Month: January 2022

Улсын өсөх идэр начин Э.Энхбат нь олимпийн аварга Н.Түвшинбаярт зодуулж хүнд бэртэл аван эмнэлэгт 8 сар ухаангүй байсан. Гэмтэл авсан дариуд нь түүнд ГССҮТ-өөс яаралтай эмнэлгийн тусламжийг үзүүлэн цаашлаад БНСУ-д очин 8 сарын турш эмчлүүлсэн ч ухаан орохгүй байсаар эх орондоо ирээд удалгүй таалал төгссөн билээ.

Тэгвэл Э.Энхбат агсны биед хийсэн шүүх шинжилгээний дүгнэлт энэ долоо хоногт гарах юм. Талийгаачийн ар гэрийнхэн “Шүүх шинжилгээний дүгнэлтийн хариуг хүлээж байгаа. Үнэн зөвөөр шийднэ гэдэгт итгэсээр, хүлээсээр” байгаа гэдгээ цахим орчиндоо илэрхийлсэн байна.

Нийслэлийн Баянзүрх дүүргийн 12 дугаар хороо, Жанжинд байшин шатаж байна гэсэн дуудлага өчигдөр 09:01 цагт ирүүлжээ. Дуудлагын дагуу тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид 4×8 метрийн хэмжээтэй байшингийн дээвэр шатаж байсныг унтраасан байна.

Нийслэлийн Сонгинохайрхан дүүргийн 26 дугаар хороонд байшин шатаж байна гэсэн дуудлага өчигдөр 17:03 цагт ирүүлжээ. Дуудлагын дагуу тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчид 7×7 метрийн хэмжээтэй байшингийн дээвэр шатаж байсныг 25 минут ажиллаж унтраажээ.

Нийслэлийн Чингэлтэй дүүргийн долоодугаар хороо, Хувьсгалчдын зургаадугаар гудамжинд байшин шатаж байна гэсэн дуудлага өчигдөр 23:13 цагт ирүүлжээ. Дуудлагын дагуу тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 5×7 метрийн хэмжээтэй байшингийн модон шал шатаж байсныг унтраасан байна.

Өмнөговь аймгийн Ханбогд сумын Номгон багийн “Дөрөлж” гудамжинд байшингийн дээвэр шатаж байна гэсэн дуудлага өчигдөр 17:43 цагт сумын онцгой комиссд иржээ. Дуудлагын дагуу тус сум дахь Гал түймэр унтраах, аврах 66 дугаар ангийн алба хаагчид уурын зуухны 24х12 метрийн хэмжээтэй байшингийн дээвэр шатаж байсныг унтраажээ.

Авлигатай тэмцэх газрын Урьдчилан сэргийлэх, соён гэгээрүүлэх хэлтэс нь 2022 оны 1 дүгээр сарын 3-7-ны өдрүүдэд авлигын хор хөнөөлийг ухуулан таниулах сурталчилгааг 13 мянга орчим өрхийн 54 мянга гаруй хүнд түгээн сурталчилж ажиллав.

Авлигын нийгмийн хор аюулыг ухуулан таниулах, авлигыг үл тэвчих үзлийг төлөвшүүлэх, авлига, ашиг сонирхлын зөрчлөөс урьдчилан сэргийлэх, авлигын эсрэг хууль тогтоомжийг сурталчлан таниулах зорилгоор Чингэлтэй дүүргийн Цагдаагийн газрын 200 гаруй алба хаагчийг хамруулан “Авлигын гэмт хэргийн ойлголт, түүнээс урьдчилан сэргийлэх нь” сэдэвт сургалтыг зохион байгуулав.

Авлигатай тэмцэх үндэсний хөтөлбөр, авлигын эсрэг хууль тогтоомжийн хэрэгжилттэй танилцах, арга зүйн туслалцаа үзүүлэх, авлигын эрсдэлийг судлан тогтоох, арилгах чиглэлээр Эм, эмнэлгийн хэрэгслийн хяналт, зохицуулалтын газарт ажиллах явцад илэрсэн зөрчил, дутагдлыг арилгах, таслан зогсоох чиглэлээр холбогдох саналыг боловсруулан Монгол Улсын Ерөнхий сайдад хүргүүллээ.

Төрийн албаны хүнд суртал, чирэгдлийг арилгах, авлига, ашиг сонирхлын зөрчлөөс урьдчилан сэргийлэх зорилгоор шинэчлэн боловсруулсан “Төрийн байгууллагын албан ёсны цахим хуудсанд үнэлгээ хийх аргачлал”-ын дагуу 14 яамны цахим хуудсанд үнэлгээ хийж, дүнг Засгийн газарт хүргүүлэхээр ажиллаж байна.

