Month: January 2022

Сайжруулагч хэмээх Усан бар жилийн цагаан сарын шинийн нэгэнд зориулсан улс, аймгийн алдар цолтой 256 бөхийн барилдааныг хоёр өдөр зохион байгуулахаар болжээ.

Барилдаан нэгдүгээр сарын 29, 30-нд буюу битүүний урд өдөр болон битүүнд болно.

Түүний өмнө нэгдүгээр сарын 13-ны өдөр 12:00 цагаас Шинэ үндсэн хуулийн 30 жилийн ойд зориулсан Улс, аймгийн алдар цолтой 256 бөхийн уламжлалт барилдааныг мөн МҮБХ зохион байгуулах аж.

Барилдах бөхчүүдийг нэгдүгээр сарын 11, 12-ны өдрүүдэд 10-17 цагийн хооронд цахимаар бүртгэх ажээ.

Монгол Улсын Засгийн газар 2021 оны 7 дугаар сарын 16-ны өдрийн хуралдаанаараа нэгэн онцлог шийдвэр гаргасан нь авлига, хүнд суртлыг таслан зогсоож, авлигын индексийн үзүүлэлтийг сайжруулах зорилго бүхий Ажлын хэсэг байгуулсан явдал юм.

Ажлын хэсгийг Хууль зүй, дотоод хэргийн сайдаар ахлуулсан бөгөөд эрчимжүүлсэн арга хэмжээний төлөвлөгөө боловсруулан ажиллаж байна.

ХБНГУ-ын Берлин хотод төвтэй “Транспэрэнси Интернэшнл” олон улсын төрийн бус байгууллагаас жил бүр улс орнуудын төрийн албан дахь авлигын талаар шинжээч, бизнес эрхлэгчдийн судалгаанд үндэслэн “Авлигын төсөөллийн индекс”-ийг боловсруулдаг бөгөөд 2020 оны дүнг 2021 оны 1 дүгээр сарын 28-ны өдөр дэлхий нийтэд зарлажээ. Индексийн дүнгээр Монгол Улс 2020 онд 35 оноо авч 180 улс орноос 111 дүгээр байрт эрэмбэлэгдсэн байна. Энэ нь өмнөх оныхтой ижил оноотой боловч 5 байраар ухарсан үзүүлэлт болж байгаа аж.

Монгол Улс өмнөх оныхоос оноо буурсан үндсэн шалтгаан нь төрийн албан хаагчид эрх мэдэл, албан тушаалын байдлаа урвуулан ашигладаг байдал нэмэгдсэнээс хамаарсан байж болох судалгааны дүн гарчээ. Түүнчлэн бизнес эрхлэгчид үйл ажиллагаа эрхлэх болон гэрээ, хэлцэл байгуулахад авлигатай нүүр тулах эрсдэл нэмэгдсэн гэх шалтгаанаар манай улсын үнэлгээ буурсан байна.

Иймээс Авлигын төсөөллийн индексээр Монгол Улс 111-р байрт жагсаж байгааг хоёр жилийн хугацаанд хоёр оронтой тоонд оруулах зорилт тавьж, үүний хүрээнд Ажлын хэсгийг байгуулжээ. Шинээр байгуулсан ажлын хэсэг авлигын гэмт хэргийг бий болгож байгаа суурь хүчин зүйлс буюу хууль эрх зүйн орчныг сайжруулах, цахим шилжилтийг эрчимжүүлэх зэрэг ажлыг хийх юм.

Засгийн газрын ажлын хэсгийн анхны хуралдаан 2021 оны 7 дугаар сарын 19-ний өдөр болсон бөгөөд энэ үеэр Ерөнхий сайд Л.Оюун-Эрдэнэ “Засгийн газар авлигын эсрэг чадах бүх зүйлээ хийнэ. Авлигатай тэмцэх газар, хууль хяналтын байгууллагад дэмжлэг үзүүлж, хамтарч ажиллана. Хоёр жилийн хугацаанд авлигыг жигших нийгмийн шинэ соёлыг бий болгоно” гэж мэдэгдсэн юм. Шүгэл үлээгчдийн эрх зүйн байдлын тухай хууль, Улс төрийн намын санхүүжилтийн тухай хуультай болох шаардлагатай байгааг онцолжээ.

Манай улсад авлигын хэргийг шийддэг дагнасан шүүх тогтолцоог бүрдүүлэх шаардлага байгааг ч хэлсэн. Энэ чиглэлийн хууль эрх зүйн орчин дутмаг байгааг Ерөнхий сайд дурдаад “Төр тунгалаг байж чадвал хувийн хэвшлийнхэнтэй холбоотой авлигын асуудал үүсэхгүй” гэв.

Энэ үйл явдлыг хэвлэлүүд “Монгол Улс авлигыг жигших нийгмийн шинэ соёлтой болох гараанаас хөдөллөө” хэмээн онцлон мэдээлж байна.

