Month: January 2022

Categories
их-уншсан мэдээ туслах-ангилал үндэсний-бөx

Улсын харцага цолтонд хүндэтгэл үзүүлэх 256 бөхийн барилдаан цуцлагдав

“Жем групп”-ын нэрэмжит Монгол Улсын харцага цолтонд хүндэтгэл үзүүлэх улс, аймгийн алдар цолтой 256 бөхийн барилдаан өнөөдөр боллоо.

Энэ барилдаанд Улсын даян аварга Н.Батсуурь, Улсын арслан Р.Пүрэвдагва нар барилдахаар бүртгүүлсэн. Гэвч тэднийг барилдахыг эсэргүүцэн бусад бөхчүүд хүндэтгэлийн барилдааны нэгийн даваанд гарч барилдсангүй. Уг хоёр бөхийн хувьд 2019 оны Улсын их баяр наадмын дараа сэргээшийн шинжилгээнд бүдэрч, барилдах эрхээ 11 сараар хасуулсан юм. Гэхдээ хориглосон хугацаа нь дуусч, тэдний барилдах эрх энэ барилдаанд сэргэсэн аж.

Гэвч бөхчүүд допингийн хариуцлагын шийдвэр өөр өөр байгаад дургүйцлээ илэрхийлэн ийнхүү бойкот зарлажээ.

Допинг илэрсэн бөхчүүдийн барилдах эрхийг багадаа хоёр жилээр хасан, цол, чимгийг нь хурааж ирсэн. Харин даян аварга Н.Батсуурь, арслан Р.Пүрэвдагва, харцага Б.Бат-Орших нараас допинг илрэхэд 11 сараар хасаж, харилцан адилгүй шийтгэл ноогдуулсан юм.

Монголын үндэсний бөхийн холбооны тэргүүн Ц.Магалжав тайлбар хийхдээ, “Хоёр бөхийн эрхийг хассан шийдвэрийг бол Баяр наадмыг зохион байгуулах комисс гаргасан. Бөхчүүд үзэгч олон болон ахмад харцага цолтой бөхчүүдээ хүндлэн гарч зодоглох хэрэгтэй. Харин аварга Н.Батсуурь, арслан Р.Пүрэвдагва хоёр сайн дураараа энэ барилдаанаас татгалзах шаардлагатай байна” гэсэн уриалгыг хэлсэн юм.

Улсын арслан Р.Пүрэвдагва өөрийн саналаар бөхчүүд, бөх сонирхогч нараа хүндлэн малгайгаа авч ёслон уг барилдаанаас түдгэлзсэн бол аварга Н.Батсуурь шаардлагыг эсэргүүцсээр байв. Бөхийн жаяг дэгийн баг яаралтай хуралдаж, бөхийн олонх дургүйцэж байгаа тул Улсын аварга Н.Батсуурийг хүчээр уг барилдаанаас хасч, нэгийн давааг дахиж барилдуулах шийдвэр гаргаад байна.

Ийнхүү хүчит бөхийн нэгийн давааг дахин барилдуулахаар болсон ч аварга Н.Батсуурь болон түүний аав, харцага Г.Намсрайжав тэргүүтэй Увс аймгийн бөхчүүд талбай дээр гарч зогсон, эсэргүүцэл илэрхийлэн барилдааныг эхлүүлэхгүй байсан учир аргагүйн эрхэнд Монголын үндэсний бөхийн холбоо тус барилдааныг цуцаллаа.

Categories
мэдээ нийгэм

Дархлаажуулалтын цэгүүд 18:00 цаг хүртэл ажиллана

Өнөөдөр /2022.01.16/ Улаанбаатар хотод суурин 158 цэгт 158 багийн 737 эмч, ажилтан ажиллаж, 6000 иргэнийг дархлаажуулахаар төлөвлөлөө. Та өөрт ойр вакцины аль ч цэгт очиж, дархлаажуулалтад хамрагдах боломжтой. Дархлаажуулалтын цэгүүд 10:00-18:00 цаг хүртэл ажиллана.

Дархлаажуулалтын цэгийг дүүрэг тус бүрээр танилцуулж байна.

Categories
амьдралын-өнгө мэдээ

Дорноговь аймаг олон нийтийг хамарсан арга хэмжээг тодорхойгүй хугацаагаар хязгаарлав

“Covid-19” халдварын батлагдсан тохиолдлын тоо эрс нэмэгдэж, орон нутагт халдвар тархах эрсдэл өндөр байгаатай холбогдуулан зарим аймгууд цагаан сарын баярыг тэмдэглэхгүй байх, олон нийтийн үйл ажиллагааг хязгаарлах шийдвэр гаргаж буй.

