Month: January 2022

Япон улсад 5-11 насны хүүхдүүдийг ирэх гуравдугаар сараас эхлэн вакцинд хамруулах төлөвтэй байгаа талаар тус улсын Засгийн газраас мэдээллээ.

Одоогийн байдлаар дээрх насны хүүхдүүдэд вакцин хийх зөвшөөрөл хараахан олгогдоогүй байгаа юм. Японы Сайд нарын танхимын Ерөнхий нарийн бичгийн дарга Хироказу Мацуно мэдээлснээр, коронавирусний 18 сая тун вакциныг АНУ-ын Модерна компаниас худалдан авсны дараа вакцинжуулалтыг эхлүүлэх ажээ.

Тэрбээр, “хэрвээ эрүүл мэндийн холбогдох байгууллага, мэргэжилтнүүдийн зөвшөөрөл гарсан тохиолдолд бид ирэх 3 дугаар сараас вакцинжуулалтыг эхлүүлэх төлөвлөгөөтэй байна. Учир нь вакцин 2 дугаар сарын сүүлч гэхэд Японд ирэх төлөвтэй байна” гэжээ.

Японы Засгийн газрын зүгээс саяхан коронавирусний эсрэг нэн яаралтай авч хэрэгжүүлэх цуврал арга хэмжээгээ танилцуулсан юм. Мөн 12-оос доош насны хүүхдүүдийг вакцинжуулах асуудлыг мэргэжилтнүүд хэлэлцэх болно гэж мэдэгджээ.

Боловсрол, Шинжлэх ухааны сайд Л.Энх-Амгалан Монгол дахь НҮБ-ын Хүүхдийн сангийн суурин төлөөлөгч Эваристе Коуасси-Комланыг хүлээн авч уулзлаа. НҮБ-ын Хүүхдийн сангийн 2017-2021 онд улс орнуудад хэрэгжүүлсэн хөтөлбөрүүд дуусч үр дүнгээ дүгнэж байна. 2022-2027 он хүртэлх ирэх 5 жилийн хугацаанд улс орнуудад хэрэгжүүлэх төслүүдээ төлөвлөж байгаа цаг үед Боловсрол, шинжлэх ухааны сайд Л.Энх-Амгалан хүлээн авч уулзаж, хамтран ажиллах хэд хэдэн санал дэвшүүллээ. Үүнд, 0-3 настай хүүхдийн цогц хөгжлийг дэмжих хөтөлбөрийг хэрэгжүүлэхэд дэмжлэг үзүүлэх, Боловсролын салбарын цахим шилжилтийг хэрэгжүүлэхэд тулгамдсан асуудал болох сургууль, цэцэрлэгүүдийн цахилгаан эрчим хүч, интернетийн холболтыг шийдвэрлэхэд GIGA төсөл дээр хамтарч ажиллах, хөгжлийн бэрхшээлтэй хүүхэд болон үндэсний цөөнхийн хүүхэд бүрийг тэгш хамран сургах гэсэн 3 асуудалд хамтран ажиллахыг Монгол дахь НҮБ-ын Хүүхдийн сангийн суурин төлөөлөгчөөс хүслээ. НҮБ-ын Хүүхдийн сан нь өнгөрсөн 5 жилийн хугацаанд Боловсролын салбарт 12 сая ам.долларын хөрөнгө оруулалт хийсэн байна.

Монгол Улсад электрон тамхи нь хууль эрхзүйн зохицуулалтгүй тул хүүхэд залуучуудын хэрэглээ илт ихссэн. Үүний талаар Боловсрол, шинжлэх ухааны сайд Л.Энх-Амгалан өөрийн цахим хуудастаа “Ерөнхий боловсролын сургуулийн сурагчид электрон тамхи татах нь ихэсчээ. Үүнийг эцэг, эх, багш сурган хүмүүжүүлэгчид ухааруулах хэрэгтэй” хэмээн бичсэн байна.

