Month: January 2022

Ачаа тээвэр, карго үйлчилгээ үзүүлэгч байгууллага тээвэрлэж буй бараа бүтээгдэхүүнийг сайтар шалгаж, баримт бичгийн бүрдлийг хангахыг ГХЯ-ны Консулын газраас анхаарууллаа.

Мөн хилээр хориотой бараа бүтээгдэхүүн тээвэрлэхээс зайлсхийх, бараа бүтээгдэхүүн илгээж буй иргэд гарал үүсэл нь тодорхойгүй хүнсний бүтээгдэхүүн, хориотой эд зүйлс илгээж хууль, журам зөрчихгүй байхыг анхааруулсан байна. Учир нь улс хооронд тээвэрлэж, илгээж буй ачаа бараанаас гарал үүсэл нь тодорхойгүй, гаалийн бүрдүүлэлтгүй хүнсний бүтээгдэхүүн, амьтны гаралтай хориотой бараа бүтээгдэхүүн илэрч дотоодын болон гадаад улсын хууль тогтоомжийг зөрчих тохиолдол гарч байгаа аж.

Гарал үүсэл нь тодорхойгүй, гаалийн бүрдүүлэлтгүй ачаа, бараа тээвэрлэх, илгээх нь эрүүгийн хариуцлага хүлээлгэх үндэслэл болох бөгөөд ачаа тээврийн үйлчилгээнд хориг тавих, торгууль ногдуулах, иргэд эд зүйлс, хөрөнгө мөнгөөр хохирох эрсдэлтэйг сэрэмжлүүлж байна.

Сонирхогчдын боксын 22 хүртэлх насны ангиллын Ази тивийн аварга шалгаруулах тэмцээн Узбекистаны нийслэл Ташкент хотод үргэлжилж байна. Энэ сарын 20-нд эхэлсэн тус тэмцээнд дасгалжуулагч Б.Пүрэв-Очир, М.Буянжаргал, С.Эрдэнэбат нарын удирдлагад 15 боксчин оролцож буй. Тэгвэл Азийн АШТ-ий эрэгтэйчүүдийн 60 кг-ын жинд Баярхүүгийн Буяндалай хүрэл медаль хүртлээ.

Америкийн Нэгдсэн Улс болон Монгол Улс нь монголын оюутан залууст чанартай боловсрол эзэмших боломж олгон хоёр орны боловсролын байгууллагуудын хооронд урт хугацааны харилцааг бий болгох хамтын үүрэг хүлээж буйгаа бататган хамтарсан Фулбрайтын Оюутны тэтгэлэгт хөтөлбөрийн санхүүжилт, үйлчилгээний шинэчилсэн гэрээнд энэ оны нэгдүгээр сарын 27-ны өдөр гарын үсэг зурлаа.

Шинэчилсэн гэрээ нь хөтөлбөрт оролцогчдод өмнө нь тавьж байсан барьцааны шаардлагыг албан ёсоор цуцалж байгаа бөгөөд энэ нь тэтгэлэгт хамрагдах боломжийг эдийн засгийн байдлаас үл хамааран бүх монгол залууст нээлттэй болгож байгаа юм.

Гарын үсэг зурах ёслолын ажиллагаанд АНУ-аас Монгол Улсад суугаа Элчин сайд Майкл Клечески болон Монгол Улсын Боловсрол, шинжлэх ухааны сайд Л. Энх-Амгалан нар байлцав.

“Боловсролын салбарын хамтын ажиллагаа нь энэхүү 35 жилийн дипломат харилцааны үндсэн суурь нь байж ирсэн бөгөөд өнөөдрийн арга хэмжээ нь энэхүү өдрийг тэмдэглэх төгс ёслол болж байна” хэмээн Элчин сайд Клечески хэллээ.

Фулбрайтын хөтөлбөр Монголд 28 жилийн өмнө эхэлсэн бөгөөд Монголын анхны Фулбрайтын зочин-судлаач 1994 онд, анхны оюутан 1995 онд АНУ руу явж байжээ. Түүнээс хойш АНУ-ын Засгийн газрын санхүүжилтээр нийт 400 гаруй хоёр талын солилцоог Фулбрайт хөтөлбөрийн хүрээнд хэрэгжүүлээд байна.

Хамтарсан Фулбрайтын хөтөлбөр хэрэгжүүлэх хэлэлцээр 2009 оноос эхэлж, 2010 оны 12 дугаар сарын 15-ны өдөр гэрээнд гарын үсэг зурсан. Түүнээс хойш Монгол Улсын Засгийн газрын санхүүжилттэйгээр 100 гаруй монгол оюутан боловсрол, байгалийн шинжлэх ухаан, нийгмийн эрүүл мэнд, геологи, инженерчлэл зэрэг мэргэжлээр магистерийн зэрэг эзэмшээд байна.

