Ардын жүжигчин Э.Амартүвшин ирэх хоёрдугаар сарын 8-наас Ром хотын театрт тавих “Луйза Миллер” дуурьд дуулахаар болжээ. Ф.Шиллерийн “Хар санаа, хайр сэтгэл” жүжгээс сэдэвлэн С.Камаронно цомнол бичиж, үүнийг нь Ж.Верди гурван бүлэгт дуурь болгосон нь “Луйзи Миллер” юм. Э.Амартүвшин тус дуурьд Миллерийн дүрийг бүтээх аж.
Тэрбээр үүний өмнө мөн Ж.Вердийн “Набукко” дуурийн Набуккогийн дүрд тоглож, арванхоёрдугаар сараас энэ сарын 23 хүртэл Английн Хатан хааны дуурийн театрыг “амилуулсан” юм.
Монгол Улс АНУ-ын хооронд шууд нислэг эхлүүлэх бэлтгэлийн явцын талаар албаны хүмүүс ИНЕГ-т мэдээлэл солилцох уулзалт, хурлыг хоёр дахь удаагаа зохион байгууллаа.
Хурлаар хоёр улсын хооронд агаарын харилцаа тогтоох, агаарын тээврийн хэлэлцээр байгуулах үйл явц, АНУ-ын Холбооны нисэхийн захиргаа, тээврийн аюулгүй байдлын агентлагаас шууд нислэгтэй болоход бусад улсад тавьдаг шаардлага, бэлтгэлийн талаар хэлэлцэв. Мөн “МИАТ” ХК-ас Монгол-АНУ хооронд шууд нислэг үйлдэх, тухайн чиглэлийн агаарын хөлөг сонголтын тухай танилцуулжээ.
ИНЕГ-ын дарга С.Мөнхнасан “Энэ нислэг нээлттэй болсноор манай улсын иргэний нисэхийн аюулгүй байдал, аюулгүй ажиллагаанд дэвшил гарна. Мөн АНУ-ыг зорих, тус улсаас Монгол Улсыг зорих иргэдийн хувьд цаг хугацаа, мөнгө санхүүгээ хэмнэх давуу талтай” гэв.
Монгол Уулсаас АНУ-д суугаа Элчин Сайд Ө.Батбаяр “Хоёр улсын хооронд шууд нислэг нээх цаг хугацаа, нөхцөл боломж нээлттэй болсон. Энэ ажлыг шуурхайлахын тулд АНУ-ын талтай уулзалт хийж, хэлэлцээр шат шатандаа нааштай өрнөж байна. Бид 2023 онд эхний нислэгээ үйлдэхээр зорьж байна” гэдгийг хэлсэн юм.
“МИАТ” ТӨХК-ны гүйцэтгэх захирал Б.Мөнхтамир “Монгол Улс АНУ-ын хооронд шууд нислэг хийх нь эдийн засгийн болоод хоёр улсын хамтын ажиллагаанд чухал ач холбогдолтой үйл явдал” гэдгийг онцолжээ.
Энэ удаагийн хуралд ИНЕГ-ын дарга С.Мөнхнасан, ИНЕГ-ын АТБЗГ-ын дарга Г.Батбаяр, ИНЕГ-ын Нисэхийн аюулгүй ажиллагааны хяналт зохицуулалтын албаны ерөнхий менежер Г.Амарцэцэг, “МИАТ” ТӨХК-ийн Гүйцэтгэх захирал Б.Мөнхтамир, “МИАТ” ТӨХК-ийн Нислэг үйлдвэрлэлийн зохицуулалт, инженерингийн хэлтсийн дарга Э.Гантулга, ИНЕГ-ын Агаарын тээврийн бодлого, зохицуулалтын газрын Агаарын харилцааны тасгийн дарга Д.Түвшинбаяр оролцов. Мөн Монгол Улсаас АНУ-д суугаа Элчин Сайд Ө.Батбаяр, Олон улсын гэрээ, эрх зүйн газрын захирал С.Сүхболд, Иргэний нисэхийн бодлогын хэрэгжилтийг зохицуулах газрын дарга Ч.Мөнхтуяа, Гадаад хамтын ажиллагааны хэлтсийн Б.Нямдаваа онлайнаар оролцож санал бодлоо хуваалцжээ.
