Month: January 2022

Categories
мэдээ спорт цаг-үе

Монгол Улс Бээжингийн өвлийн олимпод оролцоно

Монгол Улсын Ерөнхий сайд Л.Оюун-Эрдэнэ 2021 оны арванхоёрдугаар сарын 30-ны өдөр УИХ-ын чуулганы нэгдсэн хуралдааны үеэр “Олимп бол хүн төрөлхтний наадам, үүнийг улс төрөөс ялгаж салгаж ойлгох хэрэгтэй” гэж хэлжээ. Ийнхүү Монгол Улс Бээжингийн өвлийн олимпийг дэмжиж, холбогдох арга хэмжээнүүдэд оролцохоо илэрхийлэв. Энэ тухай мэдээг Хятадын Үндэсний радио телевиз болон “China news”, “Фөн Хуан”, “Хятадын залуучуудын цахим хуудас” зэрэг хэвлэл мэдээллийн сувгуудаар олон нийтэд мэдээлсэн байна.

Хятадын Гадаад хэргийн яамны хэвлэлийн төлөөлөгч Жао Лижиан “Хятад, Монгол хоёр улс уул усаараа холбогдсон, харилцан чухал, нөхөрсөг харилцаатай билээ. Өдгөө хоёр улсын харилцаа хөгжин дэвжиж байгаа бөгөөд цаашид ч нөхөрсөг харилцаагаа улам гүнзгийрүүлж батжуулна гэж найдаж байна. Прагматик болон цар тахлын эсрэг хамтын ажиллагаа маш амжилттай болсон.

Монгол Улсын ерөнхий сайд Л.Оюун-Эрдэнэ Бээжингийн олимпийн нээлтийн ёслолд оролцохоо илэрхийлсэн анхны гадаад удирдагчдын нэг боллоо. Бид үүнийг маш таатай хүлээн авч, өвлийн олимпийг амжилттай зохион байгуулахад үзүүлж буй дэмжлэгт нь талархсанаа илэрхийлж байна. Олимпийн наадмын гол утга учир бол нөхөрлөл, ойлголцол, эв нэгдэл, эрх тэгш байдал юм. Энэ бол Хятад, Монгол гээд дэлхийн олон орны нийтлэг хүсэл эрмэлзэл билээ.

Олон улсын хамтын хүчин чармайлтаар Бээжингийн өвлийн олимп амжилттай сайхан зохион байгуулагдана гэдэгт бид итгэж байна. Мөн дэлхий дахины эв найрамдлыг улам бататгаж, цэрэг арми болоод олон улсын хамтын нийгэмлэгүүдийн үйл ажиллагааг бэхжүүлнэ гэж итгэж байна” хэмээн байр сууриа илэрхийлэв.

Харин АНУ, Их Британи, Австрали, Канад, Япон тэргүүтэй орнууд Шинжаан дахь хүний эрхийн зөрчил, үндэсний цөөнхийн эсрэг бодлоготой холбогдуулан ирэх хоёрдугаар сард эхлэх өвлийн олимпийг дипломат аргаар бойкотлохоо мэдэгдсэн билээ.

Эх сурвалж: MFA.GOV

Categories
мэдээ нийгэм

ЭСЯ: Ганнамд монгол иргэд хоорондоо зодолдсон

БНСУ-ын хэвлэл мэдээллийн хэрэгслээр 2022 оны нэгдүгээр сарын 02-ны өдрийн 20:03 цагт Сөүл хотын Ганнам дүүрэгт байрлах Шиннунхён метроны буудлын ойролцоо Монгол Улсын гурван иргэн бусдад зодуулсан гэх мэдээлэл гарсан.

Дээрх мэдээллийг манай зарим хэвлэл мэдээллийн хэрэгсэл болон хувь хүмүүс “Монгол Улсын гурван иргэнийг Солонгос иргэн шалтгаангүйгээр зодсон” гэх ташаа мэдээллийг фэйсбүүк, цахим орчинд түгээж байна.

Тус ЭСЯ-ны Консулын хэлтсээс Ганнам дүүргийн Цагдаагийн газартай уулзаж, хэргийн талаар тодруулсан. Цагдаагийн газрын мэдээлснээр манай улсын найман иргэн хоорондоо маргалдсан явдал болсон бөгөөд хэвлэл мэдээллийн хэрэгслээр бичигдэж байгаа шиг зодоон болж, нэгнийхээ эрүүл мэндэд ноцтой гэмтэл учруулсан зүйл байхгүй, хэргийг хянан шалгаж байгаа талаар мэдэгдсэн болно.

