Month: January 2022

“The Voice of Mongolia” дэлхийн хэмжээний шоуг “Монгол HD” телевизээс гурав дахь удаагаа зохион байгуулж байгаа юм. Тус шоуны шилдэг оролцогчдын нэг А.Уянга нь “Хурд” хамтлагийн Отгонбаярын багийн гишүүн болсон. Түүнийг “The Voice” онцолсноор түүний үзүүлбэр дэлхийн шилдэгт багтчээ.

Монгол Улсын гавьяат тамирчин Ц.Шаравжамцын хүү Ш.Энхийн-Од NBA-ийн тамирчин болох мөрөөдөлдөө улам ойртсоор байна. Тэрбээр АНУ-ын оюутны сагсан бөмбөгийн дээд лигт нь тоглодог “Дэйтон”-ы их сургуулиас ирсэн тэтгэлгийн саналыг хүлээн авч буйгаа албан ёсоор зарлажээ.

Ингэснээр Америкийн оюутны спортын холбоо (NCAA)-ны дээд лигт тоглох урилга гардаж авсан Монголын анхны тамирчин болсон юм. “Дэйтон” их сургууль түүнийг онцолжээ.

Баянхонгор аймгийн Галуут сумын Мандал багийн “Ёлын гол” гэдэг газарт /аймгийн төвөөс баруун хойд зүгт 80км, сумын төвөөс хойд зүгт 56 км-т, Ө-46°11’24.0” У-100°21’00.0”E/ энэ сарын 14-ний өдөр буюу өчигдөр 21:35 цагт 3.6 магнитудын хүчтэй газар хөдлөлт болсон байна.

Энэ мэдээллийг 21:43 цагт Одон орон геофизикийн хүрээлэнгээс цахим шуудангаар ОБЕГ-т ирүүлсэн аж. Тус сумын Засаг даргын Тамгын газрын дарга, тус газар нутагладаг малчдаас тодруулахад иргэдэд чичирхийлэл мэдрэгдээгүй, учирсан хохиролгүй гэжээ.

Төрийн албан хаагчдын 50 хувийг, 0-5 настай эхчүүдийг гэрээс нь ажиллуулахаар шийдвэрлэв

Коронавирусийн “омикрон” хувилбарын тархалт дотоодод эрчимтэй тархан өдөрт илрэх халдварын тоо 2000-ыг даваад байгаа юм.

Цаг үеийн нөхцөл байдалтай холбогдуулан цөөнгүй аймаг Цагаан сарыг өнжихөө мэдэгдсэн. Тэгвэл энэ сарын 17-ноос буюу даваа гаригаас төрийн алба хаагчдын 50 хувийг гэрээс нь цахимаар ажиллуулж, долоо хоногийн хугацаатай ээлжлүүлэн ажиллуулах аж.

Мөн 0-5 хүртэл насны хүүхэдтэй, төрийн байгууллагад ажилладаг эмэгтэйчүүдийг Цагаан сарын баяр өнгөртөл гэрээс нь цахимаар ажиллуулах шийдвэр гарчээ.

2022 оны хоёрдугаар сард болох Бээжингийн өвлийн олимпыг “дипломатаар бойкотлох” хоригт Голланд болон Дани улсын эрх баригчид нэгдэхээр шийдвэр гаргасан талаар Европын хэвлэлүүд мэдээллээ.

БНХАУ өвлийн олимпын наадмыг гадаадын үзэгчидгүйгээр зохион байгуулахаар шийдвэр гаргасан учир Голланд улс Засгийн газрын төлөөлөгчдийг олимпын наадамд илгээхгүй юм. Харин тус улс тамирчид болон дасгалжуулагчдын багийг олимпод оролцуулна гэж мэдэгдсэн.

Голланд улсын хувьд АНУ, мөн барууны улс орнуудын нэгэн адил БНХАУ-ын эрх баригчдыг хүний эрхийг ноцтой зөрчиж байгааг нь эсэргүүцэн ийм алхам хийх болсон гэдгээ мэдэгдсэн юм.