Боловсрол, шинжлэх ухааны яамнаас 2022 оныг ёс зүйн жил болгон зарлаж, сургууль дахь гадуурхал, дээрэлхэлтийг бууруулж, хүүхэд хамгааллын үйлчилгээнд анхаарах, гүйцэтгэл, үр дүнд суурилсан санхүүжилтийн тогтолцоог нэвтрүүлж, багшийн мэргэжлийн тасралтгүй хөгжил, боловсролын чанарын үнэлгээ, сургалтын чанар, цахим сургалт, хоол үйлдвэрлэл үйлчилгээнд бодитой ахиц гаргах зорилт дэвшүүлж, төлөвлөлт хийж байгаа аж.
Түүнчлэн Баян-Өлгий аймгийн боловсролын салбарт 2022 онд хэрэгжүүлэх ажлын төлөвлөгөөг эцэслэж, холбогдох албан тушаалтнуудад үүрэг чиглэл өгчээ. Баян-Өлгий аймгийн Засаг даргын орлогч С.Ханоев тэргүүтэй ажлын хэсэг өнгөрсөн өдрүүдэд Улаанбаатар хотод ажиллаж, БЕГ, БХ, БҮТ-тэй хамтран 5 үндсэн чиглэл бүхий 31 үйл ажиллагааг тусгасан ажлын төлөвлөгөөг эцэслэсэн байна.
Тус аймгийн боловсролын салбарт 2022 онд бодитой шинэчлэл өөрчлөлтүүд хийгдэж, сургалтын чанарт 10-20 хүртэлх хувийн ахиц гаргах, Багш нарыг ил тод, нээлттэй сонгон шалгаруулалтын зарчмаар сонгон ажиллуулж, мэдлэг ур, чадварыг сайжруулахад цахим платформ, нээлттэй эх үүсвэрүүдийг ашиглах төсөв санхүүгийн эх үүсвэрүүдийг тусгалаа. Бага ангийн сурагчдын монгол хэлний чадварыг хөгжүүлэхэд мэргэжлийн багш нарын дэмжлэг оролцоог авах, эцэг эхийн сонголтоор цэцэрлэг, сургуулиудад монгол хэл дээрх сургалтыг зохион байгуулж, уян хатан зохицуулалт хийхээр болжээ.
Боловсролын газар, зарим цэцэрлэг, сургууль, дотуур байранд хэрэгцээтэй тоног төхөөрөмжийн хангалтыг хийж, сургалтын таатай орчин нөхцөлийг бүрдүүлэхэд дэмжлэг үзүүлнэ.
Энэ оны хоёрдугаар сард багтаан Баян-Өлгий аймаг дахь багшийн сургуулийн МУБИС-ийн харьяанд шилжүүлж, Удирдах зөвлөлийн хурлаар бүтэц, орон, стратегийн хөтөлбөрийг хэлэлцэн батална. Мөн тус сургуулийг түшиглэн багшийн тасралтгүй хөгжлийн төв, хос хэлний судалгааны төв, ахлах сургуулиудыг байгуулж, цогцолбор байдлаар хөгжүүлэх бодлогыг баримтална хэмээн БШУЯ-наас мэдээллээ.
Монгол Улсын Засгийн газрын 2018 оны 354 дүгээр тогтоолоор батлагдсан “Соёлын биет бус өвийг үндэсний болон дэлхийн хэмжээнд сурталчлан алдаршуулах, түгээн дэлгэрүүлэхэд онцгой хувь нэмэр оруулсан өвлөн уламжлагчид мөнгөн шагнал олгох журам”-ын дагуу жил бүр нэг өвлөн уламжлагчийг шалгаруулж, мөнгөн шагналаар шагнадаг.
2021 оны шилдэг өвлөн уламжлагчаар Өвөрхангай аймгийн Баян-Өндөр сумын харьяат, хөхүүр урлаач, “Гүүний айраг исгэх уламжлалт арга технологи” өвийг өвлөн уламжлагч Д.Гүндэгмаа шалгарлаа.