Эх сурвалж: ЭСЯ-НЫ КОНСУЛЫН ХЭЛТЭС

Categories
мэдээ нийгэм

Буянт-Ухааг нөөц нисэх буудлаар ажиллуулахаар боллоо

“Буянт-Ухаа” нисэх буудал олон улс болон орон нутгийн нислэгийн нөөц нисэх буудлаар ажиллах боломжтой болж, ИНЕГ-ын дарга С.Мөнхнасан гэрчилгээг нь гардууллаа.

Гэрэл зургийн эх сурвалж: ИНЕГ

Засгийн газрын 2019 оны 455 дугаар тогтоолоор “Буянт-Ухаа” нисэх буудлыг олон улс, орон нутгийн нислэгийн нөөц нисэх буудал, ерөнхий зориулалт, нисэхийн сургалт, захиалгат, онцгой, тусгай үүргийн нислэг, агаарын хөлгийн засвар, үйлчилгээ болон онцгой байдал, иргэний нисэхийн бусад үйл ажиллагаанд ашиглахаар ИНЕГ-ын харьяанд ажиллуулахаар шийдвэрлэсэн билээ.

Засгийн газрын 455 дугаар тогтоолын хэрэгжилтийг бүрэн хангах ажлын хүрээнд “Буянт-Ухаа” аэродром нь ИНД-139 “Аэродромын үйл ажиллагаа, гэрчилгээжүүлэлт” дүрэмд нийцүүлэн гэрчилгээжих шаардлагатай байсан юм.

Зам, тээврийн хөгжлийн сайдын 2019 онд шинэчлэн баталсан ИНД-139 “Аэродромын үйл ажиллагаа, гэрчилгээжүүлэлт” дүрмийн дагуу “Буянт-Ухаа” нисэх буудал нь холбогдох бэлтгэл ажлыг хангаж, НААХЗА-аас тавигдсан шаардлагуудыг хэрэгжүүлсний дүнд хязгаарлагдмал нөхцөлтэйгөөр аэродромын үйл ажиллагаа явуулах эрх буюу “Хязгаарлагдмал аэродромын гэрчилгээ”-ээг ИНЕГ-аас авснаар олон улсын болон орон нутгийн нөөц нисэх буудлаар үйл ажиллагаа явуулах боломжтой болж, Засгийн газрын 455 дугаар тогтоол бүрэн хэрэгжиж эхэлжээ.

Засгийн газраас “Буянт-Ухаа” нисэх буудлыг үндсэн зориулалтаар буюу иргэний нисэхийн чиглэлээр ашиглах, нисэхийн аюулгүй ажиллагааг хангах, зорилгоор 2021 онд тус нисэх буудлын газрыг улсын тусгай хэрэгцээнд авсан юм.

Эх сурвалж: Иргэний нисэхийн ерөнхий газа

Categories
мэдээ нийгэм цаг-үе

Манай улсын 13 үйлдвэр БНХАУ руу гурил экспортлох эрхтэй болжээ

Монгол Улсаас БНХАУ-д гурил экспортлоход хорио цээр, эрсдэлийн үнэлгээ, хяналт шалгалтын шаардлагыг хангаж 13 үйлдвэр урд хөрш рүү гурил экспортлох эрхтэй болжээ.

БНХАУ руу гурил экспортлох асуудал удаан хугацаанд яригдаж, 2020 онд БНХАУ-ын Гадаад харилцааны сайдын айлчлалын бүрэлдэхүүнд Чанар, хорио цээрийн яамны төлөөлөл нь багтаж ирээд “Улаанбуудай болон хөх тарианы гурилын хорио цээрийн протокол”-д гарын үсэг зурсан байдаг.

Энэ талаар ХХААХҮ-ийн сайд З.Мэндсайхан фэйсбүүк хуудастаа “Бид өнгөрсөн жилийн туршид тооцоо судалгаа хийж, хэд хэдэн удаагийн уулзалтыг БНХАУ-ын талтай амжилттай хийсний үр дүнд Монгол Улс хэрэгцээнээсээ илүү гарсан улаанбуудайг урд хөршдөө экспортлох боломж нээгдлээ.