Цар тахлын дараагийн давалгаа гарч, халдвар авсан иргэдийн тоо нэмэгдсэнтэй холбоотойгоор Дорноговь аймгийн Онцгой комисс хуралдаж дараах шийдвэрийг гаргалаа.

Үүнд, нэгдүгээр сарын 15-ны өдрөөс эхлэн аймгийн хэмжээнд олон нийтийг хамарсан соёл урлаг, биеийн тамир, үзвэр үйлчилгээ, хурал зөвлөгөөн, үзэсгэлэн худалдаа, цайллага, хүлээн авалтын арга хэмжээг тодорхойгүй хугацаагаар хязгаарлалаа.

Өнөөдрийн байдлаар Увс, Завхан, Орхон, Дархан-Уул, Ховд, Баянхонгор, Дорнод зэрэг аймгууд цагаан сарыг тэмдэглэхгүй байх чиглэл өгч, иргэдийнхээ амь нас, эрүүл мэндийг хамгаалах шийдвэр гаргажээ.

Categories
мэдээ үндэсний-бөx

Улсын аварга Н.Батсуурь, улсын арслан Р.Пүрэвдагва нарыг түдгэлзүүлж, барилдааныг дахин эхлүүлэв

Монгол бөхийн өргөөнд өнөөдөр //2022.01.16/ “Жем интернэшнл” группийн нэрэмжит, “Улсын харцага цолд хүндэтгэл үзүүлэх” Улс, аймгийн алдар цолтой 256 бөхийн барилдаан болж байна.

Уг барилдаанд зодоглохоор Улсын даян аварга Н.Батсуурь, Улсын арслан Р.Пүрэвдагва нар бүртгүүлжээ.

Улсын харцага О.Хангай тэргүүтэй бөхчүүд допинг хэрэглэсэн бөхчүүдийг шийтгэхдээ ялгавартай хандсан шударга бус байдлыг эсэргүүцэн өнөөдрийн барилдаанд оролцохгүй гэж тэмцэв. Ингэснээр Улсын аварга Н.Батсуурь, улсын арслан Р.Пүрэвдагва нарыг түдгэлзүүлж, барилдааныг дахин эхлүүлэв

Categories
булангууд мэдээ шинжлэх-ухаан-технологи

XIX зууны үеийн шашны хөгжмийн зэмсэг “Чөмгөн ганлин”

Хүний яс, мөнгө, мяндас, даавуу, будаг бүхий 34х6 см хэмжээтэй, 450 гр жинтэй 19 дүгээр зууны сүүл үеийн ганлин Баянхонгор аймгийн Түүх, угсаатны зүйн музейд хадгалагдаж байна.

Шашин номын хуралд хэнгэрэг, цан, үхэр бүрээний хамт үлээж, орчлон ертөнцийн мөнх бус, үхэл хагацал ирэхийг дурдан сануулах нэг зүйлийн хөгжмийн зэмсгийг ганлин бүрээ хэмээн нэрлэдэг. 18 настай эмэгтэйн хүний дунд чөмгөөр хийдэг хэмээн ам дамжин яригддаг дээрх хөгжмийн зэмсгийг чөмгөн ганлин гэнэ.

Чөмгөн ганлин нь 19 дүгээр зууны үеийн шашны хөгжмийн зэмсэг ба заримдаа гандан гэж нэрлэх нь бий. Дээр үед хүрээ, хийдүүд шашны элдэв зан үйлийн үед дун бүрээ, бишгүүр, матар гандан, их бүрээ, хэнгэрэг, цан, хонх, дамар, сэлнэн зэрэг төвөд, самгарди нэршилтэй үлээвэр болон цохилуур хөгжмийн зэмсгийг ашигладаг байжээ.

Дээрх хөгжмийн зэмсгийн ихэнх нь буддын шашны ёслол, зан үйлтэй холбогдож Төвдөөс орж ирсэн түүхтэй. Цордон бүрээ, дамар, хэнгэрэг, мөн балар (бишгүүр) зэргийг хослуулан үлээдэг ёстой. Эдгээр нь үлээвэр, цохивор хөгжмийн зэмсгийн төрөл юм. Урт бүрээг хэдэн хүн дамнан явж тоглодог бол дуударам, том жижиг цан, сэлнэн, дэншиг, гандан, дун зэрэг цохивор, үлээвэр хөгжмийн зэмсгийг өдөр тутмын хурал номын үед өргөн хэрэглэдэг байна.

Categories
мэдээ спорт цаг-үе

М.Уранцэцэг жүдогийн спортоос зодог тайлж, UFC-д шилжлээ

Монгол Улсын Хөдөлмөрийн баатар, МУГТ, олимпийн хүрэл, дэлхийн аваргын алт, мөнгө, хошой хүрэл медальт М.Уранцэцэг жүдо бөхөөс албан ёсоор зодог тайллаа.

