Month: January 2022

Соёлын яамнаас 16 хүртэлх насны хүүхэд музейн үзвэрийн танхимаар үнэ төлбөргүй үйлчлүүлдэг болсныг мэдээллээ. Мөн музейн тасалбараа онлайнаар авч, очих цагаа хэлснээр музейн тайлбарлагч, хөтчөө урьдчилан захиалах боломжтой юм.

Музейн тасалбараа онлайнаар захиалах холбоос: https://shoppy.mn/t/tickets

Монгол Улсын Ардчилсан шинэ Үндсэн хууль батлагдсаны 30 жилийн ойд зориулсан “Монгол Улсын Үндсэн хууль батлагдсаны 30 жилийн ой” сэдэвт шуудангийн маркийн анхны өдрийн нээлтийн ёслол өнөөдөр Төрийн ордонд болов. 1096 дахь сэдвийн шуудангийн үнэт цаас болж буй маркийн зураачаар “Монгол шуудан” компанийн Марк, үнэт цаасны хэлтсийн зураач Г.Баттөр, дизайнерээр Ж.Ганхуяг нар ажиллажээ.

“Монгол Улсын Үндсэн хууль батлагдсаны 30 жилийн ой” сэдэвт энэхүү блок марканд Монголын ард түмний оюун санааны хамтын бүтээл, нийгмийн зөвшилцлийн эрхэм дээд тунхаг болсон Ардчилсан шинэ Үндсэн хуулийн анхны хэвлэмэл эхийг залсан ба чимэглэл хэсэгт мөнх хөх тэнгэрийн дор Монгол Улс үүрд мандан бадрахын бэлгэдэл болсон төрийн далбааны өнгөн дээр “гал мэт мандан бадарч, наран, саран мэт гэрэлтэн мөнхжиж, зэв сум мэт хурц шулуун, хуяг мэт бат бэх байж, загас мэт сонор соргог, өнөр өтгөн явж, арга билиг хослон, төмөр хүрээ лугаа адил төр улсаа хамгаалъя” гэсэн гүн утгатай алтан соёмбо тэмдэг, түүний доор “Монгол Улсын Үндсэн хууль” хэмээсэн үгийг эвхмэл бичгээр бичсэн байна. Маркийн нээлтийн ёслолд Ардчилсан шинэ Үндсэн хууль батлалцсан Ардын Их Хурлын депутатууд, Улсын бага хурал болон Улсын Их Хурлын гишүүд болон марк судлаачид, маркийг хамтран бүтээлцсэн хүмүүсийн төлөөлөл оролцов.

УИХ-ын чуулганы үдээс хойших хуралдаан үргэлжилж байна. Үдээс хойших хуралдаанаар иргэдийн сурч боловсрох эрхийг хангах, хичээл, сурлагын хоцрогдлыг нөхөх, арилгах арга хэмжээний талаар Ерөнхий сайдын мэдээллийг Боловсрол, шинжлэх ухааны сайд Л.Энх-Амгалан танилцууллаа. Мэдээлэлтэй холбогдуулан гишүүд асуулт асуун хариулт авч байна.

УИХ-ын гишүүн Б.Пүрэвдорж “Хоёр настай хүүхдийг цэцэрлэгт хамруулах асуудлыг нухацтай хэлэлцэж хийх хэрэгтэй. Ингэснээр эцэг, эх нь ажил хийгээд орлогоо нэмэгдүүлэх боломж бүрдэнэ. Сайн багш нар хувийн сургуульд ажиллаад дараа нь тэтгэвэр авч чадахгүй боломж бүрддэг. Хувийн сургууль цэцэрлэгт 10 жил, улсын цэцэрлэгт 10 жил ажилласан бол 20 жилээр нь улсад ажилласан гэж тооцох шаардлага үүсэж байгаа” гэв.

Өнөөдөр /2022.01.07/ УИХ-ын чуулганы баасан гарагийн нэгдсэн хуралдаан эхэллээ. Хуралдааны эхэнд иргэдийн сурч боловсрох эрхийг хангах, хичээл, сурлагын хоцрогдлыг нөхөх, арилгах арга хэмжээний талаар БШУ-ны сайд Л.Энх-Амгалан мэдээлэл хийлээ.

Мэдээлэлтэй холбогдуулж УИХ-ын цөөнхийн бүлгийн гишүүд асуулт асууж, хариулт авч байна.