“Энэхүү 100 гаруй залуучууд өнөөдөр Монгол Улсын нийгэм, эдийн засагт үнэтэй хувь нэмрээ оруулж буй, тухайн салбар бүрдээ манлайлагч болсон гэдгийг онцолж хэлэхийг хүсэж байна” хэмээн Боловсрол, шинжлэх ухааны сайд Л. Энх-Амгалан ёслолын үеэр хэлэв.

Боловсрол, шинжлэх ухааны чиглэлээрх хамтын ажиллагааны хүрээнд АНУ-ын Элчин сайдын яам нь жил бүр нийт 2 сая гаруй ам. долларын санхүүжилттэй 120 гаруй хоёр талын, бүрэн тэтгэлэгт солилцоог хэрэгжүүлж байна.

АНУ-ын Засгийн газрын боловсролын солилцооны тэргүүлэх хөтөлбөр Фулбрайт нь дэлхийн 160 гаруй оронд хэрэгждэг ба олон улсын боловсрол, соёлын солилцооны хосгүй боломжийг санал болгодог хөтөлбөр юм. Фулбрайт хөтөлбөр нь ээдрээтэй, үргэлжид хувьсан өөрчлөгдөж буй ертөнцөд хүмүүсийг хооронд нь холбож байх зорилготой. Дэлхийн Фулбрайтуудын сүлжээ нь АНУ болон хамтрагч улс орнуудын хоорондын харилцан ойлголцлыг нэмэгдүүлж, мэдлэг мэдээллийг түгээж, дэлхийн өнцөг булан бүрд амьдрах нөхцөлийг сайжруулсаар байна.

АНУ болон Монгол Улс нь энх тайван, хөгжил цэцэглэлтийг дэмжих үүднээс хоёр орны хүмүүс хоорондын харилцаа холбоог бэхжүүлэхийн төлөө тууштай хамтран ажилласаар ирсэн.

Ерөнхий сайд Л.Оюун-Эрдэнэ Засгийн газрын хуралдааны үеэр Хөгжлийн банктай холбоотой асуудлыг хуулийн байгууллагаар шалгуулах үүрэг өгчээ. Тодруулбал, Хөгжлийн банкнаас авсан 26 зээлдэгчийн нэр хэвлэлээр ил болсон. Иймээс дээрх зээлээ төлөөгүй компанийг АТГ-т шалгуулах үүргийг өгсөн байна.

Хөгжлийн банкны нийт зээлийн 55.3 хувь нь чанаргүй зээлдэгчийн ангилалд орсон бөгөөд гэрээний үүргээ биелүүлээгүй 26 компанийг шүүхэд өгч, 841 тэрбум төгрөгийн нэхэмжлэл гаргаснаа тус банкны гүйцэтгэх захирал Н.Мандуул мэдээлсэн билээ.

Тус банкны зарласан чанаргүй 26 зээлдэгчийн нэрсийг хүргэе. Тус банкнаас өмнө нь тэднийг зээлээ цаг тухайд нь төлөхийг сануулж, хэвлэлийн бага хурал хийж байсан юм. Монгол Улсын Хөгжлийн банкийг “дампууруулсан” 26 компани дотор Улаанбаатар хотын захирагч Д.Сумъяабазараас авхуулаад, улстөрчдийн халаасны компаниуд ч бий. Улмаар Хөгжлийн банкнаас “Улстөрчдийн нөлөө орсон байхыг үгүйсгэхгүй. Зориуд бусаар зээл авч, ажил хийх ёстой аж ахуйн нэгжүүдийн боломжийг хулгайлсан” гэж тодотгож байв.

---

МЗХ-ны ерөнхийлөгч О.Гэрэлт-Од ‘’Холимог тулааны улсын аварга шалгаруулах анхдугаар тэмцээн’’-нд оролцож амжилт гаргасан ‘’Мазаалай’’ клубын тамирчдыг шагнаж урамшууллаа.

Тус клубын үүсгэн байгуулагч, байлданы самбо төрөлд дэлхийн 7 удаагийн хошой аварга МУГТ Б.Дамланпүрэвийг МЗХ-ны ойн медаль хүндэт тэмдгээр шагнаж, дасгалжуулагч багш Олон улсын хэмжээний мастер Л.Батбаярыг МЗХ-ны ”Залуучуудын зүтгэлтэн” цол тэмдэгээр, залуу тамирчин Б.Агарзандан, Л.Балдан-Очир, О.Ганзориг нарыг тэргүүний залуу алтан медалиар, С.Гэрсэнс, Н.Хишигбаяр, Н.Батцэнгэл нарыг Хөдөлмөрийн алдар медалиар, А.Тэмүүлэн, Б.Хүрэлболд, П.Содномдорж, Г.Өлзийбат, Б.Тэнгис нарыг ”Тамирчны алдар” цол тэмдэгээр тус тус шагналаа. Спортын хүнд төрлөөр хичээллэж өөрийн хүч хөдөлмөрөө бүрэн дайчилж үлгэр дуурайлал үзүүлдэг тамирчид, багш дасгалжуулагчдадаа амжилтийн дээдийг хүсэн ерөөе.