Шагналыг Соёлын сайд Ч.Номин гардуулж, талархал илэрхийллээ.
Тэрбээр “Нүүдэлчин монголчуудын ертөнцийг үзэх үзэл, ахуй амьдрал, зан заншил, шүтлэг бишрэл, байгаль хүн хоорондын харилцаа, уламжлалт идээ ундааны соёлын тод илэрхийлэл болсон соёлын биет бус өвийн нэгэн төрөл зүйл болох хөхүүр урлах, “Гүүний айраг исгэх уламжлалт арга технологи” өвийг өөрийн өвөө, аав, ээжээс язгуур хэв намбаар нь өвлөн уламжилж, түгээн дэлгэрүүлж, залуу хойч үедээ өвлүүлэн уламжлуулж буй Дашзэвэгийн Гүндэгмаа танд талархал дэвшүүлье.
2021 онд шилдгээр шалгаруулахаар нэр дэвшүүлсэн 19 өвлөн уламжлагчийн дундаас Хөхүүр урлах, “Гүүний айраг исгэх уламжлалт арга технологи” өвийг үндэсний болон дэлхийн хэмжээнд сурталчлан алдаршуулах, түгээн дэлгэрүүлэх, шавь сургалтаар дамжуулан өвлүүлэн уламжлуулахад онцгой хувь нэмэр оруулж буй таны хөдөлмөр, зүтгэл шалгарч, Монгол Улсын Соёлын биет бус өвийн 2021 оны шилдэг өвлөн уламжлагчаар шалгарлаа.
ЮНЕСКО-ийн “Хүн төрөлхтний соёлын биет бус өвийн Төлөөллийн жагсаалт”-д 2019 онд бүртгэгдсэн “Хөхүүрийн айраг исгэх уламжлал, холбогдох зан үйл” өвийг залуу хойч үед уламжлалт хэв шинжээр нь өвлүүлэн уламжлуулж, өвлөн уламжлагчдын тоог нэмэгдүүлэх, түгээн дэлгэрүүлэхэд таны үүрэг, оролцоо үнэлж баршгүй их юм.
Дашзэвэгийн Гүндэгмаа танд Монгол Улсын Засгийн газрын нэрийн өмнөөс Соёлын биет бус өвийн 2021 оны “Шилдэг өвлөн уламжлагч” хүндэт өргөмжлөлийг гардуулж, өндрөөс өндөр амжилтыг хүсэхийн зэрэгцээ эрүүл, энх урт удаан наслан, үр хойч бидэндээ үнэт өвийн их сангаа өвлүүлэн уламжлуулж, түмэн олон шавь нарын хамт соёлын өвийг түгээн дэлгэрүүлж явахын өлзийтэй сайхан ерөөлийг өргөн дэвшүүлье” гэлээ.
Д.Гүндэгмаа нь 1957 онд төрсөн, 65 настай. Монголын ард түмний уламжлалт идээ ундаа, арьс ширэн урлалын илэрхийлэл болох хөхүүр урлах, “Гүүний айраг исгэх уламжлалт арга технологи” өвийг өөрийн өвөө Ж.Цэвэгдоржоос сурч, эдүгээ 49 жил өвлөн уламжилж, түгээн дэлгэрүүлж байна. Гүндэгмаа нь хонины ноосоор эсгий боловсруулж төрөл бүрийн эсгийг гар аргаар ширж урлах, ямааны арьсаар дах дэгтий хийх, үхрийн шир, ямааны арьсаар борви, сур, хөхүүр урлах, адууны хялгасаар дээс, монгол гэрийн тоноглол хийхээс гадна хөхүүрийн айраг исгэх арга барил, айрагны амт чанараар нутаг орондоо төдийгүй Монгол орон даяар онцгойрон шалгарч, 2008 онд “Монгол Улсын брэнд айраг”-ны эзнээр тодорсон өвлөн уламжлагч юм.
