Month: January 2022

Цар тахлын нэг удаагийн хуулийн дагуу ипотекийн зээлийн эргэн төлөлтийг хойшлуулах боломжтой болсон. Ингэснээр зээлийн хугацаа хойшилж, хүү царцана. Харин тухайн иргэн зээлээ хойшлуулсан хугацаанд дансандаа мөнгө байршуулбал, хүү бус үндсэн төлөлтөөс хасагдах юм. Энэ нь иргэдэд ихээхэн боломж болж байна. Тухайлбал, Д.Одхүүгийн гэр бүл өнгөрсөн нэг жилийн хугацаанд гэрийнхээ болон ажлынхаа ус цахилгаан, хогны мөнгийг хуримтлуулан, орлоготойгоо нийлүүлж ипотекийн зээлийн үлдэгдэл болох 36 сая төгрөгөөс 26 орчим сая төгрөгийг төлөөд байна. Тэднийх 2015 онд 20 жилийн хугацаатай авсан 49 сая төгрөгийн ипотекийн зээлээ хугацаанаасаа 13 жилийн өмнө буюу долоон жилийн хугацаанд төлж дуусгах гэж байна. 2015 оноос хойш сар бүр 500 мянган төгрөг зээлэндээ өгдөг байсан. Гэхдээ энэ мөнгөний 270 мянган нь зээлийн хүүнд, харин 230 мянга нь үндсэн төлбөрөөс хасагддаг байжээ.

2021 оныг хүртэл 6 жилийн хугацаанд хүү, үндсэн төлбөр нийлсэн 13 сая төгрөг төлж байсан бол 2021 оноос хойш өнөөдрийг хүртэлх нэг жилийн хугацаанд 6 жилийн хугацаанд төлснөөсөө илүүг төлж, хүү бус үндсэн төлөлтөө төлж дуусгах гэж байгаа юм.

Тэд энэ боломжийг зээл ипотекийн зээл хойшлуулах хүсэлт гаргаснаараа олжээ. Энэ хүмүүстэй адил зээл хойшлуулсан зурвас хугацааг өрийн дарамтаас гарч, өрхийн эдийн засгаа босгох нэг боломж болгож байна.

Төв банкнаас мэдээлснээр 400 гаруй зээлдэгч зээлээ хойшлуулах хүсэлт гаргасан байна.

Канадын цэргийн сургагч нар “Unifier” ажиллагааны хүрээнд 2025 он хүртэл Украинд байрлана гэж тус улсын Ерөнхий сайд Жастин Трюдо лхагва гарагт мэдэгджээ.

“Өнөөдөр (нэгдүгээр сарын 26) би “Unifier” ажиллагааг дахин гурван жилээр сунгаж байна” гэж тэрбээр мэдэгджээ. Үүнээс гадна, Украинд байрлаж буй цэргийн тоог 200-гаас 400 болгон нэмэгдүүлэхээр болсон байна.

Канад улс Киевт зэвсэг үргэлжлүүлэн нийлүүлэхийн зэрэгцээ тагнуулын мэдээлэл солилцож, кибер халдлагатай тэмцэхэд дэмжлэг үзүүлсээр байх болно гэж Ж.Трюдо мэдэгджээ. Түүний хэлснээр, тус улсын Батлан хамгаалахын сайд Анита Ананд ойрын үед Украинд айлчилна.

Канадын эрх баригчид Украины эргэн тойронд үүссэн асуудлыг дипломат аргаар зохицуулахыг дэмжиж байгааг тэрбээр мөн мэдэгджээ.