Улсын дээд шүүхийн нийт шүүгчийн хуралдаан маргааш буюу нэгдүгээр сарын 11-ний өдөр товлогджээ.

Хуралдаанаар “Ардын чуулган” нам үүсгэн байгуулсныг бүртгүүлэх тухай хүсэлтийг хэлэлцэх юм байна.

Уг нам нь улсад бүртгүүлэх хүсэлтээ дахин гаргажээ.

Өнгөрсөн онд тус нам үүсгэн байгуулсныг бүртгүүлэх тухай хүсэлтийг хэлэлцээд Улс төрийн намын тухай хуульд заасан шаардлагыг хангаагүй тул бүртгэхээс татгалзаж байсан юм.

Багш нарын цалингийн асуудалтай холбоотой мэдээллийг салбарын сайд Л.Энх-Амгалан өглөө. Тэрбээр “Энэ оны улсын төсөвт багш нарын цалингийн гол эх үүсвэр болох нэг хүүхдэд ногдох хувьсах зардлыг бодох аргачилалд өөрчлөлт хийж, суурь цалинг нэмэгдүүлэх бодлогыг тусгасан. Үр дүнгийн урамшууллыг суурь цалингийн нэг хэсэг болгон өгнө. Багш нар энэ сараас эхлэн 1 сая төгрөгийн цалин авна. Түүнчлэн хичээлийн хэрэглэгдэхүүнд зарцуулах 200 мянган төгрөгийг нэмж авна” гэлээ.

“Бээжин-2022” Өвлийн олимпийн наадмын нээлтийн ажиллагааг цомхон хийнэ гэж нээлт болон хаалтын ажиллагааг зохион байгуулах ажлыг ахлаж буй Хятадын кино найруулагч Жан И Моу мэдэгдлээ.

“Бээжин-2008” зуны олимпын нээлт, хаалтын ажиллагааг удирдан ажилласанэ Жан И Моу хэвлэлд өгсөн ярилцлагадаа, энэ оны 2 дугаар сарын 4-ний өдөр Бээжин хотын “Шувууны үүр” цэнгэлдэхэд зохион байгуулагдах олимпын нээлтийн ажиллагааг 3000 орчим оролцогчтой, 100 минут хүрэхгүй хугацаатай зохион байгуулна гэж дурджээ.

Ингэснээр оролцогчдын тоо 2008 оны зуны олимпын оролцогчдын тавны нэг, нээлтийн ёслолын үргэлжлэх хугацаа 2008 оны нээлтийн хугацааны талаас бага байх юм.

Халдвараас сэргийлэх арга хэмжээ болон хүйтэн цаг агаар нь олимпын нээлтийн хугацааг цомхотгож, богиносгох шалтгаан болсон байна. Үүний зэрэгцээ олимп эхлэхэд нэг сар гаруй хугацаа үлдээд байхад Бээжин хоттой зэргэлдээх Тяньжин хот болон Хэнань мужид омикрон хувилбар илрээд байгаа юм.

Сүүлийн үед нийгмийн анхаарлын төвд орох болсон иргэний хөдөлгөөнүүд өнөөдөр /2022.01.10/ Засгийн газрын нээлттэй мэтгэлцээн зохион байгуулах шаардлагыг МҮОНРТ-д хүргүүлжээ.

Тодруулбал “No Double Standard”, “Тэвчээр тасарлаа” зэрэг хөдөлгөөнийхөн энэ өдөр МҮОНРТ-ийн төлөөлөлтэй уулзаж, эл шаардлагаа хүргүүлсэн байна. Тэд холбогдох гишүүнтэй нь Засгийн газрын үйл ажиллагааны талаар мэтгэлцээн зохион байгуулах хүсэлтэй байгаа аж.

Иргэн Д.Монголхүү, Э.Одбаяр нар тус иргэний хөдөлгөөнд идэвхийлэн оролцдогоор нь олон нийт мэднэ.

ЗХЖШ-ын даргын тушаалаар Зэвсэгт хүчний 084, 150, 350 дугаар ангид Анагаахын Шинжлэх Ухааны Үндэсний Их Сургуулийн зарим оюутантай “Оюутан цэрэг-Нэг өдөр” сэдэвт сургалт, сурталчилгааны ажлыг энэ сарын 10-ны өдөр зохион байгуулж байна.

АШУҮИС-ийн оюутнуудад цэрэг-эх оронч үзлийг төлөвшүүлэхэд дэмжлэг үзүүлэх, тэдэнд Зэвсэгт хүчний үйл ажиллагааг сурталчлах, иргэн-цэргийн харилцааг бэхжүүлэх зорилгоор зохион байгуулж буй эл ажлын ач холбогдол өндөр юм.