Д.Гүндэгмаа нь бага балчир наснаас мал маллах арга ухааныг сурч, эзэмшсэн бөгөөд түүнийг Өвөрхангай аймгийн “Залуу аварга малчин” (1981), Монголын хувьсгалт залуучуудын эвлэлийн Төв хорооны “Тэргүүний малчин залуу” (1981) алтан медаль, Өвөрхангай аймгийн Баян-Өндөр сумын “Аварга малчин” (1981-1983), “Хөдөө аж ахуй, хүнсний үйлдвэрийн тэргүүний ажилтан” цол, тэмдэг (2011), “Хөдөлмөрийн салбарын тэргүүний ажилтан” цол, тэмдэг (2014), “Алтан гадас” одон (2014) “Сайн малчин”, “Өвөрхангай аймгийн Баян-Өндөр сумын Мянгат малчин” (2017), “Өвөрхангай аймгийн Баян-Өндөр сумын Сайн малчин” (2018), “Нүүдэлчин Монгол” соёлын биет бус өвийн наадмын “Шилдэг оролцогч”, “Монгол Улсын Соёлын тэргүүний ажилтан” (2018), “Өвөрхангай аймгийн Шилдэг өвлөн уламжлагч” цол (2019), Өвөрхангай аймгийн “Аварга малчин” (2020), “Хөдөлмөрийн гавьяаны улаан тугийн одон” (2021)-оор тус тус шагнагдсан.
Өвлөн уламжлагч Д.Гүндэгмаа нь Засгийн газрын 2019 оны 475 дугаар тогтоолоор баталсан “Соёлын биет бус өвийн өвлөн уламжлагчийн үндэсний жагсаалт”-д бүртгэгдсэн 102 өвлөн уламжлагчийн нэг юм.
Ташрамд дурдахад, тус журмын дагуу 2018 онд Өвөрхангай аймгийн Өлзийт сумын иргэн, олноо Дөмөн хэмээн алдаршсан уртын дуучин Д.Дулмаа, 2019 онд нийслэлийн Баянзүрх дүүргийн иргэн, туульч А.Балдандорж, 2020 онд Увс аймгийн Малчин сумын иргэн, Баяд бийч, ихэлч Ж.Хумбаа нар шилдэг өвлөн уламжлагчаар шалгарч, мөнгөн шагналаар шагнагдсан билээ.
“UBCab” Онлайн такси үйлчилгээ эрхлэгчид тулгуур эрхтний бэрхшээлтэй, тэргэнцэртэй хүмүүст зориулан “UBCab care” тусгай үйлчилгээг гуравдугаар сард багтааж гаргахаар болсон байна.
Тус компанийн удирдлагууд ярилцаад “Заавал байх ёстой үйлчилгээ” гэж үзжээ. Эл ажлын судалгааг “Зориг” сангийн залуу манлайлагч хөтөлбөрийнхөн хийсэн аж.
УИХ-ын ээлжит бус чуулганы хуралдаанаар энэ оны төсвийн тухай, Нийгмийн даатгалын сангийн төсвийн тухай хуульд өөрчлөлт оруулах тухай хуулийн анхны хэлэлцүүлгийг явуулж байна.
Хэлэлцүүлэгтэй холбогдуулан гишүүд асуулт асууж, хариулт авав.
УИХ-ын гишүүн Ч.Хүрэлбаатар “Төрийн сангаас мөнгө гарч амжаагүй байхад бид төсөвт тодотгол хийхээр сууж байна. Энэ бүгд биднийг бодолтой, хариуцлагатай байхыг илтгэж байна. Төсвийн тухай хуулиар төсвийн орлого бууж байж тодотгодог үндсэн зарчимтай. Төсвийн орлого давбал хэмнэгдээд үүсээд байсан өрийг барагдуулахад чиглэх үндсэн агуулгатай нийцэхгүйгээр энэ удаагийн төсвийн тодотгол орж ирж байна.
Нийгмийн даатгалын сан алдагдалтай. Бидний гаргаж буй шийдвэрээр 650-750 тэрбум төгрөг нэмэлтээр хэрэгтэй. Ирэх 2023 онд нэг их наяд төгрөгөөр хэрэгтэй болно. Алдагдлыг бид улам л нэмээд байна. Асар их алдагдалтай нийгмийн даатгалын сангаа цаашид яах вэ гэдэг толгойн өвчин гарч ирнэ.