Гэсэн ч үнийн хувьд ч олон төрлийн сонголттой, нэг талаар гангараа болсон электрон тамхийг хориход боломжгүй болсон мэт. Тиймээс электрон тамхи хор ихтэй учир сурагчдыг ийм төрлийн тамхи татуулахгүй байх талаар арга хэмжээ авахыг Л.Энх-Амгалан сайд анхаарууллаа.

Эрүүл мэндийн сайдын тушаалаар батлагдсан “Коронавируст халдварын цар тахлын үеийн эмнэлгийн орны зохицуулалт хийх түр журам”-ын дагуу “Ор зохицуулалтын баг” ЭМЯ-ны дэргэд ажиллаж байна. Тус ор зохицуулалтын баг нийслэлд үйл ажиллагаа явуулж байгаа төр, хувийн хэвшлийн бүх эмнэлгээс орны мэдээллийг авч, дүүргийн Эрүүл мэндийн төвийн тандалтын багаас ирүүлсэн хэвтэн эмчлүүлэх шаардлагатай өвчтөний мэдээллийн дагуу эмнэлгийн орыг хуваарилж буй. Иймд ор зохицуулалттай холбоотой мэдээллийг 77330404 утсанд хандаж авахыг УОК-ын Шуурхай штабаас мэдээллээ.

Ашигт малтмал газрын тосны газраас өнөөдөр шатахуун импортлогч аж ахуйн нэгжүүдийн агуулах дээр хяналт шалгалт хийлээ.

Стратегийн гол бүтээгдэхүүн болох шатахууны хангамж, нөөцийг тасалдуулахгүй, импортын татан авалт захиалгын тоо хэмжээг бууруулахгүй байлгах тал дээр тус газар ийнхүү анхаарч буй аж.

Энэ ажлын хүрээнд агуулахад хадгалагдаж байгаа шатахуун төрөл тус бүр дээр чанарын шалгалтыг хийхээр шинжилгээний дээжийг авав. Шинжилгээг АМГТГ-ын лабораторид 18 үзүүлэлтээр шинжлэх юм.

Монгол Улсын Газрын тосны бүтээгдэхүүний тухай хуульд “Газрын тосны бүтээгдэхүүний нөөц нь улсын болон компанийн нөөцөөс бүрдэнэ” гэж заасан.

Улсын хэмжээнд газрын тосны бүтээгдэхүүний хомсдол үүсэхээс урьдчилан сэргийлэх зорилгоор АМГТГ-аас жил бүр Газрын тосны бүтээгдэхүүн импортоор оруулж, бөөний болон жижиглэнгийн худалдаа эрхлэгч аж ахуйн нэгжүүдтэй нөөц бүрдүүлэх журмын дагуу 30-аас доошгүй хоногийн шатахууны нөөцийг гэрээ байгуулан бүрдүүлдэг.

Улсын хэмжээнд газрын тосны бүтээгдэхүүний хэрэгцээг 106 агуулах, үүнээс 24 агуулах Улаанбаатар хотод 1,419 шатахуун түгээх станц, 10 орчим хийн байгууламжаар хангаж байна.

Газрын тосны бүтээгдэхүүний тусгай зөвшөөрөлтэй холбоотой нарийвчилсан журмын дагуу долоо хоног бүрийн Мягмар гарагт шатахууны нөөц, үлдэгдлийн мэдээ, мэдээллийг тогтмол гарган холбогдох байгууллагад хүргүүлдэг бөгөөд уг мэдээ, мэдээллийн үнэн бодит байдлыг тухайн аж ахуйн нэгжийн агуулах дээр сар бүр хэмжилт хийж, тулган баталгаажуулах замаар гүйцэтгэж буй аж.

2022 оны нэгдүгээр сарын 10-ны өдрийн байдлаар улсын хэмжээнд дунджаар ердийн хэрэглээний 32 хоногийн газрын тосны бүтээгдэхүүний нөөцтэй байгаа бөгөөд үүнээс АИ-80 автобензин 64, АИ-92 автобензин 31, дизелийн түлш 28, ТС-1 онгоцны түлш 23 хоногийн нөөцтэй байна.