Энэ үеэр УИХ-ын гишүүн Б.Бейсений асуултад Л.Энх-Амгалан сайд хариулахдаа:

“180 мянган хүүхэд интернет, гар утас, цахилгаангүй байна. 40 мянга нь Улаанбаатар хотод байна. Засгийн газраас энэ чиглэлд анхаарч, Задгайгийн айлуудын асуудлыг шийдэж өгсөн. Бүх нийтийн үүргийн сангаас алслагдсан дүүрэгт амьдарч буй хүүхдүүдэд интернэт хүргэх асуудлыг ярьж байна. Сүлжээ муутай байгаа асуудлуудыг шийдмээр байна.

Дараа нь багш нарын компьютер асуудал. 140-160 орчим тэрбум төгрөгийн санхүүжилт хэрэгтэй. Багш нарыг компьютерээр хангахгүй юм бол өөр хоорондоо цахим хичээл гэж худлаа ярих хэрэг алга” гэлээ.

УИХ-ын чуулганы хуралдаан үргэлжилж байна.

Коронавируст халдварын эсрэг вакцины нэмэлт тунгаар дархлаажуулах тухай Эрүүл мэндийн сайдын А/01 дугаар тушаал өчигдөр гарсан. Уг тушаалаар Монгол Улсын болон гадаад улсын 18-аас дээш насны иргэнийг өнөөдрөөс эхлэн сайн дурын үндсэн дээр коронавируст халдварын эсрэг вакцины 4 дүгээр тунгаар дархлаажуулж эхэллээ.

Коронавируст халдварын эсрэг вакцины дархлаа сэргээх нэмэлт 3 дахь тунд хамрагдаад гурван сарын хугацаа өнгөрсөн 18-аас дээш насны иргэд вакцины 4 дүгээр тунд сайн дурын үндсэн дээр хамрагдах юм. Мөн нэмэлт 3 дахь тунд хамрагдаад өвдсөн иргэн эдгэснээс хойш 21 хоногийн хугацаа өнгөрсөн бол 4 дүгээр тунд хамрагдах боломжтой юм. Дээрх шалгуурт нийцсэн иргэд Файзер үйлдвэрийн “Комирнэти”, Синофарм үйлдвэрийн “CorV” вакцинаас сонголт хийх боломжтой.

Түүнчлэн энэ жил 12 нас хүрч буй 2010 онд төрсөн хүүхдүүд коронавируст халдварын эсрэг вакцины эхний тунд хамрагдаж эхлэх юм байна. Мөн энэ жил 18 нас хүрч байгаа иргэн дархлаажуулалтын нэмэлт 3 дахь тунд хамрагдаж болох аж.

2022 оны нэгдүгээр сарын 3-наас эхлэн есөн дүүргийн ЗДТГ-ын Хүнс, худалдаа, үйлчилгээний хэлтсээс иргэн, хуулийн этгээдэд үзүүлж буй есөн ангиллын 74 нэр төрлийн зөвшөөрөл болон зөвшөөрлийн шинжтэй эрх олгодог үйлчилгээнүүдийн бүрдэл бичиг баримт, шат дамжлагыг багасган “Онлайн бизнес төвийн Үйлчилгээ эрхлэх бүртгэлийн систем”-ийг хэрэглээнд нэвтрүүлсэн. Тэгвэл энэ сарын 6-ны байдлаар буюу дөрвөн хоногийн хугацаанд 6000 гаруй иргэн, аж ахуйн нэгж, байгууллага тус системд хандан, үйлчилгээтэй холбоотой мэдээлэл авчээ. Үүнээс 162 хүсэлт нь бүртгэгдсэн байна. Дээрх хугацаанд бүртгүүлсэн иргэн, аж ахуй нэгжүүдээс худалдааны чиглэлээр 91, хоол үйлдвэрлэлд 22 , ахуй үйлчилгээнд 15, авто үйлчилгээнд 14, зочлох үйлчилгээнд хоёр, соёл урлагт дөрөв, үйлдвэрлэлийн чиглэлээр долоо, тоглоомын чиглэлээр зургаан хүсэлт тус тус ирүүлжээ.

Мөн дуудлага, мэдээллийн 11-330844, 1800-1200 утсанд 65 орчим хэрэглэгч хандан зөвлөгөө, мэдээлэл авсан байна. Өмнө нь есөн дүүргийн хэмжээнд өдөрт 5-10 хүсэлт ирдэг байсан бол цахим хэлбэрт шилжсэнээр нэг дүүргийн хэмжээнд 6-9 хүсэлт ирж байгаа юм.