Манай улсад жилд 943 мянган тонн буудай тээрэмдэх хүчин чадал бүхий 50 гаруй гурил үйлдвэрлэгч үйл ажиллагаа явуулдаг. Цар тахлын хүнд цаг үед БНХАУ-д дотоодын гурилын хэрэгцээнээс илүү гарсан улаанбуудайн гурилыг анх удаа экспортлох эхлэл тавигдсанаар хоёр улсын гадаад худалдааны эргэлтийг нэмэгдүүлэх, аж ахуйн нэгжүүд экспортлогч болж зах зээлээ тэлэх, орлогоо нэмэгдүүлэх зэрэг эдийн засагт олон эерэг нөлөө үзүүлнэ” хэмээн бичжээ.

Манай улсын улаанбуудайн дотоодын хэрэгцээ жилд дунджаар 280 мянган тонн байдаг бөгөөд энэ жилийн хувьд 60 мянган тонн илүү улаанбуудай хураан аваад байгаа аж. 60 мянган тонн улаанбуудайгаар 40-50 мянган тонн гурил үйлдвэрлэх боломжтой юм байна.

Гурилын үйлдвэрүүдийн хувьд дэлхийн стандартад нийцсэн сүүлийн үеийн тоног төхөөрөмжийг суурилуулсан бөгөөд жилдээ нэг сая орчим тонн улаанбуудай тээрэмдэх хүчин чадалтай. Тиймээс улаанбуудайн тариалалтаа нэмэгдүүлэн ирэх дөрвөн жилд гурилын экспортоос тодорхой хэмжээний орлого олно гэж тооцож байгааг ХХААХҮЯ-ны Бодлого, төлөвлөлтийн газрын дарга Ц.Болорчулуун хэлж байв.

Categories
мэдээ нийгэм

Зөвлөмж: 74 төрлийн үйлчилгээ эрхлэх бүртгэлийн хуудсыг хэрхэн авах вэ?

74 төрлийн үйлчилгээ эрхлэх бүртгэлийн хуудсыг нэгдүгээр сарын 1-нээс эхлэн цахимаар авахаар болсон.

Бизнес эрхлэгчид үйлчилгээ эрхлэх зөвшөөрөл авахдаа төрийн таван байгууллагад хандан 9-12 төрлийн бичиг баримт бүрдүүлж, 2-3 гэрээ хийж, дунджаар 14-30 хоногийг зарцуулдаг байсан тогтолцоог халсан юм.

Эдгээр үйлчилгээг эрхлэх бүртгэлийн хуудас авах зааварчилгаатай танилцана уу.

  1. Нийслэлийн мэдээ мэдээллийн нэгдсэн www.ulaanbaatar.mn портал сайтаар нэвтэрч, “Үйлчилгээ эрхлэх бүртгэл” цэсийг сонгон онлайн бизнес төвийн системд нэвтэрнэ.

ulaanbaatar.mn

2. “Үйлчилгээнүүд” гэсэн цэсийг сонгон цахимаар хүсэлт илгээх боломжтой үйлчилгээний жагсаалт гарч ирнэ. Үйлчилгээний төрлүүдээс өөрийн авах үйлчилгээг сонгон, үйлчилгээ авах цэсийг дарна.

ulaanbaatar.mn

3. Танилт нэвтрэлтийн “Дан системээр нэвтрэн” үйлчилгээг авна.

ulaanbaatar.mn

4. Үйлчилгээтэй холбоотой стандартын шаардлагатай танилцан “Зөвшөөрч байна” сонголтыг дарна.

ulaanbaatar.mn

5. Иргэн, хуулийн этгээдийн мэдээллийг оруулан “Үргэлжлүүлэх” талбарыг сонгоно.

ulaanbaatar.mn

6. Үйлчилгээний байршил, үл хөдлөх хөрөнгийн мэдээлэл оруулан “Үргэлжлүүлэх” талбарыг сонгоно.

ulaanbaatar.mn

Холбогдох баримт бичгийн мэдээллийг оруулж “Үргэлжлүүлэх” товчийг дарна. Мөн бүрдэл баримт бичгийг өмнө авч байсан эсэх мэдээллийг оруулснаар холбогдох байгууллагуудын албан хаагчид тантай ажлын үйлчилгээ эрхлэх явцад ажлын тав хоногийн дотор холбогдоно.