МҮЭХ, Сургуулийн өмнөх боловсролын ҮЭ-ийн нэгдсэн хороо, 21 аймгийн үйлдвэрчний эвлэлийн холбооноос цаг үеийн асуудлаар мэдээлэл хийлээ. “Төрийн үйлчилгээний хамгийн бага албан тушаалд хөдөлмөр эрхэлдэг ажилтнуудыг хувийн байгууллагад гэрээт ажилтан болгох шийдвэр гарсан. Энэхүү шийдвэрийг бид оны өмнөхөн эсэргүүцэж буйгаа илэрхийлсэн мөн шаардлага тавьсан. Харин бидний тавьсан шаардлагын хариуг Засгийн газар өчигдөр ирүүллээ. Үүнд төрийн үйлчилгээний ТҮ1-ТҮ3 зэрэглэлийн ажилчдыг өөрийн хүсэл сонирхлоор буюу сайн дурын үндсэн дээр бусад байгууллага, хувийн хэвшилд харьяалагдан ажиллаж болно. Хэрэв ийм сонголт хийсэн тохиолдолд цалинг бууруулахгүй нэмнэ гэж хариу ирүүлсэн. Гэвч Засгийн газраас гаргасан энэ шийдвэр хөрсөн дээрээ буухгүй байна. Учир нь зарим төрийн үйлчилгээний ажилтнуудын цалин арванхоёрдугаар сарын 18-наас өнөөдрийг хүртэл буугаагүй. Харин буусан цалин нь ямар нэгэн урамшуулал, нэмэлтгүй ердөө үндсэн цалин байна. Зөвхөн үндсэн цалинг олгоод үлдсэн нэмэлт, урамшууллыг хэн авав. Энэ зөрчлийг илрүүлэхгүй бол бид тэмцлийн дараагийн шатанд орохоо мэдэгдэж байна” гэж МҮЭХ-ны ерөнхийлөгч С.Эрдэнэбат мэдээллээ.

Ардчилсан намын төлөөллүүд цаг үеийн асуудлаар мэдээлэл хийлээ.

АН-ын дэд дарга Ч.Отгочулуу “Эрх баригч нам амлалтаа мартаад байгаа учир бид хамтдаа сануулах нь зүйтэй. МАН анх тэтгэвэр, тэтгэмжийг инфляцтай уялдуулж нэмнэ гэсэн амлалт өгсөн. Гэвч тоо баримт их өөр байна. Инфляц албан ёсоор 15 хувь, албан бусаар 60-70 хувьтай байгаа. Гэтэл тэтгэвэр үүнтэй уялдаж өсөхгүй байгаа юм.

Өнгөрсөн онд 353 мянган иргэн нийт 1.8 их наяд төгрөгийн тэтгэвэр авдаг байжээ. Энэ тоо төдийлөн өсөхөөргүй харагдаж байна. Өндөр настнуудын сард авч байгаа тэтгэврийн хэмжээний худалдан авах чадвар эрс буурсан.

2016 онд сарын тэтгэвэр нь 190 ам.доллартой тэнцдэг байв. Тэгвэл өнөөдөр 150 ам.доллар болж буурсан байна. Өөрөөр хэлбэл худалдан авах чадвар нь 20 хувиар унасан. 2016 онд тэтгэврийн мөнгөөрөө 50 кг мах авдаг байсан бол одоо 30 кг мах ч авч хүрэхгүй. Зөвхөн махаар илэрхийлэхэд өндөр насны тэтгэвэр авагчдын худалдан авах чадвар 40 хувиар буурсан байна.

Тэтгэврийг нэмэх боломж бий юу гэж асуух байх. Энэ онд зургаан их наяд төгрөгөөр барилга, байгууламж барина гэсэн төсвийг баталсан. Тэтгэврийн нийт мөнгөнөөс гурав дахин их мөнгө. Олон хэрэггүй бүтээн байгуулалт байгаа. Зарим сумын төвд хоёр дахь соёлын ордонг барьж байна. Энэ нь зардал нэмэх учир хувьчлах нь зүйтэй. Үүний оронд өндөр насны тэтгэврийг нэмэх хэрэгтэй. Дундаж тэтгэвэр 380 мянга орчим төгрөг. Энэ мөнгөөр яаж амьдрах вэ бодоод үзээрэй.

Эрх баригчид тэтгэврийг инфляцтай уялдуулж нэмнэ гэж амласан. Улсын төсөв гурав дахин, хөшөөнд очиж буй мөнгө гурваас дөрөв дахин өссөн. Харамсалтай нь тэтгэвэр 30-40 хувиар унасан байна гэдгийг сануулъя” гэлээ.

Сүүлийн 24 цагийн хугацаанд улсын хэмжээнд коронавируст халдварын 2273 тохиолдол бүртгэгджээ.

Шинээр илэрсэн тохиолдлуудын 1183 нь Улаанбаатар хотод, 1090 нь орон нутагт батлагдсан байна.

Мөн коронавируст халдварын улмаас 2 хүн нас баржээ. Нас баралтын дийлэнх хувийг зүрх судасны өвчлөл эзэлж байна.

Гэрийн хяналтад 59737 хүн байна.