Өнгөрсөн жилийн намар Зэвсэгт хүчний Жанжин штаб болон Анагаахын Шинжлэх Ухааны Үндэсний Их Сургуулийн хооронд “Хамтран ажиллах санамж бичиг”-ийг үзэглэсэн бөгөөд энэхүү санамж бичгийн хүрээнд хэд хэдэн ажлыг хэрэгжүүлэхээр төлөвлөсний нэг нь энэхүү сургалт, сурталчилгааны ажил билээ.

Энэ өдрийн өглөө 06.30 цагт АШУҮИС-ийн бүрэлдэхүүн сургуулиудын багш, оюутнууд сургуулийнхаа орчим цугласан ба гурван маршрутаар хөдөлгөөн үйлдэн, өөрсдийн хуваарилагдсан Зэвсэгт хүчний ангийн байрлалд ирсэн юм.

Тухайлбал, АШУҮИС-ийн Эм зүйн болон Сувилагчийн сургуулийн оюутнууд багш Д.Байгалмаа, Ж.Сэргэлэнцэцэг нарын удирдлага дор Зэвсэгт хүчний 084 дүгээр ангийн байрлалд 07.45 цагт хүрэлцэн ирэв.

Тэднийг ангийн Шалган нэвтрүүлэх байраар халдвар хамгааллын дэглэмийг чанд сахиулсны үндсэн дээр зохих журмын дагуу нэвтрүүлсний дараа тус ангийн удирдлага хүлээн авч, энэ өдөр хэрэгжүүлэх үйл ажиллагааны талаар санал солилцсон юм.

Сургалт, сурталчилгааны ажлын эхэнд багш, оюутнууд тус ангийн бие бүрэлдэхүүний өглөөний нэгдэлтэд хамрагдан, Монгол Улсын Төрийн далбааг мандуулах, бие бүрэлдэхүүнийг жагсаах, долоо хоногийн ажлыг эхлүүлэх, үүрэг, зааварчилгаа өгөх, жагсаалын алхаагаар явах зэрэг нэгдсэн ажиллагаанд оролцов.

Үүний дараа Зэвсэгт хүчний 084 дүгээр ангийн захирагч хурандаа Д.Шинэбаяр ангийнхаа түүх, дайчин замнал, гүйцэтгэх үүрэг, зорилго, зорилтуудын талаар танилцуулгыг хийсний зэрэгцээ БХЯ-ны сайд агсан дэслэгч генерал Ш.Жадамбын нэрэмжит болон тус ангийн Дайчин алдрын танхимаар оруулан үйл ажиллагааныхаа талаар дэлгэрэнгүй мэдээлэл өглөө.

Мөн шүхэр, хими, зэвсгийн үзэсгэлэнг үзүүлэн, сургалтыг явуулсны дараа багш, оюутнуудтай жагсаалын болон биеийн тамирын бэлтгэл хичээлийг зохион байгуулсан бөгөөд цэрэгжлийн гимнастикийн 1 ба 2 дугаар 16 тоот дасгалыг зааж, энэ дасгалыг цаашид байнгын хэрэглээ болгохыг зөвлөв.

Тэд үдийн хоол идсэний дараа Гардан тулааны мөн Инженерийн болон бусад хичээлд хамрагдаж, тус ангиас зохион байгуулах буухиа тэмцээнд оролцон хурд, хүч, авхаалж самбаагаа сорихын зэрэгцээ соёл, урлагийн бусад ажлыг хамтран зохион байгуулна.

Уг сургалт, сурталчилгааны ажил дараа өдрийн бага үд хүртэл үргэлжлэх ба багш, оюутнууд тун идэвхтэй оролцож байна гэж Зэвсэгт хүчний Жанжин штабаас мэдээллээ

Монгол хүний удмын сангийн аюулгүй байдлыг хамгаалах, хүн амын өсөлтийг дэмжих талаар авах арга хэмжээний тухай тогтоолын төслийг өнгөрсөн долоо хоногт УИХ-аар хэлэлцэж, эцсийн найруулгад бэлтгүүлэхээр байнгын хороонд шилжүүлсэн.

Уг тогтоолын төсөлд зургаагаас дээш хүүхэдтэй айлын байрны урьдчилгааг төрөөс даах заалт орсон талаар сошиал орчинд мэдээлэл тарсан.

Гэхдээ уг тогтоолд зургаан хүүхэдтэй айлын байрны урьдчилгааг төрөөс даана гэсэн заалт ороогүй аж. Харин хүүхдийн тооноос хамаарч гэр бүлд дэмжлэг үзүүлэх гэдэг утгатай заалт оруулсан хэмээн төсөл санаачлагч, УИХ-ын гишүүн Ж.Чинбүрэн хэлж байна.

Уг тогтоолын төслийг Г.Тэмүүлэн, Ж.Бат-Эрдэнэ, Ж.Мөнхбат, Ж.Чинбүрэн нарын гишүүд өргөн барьсан бөгөөд долоон зүйл заалттай аж.