7. Онлайн бизнес төвийн үйлчилгээ эрхлэх бүртгэлийн системд хүсэлтийн мэдээллийг бүртгэж дуусаад “Илгээх” товчийг дарна.

ulaanbaatar.mn

Үйлчилгээ эрхлэх бүртгэлтэй холбоотой асууж тодруулах зүйлээ Нийслэлийн Төрийн үйлчилгээний нэгдсэн лавлах 1800-1200 утсанд холбогдон авах боломжтой.

Эх сурвалж: Нийслэлийн ЗДТГ-ын хэвлэл мэдээлэлтэй харилцах хэлтэс

Categories
мэдээ нийгэм

Гадаадын иргэн 1.2 тэрбум төгрөг дээрэмдүүлсэн гэх хэргийг шалгаж байна

Гадаадын иргэнийг дээрэмдсэн хэрэг өнөөдөр нийслэл хотод бүртгэгджээ.

Тодруулбал, Хан-Уул дүүргийн 11 дүгээр хорооны нутаг дэвсгэрт халдлагад өртөж, 1.23 тэрбум төгрөгөө дээрэмдүүллээ гэх мэдээллийг цагдаагийн байгууллагад гадаадын иргэнээс өгчээ.

Дуудлага мэдээллийн дагуу цагдаагийн алба хаагчид шалгалтын ажиллагааг эхлүүлээд байгаа бөгөөд тийм хэмжээний мөнгө байсан эсэхийг тодруулан ажиллаж байгаа аж.

Эх сурвалжийн мэдээллээр тухайн гадаад иргэн гэрээсээ гараад явж байсан гэх бөгөөд 4-5 иргэн бүлэглэн дээрэмдсэн гэж мэдүүлжээ. Бид энэ талаар эргэн мэдээлэх болно.

Categories
мэдээ цаг-үе

Цэргийн бүртгэл энэ сарын 5-наас эхэлнэ

Нийслэлийн хэмжээнд цэргийн бүртгэл нэгдүгээр сарын 5-наас эхлэх гэж буй талаар Чингэлтэй дүүргийн Онцгой комиссоос мэдээллээ. Бүртгэл энэ сарын 21-нийг хүртэл үргэлжилнэ.

Бүрдүүлэх баримт бичиг:

  1. Иргэний үнэмлэх
  2. Цэргийн үүрэгтний үнэмлэх
  3. Ажлын газрын үнэмлэх
  4. Цэргийн үүрэгтний үнэмлэхгүй бол 3х4 хэмжээтэй цээж зураг 2 ширхэг.

Иргэд өөрийн оршин суугаа хорооны Засаг даргын байранд очиж бүртгүүлнэ.

e-Mongolia гар утасны апп болон вэб хуудсаар, Нийслэлийн үйлчилгээний нэгдсэн төвд хандан бүртгүүлэх боломжтой байна.

Цэргийн бэлтгэл албанд бүртгэлтэй байх насны хязгаар:

  1. Дээд офицер /Генерал/-65 насны
  2. Ахлах офицер -60 насны
  3. Дунд офицер, ахлагч -55 нас
  4. Эмэгтэй офицер, ахлагч болон байлдагч, түрүүч /иргэн/ 50 нас.

Цэргийн бүртгэлд хамрагдаагүй иргэдийг Зөрчлийн тухай хуулийн 15.17 дугаар зүйлийн 3-т 100,000 төгрөгөөр торгох заалттай байна.

Categories
мэдээ нийгэм

Хохирогч болсон монгол охины цахим гомдлыг БНСУ-ын Ерөнхийлөгч хүлээн авчээ

БНСУ-д амьдарч, суралцдаг 13 настай монгол охин үе тэнгийнхэндээ дээрэлхүүлж, зодуулсан хэрэг олны анхаарлыг татаж, элэг нэгтнүүдийг багагүй эмзэглүүлсэн.

Тэгвэл олон нийтийн зүгээс тус улсын ерөнхийлөгчийг энэхүү хэрэгт анхаарлаа хандуулахыг шаардан албан ёсны вэб сайтаар дамжуулж цахим гарын үсэг цуглуулсан нь 232,868 хүрчээ. Хүсэлт гаргасан хүмүүсийн тоо 200 мянга давсан тохиолдолд гомдол ерөнхийлөгчид албан ёсоор хүрдэг байна. Өргөдлийг хүлээн авсан ч одоогоор ямар нэгэн хариу мэдэгдээгүй байгаа аж.