Өмнө нь, Бээжингийн өвлийн олимпыг дипломат аргаар бойкотлох адилшийдвэрийг АНУ, Япон, Их Британи, Канад улс албан ёсоор зарласан.

“Дипломат бойкот” гэдэг нь тухайн улс өөрийн өндөр албан тушаалтан, итгэмжлэгдсэн төлөөлөгчдийг тэмцээн, хурал, аливаа арга хэмжээнд оролцуулахгүй байхыг хэлдэг.

Ши Жиньпин тэргүүтэй БНХАУ-д энэ мэтээр дипломат бойкотоор дарамт шахалт үзүүлэх нь тийм ч зохистой алхам биш гэж барууны зарим нэг улс орны тэргүүнүүд үздэг. Тодруулбал, 2021 оны арванхоёрдугаар сард Францын Ерөнхийлөгч Эммануэль Макрон ийм бойкот нь онцын үр дүнгүй гэж мэдэгдэж байсан. Тэрбээр хэлэхдээ, “Энэ сэдвийг хэт улстөржүүлж болохгүй гэж бодож байна” гэсэн юм.

2022 оны Бээжингийн өвлийн олимп Бээжин хотноо хоёрдугаар сарын 4-20-ны өдрүүдэд болно.

Алдарт эхийн одонгийн тэтгэмжийг 233,832 эхийн дансанд шилжүүлсэн талаар Хөдөлмөр, нийгмийн хамгааллын сайд А.Ариунзаяа өөрийн цахим хуудсанд мэдээлжээ.

Тэрбээр “65 мянга орчим нэгдүгээр зэргийн одонтой, 170 мянга орчим хоёрдугаар зэргийн одонтой ээжүүд байдаг.

Монгол Улсын Ерөнхийлөгчийн зарлигаар хүртээдэг энэхүү одонгийн тэтгэмжийн материалыг бид цахимаар авдаг болсон. Ehalamj.mn системээр дамжуулж хүсэлт илэрхийлж, дансаа холбоод тэтгэмжээ авах боломжтой.

Урд нь материал бүрдүүлэх, халамжийн хэлтэст өгөх, дараа нь банкнаас очиж авах, аваагүй бол мөнгө нь буцаагдах зэрэг олон хүндрэл учирдаг байв. Мэдээж цахим хэрэглээгүй иргэд уламжлалт аргаар үйлчилгээ авч байгаа” гэсэн байна.

Нидерланд улсын хаан Уиллем Александрын гэр бүл алтан сүйх тэрэгтэй. . Александр хаан парламентын хуралдааныг нээхдээ эл сүйх тэргийг хөлөглөдөг уламжлалтай.

Алтан сүйх тэргийн нэг талд колонийн үеийн боолчлолыг дүрсэлсэн зураг байдаг. “Колончлолд хүндлэл үзүүлье” гэдэг нэртэй уг зургийг Нидерландын зураач Николас Ваай 1896 онд зурсан юм.

Олон нийтийн зүгээс эл бүтээл боолын тогтолцоог эргэн сануулсан, арьс өнгөөр ялгаварлан гадуурхах үзлийг дэмжсэн гэж ихэд шүүмжлэх болсон.

Үүний улмаас Александр хааны гэр бүл алтан сүйх тэрэгнээсээ татгалзан, дахиж хэрэглэхгүй гэдгээ мэдэгджээ.

Улаанбаатар хотод суурин 158 цэгт 7800 иргэнийг дархлаажуулахаар төлөвлөжээ. Та өөрт ойр вакцины аль ч цэгт очиж дархлаажуулалтад хамрагдах боломжтой. Дархлаажуулалтын цэгүүд 10:00-18:00 цаг хүртэл ажиллана. Дархлаажуулалтын цэгийг дүүрэг тус бүрээр танилцуулж байна.