Өчигдөр Хөдөлмөрийн баатарын хүндэтгэлийн ёслолын үеэрээ М.Уранцэцэг 17 жил хичээллэж, дэлхийд нэрээ дансалсан жүдо бөхийн спортоос зодог тайлах болж холимог тулааны UFC холбоонд шилжих болсноо зарлалаа.

Тэрээр 17 жилийн хугацаанд олон улсын томоохон тэмцээн, наадмуудаас олимп, дэлхийн медалийг оролцуулаад 21 алт, 16 мөнгө, 21 хүрэл медаль буюу нийт 47 медаль хүртэж түүхэн амжилт тогтоож дэлхийн дээд амжилтыг бүртгэдэг Геннист бүртгэгдсэн билээ.

Холимог тулааны дэлхийн хамгийн том холбоо болох UFC холбоонд тулалдахдаа тус холбооны хөнгөн жингийн аварга Хабиб Нурмагомедовын багтай гэрээ хийсэн байна. Дашрамд сонирхуулахад жүдо бөхөөс холимог тулаанд шилжин өндөр амжилт үзүүлсэн тамирчид цөөнгүй байдаг ба Бээжин-2008 олимпийн наадмын хүрэл медальт Ронда Рөүз, 2001 оны Азийн тивийн аварга, 2002 оны Пусаны азийн наадмын аварга Ёшихиро Акияама, 2008 оны Бээжингийн Олимпийн аварга Сатоши Иший зэрэг тамирчдыг дурдаж болно.

Categories
мэдээ нийгэм

Эмнэлэгт 7041, гэртээ 30.604 иргэн эмчлүүлж байна

Улсын хэмжээнд сүүлийн 24 цагт коронавируст халдварын 2,751 тохиолдол PCR шинжилгээгээр батлагдсаныг Эрүүл мэндийн яамнаас мэдээлэв.

Тухайн тохиолдлуудын

  • 1,886 нь Улаанбаатарт
  • 865 нь орон нутагт бүртгэгдэв.

Өнөөдрийн байдлаар халдварын улмаас 7,041 хүн эмнэлэгт хэвтэн эмчлүүлж байна. Эдгээр иргэнийг биеийн байдлаар нь ангилбал

  • хөнгөн 2,080
  • хүндэвтэр 4,147
  • хүнд 768
  • нэн хүнд 46 хүн байна.

Мөн гэрийн хяналтад 30,604 иргэн байгаа юм.

Categories
гадаад мэдээ

Галт уулын дэлбэрэлт 5.8 магнитуд чичирхийлэл үүсгэжээ

Японы Номхон далайн эргийн газрууд галт уулын дэлбэрэлтээс үүссэн давалгаанд өнөө өглөө өртсөнийг мэдээллээ. Номхон далайн өмнөд хэсгийн Тонга улсын ойролцоо өчигдөр орой галт уул дэлбэрсэн юм. Японы цаг уурын агентлагаас цунамийн сэрэмжлүүлэг гаргасан долоон бүс нутагт 210 мянга гаруй хүн амьдардаг бөгөөд тэднийг өндөрлөг газар руу нүүхийг сануулжээ.

Одоогийн байдлаар 1.1-1.2 метр өндөртэй давалгаа Амами болон Иватэ мужид өнгөрсөн шөнө 2:26 цагт бүртгэгдсэн бол Хоккайдо, Окинава, Кюшү мужид метр хүрэхгүй давалгаа үүсчээ. Гэсэн ч албаныхан өнөөдөр гурван метр цунамийн давалгаа ирж болзошгүй гэж сэрэмжлүүлсээр байна. Одоогоор хүн гэмтэж бэртсэн эсвэл хохирол учирсан гэх мэдээлэл гараагүй байна.

Footage by Japan's Himawari-8 satellite shows the volcanic eruption that provoked a tsunami in Tonga. | NATIONAL INSTITUTE OF INFORMATION AND COMMUNICATIONS (JAPAN) / VIA AFP-JIJI

“NHK” телевизийн мэдээлснээр Кочи мужид 10 завь живсэн бол Японы агаарын тээврийн компани 27 нислэгээ цуцалжээ. Галт уулын дэлбэрэлтийн голомтод ойр Тонга улсад 2020 оны дөрөвдүгээр сард хийсэн бүртгэлээр Японы 35 иргэн бүртгүүлсэн байна.

Японд сүүлд 2016 оны арваннэгдүгээр сард зүүн хойд хэсгийн нутагт 7.4 магнитуд газар хөдөлснөөр цунамийн сэрэмжлүүлэг гаргаж байв.