Үүнийг дагаад энэ ондоо ч юм уу халамжуудыг нэмэх хэрэгтэй. Цалин нэммээр байна. Хөдөлмөрийн хөлсний доод хэмжээ 420 мянган төгрөг буюу хөдөлмөрлөж байж авдаг мөнгө нь ийм байхад тэтгэвэр нь 500 мянга байх нь агуулгаараа халамжаас хөдөлмөрт шилжинэ гэдгийн эсрэг болоод байна.
Үнийн өсөлт хүссэн хүсээгүй явж таарна. Мөнгөний бодлогоор барина. Буруу бодлого улам хөөсрүүлэх болов уу” гэлээ.
Сангийн сайд Б.Жавхлан “Он гараад удаагүй байхад тодотгол хийж байгаа нь тийм ч таатай зүйл биш. Гэхдээ Монгол Улсын нөхцөл байдал, Ерөнхийлөгчөөс чиглэл ирсний дагуу тухайн шийдвэрийг гаргасан. Хэрвээ өнгөрсөн оны эхний хагас жилд Цар тахлын хууль байгаагүй бол дөрөв, таван удаа төсөвт тодотгол хийх нөхцөл байдал үүссэн.
Өмнөх жилийн эцсийн төсвийн гүйцэтгэл бидний төсөөлж байснаас харьцангуй өөдрөг гарлаа. 326 тэрбум төгрөгийн давсан орлогыг цаг үеийн нөхцөл байдалтай холбож, тэтгэврийг нэмэхэд зориулах боломж гарч байна” гэв.
Нийтээр тэмдэглэх баярын болон тэмдэглэлт өдрүүдийн тухай хуульд Цагаан сар буюу билгийн тооллын хаврын тэргүүн сарын шинийн 1,2,3-нд бүх нийтээр амарна гэж заасан байдаг.
Гэвч “Монгол зурхайн цаг тооны бичиг”-т энэ жил шинийн хоёрноос дөрвөн рүү шилжсэн байгаа юм. Өөрөөр хэлбэл, шинийн гурваны өдөр байхгүй, шинийн 7-н хоёр өдөр дараалж тохиож байгаа юм. Үүнтэй холбоотой шинийн 3-ны өдөр амрах эсэхийг Засгийн газар шийднэ гэсэн мэдээлэл олон нийтийн сүлжээнд түгээд байна. Харин албаны эх сурвалжийн мэдээлж буйгаар “иргэд хоёрдугаар сарын 2-ны өдөр буюу шинийн 1-ний өдрөөс эхлэн хоёрдугаар сарын 4-ийг хүртэл бүх нийтээр гурав хоног амарна” гэлээ.
Авлигатай тэмцэх газрын Мөрдөн шалгах хэлтэс Хөгжлийн банкны албан тушаалтнуудад холбогдох хэрэг, үйлдлийг мөрдөн шалгаж, шүүхэд шилжүүлэх саналтай прокурорт шилжүүлэн, улмаар зарим хэрэг нь шүүхээр шийдвэрлэгдэж байгаа билээ.
Хөгжлийн банкнаас төсөл хөтөлбөрүүдэд зээл олгох явцад авлига, албан тушаалын гэмт хэрэг үйлдэгдсэн эсэх, зээлийг зориулалтын дагуу зарцуулсан эсэх, төсөл хөтөлбөрийн хэрэгжилт, зээлийн эргэн төлөлт зэрэгт мөрдөн шалгах ажиллагаа явуулсан ба тэдгээрээс 8 санхүүжилтийн явцад гэмт хэрэг үйлдэгдсэн үндэслэл тогтоогдсон тул эрүүгийн хэрэг үүсгэж, Эдийн засгийн хөгжлийн сайд асан Б, УИХ-ын гишүүн асан Г нарт холбогдох албан тушаалын эрх мэдлээ хэтрүүлж улсад 2.3 тэрбум төгрөгийн хохирол учруулсан гэх хэрэг, Хөгжлийн банкны гүйцэтгэх захирлаар ажиллаж байсан М, ТУЗ-ийн дарга Ш, тус зөвлөлийн гишүүн О нарт холбогдох албан тушаалын эрх мэдлээ урвуулж улсад 4.8 тэрбум төгрөгийн хохирол учруулсан гэх хэрэг, тус банкнаас авсан зээлээ зориулалтын дагуу ашиглаагүй иргэн Б, хамаарал бүхий этгээддээ давуу байдал олгосон албан тушаалтан Г, албаны эрх мэдлээ урвуулан албан тушаалтныг дарамталж хамаарал бүхий этгээддээ давуу байдал үзүүлсэн Б, зээл олгосны хариуд бусдаас хахууль авч үндэслэлгүйгээр хөрөнгөжсөн байж болзошгүй Э нарын хүмүүсийг яллагдагчаар татаж хэргүүдийг тус тус шүүхэд шилжүүлэх саналтай Прокурорын байгууллагад шилжүүлсэн юм.
