Month: January 2022

Цаг уурын байгууллагын ирүүлсэн мэдээллээр арванхоёрдугаар сарын 31-ний байдлаар нийт нутгийн 50 гаруй хувьд цасан бүрхүүл тогтжээ.

Үүнээс Алтай, Хангай, Хэнтэй, Хөвсгөлийн өндөрлөг, Хан Хөхийн нуруу, Хархираа Түргэний уулсаар 20,1 см-ээс их, Увсын Малчинд 25 см, Баян-Өлгийн Сагсай, Увсын Хяргас, Зүүнговь, Баруунтуруун, Хөвсгөлийн Ренчинлхүмбэ, Сэлэнгийн Ерөөд 11-20 см цастай байна.

Баян-Өлгийн Булган, Увсын Улаангом, Сагил, Түргэн, Завханы Цагаанхайрхан, Тосонцэнгэл, Яруу, Баянтэс, Өвөрхангайн Хайрхандулаан, Хөвсгөлийн Чандмань-Өндөр, Цэцэрлэг, Улаан-Уул, Цагаан-Үүр, Цагааннуур, Сэлэнгийн Сүхбаатар, Түшиг, Зүүнбүрэн, Хүдэр, Дорнодын Халхголд 6-10 см, нутгийн зүүн хойд хэсэг, баруун болон говийн аймгуудын зарим нутгаар 1-5 см цастай, бусад нутгаар цасгүй байна.

Улаанбаатар хотын түгжрэлийг бууруулах зорилгоор тодорхой байршлын сургуулиудын хичээл эхлэх болон тарах цагийг өөрчлөх эсэх асуудлыг хэлэлцэж эхэлжээ.

Тодруулбал, Монгол Улсын Засгийн газрын 2021 оны арванхоёрдугаар сарын 8-ны өдрийн хуралдаанаар Их тойруугийн гудамжинд байршилтай ерөнхий боловсролын сургуулийн хичээл эхлэх, дуусах цагийн зохицуулалтыг эцэг, эх, асран хамгаалагч, харгалзан дэмжигчийн ажлын цагтай нягт уялдуулан уян хатан байхаар зохицуулах асуудлыг судалж, турших арга хэмжээ авахыг нийслэлийн Засаг дарга бөгөөд Улаанбаатар хотын захирагч Д.Сумьяабазарт даалгасан байна.

Энэ дагуу нийслэлийн Боловсролын газраас Захиргааны ерөнхий хуулийн 26 дугаар зүйлийн 26.1 дэх хэсэгт “Захиргааны акт, захиргааны гэрээг батлан гаргахын өмнө эрх, хууль ёсны ашиг сонирхол нь хөндөгдөж болзошгүй этгээдэд захиргааны шийдвэр гарахад ач холбогдол бүхий нөхцөл байдлын талаар тайлбар, санал гаргах боломж олгоно” гэж заасныг үндэслэн нийслэлийн ерөнхий боловсролын зарим сургуулийн хичээл эхлэх, дуусах цагт өөрчлөлт оруулах асуудлаар судалгааны дүнг танилцуулах, санал солилцох уулзалтыг зохион байгууллаа.

Уулзалтад Улаанбаатар хотын Их тойруугийн гудамжинд байршилтай түгжрэлд нөлөө бүхий төрийн өмчийн 27, төрийн бус өмчийн 36, нийт 63 ерөнхий боловсролын сургуулийн удирдлагууд оролцов.

Төрийн болон төрийн бус өмчийн ерөнхий боловсролын зарим сургуулийн хичээл эхлэх, дуусах хугацаа, төрийн болон төсөвт байгууллага, аж ахуйн нэгжийн ажлын цагт өөрчлөлт оруулах, багш нарыг нийтийн тээврээр хөнгөлөлттэй үйлчлүүлэх зэрэг асуудлаар санал боловсруулж, холбогдох газарт уламжлахаар бэлтгэл ханган ажиллаж байна гэж нийслэлийн Боловсролын газраас мэдээллээ.

Энэ сарын 2-нд буюу өчигдөр цагдаагийн байгууллагын 102 дугаарын утсанд нийт 1918 гомдол мэдээлэл бүртгэгджээ. Үүнээс зөрчлийн дуудлага мэдээлэл 1680, хулгайтай холбоотой 14, гэр бүлийн хүчирхийллийн дуудлага 209, гэмт хэргийн шинжтэй 64 мэдээлэл бүртгэгдсэн байна.

Үүнээс гадна автомашин согтуу жолоодсон 105, олон нийтийн газар зүй бусаар биеэ авч явж, танхайрсан 172, хүний биед халдсан 61, Архидан согтуурахтай тэмцэх тухай хууль зөрчсөн 122, эрүүлжүүлэх байранд хоносон 236, оршин суугчдын амгалан тайван байдал алдагдуулсан 87 тохиолдол гарчээ.

Нийтээр тэмдэглэх баярын болон тэмдэглэлт өдрүүдийн тухай хуулийн дагуу бид жилдээ есөн тэмдэглэлт баяраар нийт 15 өдөр бүх нийтээр амардаг. Тодруулбал,

Үндэсний их баяр наадам, Ардын хувьсгалын ойн баяраар-5,

Цагаан сараар-3,

Шинэ жилээр-1,

Олон улсын эмэгтэйчүүдийн өдрөөр-1,

Хүүхдийн баяраар-1,

Үндэсний эрх чөлөө, тусгаар тогтнолоо сэргээсний өдрөөр-1,

Их Эзэн Чингис хааны мэндэлсэн өдрөөр-1,

Бүгд найрамдах улс тунхагласан өдрөөр-1,

Бурхан багшийн Их дүйчин өдрөөр-1 өдөр амардаг билээ.

2022 онд бүх нийтээр амрах баярын болон тэмдэглэлт өдрүүдийг танилцуулж байна. Энэ онд нийтээр амрах тэмдэглэлт өдрүүдийн хоёрт нь бямба гараг таарч байна. Тодруулбал, Шинэ жилийн баяр, Улс тунхагласны баярын өдрүүдэд бямба гараг таарч байна.

1.Шинэ жилийн баяр-Нэгдүгээр сарын 1-нд /бямба гариг/

2.Цагаан сар-Хоёрдугаар сарын 2, 3, 4-нд /лхагва, пүрэв, баасан/

3.Олон улсын эмэгтэйчүүдийн өдөр-Гуравдугаар сарын 8 /мягмар гариг/

4. Бурхан багшийн Их дүйчин өдөр-Тавдугаар сарын 16 /мягмар гариг/

5.Хүүхдийн баяр-Зургадугаар сарын 1 /лхагва гариг/

6.Үндэсний их баяр наадам, Ардын хувьсгалын ойн баяр-Долоодугаар сарын 11-15 /даваа, мягмар, лхагва, пүрэв, баасан/

7.Их Эзэн Чингис хааны мэндэлсэн өдөр-Арваннэгдүгээр сарын 24 /пүрэв гариг/

8.Бүгд найрамдах улс тунхагласан өдөр-Арваннэгдүгээр сарын 26 /бямба гариг/

9.Үндэсний эрх чөлөө, тусгаар тогтнолоо сэргээсний өдөр-Арванхоёрдугаар сарын 29 /пүрэв гариг/