Замын-Үүд боомтоор ачаа тээвэр нэвтрэлт нэмэгдсэн талаар Шадар. сайдын ажлын албанаас мэдэгдлээ.

Уг мэдээлэлд “Цар тахлын үед хилийн боомтын үйл ажиллагааг хэвийн явуулах, экспорт, импортын ачаа тээврийг эрчимжүүлэх үүрэг бүхий Шадар сайдаар ахлуулсан Ажлын хэсэг өчигдөр Замын-Үүд боомтод ажиллаж, тодорхой зохион байгуулалтуудыг газар дээр нь хийгээд ирсэн.

Өнөөдрөөс хилийн боомтын үйл ажиллагаа жигдэрч, 49 чингэлэг бүхий 1,000 гаруй тонн ачаа барааг Эрээний боомтоос татан авсан бөгөөд хүнс болон бусад бараа бүтээгдэхүүн зэрэг бүх төрлийн ачаа байгаа юм.

Шадар сайд өчигдөр газар дээр нь ажиллах үедээ чингэлэг тээврийн үйл ажиллагааг халдвар хамгааллын нарийн чанд дэглэмийн дор эхлүүлж, “0” цэгээс 26 чингэлэг ачаа барааг хилээр оруулж ирсэн билээ.

БНХАУ-ын хилийн Эрээн боомтод гурван сар орчим саатсан ачаа тээврийг яаралтай хил нэвтрүүлэх арга хэмжээний хүрээнд Халдвар хамгааллын дэглэм сахиулах үүднээс хоёр улсын хилийн голд “0” цэг байгуулан, чингэлэг тээврээр ачаа барааг нэвтрүүлэх горимд шилжүүлж, тээврийн хэрэгслийн жолооч нарыг хилийн цэрэг, онцгой байдлын байгууллагаас дайчилж нэгдсэн зохион байгуулалтад оруулан ажиллаж байгаа юм” гэжээ.

Ашигт малтмал газрын тосны газраас шатахуун импортлогч компаниудын агуулахад хадгалж байгаа шатахууны чанарыг шалгаж, нөөц бүрдүүлэлтэд хяналт, шалгалт хийлээ.

АМГТГ-ын Газрын тосны бүтээгдэхүүний хэлтсийн ахлах мэргэжилтэн Д.Дагвасүрэн

“Шатахууны нөөц хэвийн байна. Шатахуун түгээх станцуудын үлдэгдэл бодит эсэхийг хянахаар ирээд байна. Гэнэтийн хяналт хийхийг бидний мөрддөг журамд заасан байдаг. Улиралд нэг удаа шатахуун, дизелийн түлшний чанарт бүрэн хяналт хийдэг. Гэвч иргэдээс санал гомдол ирж байгаа тул бид сард нэг удаа дээж авдаг болсон. Өнөөдөр үлдэгдлээ шалгангаа дээж авах зорилготой байсан ч цаг агаарын нөхцөл байдлаас шатгаалаад дээж авах ажлыг түр хойшлууллаа. Учир нь цаг агаар таатай биш, цастай байгаа нь дээжийн чанарт сөргөөр нөлөөлдөг. Цаашид түүвэрлэсэн байдлаар шатахуун түгээх станцуудаас дээж авч, хяналтаа тавина” гэлээ.

АМГТГ-ын Газрын тосны бүтээгдэхүүний хэлтсийн мэргэжилтэн Л.Төмөр “ААН-үүд чанарын шаардлага хангасан шатахуун нийлүүлдэг. Устай, механик хольцтой шатахуун худалдаалж байна гэдэг нь худлаа. Агуулахаас станцад шатахуун нийлүүлэхдээ хий шахна гэж байхгүй. Шатахуун түгээх станцын хоолойд шүүлтүүр бий. Ус хүнд жинтэй тул дороо туначихдаг. Өдийд бол хөлдчихнө. Стандарт, хэмжил зүйн газраас шахалтад байнга хяналт тавьдаг, ямар нэг асуудал байхгүй. Одоогийн тоолуур шингэн шатахуунаа л тоолно. Машин тус бүрийн явалт, жолоочийн ур чадвараас шатахуун зарцуулалт хамаарна. Шатахууныг гаднаас нь хараад, үнэрлээд чанартай эсэхийг мэдэх боломжгүй” гэв.