Монгол-Канадын Хөдөө аж ахуйн хамтарсан хорооны III хурлын мөрөөр Хүнс, хөдөө аж ахуй, хөнгөн үйлдвэрийн яам болон Канад Улсын SEMEX компани хоорондын анхдугаар уулзалтыг цахимаар зохион байгуулав.

SEMEX нь Канадын фермерүүдийн санаачилгаар байгуулагдсан, 80 гаруй оронд бүтээгдэхүүнээ экспортолдог, Европ, Америк тивд үрийн үйлдвэрээр тэргүүлдэг компани юм. Уулзалтын үеэр SEMEX-ийн мах, сүүний чиглэлийн малын чанар, үүлдэр угсааг сайжруулах Progenesis, Boviteq, Immunity+ технологи, уугуул малын үүлдэр, омгийг үржил селекцийн технологиор гойд ашиг шимтэй болгох хамтын ажиллагааны туршлагаа Дэд ерөнхийлөгч М.Маккреди хуваалцлаа.

ХХААХҮЯ-ны Мал аж ахуйн бодлогын хэрэгжилтийг зохицуулах газар төрөөс мал аж ахуйн салбарт баримтлах бодлого, малын генетик, удмын сан, эрүүл мэндийг хамгаалах эрх зүйн орчин, эрчимжсэн мал аж ахуйг хөгжүүлэх бодлогыг танилцуулсан юм.

Генетикийн салбарт хамтран ажиллахад хоёр талын эрх зүйн орчныг боловсронгуй болгох шаардлага байгаа аж. Дараагийн хурлаар SEMEX генетикийн бүтээгдэхүүнийг импортлох, орон нутагт түгээх, түүнийг хэрэглэх арга ажиллагааны талаар нарийвчлан хэлэлцэхээр тохиров.

Газар нутаг, байгаль, эрс тэс цаг агаарын ижил нөхцөлтэй Канад Улсаас малын генетикийн өндөр технологийн бүтээгдэхүүн импортолж нутагшуулах, мэргэжилтэн бэлтгэх, хамтарсан судалгаа, үржил селекцийн чиглэлээр ажиллах боломж байна гэж дүгнэжээ.

Монгол Улсын Засгийн газрын 2022 оны нэгдүгээр сарын 19-ний өдрийн 47 дугаар тогтоолоор Мэргэжлийн хяналтын ерөнхий газрын даргаар томилогдсон Б.Баасандорж тамгаа гардан, үүрэгт ажлаа хүлээн авлаа.

Мэргэжлийн хяналтын ерөнхий газрын дарга асан, ШӨХТГ-ын дарга Т.Гантулга тамга гардуулахдаа “Юуны түрүүнд дэлхий нийтийг хамарсан цар тахлын амаргүй цаг үед хамтран ажиллаж, өөрчлөлт шинэчлэлийг хийхэд нэг баг болж, зорилго нэг байсан албан хаагчдадаа талархаж байна. Цар тахлын үед та бид Засгийн газар, Улсын онцгой комиссоос гаргасан эрх зүйн баримт бичгүүдийг хэрэгжүүлж, цаг наргүй, амралтгүй ажилласан.

Мэргэжлийн хяналтын байгууллага бол том айл. Энэ том айлыг удирдах богино хугацаанд багагүй ажил хийж хэрэгжүүллээ. Мэргэжлийн хяналтын байгууллагын үйл ажиллагааны эрх зүйн орчныг боловсронгуй болгох зорилгоор Төрийн хяналт шалгалтын тухай хуулийн шинэчилсэн найруулгын төслийг боловсруулж, үзэл баримтлалыг батлуулаад байна. “Дижитал шилжилт- Хэрэглэгчийн хяналт” төслийг хэрэгжүүлж эхэлснээр мэргэжлийн хяналтын байгууллагын үйл ажиллагааг бүрэн цахимжуулах нөхцөлийг бүрдүүллээ. Өнөөдөр Мэргэжлийн хяналтын ерөнхий газарт иргэн, аж ахуйн нэгжээс ирж байгаа бүх хүсэлт, гомдол мэдээлэл бүрэн цахимжсан. Тусгай зөвшөөрөл, гэрчилгээ, импортын мэдэгдэл олгох зэрэг 54 төрлийн үйлчилгээг иргэн, аж ахуйн нэгжүүд цахимаар авч байна. Аж ахуйн нэгжүүд Хяналт удирдлагын системд холбогдож өөрсдийгөө үнэлдэг тогтолцоог бүрдүүллээ. Улсын байцаагчид иргэн, аж ахуйн нэгжүүдэд цахимаар зөвлөгөө өгч, зөвлөн туслах үйлчилгээ үзүүлдэг болсон” гэдгийг онцлоод шинээр томилогдсон даргад ажлын амжилт хүсэв.