Хөгжлийн банкны гүйцэтгэх захирлаар ажиллаж байсан Н.Мөнхбат нь албан тушаалын байдлаа урвуулан ашиглаж Хөгжлийн банк дахь чөлөөт мөнгөн хөрөнгийг арилжааны банканд хугацаатай байршуулах үйл ажиллагааг бие даан шийдвэрлэж үргэлжилсэн үйлдлээр буцаан татах шаардлагагүй арилжааны банкуудад байршуулсан 102 ширхэг мөнгөн хадгаламжийг хугацааны өмнө буцаан татсанаас хүүгийн орлогыг алдагдуулж, Хөгжлийн банканд 3.4 тэрбум төгрөгийн хохирол учруулсан.
Мөн албан тушаалын байдлаа урвуулан ашиглаж Худалдаа хөгжлийн банкны төв барилгаас ажлын байр худалдан авах ажлыг зохион байгуулж, хууль бус тогтоол гаргуулснаар үл хөдлөх эд хөрөнгө худалдах, худалдан авах тухай гэрээ байгуулж, зах зээлийн ханшаас хэт өндөр буюу 27.5 тэрбум төгрөгөөр худалдан авч, Хөгжлийн банканд 4.9 тэрбум төгрөгийн хохирол учруулсан.
Түүнчлэн албан үүрэг, бүрэн эрх, албан тушаалын байдлаа урвуулан ашиглаж бусдад давуу байдал олгож нөхцөл хангаагүй компанид нийт 17.8 сая юань шилжүүлж их хэмжээний хохирол учруулсан гэх хэргийг мөрдөн шалгасан бөгөөд Сүхбаатар дүүргийн Эрүүгийн хэргийн анхан шатны шүүхээс 2021 оны 11 дүгээр сарын 09-ний өдөр Н.Мөнхбатыг гэм буруутайд тооцож, хөөн хэлэлцэх хугацаа дууссан үндэслэлээр хэргийг хэрэгсэхгүй болгон шийдвэрлэсэн байна.
Авлигатай тэмцэх газрын Мөрдөн шалгах хэлтсээс Хөгжлийн банкны гүйцэтгэх захирлаар ажиллаж байсан Б.Батбаяр, мөн тус банкны нэр бүхий 6 албан тушаалтанд Эрүүгийн хуулийн тусгай ангийн 22.1 дүгээр зүйлийн 2 дахь хэсэгт заасан гэмт хэрэгт эрүүгийн хэрэг үүсгэж, яллагдагчаар татан мөрдөн шалгах ажиллагааг явуулж байна хэмээн АТГ-аас мэдээлэв.
УИХ-ын чуулганы хуралдаан үргэлжилж байна. Ээлжит бус хуралдаанаар ахмадуудын тэтгэвэр нэмэх асуудлыг хэлэлцэж байна. Хэлэлцэж байгаа асуудалтай холбогдуулан гишүүд асуулт асуун, үг хэлж байна.
