийн газрын Хэвлэл мэдээлэл, олон нийттэй харилцах газраас мэдээллээ.

Монгол циркчид Испани улсын Жирона хотод зохион байгуулагдсан олон улсын циркчдийн уралдаанд оролцож, хүрэл цом хүртжээ. Дэлхийн 24 орны 100 гаруй уран бүтээлч оролцсон тус тэмцээнийг энэ жил арав дахь жилдээ зохион байгуулжээ. Энэ тэмцээнд Монгол Улсаа төлөөлөн “Акробат” академийн 20-24 насны залуу циркчид анх удаа акробатын төрлөөр амжилттай оролцсон байна.

Тэмцээний талаар Б.Золбаясгалан ярихдаа “Сонирхуулж хэлэхэд тэмцээнд оролцсон залуус акробат академид орж, суралцаад зургаан сараас гурван жил болж байгаа 20-24 насны залуу уран бүтээлчид. Эдгээр залуус Орос улсын циркчидтэй тэргүүн байр булаацалдах хэмжээнд өрсөлдөнө гэдэг Монгол циркчдийн чансааг илтгэж байгаа хэрэг юм. Монгол Улс циркийн барилгаа хувьчлаагүй бол төр засгаас энэ урлагийг дэмждэг байсан бол уран бүтээлчид илүү их амжилт гаргах байсан нь дамжиггүй” гэв.

Тэрбээр ах Б.Золбаяртайгаа хамтран хувийнхаа зардлаар гэр хороололд амьдардаг хүүхдүүдэд зориулан Чингэлтэй дүүрэгт цирк байгуулсан. Уг циркт хотын төвөөс зайдуу, гэр хороололд амьдардаг хүүхдүүд циркээр хичээллэх боломж олгосон циркчдийн нэг юм. Тус циркт бэлтгэл хийх байргүй болсон циркчид бэлтгэл сургуулилалтаа хийж байгаа юм.

Уг мэдээлэлд Нийслэлийн Засаг даргын тамгын газраас “Авто замын түгжрэлийг бууруулах шийдэл судалгаа”-г захиалан хийлгэсэн. Энэ судалгаанд оролцогсдын 73 хувь нь автомашин ачилтын төлбөр 60 мянган төгрөгийг 100 мянга болгон нэмснээр иргэд дуртай газраа автомашинаа байрлуулж, зохиомол түгжрэл үүсгэхгүй гэж хариулсан тухай дурджээ.

Энэ талаар Нийслэлийн Засаг даргын Хэвлэлийн төлөөлөгч Н.Сугар “Ачилтын төлбөрийг 100 мянган төгрөг болгох асуудал зөвхөн судалгааны түвшинд байгаа. Хэрэгжинэ гэсэн үг биш” гэлээ.

Өчигдөр/2022.02.22/ зам тээврийн ноцтой ослын улмаас нэг хүүхэд эндсэн харамсалтай хэрэг гарчээ. Тодруулбал, Өвөрхангай аймгийн Арвайхээр суманд гурван зорчигчтой суудлын автомашин өндөр хүчдэлийн цахилгаан дамжуулах агаарын шугамын тулгуур багана мөргөж, автомашины төмөр хийцэд хүн хавчуулагдсан тухай дуудлага Онцгой байдлын албанд ирсэн байна.

Дуудлагын дагуу тус аймгийн Онцгой байдлын газрын Эрэн хайх, аврах салбарын алба хаагчид очиход автомашины төмөр хийцэд 11 настай эрэгтэй хүүхэд хавчуулагдан нас барсан байсныг цогцсыг гаргаж, Цагдаагийн газрын жижүүрийн бүрэлдэхүүнд шилжүүлэн өгчээ.

Мөн “Гранд марк-2” загварын суудлын автомашины жолооч Б /26 настай, эрэгтэй/, зорчигч Ш /28 настай, эрэгтэй/, Б /41 настай, эрэгтэй/ нарыг гаргаж, бүсийн оношилгоо эмчилгээний төвийн жижүүр эмчид хүлээлгэн өгсөн байна.