Газрын тосны бүтээгдэхүүний нөөцийг хэвийн байлгах асуудлын хүрээнд ОХУ-ын Роснефть болон БНХАУ-ын Петрочайна Интернэшнл компаниас энэ сард нийт 117 мянган тонн газрын тосны бүтээгдэхүүн импортлох захиалга хийгдээд байгаа гэж Ашигт малтмал газрын тосны газраас мэдээллээ.

Өчигдөрийн байдлаар цагдаагийн байгууллагын 102 дугаарын утсанд нийт 1728 гомдол мэдээлэл бүртгэгджээ.

Үүнээс зөрчлийн дуудлага 1323, хулгайтай холбоотой 35, гэр бүлийн хүчирхийллийн 116, гэмт хэргийн шинжтэй 102 мэдээлэл бүртгэгдсэн байна.

Мөн согтуугаар автомашин жолоодсон 58, олон нийтийн газар зүй бусаар биеэ авч явж, танхайрсан 90, хүний биед халдсан 68, Архидан согтуурахтай тэмцэх тухай хууль зөрчсөн 86, эрүүлжүүлэх байранд хоносон 214, оршин суугчдын амгалан тайван байдал алдагдуулсан 83 тохиолдол гарчээ.

Засгийн газрын өнөөдрийн ээлжит хуралдаанаар, сайжруулсан түлшний үндсэн түүхий эд болох мидлинг болон түлшний чанарыг шалгаж, лабораторийн дүгнэлт гаргах, түлшний стандартыг дахин хянах үүрэг бүхий Ажлын баг байгуулав.

Мөн хуралдаанаар “Таван толгой түлш” ХХК-ийн сайжруулсан шахмал түлшний баруун бүсийн нэгдүгээр үйлдвэрийн барилга, тоног төхөөрөмжийг засварлах арга хэмжээ авч ажиллахыг Эрчим хүчний сайд Н.Тавинбэх, “Таван толгой түлш” ХХК-ийн гүйцэтгэх захирал М.Ганбаатар нарт даалгав. Үйлдвэрийн барилга, тоног төхөөрөмжийг засварлах санхүүжилтийг шийдвэрлэхийг “Эрдэнэс тавантолгой” ХХК-ийн ТУЗ-д даалгалаа.

Засгийн газрын хуралдаанаар хэлэлцсэн бусад асуудлыг товчоор тоймлон хүргэж байна.

Монгол Улсын Зэвсэгт хүчний Ерөнхий командлагчийн зөвшөөрснөөр Зэвсэгт хүчний Барилга-инженерийн цэргийн бие бүрэлдэхүүн, техник хэрэгслийг Зүүнбаян-Ханги чиглэлийн төмөр замын бүтээн байгуулалтын ажилд оролцуулна.

Цэргийн алба хаагчийн тэтгэвэр, тэтгэмжийн тухай хуульд нэмэлт, өөрчлөлт оруулах тухай хуулийн төслийг хэлэлцэн дэмжээд УИХ-д өргөн мэдүүлэхээр тогтов.

Агнуур зохион байгуулалтын мэргэжлийн байгууллагын ажиллах журам, Ховор амьтныг агнах, барих зөвшөөрөл олгох журмыг шинэчлэн баталлаа. Агнуурын амьтны ашиглалтыг хамгааллын үр дүнтэй нягт холбосон эрх зүйн зохицуулалт нь нөхөн сэргээгдэх байгалийн баялгийг урт хугацаанд тогтвортой ашиглах нөхцөлийг бүрдүүлнэ гэж үзэж байна.

“Жижиг зардлыг санхүүжүүлэх хөтөлбөр”-ийг санхүүжүүлэхэд зориулсан Монгол Улс, Азийн хөгжлийн банк хоорондын Хөтөлбөрийн хэлэлцээрийн төслийг хэлэлцээд УИХ-ын холбогдох Байнгын хороотой зөвшилцөхөөр тогтов.