A Meteorological Agency map shows areas under a tsunami warning (red) and an advisory (yellow) as of early Sunday morning. | JAPAN METEOROLOGICAL AGENCY

ЭХ СУРВАЛЖ: THE JAPAN TIMES

Categories
мэдээ нийгэм цаг-үе

234 мянган алдарт эхэд одонгийн тэтгэмж олгожээ

Алдарт эхийн одонгийн тэтгэмжийг 233.832 эхийн дансанд шилжүүлсэн талаар Хөдөлмөр, нийгмийн хамгааллын сайд А.Ариунзаяа өөрийн цахим хуудсанд мэдээлжээ.

Тэрбээр “65 мянга орчим нэгдүгээр зэргийн одонтой, 170 мянга орчим хоёрдугаар зэргийн одонтой ээжүүд байдаг.

Монгол Улсын Ерөнхийлөгчийн зарлигаар хүртээдэг энэхүү одонгийн тэтгэмжийн материалыг бид цахимаар авдаг болсон. Ehalamj.mn системээр дамжуулж хүсэлт илэрхийлж, дансаа холбоод тэтгэмжээ авах боломжтой.

Урд нь материал бүрдүүлэх, халамжийн хэлтэст өгөх, дараа нь банкнаас очиж авах, аваагүй бол мөнгө нь буцаагдах зэрэг олон хүндрэл учирдаг байв. Мэдээж цахим хэрэглээгүй иргэд уламжлалт аргаар үйлчилгээ авч байгаа” гэсэн байна.

Categories
мэдээ нийгэм цаг-үе

Өнөөдөр нутгийн зүүн хагаст хүйтэн, жавартай байна

Малч­ид, иргэд, тээвэрчдэд зориулсан мэдээ: Өнөөдөр нутгийн зүүн хагаст хүйтэн, жавартай байна.

2022 оны 01 сарын 16-ны 08 цагаас 20 цаг хүртэл: Баруун болон зүүн аймгуудын нутгаар солигдмол үүлтэй, бусад нутгаар багавтар үүлтэй. Улз, Халх голын хөндийгөөр цас орж, явган шуурга шуурна. Салхи нутгийн баруун хэсгээр баруунаас, бусад нутгаар баруун хойноос секундэд 5-10 метр, тал, хээрийн нутгаар секундэд 12-14 метр хүрч ширүүснэ. Увс нуур болон Дархадын хотгор, Тэс голын хөндийгөөр 23-28 хэм, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Эг, Үүр, Орхон, Ерөө, Хэрлэн, Онон, Улз, Халх голын хөндийгөөр 16-21 хэм, цас багатай газар болон говийн бүс нутгийн өмнөд хэсгээр 4-9 хэм, бусад нутгаар 11-16 хэм хүйтэн байна.

УЛААНБААТАР ХОТ ОРЧМООР: Багавтар үүлтэй. Цас орохгүй. Салхи баруун хойноос секундэд 4-9 метр. 13-15 хэм хүйтэн байна.

БАГАНУУР ОРЧМООР: Багавтар үүлтэй. Цас орохгүй. Салхи баруун хойноос секундэд 5-10 метр. 12-14 хэм хүйтэн байна.

ТЭРЭЛЖ ОРЧМООР: Багавтар үүлтэй. Цас орохгүй. Салхи баруун хойноос секундэд 5-10 метр. 14-16 хэм хүйтэн байна.

2022 оны 01 дүгээр сарын 17-ноос 2022 оны 01 дүгээр сарын 21-нийг
хүртэлх цаг агаарын урьдчилсан төлөв

17-нд төвийн аймгуудын нутгийн хойд хэсгээр, 18-нд төвийн аймгуудын нутгийн зүүн хэсэг, зүүн аймгуудын нутгийн зарим газраар, 19-нд баруун аймгуудын нутгийн хойд хэсгээр, төвийн аймгуудын нутгийн баруун хойд хэсгээр, 20-нд нутгийн хойд хэсгээр цас орж, явган шуурга шуурна. Салхи 17, 18-нд говь, тал, хээрийн нутгаар, 19, 20-нд зарим газраар секундэд 12-14 метр хүрч ширүүснэ. Өдөртөө ихэнх нутгаар хүйтний эрч суларч Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс, Халх голын хөндийгөөр шөнөдөө 32-37 хэм, өдөртөө 21-26 хэм, Их нууруудын хотгор, Алтай, Хангай, Хөвсгөл, Хэнтийн уулархаг нутаг, Эг, Үүр, Хараа, Ерөө, Туул, Тэрэлж, Хэрлэн, Онон, Улз голын хөндийгөөр шөнөдөө 26-31 хэм, өдөртөө 16-21 хэм, цас багатай газар болон говийн бүс нутгийн баруун өмнөд хэсгээр шөнөдөө 12-17 хэм, өдөртөө 1-6 хэм, бусад нутгаар шөнөдөө 18-23 хэм, өдөртөө 10-15 хэм хүйтэн байна.