Хохирогч охины ээжийн хэлж буйгаар уг хэрэг дээр ажиллаж байгаа цагдаагийн байгууллага ч маш хойрго хандсан төдийгүй, гэмт этгээдүүдэд тооцох хариуцлага хөнгөдсөн шийдвэрийг прокурор гаргасан хэмээн үзэж байгаа юм.

Categories
мэдээ нийгэм цаг-үе

О.Батбаяр: Монгол Улсад омикрон хувилбар бүртгэгдээгүй

Эрүүл мэндийн яамнаас коронавирусийн Омикрон хувилбарын талаар мэдээлэл хүргэлээ.

Эрүүл мэндийн сайдын зөвлөх О.Батбаяр “2021 оны 11 сарын 27-ноос хойш Монгол улсын хилээр нийтдээ 95 олон улсын нислэг орж ирсэн байна. Энэ 95 нислэгээр 9723 зорчигч ирсэн. Тус зорчигчдоос одоогийн байдлаар эхний шинжилгээгээр 63, хоёр дахь шинжилгээгээр 75 зөөвөрлөгдсөн тохиолдол илэрсэн. Зөөвөрлөгдсөн тохиолдлууд дотор үе шаттайгаар генийн дараалал тогтоох шинжилгээг хийж байна. Одоогийн байдлаар энэ шинжилгээнүүдээр Омикрон хувилбар бүртгэгдээгүй байна. Олон улсын энхийг сахиулагчдын нислэг тусдаа байгаа. Нэг удаагийн нислэгээр 244 цэргийн алба хаагч ирсэн. Энэ цэргийн албан хаагчид Багабаянд тусгаарлагдсан. Тухайн цэргийн албан хаагчдаас авсан шинжилгээгээр омикрон хувилбар илрээгүй. Ойрын үед цэргийн алба хаагчдын эхний хэсэг гэртээ харихаар бэлтгэж байна. Хамгийн олон тохиолдол бүртгэгдсэн нислэг бол 2021 оны 12 сарын 24-нд Тайландаас ирсэн нислэг байна. Энэ нислэгээр эхний шинжилгээгээр 4, дараагийн шинжилгээгээр 10 хүнд халдвар илэрсэн. Мөн 27-нд ирсэн Туркын нислэгээс 10 хүнд халдвар илэрсэн байна. Эдгээр тохиолдоос мөн Омикрон илрээгүй” гэв.

Categories
мэдээ нийгэм

Улсын хэмжээнд албан тушаалтнуудын ХАСХОМ шинэчлэн бүртгүүлэх ажил эхэллээ

Авлигатай тэмцэх газрын Хяналт шалгалт, дүн шинжилгээний хэлтэс нь 2021 оны 12 дугаар сарын 27-31-ний өдрүүдэд нийтийн албанд томилогдохоор нэр дэвшсэн 156 иргэний хувийн ашиг сонирхлын урьдчилсан мэдүүлгийг шалган, 54 мэдүүлгийг хянан шийдвэрлэлээ. Одоогоор ажиллагаанд 102 нэр дэвшигчийн урьдчилсан мэдүүлэг хянагдаж байна.

Өнгөрсөн долоо хоногт иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 39 гомдол, мэдээллийг хүлээн авч шалгаснаас 8 гомдол, мэдээллийг хянан шийдвэрлэлээ.

Төлөвлөгөөт хяналт шалгалтын хүрээнд 43 албан тушаалтны хувийн ашиг сонирхлын болон хөрөнгө, орлогын мэдүүлгийг шалгаж, 7 мэдүүлгийг хянан шийдвэрлэжээ. Одоогоор 36 албан тушаалтны хөрөнгө, орлогын болон хувийн ашиг сонирхлын мэдүүлгийг шалгаж байна.

Улсын хэмжээнд нийтийн албан тушаалтнууд ХАСХОМ-ээ шинэчлэн бүртгүүлэх ажил 2022 оны 1 дүгээр сарын 1-ний өдрөөс эхэллээ. Энэ ажил 2020 оны 2 дугаар сарын 15-ны өдрийг дуустал үргэлжилнэ. Үүнтэй холбогдуулан Авлигатай тэмцэх газраас төрийн захиргааны төв болон нутгийн захиргааны байгууллага, түүний салбар нэгжийн эрх бүхий албан тушаалтан, мэдүүлэг гаргагч нараас ирүүлсэн тодруулга асуулт, хүсэлтийг тухай бүр шийдвэрлэн, арга зүйн зөвлөмжийг өгч ажиллаж байна.