Худалдаа, эдийн засаг, шинжлэх ухаан, техникийн хамтын ажиллагааны Монгол, Унгарын Засгийн газар хоорондын комиссын VII хуралдаан энэ сарын 18-19-нд болно. Тус хуралдааныг цахимаар зохион байгуулна.

Хөдөлмөр, нийгмийн түншлэлийн гурван талт Үндэсний хорооны дүрмийг шинэчлэн баталлаа.

Монгол Улсын Ерөнхийлөгч У.Хүрэлсүхийн 2021 оны арван хоёрдугаар сарын 15-17-нд ОХУ-д хийсэн албан ёсны айлчлалын дүнг хэлэлцээд Үндэсний аюулгүй байдлын зөвлөлд оруулахыг Гадаад харилцааны сайдад даалгалаа.

Бүгд Найрамдах Турк Улсын Анкара хотноо өнгөрсөн оны арван нэгдүгээр сарын 15-нд гарын үсэг зурсан “Цэргийн түүх, архив, музей судлал, хэвлэл мэдээллийн чиглэлээр хамтран ажиллах тухай Монгол Улсын Засгийн газар, Бүгд Найрамдах Турк Улсын Засгийн газар хоорондын харилцан ойлголцлын санамж бичиг”-ийг баталлаа.

Цөмийн энергийн комиссын бүрэлдэхүүнийг өөрчлөн баталлаа. Боловсрол, шинжлэх ухааны сайд тус комиссыг даргална.

Төрийн байгуулалтын байнгын хорооны өнөөдрийн хуралдаанаар “МҮОНРТ-ийн Үндэсний зөвлөлийн гишүүнээс чөлөөлөх, гишүүнээр томилох тухай” УИХ-ын тогтоолын төслийг хэлэлцлээ.

МҮОНРТ-ийн Үндэсний зөвлөл 15 гишүүнтэй, бүрэн эрхийн хугацаа нь зургаан жил. Монгол Улсын Ерөнхийлөгч Үндэсний зөвлөлийн гишүүнд дөрвөн хүнийг нэр дэвшүүлэх эрхтэй.

Монгол Улсын Ерөнхийлөгчөөс МҮОНРТ-ийн Үндэсний зөвлөлийн гишүүнээр санал болгон томилуулсан Ж.Соёл-Эрдэнэ, Б.Галаарид, Ж.Цэсэн, Д.Өлзийбаатар нарыг томилуулснаас Ж.Соёл-Эрдэнэ, Б.Галаарид нарын бүрэн эрхийн хугацаа дууссан тул тэдний оронд шинэ гишүүдийг томилуулах гэж буй нь энэ юм.

Ерөнхийлөгч У.Хүрэлсүх бүрэн эрхийнхээ хүрээнд Д.Жавзандорж, Н.Онон нарыг томилуулах саналыг УИХ-д оруулсан байна.

Нанжидын Онон Улаанбаатар хотод төрсөн, 53 настай.

1977-1987 онд 23 дугаар дунд сургууль,

1987-1991 онд Соёл урлагийн их сургуулийг жүжигчин мэргэжлээр дүүргэсэн.

1999-2001 онд Монгол Улсын Их Сургуулийн Хууль зүйн сургуулийг эрх зүйч мэргэжлээр төссөн.

1991-2000 онд Драмын улсын эрдмийн театрт жүжигчин,

1996 оноос “X түц” уран бүтээлийн нэгдлийн захирал,

2020 оноос Ерөнхий сайдын дэргэдэх Соёл урлагийн зөвлөлийн гишүүнээр ажиллаж байна.

Дуламдоржийн Жавзандорж нь Сүхбаатар аймагт төрсөн, 42 настай.

1998-2012 онд БНЭУ-ын Буддын шашны гүн ухааны их сургуульд суралцсан.

2012-2019 онд БНЭУ-ын Буддын шашны гүн ухааны их сургуульд багш,

2020 оноос Монголын бурхан шашинтны төв Гандантэгчинлэн хийдийн дэргэдэх Өндөр гэгээн Занабазарын нэрэмжит Монголын бурхан шашинтны дээд сургуулийн сургалтын албанд багшаар ажиллаж байна.