Монгол Улсын Шадар сайд С.Амарсайхан Мэргэжлийн хяналтын ерөнхий газрын даргаар томилогдсон Б.Баасандоржид баяр хүргэж, амжилт хүсээд “Цар тахлын үед мэргэжлийн хяналтын байгууллагын албан хаагчид тэргүүн эгнээнд цаг наргүй, хичээж зүтгэж ажилласан. Агаарын бохирдлыг бууруулах тухай Засгийн газрын тогтоолыг хэрэгжүүлэхэд онцгой үүрэг гүйцэтгэсэн. Цаашид нийгмийн хүлээлт, сэтгэлгээг өөрчлөхөд та бидний хамтын ажиллагаа чухал” хэмээн тодотгоод мэргэжлийн хяналтын байгууллагын удирдлагуудад цаашид анхаарч ажиллах асуудлаар үүрэг даалгавар өглөө.

Мэргэжлийн хяналтын ерөнхий газрын дарга Б.Баасандорж “Засгийн газрын Шинэ сэргэлтийн бодлогын хүрээнд Мэргэжлийн хяналтын байгууллага бизнес эрхлэгчдээ дэмжсэн бодлого баримталж, цаашид хэрэгжүүлэх ажлыг хамтын оролцоотой хийж, мэргэжлийн хяналтын байгууллагын одоогийн нөхцөл байдлыг хамтдаа өөрчилье” гэлээ.

Хятад улсын нийслэл Бээжин хотноо Олимпын наадамд оролцохоор хүрэлцэн ирсэн хүмүүсийн дундаас коронавирусний халдварын 15 шинэ тохиолдол илэрлээ гэж наадмыг зохион байгуулах хорооноос мягмар гарагт нийтэлсэн мэдэгдэлд дурджээ.

Тодруулбал, нэгдүгээр сарын 24-ний өдөр Хятадад 246 хүн ирснээс 23 нь тамирчин болон албаны хүмүүс, 223 нь “бусад сонирхогч талуудын төлөөлөгчид” байсан гэж Олимпын наадмыг зохион байгуулах хороо мэдээлжээ. Тэднээс PCR шинжилгээ авахад сонирхогч талуудын төлөөлөгчид дундаас халдварын 12 тохиолдол илэрчээ. Харин өөр гурван тохиолдол нь өмнө нь ирээд шинжилгээ өгсөн хүмүүсийн дундаас илэрсэн нь нэг нь тамирчин, хоёр нь сонирхогч талуудын төлөөлөгчид аж.

Нэгдүгээр сарын 23-ны өдөр ОХУ-ын Олимпын хорооны найман төлөөлөгч Бээжинд хүрэлцэн очжээ. Бээжингийн олимпод оролцох Оросын багийн төлөөлөгчдийн тэргүүн Андрей Конокотиний мэдээлснээр, тэдний коронавирусний шинжилгээний хариу нь “сөрөг” гарсан байна.

Коронавирусний халдвар илэрсэн олимпын оролцогчид 10 хоног тусгаарлагдсаны дараа өмнө нь захиалсан буудалдаа буцах боломжтой. Гэхдээ “COVID-19”-ийн шинж тэмдэг илрээгүй, шинжилгээний хариу нь гурван өдөр дараалан сөрөг гарсан байх шаардлагатай байна.