УИХ-ын гишүүн Б.Бат-Эрдэнэ “Шатыг дээрээс шүүрдэнэ. Хулгай луйвруудыг таслан зогсоохын тулд Ерөнхий сайд ямар ажил хийх вэ. НДС-гаас завшсан Капитал банк, Хөрөнгө оруулалтын банкны луйвруудыг чимээгүй хараад суух уу. Хөгжлийн банкны 841 тэрбум төгрөгийг завшаад алга болсон 26 зээлдэгчийн зарласан байна. Бүгд улс төрийн эрх мэдэлтнүүдийн асуудал. Ерөнхий сайд хийж байсан хүний асуудал ч яригдах ёстой. Энэ талаар яагаад ажил хийхгүй байна вэ” гэж асуулаа.
Ерөнхий сайд Л.Оюун-Эрдэнэ “Засгийн газар авлигатай тэмцэх асуудалд анхаарч байгаа. Өмнөх Засгийн газрын хуралдаанаар Хөгжлийн банктай холбоотой бүх өр төлбөр, авсан хамаарал бүхий этгээдүүдийг АТГ-т шалгуулахаар өгсөн. Нэг жилийн хугацаанд бид хүсэлт тавьсан. Мэдээж бизнесийн хувьд хүндэрсэн ААН бий. Гэхдээ боломжтой мөртлөө төрийн байгууллагад ингэж хандаж байгаа иргэн, ААН-үүд байж болохгүй. Хуулийн байгууллага дээр очоод учраа олох байх.
Таны хэлсэн бүх асуудлуудыг хууль, хяналтын байгууллагад шалгуулахаар өгсөн” гэв.
Тээврийн цагдаагийн албаны Жижүүрийн шуурхай удирдлагын төвд энэ долоо хоногт нийт 1,239 дуудлага мэдээлэл хүлээн авснаас зам тээврийн ослын шинжтэй 997 дуудлага мэдээлэл бүртгэгджээ.
Нийт 23 осол бүртгэгдэж, үүний улмаас 23 хүн гэмтэж, хоёр иргэн нас барсан байна. Тодруулбал,
Нийслэлд хүн гэмтэж бэртсэн нийт 19 осол бүртгэгдэж, 21 хүн гэмтэж бэртсэн байна.
Орон нутагт хүн гэмтэж бэртсэн нийт 4 осол бүртгэгдэж, хоёр хүн гэмтэж, хоёр хүн амиа алджээ.
Энэ долоо хоногт явган зорчигч автомашинд мөргүүлэх хэлбэрээр 17 осол бүртгэгдэж, 17 хүн гэмтсэн байна. Тэдний дөрөв нь явган хүний гарцаар зам хөндлөн гарч байгаад автомашинд мөргүүлж гэмтэж бэртсэн байна.
Энэ долоо хоногт явган зорчигч хэлбэрээр автомашинд мөргүүлж гэмтсэн хүний тоо өмнөх долоо хоногтой харьцуулахад 41 хувиар өсжээ. Замын хөдөлгөөнд явганаар оролцох үедээ мөргүүлсэн иргэдийн дунд архи согтууруулах ундааны зүйлийг хэтрүүлэн хэрэглэсэн тохиолдолд цөөнгүй байгаа аж. Иймд иргэд архи согтууруулах ундааны зүйлийг зүй зохистой хэрэглэх, хэтрүүлэн хэрэглэсэн найз нөхөд, хамт олныгоо хараа хяналттай ар гэрт нь хүлээлгэн өгөхийг цагдаагийн байгууллагаас анхааруулж байна.
Түүнчлэн согтууруулах ундааны зүйл хэрэглэсэн үедээ тээврийн хэрэгсэл жолоодсон 272 зөрчил бүртгэгдсэний нийслэлд 194, орон нутагт 78 зөрчлийг тус тус илрүүлж, учирч болох эрсдэлээс урьдчилан сэргийлэн ажиллажээ.
Орон нутгийн замд хөдөлгөөнд оролцох үедээ автомашины бүрэн бүтэн байдал, шатахуун, тослох материал, дулаан хувцас, хүнсээ хангаж, цаг агаар, зам орчныхоо нөхцөл байдалд хурдаа зөв тохируулж хөдөлгөөнд оролцохоос гадна архи, согтууруулах ундааны төрлийн зүйл хэрэглэсэн үедээ тээврийн хэрэгсэл жолоодохгүй байхыг Тээврийн цагдаагийн албанаас анхааруулж байна.