“Тэрбум мод” үндэсний хөдөлгөөний хүрээнд зохион байгуулсан “Ногоон дэлхий-Бидний ирээдүй” сэдэвт хүүхдийн гар зургийн уралдаанд шагналт байр эзэлсэн бүтээлүүд тодорлоо.

Монгол Улсын Ерөнхийлөгчийн Тамгын газар, Байгаль орчин, аялал жуулчлалын яам, Гэр бүл, хүүхэд, залуучуудын хөгжлийн газар хамтран зохион байгуулсан тус уралдаанд нийт 300 гаруй бүтээл иржээ. Үүнээс:

9-16 насны ангилалд

• Нэгдүгээр байрыг “Модоо хайрлах сэтгэл” бүтээлээр нийслэлийн Сэлбэ сургуулийн сурагч Ө.Уранжигүүр /10 настай/
• Хоёрдугаар байрыг “Ногоон дэлхий-Бидний ирээдүй” бүтээлээр Сэлэнгэ аймгийн Хөтөл сумын 1 дүгээр сургуулийн сурагч Б.Дэлгэрмаа /16 настай/
• Гуравдугаар байрыг “Хайрын цэцэрлэг” бүтээлээр нийслэлийн Монгени цогцолбор сургуулийн сурагч Б.Никкол /15 настай/
• Тусгай шагналыг “Ээж” бүтээлээр нийслэлийн 2 дугаар сургуулийн сурагч Б.Цэцэн /14 настай/
• Тусгай шагналыг “Байгалийн судас” бүтээлээр Завхан аймгийн Их-Уул сумын Ерөнхий боловсролын сургуулийн сурагч Э.Жавхлантөгс /14 настай/ нар хүртсэн байна.

8 хүртэлх насны ангилалд

• Нэгдүгээр байрыг “Бидний бүтээх ногоон ирээдүй” бүтээлээр нийслэлийн 5 дугаар сургуулийн сурагч М.Сүндэръяа /8 настай/
• Хоёрдугаар байрыг “Ховдог халзан тугал минь байгалиа хайрлая” бүтээлээр нийслэлийн Баянзүрх дүүргээс оролцогч П.Маргадмаа /4 настай/
• Гуравдугаар байрыг “Ирээдүйг хамгаалъя” бүтээлээр Говь-Алтай аймгийн Есөн булаг сумаас оролцогч Б.Сугар-Эрдэнэ /8 настай/
• Тусгай шагналыг “Мод тарья” бүтээлээр нийслэлийн 65 дугаар сургуулийн сурагч Э.Анужин /7 настай/
• Тусгай шагналыг “Хүн бүр гэр бүлээрээ тэрбум мод тарья” бүтээлээр нийслэлийн 84 дүгээр сургуулийн сурагч Т.Хатанзаяа /8 настай/нар хүртэв.

Зэвсэгт хүчний 014 дүгээр анги, Цус сэлбэлт судлалын үндэсний төвтэй хамтран “Цусаа хандивлаж, бусдын амийг аваръя” аяныг зохион байгууллаа.

Цар тахлын халдвар буурахгүй байгаатай холбогдуулан цусны доноруудын хандив буурч, цусны нөөц улс орон даяар багассан энэ үед инженерийн цэргүүдийн аян оновчтой арга хэмжээ болж чадсан юм.

Бусдад амьдрал бэлэглэх аянд хугацаат цэргийн алба хаагчид өөрсдийн хүсэлтээр хамрагдсанд Цус сэлбэлт судлалын үндэсний төвөөс талархал илэрхийлж, “Эх орноо батлан хамгаалагч эр цэргүүд та нар энэ үйлсээрээ том гавьяа байгуулж байна. Бусдын алтан амийг аварна гэдэг дайны талбарт нөхөртөө тусалсан шиг баатарлаг үйлс, хэзээ ч мартагдахгүй мөнхийн гавьяа” хэмээн баяр хүргэж, цэргийн албаа нэр төртэй хаахыг захилаа.